އެމެރިކާއިން އީރާނުގެ ތެޔޮ އުފުލާ ފަސް ބޯޓެއް ފައްތާލުމާ ގުޅިގެން، ބަދަލުހިފުމުގެ ގޮތުން ހޯރްމުޒް ކަނޑުއޮޅި ކައިރިން 10 އުޅަނދަކަށް ހަމަލާދީފައިވާ ކަމަށް އީރާނުން ބުދަ ދުވަހު ބުނެފި އެވެ.
މިއީ މީގެ ހަ މަސް ކުރިން ފެށުނު ހަނގުރާމައިގައި، ދެ ފަރާތުން ކަނޑުދަތުރުފަތުރަށް އަމާޒުކޮށް މިހާތަނަށް ދިން އެންމެ ވަރުގަދަ ހަމަލާތަކެވެ.
މި ހަމަލާތަކާ ގުޅިގެން ތެލުގެ އަގު ވަނީ ވަރަށް ބޮޑަށް އުފުލިފަ އެވެ. އެގޮތުން ބައިނަލްއަގުވާމީ މާކެޓުގައި ބްރެންޓް ކްރޫޑް ފީފާއެއްގެ އަގު މިދިޔަ ޖުލައި މަހަށްފަހު ފުރަތަމަ ފަހަރަށް 100 ޑޮލަރަށް ވުރެ މައްޗަށް ވަނީ އަރާފަ އެވެ.
މި ހަމަލާތަކުގައި ތެޔޮ ބޯޓެއްގައި މަސައްކަތްކުރާ ފަޅުވެރިއަކު މަރުވެފައިވާ ކަމަށް ރިޕޯޓުކޮށްފައިވާއިރު، އިތުރު މީހަކު ވަނީ ގެއްލިފަ އެވެ.
އީރާނުން ބުނި ގޮތުގައި އުރުދުންގައި އެމެރިކާ ސިފައިން ބޭނުންކުރާ އަސްކަރީ މަރުކަޒަކަށް ވެސް އެ ގައުމުން ވަނީ ބެލިސްޓިކް މިސައިލް ހަމަލާތަކެއް ދީފަ އެވެ.
އޮގަސްޓް މަހުގެ ފަހުކޮޅުން ފެށިގެން ދެ ފަރާތުން ދެމުންދާ މި ހަމަލާތަކުގެ ސަބަބުން، މަހެއްހާ ދުވަހު ސަރަހައްދަށް އައިސްފައި އޮތް ހަމަހިމޭންކަން ވަނީ ގެއްލިފަ އެވެ.
އެމެރިކާ އާއި އީރާނުން ވެސް ދަނީ އަސްކަރީ މަރުކަޒުތަކަށާއި، މުދާ އުފުލާ ބޯޓުފަހަރުގެ އިތުރުން ހަކަތަ އުފައްދާ ވަސީލަތްތަކަށް އަމާޒުކޮށް ހަމަލާދެމުންނެވެ.
އީރާނުގެ ރިވޮލިއުޝަނަރީ ގާޑްސްއިން ބުނީ، ކުރިއަށް އޮތް ތަނުގައި ދޭ ކޮންމެ ހަމަލާއަކަށް ދޭ ރައްދު މިހާރަށް ވުރެ ވަރުގަދަ ކުރާނެ ކަމަށެވެ. އަދި ދުޝްމަނުން އީރާނުގެ ދެތިން އަމާޒަކަށް ހަމަލާދީފި ނަމަ، އޭގެ ބަދަލުގައި 20 އަމާޒަކަށް ހަމަލާދޭނެ ކަމުގެ އިންޒާރު ވެސް އެ ފައުޖުން ވަނީ ދީފަ އެވެ.
މީގެ އިތުރުން، ޕާކިސްތާނު ބޯޑަރު ކައިރީގައި އޮންނަ ޗާބަހާރުގެ އައްސޭރިފަށުން ފެށިގެން އަރަބި ކަނޑުގެ ބޮޑު ސަރަހައްދަކީ މަނާ ސަރަހައްދެއްގެ ގޮތުގައި ކަނޑައަޅައި، އެ ސަރަހައްދުގެ ޗާޓުތައް ވަރަށް އަވަހަށް އާންމުކުރާނެ ކަމަށް ވެސް ރިވޮލިއުޝަނަރީ ގާޑްސްއިން ބުންޏެވެ.
