އެމެރިކާގެ ރައީސް ޑޮނަލްޑް ޓްރަމްޕް ސޯޝަލް މީޑިއާގައި އާންމުކުރެއްވި ފޮޓޯއެއްގައި، އައިސްލޭންޑާއި އެހެން ބައެއް ގައުމުތަކުގެ މަތީގައި އެމެރިކާގެ ދިދަ ޖަހާފައިވާތީ، އެ ގައުމުގައި ހުންނަވާ އެމެރިކާގެ ސަފީރު ހޯމަ ދުވަހު ހާޒިރުކޮށްފައިވާ ކަމަށް އައިސްލޭންޑުގެ ބްރޯޑްކާސްޓަރު އާރު.ޔޫ.ވީ އިން ރިޕޯޓްކޮށްފި އެވެ.
ޓްރަމްޕް އާންމުކުރެއްވި އެ ޗާޓުގައި އެމެރިކާ، ކެނެޑާ، ގްރީންލޭންޑް، އައިސްލޭންޑް، މެކްސިކޯ، މެދުތެރޭ އެމެރިކާ އަދި ކެރީބިއަން ސަރަހައްދު އޮތީ އެމެރިކާގެ ދިދައިން ފޮރުވިފަ އެވެ. އަދި އެ މުޅި ސަރަހައްދަށް ނަން ދީފައިވަނީ "ޔުނައިޓެޑް ސްޓޭޓްސް އޮފް އެމެރިކާ" ގެ ގޮތުގަ އެވެ.
އެއްވެސް ތަފްސީލެއް ދެއްވުމެއް ނެތި ޓްރަމްޕް މި ފޮޓޯ އާންމުކުރެއްވީ އޭނާގެ އަމިއްލަ ސޯޝަލް މީޑިއާ ޕްލެޓްފޯމް ކަމަށްވާ "ޓްރުތް ސޯޝަލް" ގައެވެ.
އާރު.ޔޫ.ވީ އިން ރިޕޯޓްކޮށްފައިވާ ގޮތުގައި، އައިސްލޭންޑުގެ ފޮރިން މިނިސްޓަރު ތޯގާޑާ ގަނާސްޑޮޓިރް ވަނީ އެމެރިކާއިން އައިސްލޭންޑަށް ކަނޑައަޅާފައި ހުންނަވާ ސަފީރު ބިލީ ލޯންގް ހާޒިރުކުރައްވާފަ އެވެ. ބިލީ ލޯންގް ސަފީރުކަމުގެ މަގާމާ ރަސްމީކޮށް ހަވާލުވެވަޑައިގަތީ މިދިޔަ މަހުގެ ތެރޭގަ އެވެ.
އައިސްލޭންޑުގެ ފޮރިން މިނިސްޓްރީން އާރު.ޔޫ.ވީ އަށް މައުލޫމާތު ދެމުން ބުނީ، ޓްރަމްޕް ކުރެއްވި އެ ޕޯސްޓަކީ އެއްގޮތަކަށް ވެސް ބަލައިގަނެވޭނެ ކަމެއް ނޫން ކަމަށް ސަފީރަށް ދެންނެވިފައިވާނެ ކަމަށެވެ.
މި މައްސަލައާ ގުޅިގެން އެމެރިކާގެ ސްޓޭޓް ޑިޕާޓްމަންޓުންނާއި، ކޯޕަންހޭގަން އަދި ރޭކިއަވިކްގައި ހުންނަ އެމެރިކާގެ އެމްބަސީތަކުންނާއި، ނޫކްގައި ހުންނަ އެމެރިކާގެ ކޮންސިއުލޭޓުން ވަގުތުން އެއްވެސް ޖަވާބެއް ދީފައެއް ނުވެ އެވެ. އަދި އައިސްލޭންޑުގެ ފޮރިން މިނިސްޓްރީން ވެސް އިތުރު ތަފްސީލެއް ދީފައެއް ނުވެ އެވެ.
ޑެންމާކުގެ ބާރުގެ ދަށުން، އަމިއްލަ އިދާރީ ހިންގުމެއް އޮންނަ ގްރީންލޭންޑަކީ އެމެރިކާގެ މިލްކަކަށް ހަދަން ޖެހޭ ކަމަށް ފާއިތުވި އަހަރުތަކުގައި ޓްރަމްޕް ދައްކަވަމުން ގެންދެވި ވާހަކަތަކުގެ ސަބަބުން، ނޭޓޯގެ މެންބަރުން ކަމަށްވާ އެމެރިކާ އާއި ޑެންމާކާ ދެމެދު ވަނީ ނުތަނަވަސްކަން އުފެދިފަ އެވެ. އަދި މިކަމުގެ ސަބަބުން މުޅި ޔޫރަޕްގައި ވެސް ކަންބޮޑުވުންތައް ވަނީ އިތުރުވެފަ އެވެ.
އައިސްލޭންޑުން މިދިޔަ މަހު ނެގި ފެންނަ ނުފެންނަ ވޯޓެއްގައި، ޔޫރަޕިއަން ޔޫނިއަން (އީޔޫ) އާ ގުޅުމުގެ މަޝްވަރާތައް އަލުން ފެށުމާ ދެކޮޅަށް ވަނީ ވޯޓު ދީފަ އެވެ. އެ ވޯޓުގެ ކެމްޕޭން ތެރޭގައި ވެސް ގްރީންލޭންޑާ މެދު ޓްރަމްޕް ގެންގުޅުއްވާ ވިސްނުންތަކުގެ ވާހަކަ ވަނީ ދެކެވިފަ އެވެ.
އީޔޫއާ ގުޅުމަށް ތާއީދުކުރި ބައެއް ފަރާތްތަކުން ބުނަމުން ދިޔައީ، އެމެރިކާއަކީ އިތުބާރު ކުރެވޭނެ ގައުމެއްގެ ގޮތުގައި ނުފެންނާތީ އީޔޫއާ ގާތް ގުޅުމެއް ބޭއްވުން މުހިންމު ކަމަށެވެ. ނަމަވެސް، ބެލެވޭ ގޮތުގައި ވޯޓުގެ ނަތީޖާ އެގޮތަށް ނުކުތީ އެ ގައުމުގެ އިގްތިސާދީ ހާލަތާ މެދު އާންމުގެ ކަންބޮޑުވުންތަކުގެ ސަބަބުންނެވެ.
ޓްރަމްޕް މި ފޮޓޯ އާންމުކުރެއްވީ، ޔޫރަޕިއަން ކޮމިޝަންގެ ރައީސާ އުރުސުލާ ފޮން ޑަ ލޭޔަން ގްރީންލޭންޑަށް ކުރެއްވި ޒިޔާރަތެއްގައި، އެ ގައުމަށް 200 މިލިއަން ޔޫރޯ (232.50 މިލިއަން އެމެރިކާ ޑޮލަރު) ގެ އިންވެސްޓްމަންޓެއް ކުރާނެކަން އިއުލާން ކުރިތާ މަދު ގަޑިއިރުތަކެއްގެ ތެރޭގަ އެވެ.
