މާލެ ރީޖަން ލީގުގެ (ދެ ވަނަ ޑިވިޝަން ފުޓްބޯޅަ މުބާރާތުގެ) ޗެމްޕިއަންކަން ހޯދައިގެން، ދިވެހި ޕްރިމިއާ ލީގުގައި ބިސް ބުރު ސްޕޯޓްސް ކްލަބުން ވާދަކުރާއިރު، ކޮންމެ މެޗަކަށް ވެސް ނުކުންނަނީ ހާސިލްކުރެވޭނެ ކަންތައްތައް ބަލައި، އިދިކޮޅަށް ނުކުންނަ ޓީމަކަށް ޗެލެންޖެއް ދިނުމަށް ކަމަށް ބިސް ބުރުގެ ކޯޗު، އަހުމަދު ނާޝިދު (ނާދު) ބުނެފި އެވެ.
ލީގުގައި މިރޭ ބިސް ބުރުން ކުޅޭނީ އެންމެ ފަހުން ފަސް ސީޒަނުގައި، ރާއްޖޭގެ ޗެމްޕިއަން، މާޒިޔާ ސްޕޯޓްސް އެންޑް ރެކްރިއޭޝަނާ ދެކޮޅަށެވެ. އެ މެޗުގެ ކުރިން، އިއްޔެ ބޭއްވި ނޫސްވެރިންގެ ބައްދަލުވުމުގައި، ނާދު ބުނީ، މާޒިޔ އަކީ މި ސީޒަނަށް ތައްޔާރުވި އެންމެ ރަނގަޅު އެއް ޓީމު ކަމަށެވެ. މާޒިޔާ އަކީ މިހާތަނަށް މި ސީޒަނުގައި ފެނުނު އެންމެ ރަނގަޅު ޓީމު ކަމަށާއި ބިސް ބުރުން މި މެޗާ ކުރިމަތިލާއިރު، އަނިޔާގެ މައްސަލައެއް ނެތް ކަމަށް ނާދު ވަނީ ބުނެފަ އެވެ.
"އަޅުގަނޑުމެން ކޮންމެ ޓީމަކާ އެކީ ކުޅޭއިރު ވެސް އިންނާނެ ޗެލެންޖެއް. ކޮންމެ ވެސް ގޮތަކަށް ތައްޔާރުވާން. އެކި ޓީމުތަކާ މި ކުޅެން ޖެހެނީ އެކި ކަހަަލަ ގޮތްގޮތަށް. އެ ޓީމު ރާވައިގެން، އެހެންވީމަ، މާޒިޔާއާ އެކު ވެސް ކުޅޭނީ މާޒިޔާގެ ލެވަލް އަށް ބަލައިގެން،" މާޒިޔާއާ ދެކޮޅަށް ކުޅޭ މެޗުގެ ރޭވުންތަކަށް އިޝާރާތްކޮށް ނާދު ބުންޏެވެ.
"އަޅުގަނޑުމެންނަށް ކިހިނެއްތޯ، ޕްލޭޔަރުން ދަނޑުމަތީގައި ކޮންޓްރޯލް ކުރެވޭނީ، އަދި، އިދިކޮޅު ޓީމަށް ކޮން ގޮތަކުން އުނދަގޫ ކޮށްގެންތޯ، އަޅުގަނޑުމެންނަށް، އެ ނަތީޖާ ބަދަލުކުރެވޭނީ، އެ ކަހަލަ ގޮތަކަށް ވިސްނައިގެން މާޒިޔާ ޓީމަށް ބަަލައިގެން މެޗަށް ޓްރެއިން ކުރަމުން މި އައީ،"
މާޒިޔާ އާއި ބިސް ބުރުގެ ދެމެދުގައި މި ވަގުތު ލީގު ތާވަލުގައި އޮތީ އެއް ޕޮއިންޓުގެ ފަރަގެކެވެ. ލީގުގެ ފަސް ވަނައިގައި އޮތް މާޒިޔާ އަށް ހަތަަރު މެޗުން ހަތް ޕޮއިންޓް ލިބިފައިވާއިރު، ލީގުގެ ހަ ވަނައިގައި ބިސް ބުރުން އޮތީ ހަތަރު މެޗުން ހަ ޕޮއިންޓް ހޯދައިގެންނެވެ.
ބިސް ބުރުން ވަނީ ލީގުގައި ދިއްދޫ ފުޓްބޯޅަ ޓީމާއި ބުރު ސްޕޯޓްސް ކްލަބް ބަލިކޮށްފަ އެވެ. އެކަމަކު، އެންމެ ފަަހުން ބިސް ބުރު ކުޅުނު މެޗުން ވަނީ، ވިކްޓަރީ އަތުން 3-0 އިން ބަލިވެފަ އެެވެ.
