ހޯމް މިނިސްޓަރު އަލީ އިހުސާންގެ ރަސްމީ އެކްސް އެކައުންޓުން ސޯޝަލް މީޑިއާ އެކްޓިވިސްޓް މިދުއަމް ސައުދު ބްލޮކް ކޮށްފައިވާ މައްސަލަ ތަހުގީގު ނުކުރަން ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) އިން ނިންމައިފި އެވެ.
އެޗްއާރްސީއެމް އިން މިދުއަމް އަށް ފޮނުވި ސިޓީއެއްގައި ބުނެފައި ވަނީ މިދުއަމް ހުށަހެޅި ޝަކުވާގައި ފާހަގަކޮށްފައިވާ މައްސަލަ އިންފޮމޭޝަން ކޮމިޝަނަރުގެ އޮފީހަށް ހުށަހެޅުމަށް ލަފާދީ ގާނޫނުގެ ދަށުން ވަކި މައްސަލައެއްގެ ގޮތުގައި ތަހުގީގު ނުކުރަން ނިންމާފައިވާ ކަމަށެވެ.
"މިދުއަމް ސައުދު މި ކޮމިޝަނަށް ހުށަހަޅާފައިވާ މައްސަލަ އިންފޮމޭޝަން ކޮމިޝަނަރުގެ އޮފީހަށް ހުށަހެޅުމަށް ލަފާދީ ހިއުމަން ރައިޓްސް ކޮމިޝަނުގެ ގާނޫނުގެ ދަށުން މިދުއަމް ސައުދު މި ކޮމިޝަނަށް ހުށަހަޅާފައިވާ ޝަކުވާ ވަކި މައްސަލައެއްގެ ގޮތުގައި ތަހުގީގު ނުކުރާކަމުގައި މައުލޫމާތަށްޓަކައި ދަންނަވަން،" އެ ސިޓީގައި ބުނެފައިވެ އެވެ.
އެކްސްގައި ކުރި ޕޯސްޓެއްގައި މިދުއަމް ބުނީ, ހޯމް މިނިސްޓަރުގެ އެކައުންޓުން އޭނާ ބްލޮކް ކުރި މައްސަލަ އެޗްއާރްސީއެމް އަށް ފުރަތަމަ ހުށަހެޅީ ވަކި ހާއްސަ މަގުސަދެއްގައި ކަމަށާއި އެއީ ގާނޫނުއަސާސީން ރައްޔިތުންނަށް ދީފައިވާ ހައްގުތަކަށް އުނިކަން އައިސްފައިވޭތޯ ބެލުމަށް ކަމަށެވެ.
"ހައްގުތަކަށް އަރައިގަންނަ ކަމަށް ބުނާ މައްސަލަތައް އެޗްއާރްސީއެމް އިން ނުބަލާނަމަ, ދެން އެ މައްސަލަތައް ބަލާނީ ކާކު،" އޭނާ ބުނެފައިވެ އެވެ.
އެއްވެސް ތަފާތު ކުރުމެއް ނެތި އަދި އޭނާ ފާޅު ކުރާ ހިޔާލަކަށް ބެލުމެއް ނެތި ހިދުމަތް ލިބިގަތުމަކީ ކޮންމެ ރައްޔިތަކަށް ވެސް ގާނޫނުއަސާސީ އިން ލިބިދީފައިވާ ހައްގެކެވެ. އެހެންވެ، ދައުލަތުގެ މަގާތުމަކުގައި ތިއްބަވާ ބޭފުޅުން އާންމުންނަށް ޖަވާބުދާރީވުމުގެ ބަދަލުގައި ސަރުކާރުގެ ރަސްމީ ޕްލެޓްފޯމުތަކުން ވަކި ރައްޔިތެއް އެކަހެރިކުރުމަކީ ބަލައިގަނެވޭނެ ކަމެއް ނޫން ކަމަށް މި މައްސަލަ އާއި ގުޅިގެން އެކި ފަރާތްތަކުން ދަނީ ބުނަމުންނެވެ.
