އިންޑިއާގެ ބައެއް ސަރަހައްދުތަކަށާއި އަވަށްޓެރި ނޭޕާލަށް ބޯކޮށް ވާރޭވެހި، ފެންބޮޑުވެ، ބިންގަނޑު ކަނޑައިގެން ދިއުމުގެ ހާދިސާތަކުގައި މަދުވެގެން 19 މީހުން މަރުވެއްޖެ އެވެ.
ކޯރުތަކުގެ ފެންގަނޑު ނުރައްކާތެރި މިންވަރަކަށް އުފުލިފައިވާ މި ހާދިސާތަކުގައި 10 މަސައްކަތްތެރިއަކު ގެއްލިފައިވާ ކަމަށް ވެސް އޮފިޝަލުން މައުލޫމާތު ދެއެވެ.
އިންޑިއާގެ އުއްތަރު ޕްރަދޭޝް ސްޓޭޓްގެ ސަރުކާރުން ހޮނިހިރު ދުވަހު ނެރުނު ބަޔާނެއްގައި ބުނެފައިވަނީ، ވޭތުވެދިޔަ 48 ގަޑިއިރު ތެރޭގައި އެ ސްޓޭޓުން 15 މީހުން މަރުވެ، ފަސް މީހަކަށް އަނިޔާވެފައިވާ ކަމަށެވެ. މީގެ އިތުރުން މޫސުމީ ހާދިސާތަކުގައި 117 ގެއަކަށް އެކިވަރުގެ ގެއްލުންތައް ލިބިފައިވާ ކަމަށް ވެސް އެ ބަޔާނުގައިވެ އެވެ.
އުއްތަރު ޕްރަދޭޝްގެ 63 ޑިސްޓްރިކްޓަކަށް ބޯކޮށް ވާރޭވެހި ތޫފާނުގެ އަސަރުކޮށްފައިވާއިރު، ހޮނިހިރު ދުވަހާ ހަމައަށް ހިނގައިދިޔަ 24 ގަޑިއިރު ތެރޭގައި އެ ސްޓޭޓަށް ވަނީ އާންމުކޮށް ވެހޭ މިންވަރަށް ވުރެ 19 ގުނަ އިތުރަށް ވާރޭވެހިފަ އެވެ.
ނޭޕާލުގެ ބަގްލަންގް ޑިސްޓްރިކްޓްގެ ނިޝީ ޚޯލާ އަވަށުގައި މީހުން ނިދާފައި ތިއްބާ ބިންގަނޑު ކަނޑައިގެން ގޮސް ގެއެއްގެ މައްޗަށް ފަސްގަނޑު ފޭބުމުގެ ހާދިސާގައި ހަތަރު މީހަކު މަރުވެފައިވާ ކަމަށް އެ ޑިސްޓްރިކްޓްގެ އެންމެ އިސް އޮފިޝަލް ކްރިޝްނާ ޕްރަސާދު އަޗާރިޔާ ވިދާޅުވި އެވެ. މަރުވި މީހުންގެ ތެރޭގައި ތިން ކުޑަކުދިންނާއި އަންހެނަކު ހިމެނެ އެވެ.
ނޭޕާލުގެ އުތުރުގައި އޮންނަ މަނަންގް ޑިސްޓްރިކްޓްގައި ހުންނަ 7،126 މީޓަރު އުސް ހިމްލުންގް ހިމާލް ފަރުބަދައިގެ ބޭސް ކޭމްޕަށް ސުނޯ ފޭބުމުގެ ހާދިސާއެއްގައި ނޭޕާލުގެ 10 މަސައްކަތްތެރިއަކު ގެއްލިފައިވާ ކަމަށް ވެސް އޮފިޝަލުން ބުންޏެވެ.
މި މަސައްކަތްތެރިންނަކީ ބޭރުގެ ފަރުބަދައަށް އަރާ މީހުންނަށް ފޭލިގެ ޖެހުމުގެ މަސައްކަތުގައި އުޅުނު ބައެއް ކަމަށާއި، މި ހާދިސާ ހިނގިއިރު ބޭރުގެ ފަރުބަދައަށް އަރާ މީހުން އެ ސަރަހައްދުގައި ނެތް ކަމަށް ވެސް އޮފިޝަލުން މައުލޫމާތު ދެއެވެ.
ނޭޕާލުގެ ބޮޑެތި ކޯރުތަކާއި ކޯރުތަކަށް ގުޅިފައިވާ ކުދި ކޯރުތަކުގެ ފެންގަނޑު މަތިވަމުންދާތީ، އެ ގައުމުގެ 77 ޑިސްޓްރިކްޓްގެ ތެރެއިން 49 ސަރަހައްދެއްގައި ކުއްލި ފެންބޮޑުވުމުގެ ބިރު އޮތް ކަމަށް ކަމާބެހޭ އިދާރާތަކުން ވަނީ އިންޒާރު ދީފަ އެވެ. މީގެ ތެރެއިން ދެބައިކުޅަ އެއްބަޔަށް ވުރެ ގިނަ ސަރަހައްދުތަކަށް ބޮޑަށް ފެންބޮޑުވުމުގެ ނުރައްކާ އޮތް ކަމަށް ވެސް ބުނެފައިވެ އެވެ.
