އެންޓާކްޓިކާ ކައިރީގައި އޮންނަ އެކަހެރި އަލިފާން ފަރުބަދައެއްގެ ރަށެއް ކަމަށްވާ ޒަވޮޑޮވްސްކީ އައިލެންޑުގައި ދިރިއުޅޭ "ޗިންސްޓްރެޕް" ބާވަތުގެ ޕެންގުއިންގެ އާބާދީގެ ގާތްގަނޑަކަށް ތިންބައިކުޅަ ދެބައި މަދުވެފައިވާ ކަމަށް ވައިގެ މަގުން ކުރި ސާވޭތަކުން ދައްކައިފި އެވެ.
ދުނިޔޭގައި އެންމެ ގިނަ އަދަދަކަށް ޕެންގުއިން އުޅޭ ސަރަހައްދުގެ ގޮތުގައި މީގެ ކުރިން ބެލެވިފައިވަނީ ޒަވޮޑޮވްސްކީ އައިލެންޑެވެ. ނަމަވެސް، މި ސާވޭތައް ކުރިއަށް ގެންދިޔަ ދިރާސާވެރިން ބުނާ ގޮތުގައި އެ ރަށަށް މިހާރު ވަނީ އެ ޝަރަފު ގެއްލިފަ އެވެ.
މި ދިރާސާއިން ދައްކާ ގޮތުގައި، 2011 ވަނަ އަހަރާ އަޅާބަލާއިރު 2025 ވަނަ އަހަރު އެ ރަށުގައި ޗިންސްޓްރެޕް ޕެންގުއިންތައް ބޭނުންކުރާ ހާލީގެ އަދަދު ވަނީ 63 އިންސައްތަ ދަށަށް ގޮސްފަ އެވެ.
ދިރާސާ ކުރާ ޓީމުން ބުނާ ގޮތުގައި މޫސުމަށް އަންނަ ބަދަލުތަކުގެ ސަބަބުން މި ދޫނިތަކުގެ ކާނާ ލިބުމަށާއި ދިރިއުޅުމަށް ވަނީ ބޮޑެތި ހުރަސްތަކެއް ކުރިމަތިވެފަ އެވެ. އަދި މިހާރު މި ބާވަތުގެ ޕެންގުއިންއަކީ ނެތިދިއުމުގެ ބިރު އޮތް އެއްޗެއްގެ ގޮތުގައި ރަސްމީކޮށް ކަނޑައެޅިދާނެ ކަމަށް ވެސް އެ ފަރާތްތަކުން ބުނެ އެވެ.
މި ރަށުގައި "މެކަރޯނީ" ބާވަތުގެ ޕެންގުއިން ވެސް އުޅެމުންދާއިރު، އެ ބާވަތުގެ ޕެންގުއިންގެ އާބާދީ ދަނީ އިތުރުވަމުންނެވެ. ސައިންސްވެރިން ގަބޫލުކުރާ ގޮތުގައި މީގެ ސަބަބަކީ އެ ތަކެތި ކައިއުޅޭ ކާނާގެ ބާވަތްތައް ގިނަވުމެވެ.
ޒަވޮޑޮވްސްކީ އައިލެންޑަކީ އެންޓާކްޓިކާ ބައްރުގެ އުތުރުގައި އޮންނަ، އިނގިރޭސިވިލާތުގެ ބާރުގެ ދަށުގައިވާ ސައުތު ސޭންޑްވިޗް އައިލެންޑްސްގެ ބައެކެވެ.
ބްރިޓިޝް އެންޓާކްޓިކް ސާވޭ (ބީއޭއެސް) އިން 2011 ވަނަ އަހަރު ހާމަކުރި ގޮތުގައި، އެ ރަށަކީ ދުނިޔޭގައި އެންމެ ގިނަ ޕެންގުއިން އުޅޭ ރަށެވެ. އެގޮތުން އެ ރަށުގައި ގާތްގަނޑަކަށް 600،000 ޗިންސްޓްރެޕް ޕެންގުއިން އާއި 90،000 މެކަރޯނީ ޕެންގުއިން އުޅޭ ކަމަށް އޭރު އަންދާޒާ ކުރެވުނެވެ.
މި އާ ދިރާސާ ކުރިއަށް ގެންދިޔަ ބީއޭއެސް އިން ބުނާ ގޮތުގައި، އެ ރަށަކީ ދުނިޔޭގައި މިފަދަ ދިރާސާއެއް ކުރުމަށް އެންމެ ދަތި އަދި ނުރައްކާތެރި އެއް ސަރަހައްދެވެ.
ބީއޭއެސްގެ ޓީމުން އެ ރަށަށް ދިއުމަށްޓަކައި 15 ދުވަސް ވަންދެން ކަނޑު ދަތުރު ކުރި އެވެ. އަދި އެ ރަށުގައި އުޅޭ ދޫނިތައް ދިރާސާ ކުރުމަށްޓަކައި ޑްރޯން އާއި ވައިގެ މަގުން ނަގާ ފޮޓޯގެ އިތުރުން، 20 ދޫންޏެއްގެ ހަށިގަނޑުގައި ޓްރެކިން ޑިވައިސްތައް ހަރުކުރި އެވެ.
މި ދިރާސާއިންނާއި ސެޓެލައިޓް ފޮޓޯތަކުން ދައްކާ ގޮތުގައި، 2011 އާއި 2025 އާ ދެމެދު ޗިންސްޓްރެޕް ޕެންގުއިންތައް ބޭނުންކުރާ ހާލީގެ އަދަދު ވަނީ 63 އިންސައްތަ މަދުވެފަ އެވެ.
ދިރާސާވެރިން ބުނާ ގޮތުގައި ޗިންސްޓްރެޕް ޕެންގުއިންގެ އާބާދީ މިހާ ބޮޑަށް ދަށަށް ދިއުމުގެ މައިގަނޑު ސަބަބަކީ ކާނާ ލިބުން ދަތިވުމާއި، މޫސުމަށް އަންނަ ބަދަލުތަކުގެ ސަބަބުން ކަނޑުގެ ލޮނުގަނޑުގެ ހޫނުމިން މަތިވުމެވެ.
މި ދިރާސާގައި އިސްކޮށް އުޅުއްވި ޕްރޮފެސަރު ނޯމަން ރެޓްކްލިފް ވިދާޅުވި ގޮތުގައި، ޗިންސްޓްރެޕް ޕެންގުއިންތަކަކީ ވަކި ހާއްސަ ކާނާއެއް ކައިއުޅޭ އަދި ފިނި ފެނަށް ލޯބިކުރާ ބާވަތަކަށް ވުމުން، ތިމާވެއްޓަށް އަންނަ ބަދަލުތަކުގެ ނުރައްކާ އެ ތަކެއްޗަށް ވަނީ ވަރަށް ބޮޑަށް ކުރިމަތިވެފަ އެވެ.
