މައުލޫމާތު ހޯދައި ލިބިގަތުމުގެ ހައްގުގެ (އާރުޓީއައި) ގާނޫނުގެ ދަށުން އިންފޮމޭޝަން ކޮމިޝަނަރުގެ އޮފީހުން (އައިކޮމް) ނިންމާ އިޖުރާއީ ނިންމުންތައް ވަކިން ހައިކޯޓުގައި އިސްތިއުނާފު ނުކުރެވޭނެ ކަމަށް ހައި ކޯޓުން ހުކުމް ކޮށްފި އެވެ.
ހައި ކޯޓުން މިގޮތަށް ކަނޑައެޅީ ސްޓޭޓް އިލެކްޓްރިކް ކޮމްޕެނީ (ސްޓެލްކޯ) އިން އައިކޮމްއާ ދެކޮޅަށް ހުށަހެޅި މައްސަލައެއް ބެލުމަށް ފަހު އެވެ.
މި މައްސަލަ އުފެދުނީ ނޮވެމްބަރު 17، 2023 އިން ޖުލައި 3، 2024 އަށް ސްޓެލްކޯއަށް އައްޔަންކުރި އަދި ވަކިކުރި މުވައްޒަފުންގެ މައުލޫމާތު ހޯދަން އަމިއްލަ ފަރާތަކުން އެދުމުންނެވެ. މި މައުލޫމާތު ހޯދަން މަހޯލި ޕޯޓަލް މެދުވެރިކޮށް ޖުލައި 3، 2024 ގައި އެދުނީ ގ. މާގޮށި، މުހައްމަދު ޝަރުހާން އެވެ.
މި ހުށަހެޅުމާ ގުޅިގެން ސްޓެލްކޯއިން އީމެއިލް މެދުވެރިކޮށް ޖަވާބު ދިނީ ޖުލައި 28، 2024 ގަ އެވެ. އެ ޖަވާބުގައި ސްޓެލްކޯއިން ބުނީ މައުލޫމާތު ދޭން އިތުރު ވަގުތު ބޭނުންވާ ކަމަށެވެ. އަދި އޮގަސްޓު 11، 2024 ގެ ކުރިން މައުލޫމާތު ދޭނެ ކަމަށް ވެސް ބުންޏެވެ. މި މަރުހަލާގައި އާރުޓީއައި ހުށަހެޅުމާ މެދު އެއްވެސް މައްސަލައެއް ސްޓެލްކޯއިން ފާހަގައެއް ނުކުރެ އެވެ.
މި މުއްދަތުގައި މައުލޫމާތު ނުލިބުމުން، މައުލޫމާތަށް އެދުނު މީހާ އައިކޮމްއަށް ޝަކުވާ ހުށަހެޅި އެވެ.
ނަމަވެސް، މި ޝަކުވާއާ ގުޅިގެން އައިކޮމްއިން ބޭއްވި އަޑުއެހުމުގައި ސްޓެލްކޯއިން އިޖުރާއީ ނުކުތާއެއް ނެގި އެވެ. ސްޓެލްކޯއިން ބުނީ މައުލޫމާތަށް އެދުނު ނަމުގައި މީހަކު ދުނިޔޭގައި ނެތް ކަމަށެވެ. އަދި ޝަހްސު ކަށަވަރުނުވާ ފަރާތެއްގެ ހުށަހެޅުމެއް ބަލައިގަންނަން ނުޖެހޭނެ ކަމަށް ވެސް ބުންޏެވެ.
މިކަމާ ގުޅިގެން އައިކޮމްއިން ބެލިއިރު މައުލޫމާތަށް އެދުނު މީހާގެ ފުރިހަމަ ނަމަކީ "މުހައްމަދު ޝަރުހާން ވަހީދު" ކަން އެނގުނެވެ. އަދި ކުރިން ލިޔެވުނީ ނަމުގެ އެއްބައި ކަމަށް ބުނެ އެ ފަރާތުން އީމެއިލް ފޮނުވި އެވެ. އެހެންވެ މައްސަލަ ކުރިއަށް ގެންދިއުމަށް ހުރަހެއް ނެތް ކަމަށް އައިކޮމްއިން ނިންމި އެވެ.
އައިކޮމްގެ އެ ނިންމުމާ މެދު ހިތްހަމަނުޖެހިގެން ސްޓެލްކޯއިން މައްސަލަ ހައިކޯޓުގައި އިސްތިއުނާފު ކުރަމުން ސްޓެލްކޯއިން އެދުނީ އައިކޮމްގެ އިޖުރާއީ ނިންމުންތައް ވެސް ވަކިން އިސްތިއުނާފު ކުރެވޭނެ ކަމަށް ކަނޑައަޅައި ދިނުމަށެވެ. އަދި މައުލޫމާތަށް އެދޭ މީހުންގެ ޝަހްސު ކަށަވަރު ކުރުމަކީ އައިކޮމްގެ ޒިންމާއެއް ކަމަށް ކަނޑައެޅުމަށް ވެސް އެދުނެވެ.
މި މައްސަލައިގައި ހައިކޯޓުން ކުރި ހުކުމުގައި ބުނީ، މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ 64 ވަނަ މާއްދާގެ ދަށުން ހައިކޯޓަށް އިސްތިއުނާފު ކުރެވެނީ މައުލޫއީ މައްސަލަ އެއްކޮށް ނިންމާ ނިންމުންތައް އެކަނި ކަމަށެވެ.
މައްސަލަ ބަލަމުންދާ ވަގުތު ނިންމާ އިޖުރާއީ ނިންމުންތައް ވަކިވަކިން ހައިކޯޓަށް އިސްތިއުނާފު ކުރުމުގެ ފުރުސަތެއް ގާނޫނު ނުދޭ ކަމަށް ހައިކޯޓުން ބުންޏެވެ. އަދި އެފަދަ ކަންކަން ފާހަގަކުރަން ޖެހޭނީ އަސްލު މައްސަލަ ނިމުމުން ހުށަހަޅާ އިސްތިއުނާފެއްގައި ކަމަށް ވެސް ކަނޑައެޅި އެވެ.
މީގެ އިތުރުން މައުލޫމާތަށް އެދުނު ފަރާތުގެ އެޑްރެހާއި ފޯނު ނަންބަރާއި އީމެއިލް ހިމަނާފައިވާތީ، ގާނޫނާއި ގަވާއިދު ބުނާ މިންވަރަށް ޝަހްސު ކަށަވަރުވާ ކަމަށް ވެސް ކޯޓުން ނިންމި އެވެ. މިހެންކަމުން އައިކޮމްގެ އެ އިޖުރާއީ ނިންމުމަކީ ހައިކޯޓުގައި އިސްތިއުނާފު ކުރެވޭނެ ނިންމުމެއް ނޫން ކަމަށް މައްސަލަ ބެލި ތިން ފަނޑިޔާރުންގެ އިއްތިފާގުން ވަނީ ހުކުމް ކޮށްފަ އެވެ.
