އެމެރިކާގައި ބަޑީގެ ހަމަލާއެއްގައި މަރުވި މީހެއްގެ އާއިލާއިން ކޯޓުގައި ދެއްކި އޭއައި ވީޑިއޯގެ ސަބަބުން، ގާތިލަށް އިއްވާފައިވާ ހުކުމް ބާތިލްކޮށް އަލުން ހުކުމް ކަނޑައެޅުމަށް އެރިޒޯނާގެ އިސްތިއުނާފީ ކޯޓުން އަމުރުކޮށްފި އެވެ.
މި މައްސަލައިގައި ކުށް ސާބިތުވެފައިވަނީ އުމުރުން 55 އަހަރުގެ ގެބްރިއަލް ޕޯލް ހޯކަސިޓާސްގެ މައްޗަށެވެ. އޭނާގެ މައްޗަށް ދައުވާ އުފުލާފައިވަނީ 2021 ވަނަ އަހަރު ޓްރެފިކް ލައިޓެއް ކައިރީގައި ހިނގި ކުރިމަތިލުމެއްގައި، އުމުރުން 37 އަހަރުގެ ކްރިސްޓޮފާ ޕެލްކީގެ ގަޔަށް ބަޑިޖަހައި މަރާލި މައްސަލައިގަ އެވެ.
މި މައްސަލައިގައި ހޯކަސިޓާސް 10 އަހަރަށް ޖަލަށް ހުކުމް އިއްވި އެވެ. ނަމަވެސް، އިސްތިއުނާފީ މަރުހަލާގައި ހޯކަސިޓާސްގެ ވަކީލުން ފާހަގަކުރި ގޮތުގައި، މިދިޔަ އަހަރު އޭނާއަށް އަދަބު ކަނޑައެޅުމުގެ ކުރިން، މަރުވި ޕެލްކީގެ އާއިލާއިން އޭއައި ބޭނުންކޮށްގެން ތައްޔާރުކޮށްފައިވާ ވީޑިއޯއެއް ކޯޓުގައި ދެއްކުމަށް ފަނޑިޔާރު ހުއްދަ ދެއްވުމަކީ ގާނޫނީ ގޮތުން ކުރެވިގެންވާނެ ކަމެއް ނޫނެވެ.
އެ ވީޑިއޯއަކީ މަރުވި މީހާގެ ފަރާތުން ވާހަކަދައްކާ ގޮތަށް އުފައްދާފައިވާ ވީޑިއޯއެކެވެ.
އެރިޒޯނާގެ ކޯޓް އޮފް އެޕީލްސްއިން ބުދަ ދުވަހު ވަނީ ދަށު ކޯޓުގެ ނިންމުމަށް ފާޑުކިޔައި، ހޯކަސިޓާސްގެ ދިފާއީ ވަކީލުންގެ ހުއްޖަތްތަކަށް ތާއީދުކޮށްފަ އެވެ.
އިސްތިއުނާފީ ކޯޓުން ކަނޑައެޅި ގޮތުގައި، އެ އޭއައި ވީޑިއޯއަކީ "ހުދޫދުން ބޭރުވެފައިވާ" އެއްޗެކެވެ. އެހެންކަމުން، އެ ވީޑިއޯއަށް ރިއާޔަތްކޮށް އިއްވާފައިވާ އަދަބު ބާތިލުކޮށް، އޭނާއަށް އަލުން އަދަބު ކަނޑައަޅަން ޖެހޭނެ ކަމަށް ކޯޓުން ވަނީ އަމުރުކޮށްފަ އެވެ.
އިސްތިއުނާފީ ކޯޓުގެ ފަނޑިޔާރުން ފާހަގަކުރެއްވި ގޮތުގައި، ކޯޓުގައި ދެއްކި އޭއައި ވީޑިއޯއަކީ ހަގީގަތުގައި ހިނގާފައިވާ ހާދިސާއެއް ނުވަތަ ކުރިން ރެކޯޑުކުރެވިފައިވާ ވަގުތެއް ދައްކުވައިދޭ އެއްޗެއް ނޫނެވެ.
އެއީ މަރުވި މީހާގެ އަންހެން ކޮއްކޮގެ އަމިއްލަ ހިޔާލަށް އައި ގޮތަށް، މަރުވި މީހާގެ ސިފައާއި އޭނާގެ ވިސްނުން ހުރެދާނެ ގޮތް ދައްކުވައިދޭން އުފައްދާފައިވާ ހިޔާލީ އުފެއްދުމެކެވެ. މިއީ އަދުލު އިންސާފުގެ ނިޒާމުގެ ތެރޭގައި ހެކީގެ ގޮތުގައި ބޭނުންކުރެވޭނެ އެއްޗެއް ނޫން ކަމަށް ކޯޓުން ބުންޏެވެ.
ޕެލްކީގެ އަންހެން ކޮއްކޮ ސްޓޭސީ ވޭލްސް މީގެ ކުރިން ބީބީސީއަށް ދިން އިންޓަވިއުއެއްގައި ބުނެފައިވަނީ، އެ އޭއައި ވީޑިއޯ ތައްޔާރުކުރުމަށްޓަކައި އޭނާގެ ބޭބެގެ އަޑު ރެކޯޑިންތަކާއި، ވީޑިއޯ އަދި ފޮޓޯތައް ބޭނުންކޮށްފައިވާނެ ކަމަށެވެ. އޭނާ ބޭނުންވީ ބޭބެގެ އަޑުން އޭނާގެ އިހުސާސްތައް ކޯޓަށް އިއްވުމަށެވެ.
މި މައްސަލައިގެ އަދަބު ކަނޑައެޅުމުގެ މަރުހަލާގައި، ދަށު ކޯޓުގެ ފަނޑިޔާރު ޓޮޑް ލޭންގް ވަނީ އޭއައި ބޭނުންކުރުމަށް ތާއީދުކުރައްވައި، އެއީ އާއިލާއަށް ލިބިފައިވާ ހިތާމަ ބަޔާންކޮށްދިނުމަށް ބޭނުންކުރެވިދާނެ ވަސީލަތެއް ކަމަށް ވިދާޅުވެފަ އެވެ.
