ނެޝަނަލް އިންޓަގްރިޓީ ކޮމިޝަނަށް ހުށަހެޅިފައިވާ ގިނަ ދުވަސްވީ އެތަކެއް މައްސަލަތެއް ހުރި ކަމަށާއި އެ މައްސަލަތައް ނިންމުމުގައި އެންމެ ބޮޑު ގޮންޖެހުމެއް ކުރިމަތިވަނީ އިންވެސްޓިގޭޓަރުންގެ އަދަދު މަދުވުމުން ކަމަށް އެ ކޮމިޝަނުން ބުނެފި އެވެ.
ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީއަށް ހާޒިރުވެ އެ ކޮމިޝަނުން ވަނީ މިދިޔަ އަހަރު ކުރެވިފައިވާ މަސައްކަތްތަކާ ގުޅޭ މައުލޫމާތު ހިއްސާކޮށްފަ އެވެ. މިދިޔަ އަހަރުގެ ތެރޭގައި އެ ކޮމިޝަނަށް 196 މައްސަލަ ހުށަހެޅުނުއިރު އޭގެ ތެރެއިން 160 މައްސަލައެއް ރެޖިސްޓްރީކޮށް ވަނީ ބަލަން ފަށާފަ އެވެ.
"އަޅުގަނޑުމެންގެ އިންވެސްޓިގޭޓަރުންގެ އަދަދު، ނުވަ ކުދިން މިހާރު ތިބީ. އެއީ ލިބިފައި ތިބި މުވައްޒަފުންގެ އަދަދަކީ، މި އަހަރު ފެށުނުއިރު ތިބީ ހަތަރު އިންވެސްޓިގޭޓަރުން، އެއީ ވަރަށް ބޮޑު ޗެލެންޖެއް ބޭނުންވާ ސްޕީޑުގައި މައްސަލަތައް ކުރިއަށްގެންދަން،" އެ ކޮމިޝަނުގެ ނައިބު ރައީސް ފާތިމަތު ޝަރީފް ވިދާޅުވި އެވެ.
ކޮމިޝަނަށް ހުށަހެޅި ގޮތެއް ނުނިމި އޮތް ވަރަށް ގިނަ މައްސަލަތަކެއް ހުރި ކަމަށާއި އެ މައްސަލަތައް ނިންމުމަށް ހާއްސަ އިސްކަމެއް ދީގެން މަސައްކަތްކުރާ ކަމަށް އެންއައިސީން ވަނީ ބުނެފަ އެވެ. މައްސަލަތައް ނިމެމުންދާ ވަރަކަށް ކުރިއަށް އޮތްތަނުގައި ހުށަހެޅޭ މައްސަލަތައް ވެސަް އިތުރުވާނެ ކަމަށް ބެލެވޭ ކަމަށް އެންއައިސީން ވަނީ ބުނެފަ އެވެ.
މިދިޔަ އަހަރު އެ ކޮމިޝަނަށް ހުށަހެޅި މައްސަލަތަކުގެ 87 ޕަސެންޓަކީ ފުލުހުންނާ ދެކޮޅަށް ހުށަހެޅުނު މައްސަލަ އެވެ. ދެން އެންމެ ގިނަ މައްސަލަ ހުށަހެޅިފައިވަނި ޖަލުތައް ބަލަހައްޓާ ކަރެކްޝަންސްއާ ދެކޮޅަށެވެ.
އިންޓެގްރިޓީ ކޮމިޝަނަށް މިދިޔަ އަހަރު ހުށަހެޅި 196 މައްސަލައިގެ ތެރެއިން 81 ޕަސެންޓު މައްސަލަ ހުށަހެޅީ އާންމުންނެވެ. ކޮމިޝަނުގެ އަމިއްލަ އިސްނެގުމަށް 10 ޕަސެންޓު މައްސަލަ ބަލަން ވަނީ ފަށާފަ އެވެ.
އެންއައިސީ އަކީ ރާއްޖޭގެ ގާނޫނު ތަންފީޒު ކުރުމުގެ ޒިންމާ މަތިކޮށްފައިވާ އިދާރާތަކުގެ ހިންގުން ހަރުދަނާކޮށް ގާނޫނު ތަންފީޒު ކުރާ އިދާރާތަކާ ގުޅޭ މައްސަލަތައް ބަލައި ފިޔަވަޅު އަޅާ ކޮމިޝަނެވެ.
އެގޮތުން ފުލުުހުންނާއި ކަސްޓަމްސް އާއި ޕްރިޒަންސްގެ އިތުރުން އިމިގްރޭޝަނާ ގުޅޭ އިންޓެގްރިޓީގެ ހުރިހާ މައްސަލައެއް ބަލާނީ އެންއައިސީންނެވެ.
