އިނގިރޭސިވިލާތް ޔޫރަޕިއަން ޔޫނިއަން (އީޔޫ) އިން ވަކިވުމަށް ނެގި "ބްރެކްސިޓް" ރިފަރެންޑަމަށް ރަޝިއާއިން ނުފޫޒު ފޯރުވާފައިވާ ކަމަށް އެ ގައުމުގެ ބޮޑުވަޒީރު އެންޑީ ބާންހަމް ވިދާޅުވެއްޖެ އެވެ. އަދި މިފަދަ އަމަލުތަކެއް ފްރާންސާއި ޖަރުމަނުވިލާތުގައި ވެސް ހިނގަމުންދާ ކަމުގެ އިންޒާރު އޭނާ ވަނީ ދެއްވާފަ އެވެ.
"ދަ ރެސްޓް އިޒް ޕޮލިޓިކްސް" ޕޮޑްކާސްޓަށް ދެއްވި އިންޓަވިއުއެއްގައި އިނގިރޭސި ބޮޑުވަޒީރު ވިދާޅުވީ، މަގާމާ ހަވާލުވެވަޑައިގަތުމަށް ފަހު ނަންބަރު 10 ޑައުނިންގް ސްޓްރީޓަށް ވަޑައިގެން، 2016 ވަނަ އަހަރުގެ ވޯޓަށް ރަޝިއާއިން ނުފޫޒު ފޯރުވާފައިވޭތޯ ސުވާލު ކުރެއްވި ކަމަށެވެ. އަދި އެކަމަށް ރަޝިއާއިން ނުފޫޒު ފޯރުވި ކަމުގެ ސާފު ޖަވާބު ލިބިވަޑައިގެންފައިވާ ކަމަށް އޭނާ ވިދާޅުވި އެވެ.
ބާންހަމް އިތުރަށް ވިދާޅުވީ، ބޭރު ގައުމުތަކުން އިނގިރޭސިވިލާތުގެ ސިޔާސީ ނިޒާމަށް ބުރޫއަރުވަން މަސައްކަތް ކުރާ މިންވަރާ ގުޅޭ ގޮތުން އާންމު ރައްޔިތުންނަށް އެކަށީގެންވާ މައުލޫމާތު ދެވިފައި ނުވާ ކަމަށާއި، އެކަމުގައި ސަރުކާރުން އޮތީ ވަރަށް ބޮޑަށް ފަހަތަށް ޖެހިފައި ކަމަށެވެ.
ބްރެކްސިޓް ރިފަރެންޑަމްގެ ތެރޭގައި ރަޝިއާއިން ހިންގި ހަރަކާތްތަކުގެ ބާވަތާއި ނުވަތަ އެކަން ކުރި މިންވަރާ ބެހޭ އިތުރު ތަފްސީލެއް ބާންހަމް ހާމައެއް ނުކުރައްވަ އެވެ.
ބްރެކްސިޓަށް ތާއީދުކުރާ ކެމްޕޭން ގްރޫޕެއް ކަމަށްވާ "ބްރިޓަން އަންބައުންޑް" އިން ބުނީ، ބާންހަމްގެ މި ވާހަކަތަކަކީ 2016 ވަނަ އަހަރު އިނގިރޭސި ރައްޔިތުން ނިންމި ނިންމުމުގެ ސައްހަކަން ގެއްލުވާލުމަށް ކުރި ވަރަށް ދަށު ދަރަޖައިގެ މަސައްކަތެއް ކަމަށެވެ.
އިނގިރޭސިވިލާތުގެ އިންތިޚާބުތަކަށް ބޭރުގެ ނުފޫޒު ފޯރުވުމަކީ ބަލައިގަނެވޭނެ ކަމެއް ނޫން ކަމަށް އެ ޖަމާއަތުން ބުނި ނަމަވެސް، 2016 ވަނަ އަހަރުގެ ރިފަރެންޑަމްގެ ނަތީޖާއަށް ރަޝިއާގެ ނުފޫޒުން ބަދަލެއް އައި ކަމަށް ގަބޫލުކުރާނެ އެއްވެސް ހަރުދަނާ ސަބަބެއް ނެތް ކަމަށް އެ ގްރޫޕުން ބުންޏެވެ.
މީގެ އިތުރުން، ވޯޓުލީ މީހުންނަކީ އެހާ ފަސޭހައިން އޮޅުވާލެވޭނެ ބައެއް ކަމަށް ދޭހަވާ ގޮތަށް ވާހަކަ ދެއްކުމަކީ ރައްޔިތުންނަށް ކުރެވޭ އިހާނެތި ކަމެއް ކަމަށް ވެސް އެ ޖަމާއަތުން ފާހަގަކުރި އެވެ.
އަންގާރަ ދުވަހު އާންމުކުރުމަށް ހަމަޖެހިފައިވާ މި އިންޓަވިއުގައި ބާންހަމް ވިދާޅުވީ، މިދިޔަ ހަފުތާގައި އޭނާ ޖަރުމަނުވިލާތަށް ކުރެއްވި ދަތުރުފުޅުގައި އެ ގައުމުގެ ޗާންސެލަރު ފްރީޑްރިކް މާޒްއާ އެކު ރަޝިއާގެ ނުފޫޒުގެ މައްސަލައާ ބެހޭ ގޮތުން މަޝްވަރާ ކުރެއްވި ކަމަށެވެ.
މިއީ 2016 ވަނަ އަހަރުގެ ބްރެކްސިޓް ވޯޓަށް ރަޝިއާއިން ނުފޫޒު ފޯރުވަން މަސައްކަތް ކުރި ކަމަށް އިނގިރޭސި ބޮޑުވަޒީރަކު ވިދާޅުވި ފުރަތަމަ ފަހަރެވެ. ނަމަވެސް، އިނގިރޭސި ސިޔާސީ މަސްރަހަށް ނުފޫޒު ފޯރުވުމަށް ކްރެމްލިންއިން މަސައްކަތް ކުރާ ކަމުގެ އިންޒާރުތައް ދަނީ މީގެ ކުރިން ވެސް ދެމުންނެވެ.