ނާދު ބުނީ، މާޒިޔާއާ ކުޅެން ޖެހޭ މެޗަކީ، ވިކްޓަރީ މެޗު ކަހަލަ ގޮތަކަށް މެޗުގެ 90 މިނިޓަށް އެއްކޮށް ފުރިހަަމަ ސަމާލުކަން ދީގެން ކުޅެން ޖެހޭ މެޗެއް ކަމަށެވެ. ބިސް ބުރުން މި ސީޒަނުގައި މުޅިން އަލަށް ފުރަތަމަ ޑިވިޝަނުގައި ކުޅޭ ޓީމަކާ ބަލައި، ޖުމްލަކޮށް ދައްކާ ކުުޅުން ރަނގަޅު ކަމަށް ނާދު ވަނީ ފާހަގަކޮށްފަ އެވެ.
"އަޅުގަނޑުމެން ކުޅުނު މެޗުތަކަށް ބަލާއިރު ރަނގަޅު ޕާފޯމަންސެއް ދައްކައިފި. ދެން، ޓީމު ޅަ ވީމަ މެޗުތައް މި ދަނީ ކުދި ކުދި މިސްޓޭކުތައް ހެދިގެން. ދޫވެގެން، އެހެން އަންނާނެ، އެކްސްޕީރިއަންސް ތަންކޮޅެއް ދަށީ ކުޅުންތެރިންގެ ޕްރިމިއާ ލީގު އެއްޗެހީގައި އައިސް ކުޅެން، އެހެން ނޫންނަމަ މި އަށް ވުރެން ރަނގަޅު ނަތީޖާ ނެރެވޭނެ،" ނާދު ބުންޏެވެ.
ރާއްޖޭގެ ފުރަތަމަ ޑިވިޝަނުގައި ގިނަ އަހަރުތަކެއްގެ ކޯޗިން ތަޖުރިބާ ހާސިލްކޮށް، ގައުމީ ޓީމުތަކުގައި ވެސް ކޯޗިން މަސައްކަތް ކޮސްފައިވާ ނާދު ވަނީ އަލަށް ފުރަތަމަ ޑިވިޝަނުގައި ކުޅުނު ޓީމުތައް ގޮވައިގެން ވެސް ރަނގަޅު މަސައްކަތްތަކެއް ކޮށްފަ އެވެ.
ނާދު ބުނީ، އޭނާ އަށް ލިބިފައިވާ ތަޖުރިބާގެ އަލީގައި ކަންކަން ރަަނގަޅު ކުރުމަށްޓަކައި ކުޅުންތެރިންނަށް ވިސްނައިދެމުން އަންނަ ކަމަށެެވެ.
"އަޅުގަނޑުގެ މި ހުރި ތަޖުރިބާ އަށް ބަލާފައި. އެބަ ކިޔައިދޭން، ލީގުގައި ހިފެހެއްޓޭނީ މިހެން މިހެން މަސައްކަތް ކޮށްގެނޭ. އަޅުގަނޑުމެން ޓީމުގައި ތިބީ ޕްރިމިއާ ލީގަށް ގިނަ ޕްލޭޔަރުން އާ ވާނެ، އަސްލު ވަރަށް އުނދަގޫ، އެހެން ނަމަވެސް، އެ ކުދިންނަށް ވިސްނައިދީގެން، ލީގުގައި އަޅުގަނޑުމެން ހިފެހެއްޓޭނީ ކޮން ކަހަލަ މަސައްކަތްތަކެއް ކުރަންޖެހެނީ، އެ މަސައްކަތް ކޮށްދީގެން މި ވަރަށް ވެސް މި ހިފެހެއްޓެނީ. އެހެންނޫންނަމަ އުނދަގޫވާނެ. އަލަށް ފުރަަތަމަ ޑިވިޝަަނަށް އައިސްގެން އަޅުގަނޑުމެންގެ ނަތީޖާ ގޯސް ގޯހެއް ނޫން،" ނާދު ބުންޏެވެ.
އިތުރު ބިދޭސީ ކުޅުންތެރިއަކު ޓީމަށް ހޯދުމުގެ މަސައްކަތް ކުރާ ކަމަށާއި، އެހެން ނަމަވެސް މާލީ ކަންކަން ކްލަބަށް ހުރި ގޮތުން، ތަޖުރިބާހުރި ދިވެހި ކުޅުންތެރިން ހޯދުމުގައި ގޮންޖެހުންތަކެއް އެބަހުރި ކަމަށް ނާދު ވަނީ ބުނެފަ އެވެ.
މާޒިޔާ އާއި ބިސް ބުރު ކުޅޭ މެޗު ފަށާނީ މިރޭ 9 ޖަހާއިރު އެވެ. އޭގެ ކުރިން، މިއަދު ހަވީރު، ދިއްދޫން ޓީސީއާ ބައްދަލުކުރާނެ އެވެ.
