ފްލައިދުބާއީ ފްލައިޓެއް ކުއްލި ހާލަތުގައި ސައުދީ އަރަބިއްޔާއަށް ޖެއްސުމާ ގުޅިގެން، އެ ބޯޓުގައި ތިބި އިޒްރޭލު މީހުން ބަލާ ދިއުމަށް އިޒްރޭލުގެ ބޯޓުތައް ފޮނުވަން އެދުމުން ސައުދީ ސަރުކާރުން އެކަމަށް ހުއްދަ ނުދިން ކަމަށް ސަލާމަތީ ދާއިރާގެ ދެ މަސްދަރަކުން ބުދަ ދުވަހު ބުނެފި އެވެ.
މަސްދަރުތަކުން ބުނި ގޮތުގައި، އިޒްރޭލާ އެކު ސިޔާސީ ގުޅުމެއް ނެތް ސައުދީ އަރަބިއްޔާއަށް އިޒްރޭލުގެ އަސްކަރީ މަތިންދާބޯޓުތައް ވަނުމުގެ ހުއްދައަށް އެދިފައިވަނީ، އެ ގައުމުގައި ތިބި އިޒްރޭލު ރައްޔިތުން އަނބުރާ ގެންދިއުމަށެވެ.
މި މައްސަލައާ ގުޅިގެން ސައުދީ އަރަބިއްޔާގެ ސަރުކާރުގެ މީޑިއާ އޮފީހުން ބަހެއް ހޯދުމަށް އެދުމުން، އެ އޮފީހުން ރޮއިޓާޒްއަށް ވަކި ޖަވާބެއް ދީފައެއް ނުވެ އެވެ.
މަސްދަރުތަކުގެ ތެރެއިން އެކަކު ބުނި ގޮތުގައި، އިޒްރޭލު މީހުން ބަލާ ދިއުމަށްޓަކައި އިޒްރޭލުގެ ވައިގެ ސިފައިން ދިޔައީ "ސުޕަ ހާކިއުލިސް" މަރުކާގެ މަތިންދާބޯޓުތަކެއް ތައްޔާރުކުރަމުންނެވެ.
ނަމަވެސް، ފްލައިދުބާއީ އެއާލައިނުން ބުނެފައިވަނީ އެ ބޯޓުގައި ތިބި ފަސިންޖަރުން ދަތުރު ކުރިއަށް ގެންދާނީ އެ އެއާލައިންގެ އެހެން ބޯޓެއްގައި ކަމަށެވެ.
ދުބާއީން ފުރައިގެން ތެލް އަވީވަށް ދަތުރުކުރި ފްލައިދުބާއީގެ މި ފްލައިޓުގެ ކޯ-ޕައިލެޓް، ބޯޓުގެ ޕައިލެޓަށް ވަޅިން ހަމަލާދިނުމަށްފަހު ބޯޓު ވައްޓާލަން މަސައްކަތް ކުރި ކަމަށް އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ބުދަ ދުވަހު ބުންޏެވެ. ނަތަންޔާހޫ ބުނި ގޮތުގައި ބޯޓު ވައްޓާލަން އުޅުމުން ފަސިންޖަރުން ވަނީ އޭނާ ހިފަހައްޓާފަ އެވެ. އަދި އެހެން ޕައިލެޓުން ވަނީ ބޯޓު ރައްކާތެރިކަމާއެކު ސައުދީ އަރަބިއްޔާއަށް ޖައްސާފަ އެވެ.
އެމެރިކާ މެދުވެރިވެގެން އެކުލަވާލާފައިވާ "އަބްރަހަމް އެކޯޑްސް" ގެ ދަށުން އަރަބި ބައެއް ގައުމުތަކުން އިޒްރޭލާ އެކު ގުޅުން ގާއިމުކޮށްފައިވާއިރު، އެ އެއްބަސްވުމުގައި ސައުދީ އަރަބިއްޔާ ބައިވެރިކުރުމަށް އެމެރިކާގެ ރައީސް ޑޮނަލްޑް ޓްރަމްޕް ދަނީ ބާރުއަޅުއްވަމުންނެވެ. ނަމަވެސް، ފަލަސްތީނުގެ މިނިވަން ދައުލަތެއް ގާއިމުކުރުމުގެ މަގު ފަހިނުވަނީސް އެ އެއްބަސްވުމުގައި ބައިވެރިވުމަށް ސައުދީން ވަނީ މީގެ ކުރިންވެސް އިންކާރުކޮށްފަ އެވެ.
ބޮޑުވަޒީރު ނަތަންޔާހޫ ދާދިފަހުން ޔުނައިޓެޑް އަރަބް އެމިރޭޓްސް (ޔޫއޭއީ) އަށް ކުރި ދަތުރުގައި ސައުދީގެ އޮފިޝަލަކާ ބައްދަލުކުރި ކަމަށް އިޒްރޭލުގެ މީޑިއާތަކުން ރިޕޯޓުކޮށްފައިވެ އެވެ. ނަމަވެސް، ސައުދީ ސަރުކާރުގެ އިސް އޮފިޝަލަކު ބުދަ ދުވަހު ވަނީ އެފަދަ ބައްދަލުވުމެއް ބޭއްވި ކަމަށް ބުނާ ވާހަކަތައް ދޮގުކުރައްވާފަ އެވެ.
