ޔަމަނުގެ ހޫތީން ސައުދީ އަރަބިއްޔާއަށް ދެމުންގެންދާ ހަމަލާތައް އިތުރުވަމުންދާ ދަނޑިވަޅެއްގައި، ސައުދީގެ ދިފާއުގައި އަޅަންޖެހޭ ކޮންމެ ފިޔަވަޅެއް އެޅުމަށް މިސްރު ތައްޔާރަށް އޮތް ކަމަށް އެ ގައުމުގެ ރައީސް އަބްދުލް ފައްތާހު އަލް ސީސީ ހޮނިހިރު ދުވަހު ވިދާޅުވެއްޖެ އެވެ.
މިކަމާ ގުޅޭ ގޮތުން މަޝްވަރާ ކުރުމަށް މިސްރުގެ ޕާލަމެންޓުގެ ކުއްލި ޖަލްސާއެއް އާދީއްތަ ދުވަހު ބޭއްވުމަށް މިހާރު ވަނީ ނިންމާފަ އެވެ.
މިސްރުގެ މިލިޓަރީ އެކަޑަމީގެ ދަސްވެނިވުމުގެ ރަސްމިއްޔާތެއްގައި ވާހަކަދައްކަވަމުން ސީސީ ވިދާޅުވީ، ސައުދީ އަރަބިއްޔާގެ ސަލާމަތާއި ރައްކާތެރިކަމަށް ނުވަތަ ހަމަޖެހުމަށް ބުރޫއަރާ ފަދަ އެއްވެސް ކަމަކަށް މިސްރުން ފުރުސަތު ނުދޭނެ ކަމަށެވެ.
މިސްރަކީ އެއްވެސް ބަޔަކަށް ހަމަލާދޭން ބޭނުންވާ ގައުމެއް ނޫން ކަމަށާއި، ނަމަވެސް ދިފާއީ ގޮތުން ފިޔަވަޅު އެޅުމަށް އަބަދުވެސް އޮތީ ތައްޔާރަށް ކަމަށް އޭނާ ވިދާޅުވި އެވެ.
ޔަމަނުގައި ހަނގުރާމަ ހުއްޓާލުމަށް އެއްބަސްވެފައި އޮތް އޮތުން ނިމުމަކަށް އައިސް، ބައިނަލްއަގުވާމީ ގޮތުން ބަލައިގެންފައިވާ ޔަމަނުގެ ސަރުކާރުގެ ސިފައިންނާއި ހޫތީންނާ ދެމެދު ކުރިމަތިލުންތައް އަލުން ވަނީ ފެށިފަ އެވެ.
މި ހަމަލާތަކުގެ ތެރެއިން، އީރާނަށް ތާއީދުކުރާ ހޫތީން ވަނީ ފާއިތުވި ދުވަސްތަކުގައި ސައުދީގެ ވެރިރަށް ރިޔާދުގެ ބައިނަލްއަގުވާމީ އެއާޕޯޓަށާއި، އެ ގައުމުގެ ތެޔޮ ކުންފުނި، ސައުދީ އަރަމްކޯގެ މަރުކަޒުތަކަށް އަމާޒުކޮށް ހަމަލާތަކެއް ދީފަ އެވެ.
ސީސީ ވިދާޅުވި ގޮތުގައި މިސްރުން އަމަލުކުރާނީ ސައުދީގެ ރަސްގެފާނު ސަލްމާން ބިން އަބްދުލްއަޒީޒާއި ވަލީއަހުދު މުހައްމަދު ބިން ސަލްމާން ދެއްވާ އިރުޝާދުގެ މަތިންނެވެ.
ޔަމަނުގެ ހަނގުރާމަ އަލުން ފެށުމާ ގުޅިގެން، ރަތްކަނޑުގެ ސަލާމަތާއި ދަތުރުފަތުރުގެ ރައްކާތެރިކަމާ ބެހޭ ގޮތުން މަޝްވަރާ ކުރެއްވުމަށް ސައުދީގެ ވަލީއަހުދު ވަނީ ސެޕްޓެމްބަރު މަހުގެ 15 ވަނަ ދުވަހު މިސްރަށް ޒިޔާރަތްކުރައްވައި ސީސީއާ ބައްދަލުކުރައްވާފަ އެވެ.
"އަޅުގަނޑަށް އެނގޭ މިފަދަ ފިޔަވަޅެއް އެޅުމަށް މިސްރުގެ ޕާލަމެންޓުގެ ހުއްދަ ބޭނުންވާނެކަން. އެހެންކަމުން، ސައުދީން އެދިއްޖެ ހާލަތެއްގައި އެ އެހީތެރިކަން ފޯރުކޮށްދިނުމުގެ ހުއްދަ ދިނުމަށްޓަކައި ޕާލަމެންޓުގެ ކުއްލި ޖަލްސާއެއް ބާއްވައިދިނުމަށް އަޅުގަނޑު އެދެން،" ސީސީ ވިދާޅުވި އެވެ.
ސީސީ މިހެން ވިދާޅުވިތާ މާގިނަ އިރުތަކެއް ނުވަނީސް، އެ ގައުމުގެ ޕާލަމެންޓުން ވަނީ ރައީސްގެ އެދިވަޑައިގަތުމަށް އިޖާބަދީ، އާދީއްތަ ދުވަހުގެ މެންދުރުފަހު 1:00 ގައި ޕާލަމެންޓުގެ ފުރިހަމަ ޖަލްސާއެއް ބާއްވާނެކަން އިއުލާންކޮށްފަ އެވެ. ނަމަވެސް އެ ޖަލްސާގެ އެޖެންޑާ ރަސްމީކޮށް ހާމަކޮށްފައެއް ނުވެ އެވެ.
މިސްރާއި ސައުދީ އަރަބިއްޔާއަކީ އިސްތިރާތީޖީ ގޮތުންނާއި އިގްތިސާދީ ގޮތުން ވަރަށް ގާތް ދެ ގައުމެވެ. 2013 ވަނަ އަހަރު މިސްރުގެ ކުރީގެ ރައީސް މުހައްމަދު މުރްސީގެ ސަރުކާރު އަސްކަރީ ބަގާވާތަކުން ވައްޓާލުމަށް ފަހު، ސައުދީ އަރަބިއްޔާ އާއި ގަލްފުގެ މުއްސަނދި ގައުމުތަކުން ވަނީ މިސްރަށް އެތައް ބިލިއަން ޑޮލަރެއްގެ އެހީ އާއި، ސެންޓްރަލް ބޭންކުގައި ފައިސާ ބެހެއްޓުމާއި، އިންވެސްޓްމަންޓްތައް ފޯރުކޮށްދީފަ އެވެ.
މީގެ އިތުރުން، 2015 ވަނަ އަހަރު ޔަމަނުގެ ސަރުކާރުގެ ދިފާއުގައި ހޫތީންނާ ދެކޮޅަށް ސައުދީ އަރަބިއްޔާ އިސްވެ އޮވެ އުފެއްދި އަސްކަރީ އިއްތިހާދުގައި ވެސް މިސްރުން ވަނީ ބައިވެރިވެފަ އެވެ.
