ދިރާގު ދިވެހި ޕްރިމިއާ ލީގުގައި މިއަދު ހަވީރު އެންމެ ފަހުގެ ޗެމްޕިއަން، މާޒިޔާ ސްޕޯޓްސް އެންޑް ރެކްރިއޭޝަން ކުޅޭ މެޗުގައި ޓީސީ ސްޕޯޓްސް ކްލަބާ ދެކޮޅަށް ނަތީޖާ ނެރުމުގެ މުހިންމުކަން ބޮޑު ކަމަށް މާޒިޔާގެ ކޯޗު ޗެކް ރިޕަބްލިކްގެ ތޯމަސް ޓްރުޗާ ބުނެފި އެވެ.
މިދިޔަ ފަސް ސީޒަނުގެ ލީގު ޗެމްޕިއަން، މާޒިޔާ އިން ލީގުގައި އެންމެ ފަހުން ކުޅުނު ދެ މެޗުގައި ވެސް މޮޅުނުވެ އެވެ. މިއީ، މިދިޔަ ހަތް އަހަރު ތެރޭ ޖެހިޖެހިގެން ލީގުގެ ދެ މެޗަކުން މާޒިޔާ މޮޅެއް ނުލިބި ނިންމާލަން ޖެހުނު ފުރަތަމަ ފަހަރެވެ. ނިއު ރޭޑިއަންޓް ސްޕޯޓްސް ކްލަބުން ފަހު ވަގުތު ލަނޑު ޖަހައި މާޒިޔާ ކައިރިން ކުރިހޯދައި އެ ޓީމު ހަތަރު އަހަރު ތެރޭ ލީގުގެ މެޗަކުން ފުރަތަމަ ފަަހަރަށް ބަލިކުރި ފަހުން، ދެން، މާޒިޔާ އިން ނުކުތް މެޗުގައި މޮޅުވާން ދަނިކޮށް ވިކްޓަރީ ސްޕޯޓްސް ކްލަބުން ވަނީ ފަހު ވަގުތު ލަނޑު ޖަހައި، މާޒިޔާއާ އެއްވަރުކޮށްފަ އެވެ.
"ފުޓްބޯޅައިގައި އަހަރެން ވަރަށް ގިނަ ދުވަސްވެއްޖެ، ކޮންމެ މެޗެއް ވެސް ޕްރެޝަރު އެބައޮތް. އުންމީދުކުރަނީ މި މެޗުގައި އަހަރެމެންނަށް ކުރިން ދެ މެޗުގައި މިދިޔަ ކަންތައްތައް ރަނގަޅުކުރެވި، ހުރިހާ ކުޅުންތެރިން ޓީމަށްޓަކައި ތިން ޕޮއިންޓް ހޯދާނެ ކަމަށް،" ޓީސީ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި، މާޒިޔާގެ ކޯޗު ޓްރުޗާ ބުންޏެވެ.
މާޒިޔާ އަށް މި ފަހަރުގެ ކަޕް ވިނާސް ކަޕްގެ ޗެމްޕިއަންކަން ހޯދައިިދިން ޓްރުޗާ ބުނީ، މާޒިޔާއާ ހަވާލުވިއިރު، އެ ކްލަބްގެ ކަންކަން ވަރަށް ރަނގަޅަށް ދިރާސާކުރި ކަމަށެވެ. މާޒިޔާ އަކީ ވަރަށް އުންމީދާ އެކު ކުރިއަށްދާ މޮޅެތި ކުޅުންތެރިން ގިނަ ކޮންމެ މެޗަކުން ވެސް މޮޅުވާން ބޭނުންވާ ޓީމެއް ކަމަށް ޓްރުޗާ ވަނީ ބުނެފަ އެވެ.
" އެއާ އެއްވަރަށް އަހަރެމެން ވިސްނަން ޖެހޭ ދެން ވެސް އެބައޮތް މިހާރު އިތުރު ވަރުގަދަ ޓީމުތަކެއް، އެ މީހުން އެބަ ބޭނުންވޭ މާޒިޔާ ހުރިހާ މެޗަކުން މޮޅުވިޔަނުދޭން، އެހެންވީމަ އަހަރެމެން އަތްމަތީގައި މި އޮތީ ކުރާ ކަމެއް ރަނގަޅަށް ކުރުން، ޓާގެޓްތަކާ ދިމާލަށް ދާން ރަނގަޅަށް ތައްޔާރުވާން،" ޓްރުޗާ ބުންޏެވެ.
