ސްޕޭނުގައި ޕައިލެޓް ޓްރޭނިން ހަދަމުން ދިޔަ އުމުރުން 27 އަހަރުގެ ދިވެހި ދަރިވަރަކު ދަތުރުކުރި ކުޑަ މަތިންދާބޯޓެއް ވެއްޓި، އޭނާއަށާއި އިންސްޓްރަކްޓަރަށް ބޮޑެތި އަނިޔާތަކެއް ވެއްޖެ އެވެ.
އިއްޔެ މެންދުރުގެ ވަގުތެއްގައި ހިނގި މި ހާދިސާގައި އަނިޔާވި ދިވެހި ދަރިވަރަކީ ޕައިލެޓް ތަމްރީނުގެ އެންމެ ފަހު މަރުހަލާގައި ހުރި ޒުވާނެއް ކަމަށް ސްޕެއިންގެ ނޫސްތަކުން ރިޕޯޓްކޮށްފައިވެ އެވެ. ނަމަވެސް، އޭނާގެ ވަނަވަރެއް އާންމުކޮށްފައެއް ނުވެ އެވެ.
ދެ އިންޖީނުލީ މި ބޯޓު ދުއްވަން އިނީ 700 އަށްވުރެ ގިނަ ގަޑިއިރުގެ އުދުހުމުގެ ތަޖުރިބާ ހުރި އުމުރުން 26 އަހަރުގެ ޕޯޗުގަލް އިންސްޓްރަކްޓަރެއް ކަމަށް ވެސް ނޫސްތަކުގައި ބުނެފައިވެ އެވެ.
މި ހާދިސާގައި ދިވެހި ދަރިވަރުގެ ބޮލަށް އަނިޔާވެ، ފައި ބިންދައިގެން ގޮސްފައިވާތީ އޭނާއަށް މިހާރު ދަނީ ސަން ޕެޑްރޯ ހޮސްޕިޓަލުގައި ފަރުވާ ދެމުންނެވެ. އަދި އިންސްޓްރަކްޓަރުގެ މައިބަދައަށް ބޮޑެތި ގެއްލުންތަކެއް ލިބި، ހާލު ސީރިއަސްވުމުން ހެލިކޮޕްޓަރުގައި ވަނީ ޔުނިވާސިޓީ ހޮސްޕިޓަލަށް ގެންގޮސްފަ އެވެ.
ތަމްރީނު ދަތުރު ނިންމާލުމަށްފަހު އެއާޕޯޓަށް ޖައްސަން ދަނިކޮށް ބޯޓަށް މައްސަލައެއް ދިމާވީ އިންޖީނުގެ ތެރެއަށް ދޫންޏެއް ވަނުމުން ނުވަތަ މެކޭނިކަލް މައްސަލައަކުން ކަމަށް ބެލެވޭ ކަމަށް ފްލައިބައި ސްކޫލުން ބުނެ އެވެ. ނަމަވެސް، ކުއްލި ނުރައްކަލުގެ މި ހާލަތުގައި ބޯޓު ކޮންޓްރޯލްކޮށްގެން ދަނޑުބިމަކަށް ތިރިކުރުމަށް މަސައްކަތްކޮށްފައިވާތީ، މިއީ އިންސާނީ ގޯހަކުން ހިނގި ކަމެއް ނޫން ކަމަށް ކަމާބެހޭ ފަރާތްތަކުން ގަބޫލުކުރެ އެވެ.
ސްޕޭނުގެ އޭވިއޭޝަން ސޭފްޓީ އެޖެންސީން މިހާރު ވަނީ މި ހާދިސާގެ ތަހުގީގެއް ފަށާފަ އެވެ. ދިވެހި ދަރިވަރު ތައުލީމު ހާސިލުކުރަމުންދާ 'ފްލައިބައި' ޕައިލެޓް ސްކޫލަކީ 150 އަށްވުރެ ގިނަ ބައިނަލްއަގުވާމީ ދަރިވަރުން އުނގެނެމުންދާ މަގުބޫލު ސްކޫލެކެވެ.
މިއީ ފާއިތުވި ހަތަރު މަސްދުވަހުގެ ތެރޭގައި މި ސްކޫލުގެ ބޯޓަކަށް ދިމާވި ދެވަނަ ހާދިސާ އެވެ. މީގެ ކުރިން މިދިޔަ އޭޕްރީލް މަހުވެސް މި ސްކޫލުގެ އަންހެން ދަރިވަރަކު ދުއްވި ބޯޓެއް ޖައްސަން އުޅުމުގެ ތެރޭގައި ފުރޮޅުލީ ބައި ބިންދައިގެން ގޮސް ހާދިސާއެއް ހިނގާފައިވެ އެވެ. ނަމަވެސް، އެ ހާދިސާގައި އެއްވެސް މީހަކަށް އަނިޔާއެއް ނުވެ އެވެ.
