ފާއިތުވި ތިން އަހަރުތެރޭގައި ދިވެހި ސިވިލް ސާވިސްގެ މުވައްޒަފުންގެ އަދަދު 16 ޕަސެންޓު އިތުރުވެ، މުސާރައަށް ކުރާ ހޭދަ 44 ޕަސެންޓު އިތުރުވެފައިވާކަން ސިވިލް ސާވިސް ކޮމިޝަނުގެ ތަފާސްހިސާބުތަކުން ހާމަވެއްޖެ އެވެ.
މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން އަދަދު ނޫހުން ހޯދި މައުލޫމާތުން ދައްކާ ގޮތުގައި 2023 ނޮވެމްބަރުގެ ނިޔަލަށް ސިވިލް ސާވިސްގައި ތިބީ ޖުމުލަ 29،386 މުވައްޒަފުންނެވެ. އެއީ ދާއިމީ 28،717 މުވައްޒަފުންނާއި ވަގުތީ 721 މުވައްޒަފުންނެވެ.
ނަމަވެސް މި އަހަރުގެ ސެޕްޓެމްބަރުގެ ނިޔަލަށް ދާއިމީ 32،656 މުވައްޒަފުންނާއި ވަގުތީ 1456 މުވައްޒަފުނާއެކު ސިވިލް ސާވިސްގައި ތިބި ޖުމުލަ މުވައްޒަފުންގެ އަދަދު 34،112 އަށް ވަނީ އަރައިފަ އެވެ. މިއީ 4،726 މުވައްޒަފުންގެ އިތުރުވުމެކެވެ.
މި މުއްދަތުގެ ތެރޭގައި ސިވިލް ސާވިސް މުވައްޒަފުންގެ މުސާރައިގެ ހޭދަ 354.5 މިލިއަން ރުފިޔާއިން 511.2 މިލިއަން ރުފިޔާއަށް އިތުރުވެފައިވެ އެވެ. މިއީ މަހެއްގެ މައްޗަށް 156.7 މިލިއަން ރުފިޔާގެ އިތުރުވުމެކެވެ. މުސާރައިގެ ހޭދަ އިތުރުވި މައިގަނޑު އެއް ސަބަބަކީ ޕޭ ކޮމިޝަނުން މުސާރައިގެ އޮނިގަނޑަށް ގެނައި ބަދަލެވެ.
| އަހަރު | މުވައްޒަފުން | މުސާރަ (މިލިއަނުން) |
|---|---|---|
| 2023 ނޮވެމްބަރު | 29،386 | 354.5 |
| 2023 ޑިސެމްބަރު | 29،446 | 355.0 |
| 2024 ޑިސެމްބަރު | 31،177 | 380.7 |
| 2025 ޑިސެމްބަރު | 33،252 | 489.1 |
| 2026 ސެޕްޓެމްބަރު | 34،112 | 511.2 |
ސިވިލް ސާވިސް ކޮމިޝަންގެ މުވައްޒަފުންގެ އަދަދު ވެސް ފާއިތުވި ތިން އަހަރު ތެރޭގައި 100 އަށް ވުރެ އިތުރުވިއިރު، މުސާރައިގެ ހޭދަ 20 މިލިއަން ރުފިޔާއިން، 37.5 މިލިއަން ރުފިޔާ އަށް އަރައިފައިވެ އެވެ.
ނޮވެމްބަރު 2023 ގައި އެ ކޮމިޝަންގައި 2441 މުވައްޒަފުން ތިބިއިރު، މި އަހަރުގެ ސެޕްޓެމްބަރު މަހުގެ ނިޔަލަށް ތިބީ 2558 މުވައްޒަފުންނެވެ. ސިވިލް ސާވިސް އާއި ސިވިލް ސާވިސް ކޮމިޝަންގެ މުވައްޒަފުންނާއި މުސާރައިގެ ހޭދަ އިތުރުވިއިރު، ސަރުކާރުގެ އޮފީސްތަކުގެ ހިދުމަތްތަކާމެދު ޝަކުވާތައް ގިނަ އެވެ.
