ލަންޑަން (އޮކްޓޫބަރު 20) - އިނގިރޭސި ޕްރިމިއާ ލީގުގައި ރޭ ކަވެންޓްރީ ސިޓީ އަތުން 3-1 އިން ކުރިހޯދައި، ޓޮޓެންހަމް ހޮޓްސްޕާސް އިން މި ފަހަރުގެ ލީގު ސީޒަނުގައި ފުރަތަމަ މޮޅު ހޯދައިފި އެވެ.
ރޭގެ މެޗާ ކުރިމަތިލިއިރު، 20 ޓީމު ވާދަކުރާ އިނގިރޭސި ޕްރިމިއާ ލީގުގައި ޓޮޓެންހަމް އޮތީ 20 ވަނައިގަ އެވެ. އެކަމަކު، މި މޮޅާ އެކު، ޓޮޓެންހަމް އިން ވަނީ ހަތް މެޗުން ހަ ޕޮއިންޓް ހޯދައި، ލީގުގެ 16 ވަނަ އަށް ޖެހިލައިފަ އެވެ.
ލީގުގެ ފުރަތަމަ ހަ މެޗުން މޮޅެއް ނުލިބި ޓޮޓެންހަމް އަށް ކުރިމަތިވެފައި އޮތީ ބޮޑު މާޔޫސްކަމެކެވެ. އެކަމުން އަަރައިގަންނަން ރޭގެ މެޗުގައި ނަތީޖާ ނެރުން އެ ޓީމަށް އޮތީ ހުރިހާ ގޮތަކުން ވެސް މުހިންމުވެފަ އެވެ. އަށާރަ މަސް ދުވަސް ތެރޭ ފުރަތަމަ ފަހަރަށް، ޖޭމްސް މެޑިސަން، ޓޮޓެންހަމްގެ ފުރަތަމަ އެގާރައިގައި ހިމެނިގެން މި މެޗުގައި ރަނގަޅު ކުޅުމެއް ދެއްކި އެވެ.
ރޭގެ މެޗުގައި ޓޮޓެންހަމްގެ ފުރަތަމަ ލަނޑު ޖެހީ ވެސް މެޑިސަން އެވެ. މިއީ، މުހައްމަދު ކުޑޫސް ތަނަވަސްކޮށްދިން ފުރުސަތެއްގައި މެޑިސަން ޖެހި ގޯލެކެވެ. މި ލަނޑާ އެކު ޓޮޓެންހަމް އިން ނެގި ލީޑުގައި އޮވެ ފުރަތަމަ ހާފު ނިންމާލި އެވެ. އެކަމަކު، ދެ ވަަނަ ހާފު ފެށުނުތަނާހެން ކަވެންޓްރީން ލަނޑު ޖަހައި ނަތީޖާ ހަމަހަމަކުރި އެވެ. މި ލަނޑު ޖެހީ، މެޗުގެ 49 ވަނަ މިނިޓްގައި ޖެކް ރުޑޯނީ އެވެ.
މެޗުގައި ދެ ވަނަ ފަހަރަށް ޓޮޓެންހަމް އިން ލީޑުނެގީ 58 ވަނަ މިނިޓްގަ އެވެ. މި ލަނޑު ޖެހީ އެންޑީ ރޮބަޓްސަން ދިން ބޯޅައަކުން އޮމަރު މާމޫޝް އެވެ. އޭނާ އަށް ލިބުނު ފުރުސަތުގައި ހަމަޖެހިލައިފައި ގޯލަށް ބޯޅަ ވައްދާލި އެވެ. އެއް ގޯލުގެ ލީޑުގައި އޮވެ، ޓޮޓެންހަމް އިން ރަނގަޅަށް ޑިފެންސްކުރުމުގެ ނަތީޖާ އަކަށްވީ މެޗުގެ އިތުރު ވަގުތުގައި ލީޑުފުޅާކުރަން ފުރުސަތެއް ލިބުމެވެ. އެ ފުރުސަތުގެ ބޭނުން، ޓޮޓެންހަމް އިން ރަނގަޅަށް ހިފި އެވެ. ޓޮޓެންހަމް އަށް މެޗުގެ ތިން ޕޮއިންޓް ޔަގީންކޮށްދިން ލަނޑު ޖެހީ ބެން ޑޭވިސް އެވެ. މިއީ، ޑޮމިނިކް ސޮލާންކޭ ދިން ބޯޅައަކުން ޑޭވިސް ޖެހި ލަނޑެކެވެ.
މިއީ، ޕްރިމިއާ ލީގުގައި އެންމެ ފަހުން ޓޮޓެންހަމް އިން އަމިއްލަ ދަނޑުގައި ކުޅުނު 37 މެޗުގެ ތެރެއިން މޮޅުވި ހަތް ވަނަ މެޗެވެ.
ރޭގެ މެޗަށް ފަހު، ޓޮޓެންހަމްގެ ކޯޗު ރޮބާޓޯ ޑި ޒާބީ ބުނީ، މި ސީޒަނުގައި ޓޮޓެންހަމް އަށް ދިމާވަމުން އަންނަ ކޮންފިޑެންސްގެ މައްސަލަައަށް ފުރަތަމަ މޮޅާ އެކު، ހައްލުތަކެއް ލިބިގެންދާނެ ކަމަށެވެ.
