އުރުދުންގެ ނަސާރާ ދީނުގެ ފައްޅިއެއްގައި ބޭއްވި ޖަނާޒާއެއްގެ ތެރެއަށް ބަޑީގެ ހަމަލާތަކެއްދީ ހަތް މީހަކު މަރާލައި، 40 މީހަކު ޒަހަމްކޮށްލައިފި އެވެ.
މި ހަމަލާ ދީފައިވަނީ އުރުދުންގެ ވެރިރަށް އައްމާނާ ގާތްގަނޑަކަށް 90 ކިލޯމީޓަރު ދުރުގައި އޮންނަ ކަރަކްގައި ހުންނަ ގްރީކް އޮތޮޑޮކްސް ފައްޅިއެއްގަ އެވެ.
އުރުދުންގެ ދައުލަތުގެ ޓީވީން ދެއްކި މަންޒަރުތަކުން ފެންނަ ގޮތުގައި، ފިސްތޯލަ ހިފައިގެން ތިބި ދެ މީހަކު ފައްޅިއާ ދިމާލަށް ގޮސް ބަޑިޖަހަން ފަށަ އެވެ. އޭގެ ފަހުން ސެމީ އޮޓޮމެޓިކް ރައިފަލެއް ހިފައިގެން ހުރި ތިންވަނަ މީހަކު އައިސް ބަޑިޖަހަން ފެށުމަށް ފަހު، އެ ތިން މީހުން ފައްޅިއާ ދިމާލަށް ދުއްވައިގަންނަ މަންޒަރު ފެނެ އެވެ.
މަންޒަރު ދުށް މީހުން ނަގާފައިވާ ވީޑިއޯތަކުން ފެންނަ ގޮތުގައި، ފައްޅީގެ ތަޅުންގަނޑުމަތީގައި ބިއްލޫރިތައް ތަޅައިގެން ގޮސްފައި ހުރިއިރު، ގިނަ އަދަދަކަށް ލޭ އޮހޮރިފައި ހުއްޓެވެ.
ސަރުކާރުން ނެރުނު ބަޔާނެއްގައި ބުނެފައިވަނީ މި ހަމަލާ ދިނީ ކޮން ބަޔެއްކަން ނޭނގޭ ކަމަށެވެ. އަދި ހަމަލާދިން މީހުންގެ ތެރެއިން އެއްވެސް މީހަކު ހައްޔަރުކުރެވުނު ކަމެއް ނުވަތަ މަރާލެވުނު ކަމެއް ބަޔާނުގައި ބުނެފައެއް ނުވެ އެވެ. ސަރުކާރުން ބުނީ މި މައްސަލައިގެ ތަހުގީގު ވަރަށް ބާރުމިނުގައި ކުރިއަށްދާ ކަމަށެވެ.
އުރުދުންގެ ރަސްމީ ޕެޓްރާ ނިއުސް އެޖެންސީން ރިޕޯޓްކޮށްފައިވާ ގޮތުގައި، މި ހާދިސާއާ ގުޅިގެން އެ ގައުމުގައި ތިން ދުވަހުގެ ގައުމީ ހިތާމަ ވަނީ އިއުލާންކޮށްފަ އެވެ.
ކަރަކް އަކީ އުރުދުންގެ މަދު އަދަދެއްގެ ކްރިސްޓިއަނުން ދިރިއުޅޭ ސަރަހައްދެކެވެ.
މީގެ ކުރިން 2016 ވަނަ އަހަރު ވެސް ކަރަކްގައި ހުންނަ ފަތުރުވެރިންގެ މެދުގައި މަގުބޫލު ކްރޫސޭޑާ ކާސަލް ހިމެނޭހެން ދިން ސިލްސިލާ ހަމަލާތަކެއްގައި ހަތް ފުލުހުން ހިމެނޭހެން 10 މީހުން މަރާލައި ގިނަ ބަޔަކު ޒަހަމްކޮށްލާފައިވެ އެވެ. އެ ފަހަރު ހަމަލާދިން މީހުން މަރާލާފައިވަނީ އުރުދުންގެ ސަލާމަތީ ބާރުތަކުން ކުރިއަށް ގެންދިޔަ ވަރުގަދަ އޮޕަރޭޝަނަކަށް ފަހުގަ އެވެ.
އުރުދުންގެ ހެލްތު މިނިސްޓަރު އިބްރާހީމް އަލް ބުދޫރު ވިދާޅުވި ގޮތުގައި، މި ހަމަލާގައި ޒަހަމްވި މީހުންގެ ތެރެއިން ދެ މީހެއްގެ ހާލު ވަރަށް ސީރިއަސް އެވެ.
ރަސްގެފާނު އަބްދުﷲ ދެވަނަ އެކްސްގައި ކުރެއްވި ޕޯސްޓެއްގައި ވިދާޅުވީ، ކަރަކްއަށް އަމާޒުކޮށް ދިން މި ޓެރަރިސްޓް ހަމަލާއާ ދެކޮޅަށް އުރުދުންއިން އެންމެ ހަރުކަށި ފިޔަވަޅު އަޅާނެ ކަމަށެވެ. އަދި މި ހަމަލާގައި މަރުވި މީހުންގެ އާއިލާތަކަށް ތައުޒިޔާ ފޮނުއްވައި، ޒަހަމްވި މީހުންނަށް އަވަސް ޝިފާއަކަށް އެދިވަޑައިގަންނަވާ ކަމަށް ވެސް ރަސްގެފާނު ވިދާޅުވި އެވެ.
