ރާއްޖޭގެ އެންމެ މަތީ ކޯޓު، ސުޕްރީމް ކޯޓުގެ ފީތަކަށް ބަދަލު ގެނެސް އެ ކޯޓުގެ ވެބްސައިޓުގައި އެ ބަދަލުތައް އާންމުކޮށްފި އެވެ.
ސުޕްރީމް ކޯޓަށް ހުށަހަޅާ އިސްތިއުނާފުގެ ހުއްދަ ހޯދުމުގެ ހުށަހެޅުންތަކާއި، އިސްތިއުނާފު ހުށަހެޅުންތަކާއި، ވަގުތީ ހުށަހެޅުންތަކާއި، އެޑްމިނިސްޓްރޭޓިވް ހުށަހެޅުންތަކަށް ތަފާތު އެކި ފީތައް ނަގަ އެވެ.
އަދަދު އަށް އެނގިފައިވާ ގޮތުގައި ސުޕްރީމް ކޯޓުގެ ފީތަކަށް ގެނައި ބަދަލާއެކު ބައެއް ފީތައް ވަނީ ބޮޑުވެފަ އެވެ. ނަމަވެސް ފީތަކަށް އައިސްފައިވާ ބަދަލުތައް ސުޕްރީމް ކޯޓުން ހާމަކުރަން ވަނީ ދެކޮޅު ހަދާފަ އެވެ.
ސުޕްރީމް ކޯޓުން އަދަދު އަށް ބުނީ ކޯޓުގެ ފީތަކަށް ބަދަލު ގެނެސްފައިވަނީ މެޖިސްޓްރޭޓް ކޯޓުން ފޯރުކޮށްދޭ ހިދުމަތްތަކަށް ފީ ނަގާނެ ގޮތުގެ ތާވަލާ އެއްގޮތަށް ފީތައް އެއްގޮތް ކުރުމުގެ ގޮތުން ކަމަށެވެ.
މި ފީތަކުގެ ތެރެއިން މައާފް ކުރެވިފައިވާ ފީތަކަކީ ދައުލަތުން ނުވަތަ ސަރުކާރު ފަރާތަކުން ހުށަހަޅާ ކަންކަމާއި، ހަބިއަސް ކޯޕަސް ހުށަހެޅުންތަކާއި، އާންމު މަސްލަހަތުގެ ގޮތުގައި ސައްހަކުރެވިފައިވާ ހުށަހެޅުންތަކުގެ އިތުރުން ފަގީރުން ހުށަހަޅާ ހުށަހެޅުންތަކެވެ.
