މޮރޮކޯއާ އިންވެގެން އޮންނަ ސްޕެއިންގެ ސަރަހައްދެއް ކަމަށްވާ ސެއުޓާއަށް އެތެރެވާން މަސައްކަތް ކުރި އެތައް ބަޔަކު މޮރޮކޯގެ ކަމާބެހޭ ފަރާތްތަކުން ހުއްޓުވައިފި ކަމަށް ރިޕޯޓުތައް ބުނެފި އެވެ.
ސްޕެއިންގެ މީޑިއާތަކާއި ރޮއިޓާސް ނިއުސް އެޖެންސީން މޮރޮކޯގެ ސަލާމަތީ ބާރުތަކާ ހަވާލާދީ ރިޕޯޓުކޮށްފައިވާ ގޮތުގައި، ފްނިޑެކް އަވަށުގެ ބޭރުން ބޯޑަރާ ދިމާލަށް ދަތުރުކުރަން އުޅުނު 100 އަށްވުރެ ގިނަ މީހުން ވަނީ ހުއްޓުވާފަ އެވެ.
މި ހާދިސާ ހިނގާފައި މިވަނީ، މީގެ ދެ ހަފުތާ ކުރިން މަދު ގަޑިއިރުތަކެއްގެ ތެރޭގައި ކަނޑުމަގުން 78،000 އެއްހާ މީހުން ސެއުޓާއަށް އެތެރެވި ހާދިސާއަށް ފަހުގަ އެވެ. އެ ސިޓީގެ މޭޔަރު ވިދާޅުވި ގޮތުގައި އެ ފަހަރު އެތެރެވި މީހުންގެ ތެރެއިން 100 މީހަކު މަރުވިއިރު، އޭގެ ތެރެއިން ގިނަ މީހުން މިހާރު ވަނީ އަނބުރާ މޮރޮކޯއަށް ފޮނުވާލާފަ އެވެ.
ގިނަ އަދަދެއްގެ ބަޔަކު އެއްފަހަރާ އެތެރެވި ހާދިސާއާ ގުޅިގެން އެ ސަރަހައްދުގެ ސަލާމަތީ ކަންކަން ވަނީ ވަރުގަދަކޮށްފަ އެވެ. އަދި މި ހަފުތާ ބަންދުގައި ވެސް ގިނަ ބަޔަކު އެއްފަހަރާ ބޯޑަރު ހުރަސްކުރަން އުޅޭ ކަމުގެ އަޑުތައް ސޯޝަލް މީޑިއާގައި ފެތުރިފައިވާތީ ސަލާމަތީ ބާރުތަކުން ވަނީ ތައްޔާރީ ހާލަތަކަށް އައިސްފަ އެވެ.
މޮރޮކޯ ސަރުކާރުން ބުނެފައިވަނީ، ހޮނިހިރު ދުވަހު ގިނަ ބަޔަކު އެއްފަހަރާ ބޯޑަރު ހުރަސްކުރުމަށް ގޮވާލައި ސޯޝަލް މީޑިއާގައި ދައުރުވަމުންދާ މެސެޖުތައް މޮނިޓާ ކުރަމުންދާ ކަމަށެވެ. އަދި މިފަދަ ކަންކަން ރާވާ ފަރާތްތަކާއި އޭގައި ބައިވެރިވާ މީހުންނަށް ގާނޫނީ ފިޔަވަޅު އަޅާނެ ކަމުގެ އިންޒާރު ވެސް ސަރުކާރުން ވަނީ ދީފަ އެވެ.
