އިސްރާއީލުން ހިފާފައިވާ ހުޅަނގު އައްސޭރީގައި، މޫނު ނިވާކޮށްގެން ތިބި ޔަހޫދީ ވަޒަންވެރިންތަކެއް ޔޫރަޕްގެ ޑިޕްލޮމޭޓުންގެ ވަފުދަކަށް ހަމަލާދީފި އެވެ.
ބެލްޖިއަމްގެ ކޮންސުލް ޖެނެރަލް އާއި އެހެނިހެން މަންދޫބުންނަށް ދިން މި ހަމަލާ ބެލްޖިއަމް ސަރުކާރުން ކުށްވެރިކޮށްފައިވާއިރު، މިކަމުގައި ޒިންމާވާ ފަރާތްތައް އިންސާފުގެ ކުރިމައްޗަށް ގެނައުމަށް އިސްރާއީލަށް ވަނީ ގޮވާލާފަ އެވެ.
އިސްރާއީލުގެ އަސްކަރިއްޔާ (އައިޑީއެފް) އިން ވެސް ވަނީ މިއީ "ނުރައްކާތެރި އަނިޔާވެރި އަމަލެއް" ކަމަށް ސިފަކޮށް، އެ މައްސަލަ ތަހުގީގު ކުރަމުންދާ ކަމަށް ބުނެފަ އެވެ.
ނަމަވެސް، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫގެ އޮފީހުން ވަނީ ހިނގާދިޔަ ކަންތައްތަކާ މެދު ޝައްކު އުފައްދާފަ އެވެ. އަދި މިއީ "އިސްރާއީލުގެ އަގުވައްޓާލުމަށް ރޭވުންތެރިކަމާއެކު ހިންގާ ކެމްޕޭނެއްގެ" ބައެއް ކަމަށް އެ އޮފީހުން ވަނީ ތުހުމަތުކޮށްފަ އެވެ.
މި ހަމަލާ ދީފައިވަނީ ހުޅަނގު އައްސޭރީގެ އެހެން އަވަށެއްގައި ވަޒަންވެރިން ދިން ހަމަލާއެއްގައި ފަލަސްތީނުގެ ބައެއް މީހުންނާއި ވޮޝިންޓަން ޕޯސްޓްގެ ފޮޓޯގްރާފަރު ހެއިޑީ ލެވިންއަށް އަނިޔާވިތާ އެންމެ ދުވަހެއް ފަހުންނެވެ.
އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވީ ފޮޓޯގްރާފަރު ލެވިންއަށް ދިން ހަމަލާއަކީ "ކަންބޮޑުވާންޖެހޭ" އަދި "ބަލައިގަނެވޭނެ ކަމެއް ނޫން" ކަމަށެވެ.
އިސްރާއީލަށް ކަނޑައަޅާފައި ހުންނަވާ އެމެރިކާގެ ސަފީރު މައިކް ހަކަބީ ވެސް ވަނީ އެ ހަމަލާ ކުށްވެރިކުރައްވާފަ އެވެ. އިސްރާއީލުގެ ވަރުގަދަ މަދަދުގާރެއް ކަމަށްވާ ހަކަބީ އެ ހަމަލާ ސިފަކުރެއްވީ "މޫނު ނިވާކޮށްގެން ތިބި ފިނޑިން ހިންގި ޓެރަރިސްޓް އަމަލެއް" ގެ ގޮތުގަ އެވެ. އަދި ހަމަލާދިން މީހުންނަށް ގާނޫނުގެ އެންމެ ހަރުކަށި އަދަބު ދޭންޖެހޭނެ ކަމަށް އޭނާ ވިދާޅުވި އެވެ.
ހޮނިހިރު ދުވަހު ހިނގި މި ހާދިސާގައި، ބެލްޖިއަމް، ފްރާންސް، ޕޮލެންޑް އަދި ކެތޮލިކް ޗާޗަށް ނިސްބަތްވާ ޔޫރަޕްގެ ޑިޕްލޮމޭޓުން ވަޑައިގަތީ ރާމަﷲ ކައިރީގައި އޮންނަ، ކްރިސްޓިއަނުންގެ އާބާދީ ބޮޑު ތައިބޭ އަވަށަށެވެ.
ޑިޕްލޮމޭޓުން އެ އަވަށަށް ވަޑައިގަތީ، ޒައިތޫނި ބިންނަން އުޅޭ ފަލަސްތީނު މީހުންނަށް އަމާޒުކޮށް އިސްރާއީލުގެ ވަޒަންވެރިން ކޮންމެ ދުވަހަކު ކަހަލަ ގޮތަކަށް ދެމުންދާ ހަމަލާތަކާ ގުޅިގެން، އެ ސަރަހައްދުގެ ހާލަތު ބެއްލެވުމަށެވެ.
