ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) ގެ މުވައްޒަފުން ތިން އަހަރު ތެރޭ ދެގުނަ އިތުރުވެ، މުސާރައަށް ކުރަންޖެހޭ ހޭދަ 45 މިލިއަނަށް އަރައިފި ކަމަށް އެ ކުންފުނިން ހާމަކުރި ތަފާސްހިސާބުތަކުން ދައްކައިފި އެވެ.
މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން އަދަދު ނޫހުން ހުށަހެޅި ހުށަހެޅުމަކާ ގުޅިގެން އެ ކުންފުނިން ހާމަކުރި ހިސާބުތަކަށް ބަލާއިރު، ރައީސް އިބްރާހިމް މުހައްމަދު ސޯލިހުގެ ވެރިކަމުގެ އެންމެ ފަހު މަސް ކަމުގައިވާ، ނޮވެމްބަރު 2023 ގައި އެ ކުންފުނީގައި ތިބީ 1741 މުވައްޒަފުންނެވެ. ނަމަވެސް މިހާރު އެ ކުންފުނީގެ މުވައްޒަފުންގެ އަދަދު ވަނީ 3946 އަށް އަރައިފަ އެވެ. މިއީ 2205 މުވައްޒަފުންގެ އިތުރުވުމެކެވެ.
އޮގަސްޓް، 2026، ނިޔަލަށް އެކުލަވާލާފައިވާ މި ރިޕޯޓުން ދައްކާ ގޮތުގައި، ދާއިމީ މުވައްޒަފުންގެ އަދަދު ނޮވެމްބަރު 2023 ގައި 230 ގައި ހުރިއިރު، އެ އަދަދު އޮގަސްޓު 2026 ގައި ވަނީ 1547 އަށް އިތުރުވެފައެވެ. މިއީ ގާތްގަނޑަކަށް ހަތް ގުނައިގެ އިތުރުވުމެކެވެ.
އެ މުއްދަތުގެ ތެރޭގައި ކޮންޓްރެކްޓް މުވައްޒަފުންގެ އަދަދު 1511 އިން 2399 އަކަށް އިތުރުވެފައިވާއިރު، މިއީ 25 ޕަސެންޓުގެ އިތުރުވުމެކެވެ.
ނޮވެމްބަރު 2023 ގައި މުވައްޒަފުންގެ ތެރެއިން ދާއިމީ މުވައްޒަފުންގެ ނިސްބަތަކީ 13 ޕަސެންޓު ކަމަށްވީ ނަމަވެސް، މިހާރު އެ ނިސްބަތް ވަނީ 39 ޕަސެންޓަށް އިތުރުކޮށްފަ އެވެ.
މުވައްޒަފުންގެ އަދަދާއެކު އެ ކުންފުނީގެ މުސާރައާއި އިނާޔަތްތަކަށް ކުރާ ހޭދަވެސް ވަނީ ބޮޑުތަނުން އިތުރުވެފަ އެވެ. މަހެއްގެ މައްޗަށް އަސާސީ މުސާރައިގެ ގޮތުގައި ކުރާ ހޭދަ 8 މިލިއަން ރުފިޔާއިން 19.8 މިލިއަން އަށް ވަނީ އިތުރުވެފައެވެ. މީގެއިތުރުން، މަހެއްގެ މައްޗަށް ދޭ އިނާޔަތްތައް 13.3 މިލިއަން ރުފިޔާއިން 25.9 މިލިއަނަށް ވަނީ އިތުރުވެފަ އެވެ.
ތަފާސްހިސާބުތަކުން ދައްކާ ގޮތުގައިބއާރުޑީސީގެ މުވައްޒަފުންގެ އަދަދު އެންމެ ބޮޑަށް އިތުރުވެފައިވަނީ ފާއިތުވި އެއް އަހަރު ދުވަހުގެ ތެރޭގައެވެ. އެގޮތުން ޖެނުއަރީ 2025 ގައި 183 މުވައްޒަފުން ތިބިއިރު، މި އަހަރުގެ ޖެނުއަރީއާ ހަމައަށް އެ އަދަދު ވަނީ 2902 އަށް އިތުރުވެފަ އެވެ.
މުވައްޒަފުން އިތުރުކުރީ މިއަހަރު ބޭއްވި ލޯކަލް ކައުންސިލް އިންތިހާބާ ދިމާކޮށްފަ އެވެ.