މާޒިޔާ އިން މި ފަހުން އެންމެ ބޮޑަށް ވާހަކަ ދައްކައި މަޝްވަރާ ކުރަމުން އައި ކަމަކީ އިދިކޮޅަށް ނުކުންނަ އެއްވެސް ޓީމެއް ފަސޭހަކޮށް ނުނެގުން ކަމަށް ޓްރުޗާ ފާހަގަކުރިި އެވެ. މާޒިޔާގައި އޮތް ސްކޮޑަށް ބަލާއިރު، ކޮންމެ މެޗެއްގައި ވެސް ބޭނުންކުރާ ކުޅުންތެރިން ތަފާތު އޮތް ކަމަށް ޓްރުޗާ ވަނީ ބުނެފަ އެވެ. އެއީ، ޕްރެކްޓިހުގައި ރަނގަޅަށް މަސައްކަތްކުރާ ކުޅުންތެރިންނަށް ފުރުސަތު ދިނުމާއި އިދިކޮޅަށް ނުކުންނަ ޓީމަށް ބަލައި ރާވާ ޓެކްޓިކްސްތަކަށް އެންމެ ރަަނގަޅު ކުޅުންތެރިން ނެގުމުގެ ގޮތުން ކަމަށް ޓްރުޗާ ބުނެފައިވެ އެވެ.
ވަކިވަކި ކުޅުންތެރިންގެ ކުޅުމަށް ގޮތް ކިއުމުގެ ބަދަލުގައި، ސީޒަނުގެ މިހާ ކުރީކޮޅުގައި، މާޒިޔާގެ ބިދޭސީ ކުޅުންތެރިންނާއި ދިވެހި ކުޅުންތެރިންނަށް ވެސް އިތުބާރު ދީގެން ކްލަބުން ބޭނުންވާ ޓާގެޓްތައް ހާސިލްކުރަން ޓްރުޗާ ހުރީ އިތުބާރާ އެކު އެވެ.
މާޒިޔާ އިން މިދިޔަ ސީޒަނުގައި ޖެހިޖެހިގެން 10 މެޗުން މޮޅުވެފައި އޮއްވައި، އެ ރެކޯޑް ނިމުމަކަށް ގެނައީ، ޓީސީއާ ހަވާލުވުމަށް ފަހު، ކޯޗު މުހައްމަދު އާތިފް (އާތީ) އެވެ. އެ ހަނދާންތައް އާތީ ވަނީ މި ފަހަރުގެ މި ދެ ޓީމުގެ މެޗުގެ ކުރިން އާ ކޮށްފަ އެވެ. ދެން، އާތީ ފާހަގަކުރީ މި ވަގުތު ދެ ޓީމުގެ ހާލަތާއި ޓީމުގެ ސްކޮޑުގެ ހުރި ތަފާތުތަކެވެ.
"ފަސޭހައެއް ނުވާނެ ޓީސީ އަކަށް މާޒިޔާ. ކޮންމެ ގޮތެއް ވިޔަސް ތި ތަފާތުތައް އެބަހުރި، މިދިޔަ އަހަރުގެ ލީގުގެ ދެ ވަނަ ބުރު ޓީސީއާ ހަވާލުވީ، މާޒިޔާ މޮޅުވަމުން އައި ރެކޯޑް ޓީސީ ކަންނޭނގެ ހުއްޓުވާލީ، އެހެންވީމަ މެޗަކީ ތަފާތު ކަމެއް، މި ބުނަނީ ޓީސީ އަށް މި ފަަހަރު އެކަން ވާނެއެކޭ އެއްވެސް ނޫން، ނުވާނެއެކޭ ވެސް ނޫން، އެކަމަކު މެޗަކީ ތަފާތު އެއްޗެކޭ އެ ދުވަހަކު ޓީމަކުން ތައްޔާރުވެގެން ތިބޭވަރު ނަތީޖާ ކަނޑައެޅޭނީ،" އާތީ ބުންޏެވެ.
މި ފަަހަރުގެ ލީގުގައި ޓީސީން ކުޅުނު ތިން މެޗުގެ ނަތީޖާ އަށް ބަލާފައި، ޓީސީ ކުޅުންތެރިން އިތުރަށް މާޒިޔާއާ ދެކޮޅަށް މަސައްކަތްކޮށް މިއީ ޗެލެންޖިން މެޗަކަށްވާނެ ކަމަށް އާތީ ވަނީ ބުނެފަ އެވެ.
"ޓީސީގެ ބަލިފައި ރަނގަޅު ކުރަން އެ ލިބޭނެ އެންމެ ރަނގަޅު މެޗު މިއީ،" އާތީ ބުންޏެވެ.
"ޓީސީގައި މި އޮތީ މާޒިޔާއާ އަޅާކިޔާއިރު މާ ބޮޑު ބަދަލުތަކެއް ކުޅުންތެރިންނަށް ބަލައިގެން ގެނެވޭވަަރުގެ ސްކޮޑެއް ނޫން. އެހެންނަމަވެސް، އަނިޔާގައި ތިބި ކުޅުންތެރިންގެ ބަދަލުގައި ކުޅުންތެރިން ލައިގެން ކަންކަން ރަނގަޅުކުރެވޭތޯ ބަލަންޖެހޭނީ،"
ޓީސީ އާއި މާޒިޔާ ކުޅޭ މެޗު ފަށާނީ މިއަދު ހަވީރު، 16:00 ގަ އެވެ.
