"ދިވެހީންގެ ރާއްޖޭ" ނަމުގައި ވެރިކަމަށް އައި ސަރުކާރުން މަސައްކަތް ކުރަމުން ދަނީ ދިވެހީންގެ އަތުން ރާއްޖެ ފޭރިގަންނަން ކަމަށް ވައިކަރަދޫ ދާއިރާގެ މަޖިލިސް މެންބަރު، ހުސެއިން ޒިޔާދު ވިދާޅުވެއްޖެ އެވެ.
މިއަދު ބޭއްވި މަޖިލީހުގެ ޖަލްސާގައި ރަސްމާލޭގެ ބިމުން 500 ހެކްޓަރު ބޭރުގެ ބަޔަކަށް ކުއްޔަށް ދިނުމާ ގުޅޭ ގޮތުން ހުށަހެޅި ކުއްލި މައްސަލައަށް ބަހުސް ކުރައްވަމުން ޒިޔާދު ވިދާޅުވީ ރަސްމާލޭގެ ބިމުގެ އެއްބައި ބޭރުގެ ބަޔަކަށް ދިނުމަކީ ރާއްޖޭގެ މިނިވަންކަން ގެއްލިގެންދާނެ ކަމެއް ކަމަށެވެ.
"މިއަދާ ހަމައަށް ދިވެހިރާއްޖެ މިނިވަންކަންމަތީގައި މި އޮވެވުނީ ދިވެހީން އެކަނި މި ތަނުގައި ދިރިއުޅޭތީ އިއްޒަތްތެރި ރައީސް، ވަޒަންވެރިވެގެން ދިވެހީން ރައްޔިތުން، މިއަދު އަޅުގަނޑުމެން ފުރުސަތު މި ދެނީ 20 ވަނަ މަޖިލީހުން އެހެން ގައުމެއްގެ ބައެއް މި ތަނުގައި ވަޒަންވެރިވާން،" ޒިޔާދު ވިދާޅުވި އެވެ.
ރަސްމާލޭގެ ބިން ބޭރުގެ ބަޔަކަށް ދިނުމާ ދެކޮޅުހަދަން ޕީއެންސީއަށް ނިސްބަތްވާ މަޖިލިސް މެންބަރުންނަށް ކެރިވަޑައިނުގަންނަވަނީ އެ ބޭފުޅުންގެ އަޅުވެތިކަން ބޮޑުކަމުން ކަމަށް ޒިޔާދު ތުހުމަތުކުރެއްވި އެވެ.
މުޅި ރާއްޖޭގެ އިގުތިސާދު އަނދަވަޅަކަށް ވައްޓާލައިފައި ރަސްމާލެ ހިއްކުމުގެ މަސައްކަތް ކުރިއަށް ގެންދިޔައީ އެ ތަނުން ދިވެހީންނަށް ބޯހިޔާވަހިކަން ހޯދައިދިނުމަށް ކަމަށް ޒިޔާދު ވިދާޅުވި އެވެ.
"މި މަޝްރޫއު ފެށުމުގެ ސަބަބުން ދިވެހީން މިއަދު އުފުލަން ޖެހުނު ހުރިހާ ތަކުލީފެއް އުފުލަން ޖެހުނީ، ތަކުރާރުކޮށް ރައީސުލްޖުމްހޫރިއްޔާ ބުނަމުންދިޔައީ ދިވެހީން ފަސްޓްއޭ، ދިވެހީންނަށޭ އިސްކަން ދޭނީ ދިވެހީންގެ ރާއްޖެޔޭ، އެހެންނަމަވެސް، އާހިރުަގައި ދިވެހީން މިވީ ޑަސްޓްއަށް،" ޒިޔާދު ވިދާޅުވި އެވެ.
އޭނާ ވިދާޅުވީ ރަސްމާލެއިން ދިވެއްސަކަށް ބިންކޮޅެއް ލިބެނީ އެ މީހެއްގެ ވަންހަދިލަކޮޅުން ވާރުތަވަމުން އައި މުދާ ދޫކޮށްލާފައި ކަމަށެވެ. އެހެންނަމަވެސް، ރަސްމާލޭގެ ދެބައިކުޅަ އެއްބައި ބޭރުގެ ބަޔަކަށް ލިބުމުން، ފަސޭހަކަމާއެކު އެ ތަނުން ޕްރޮޕަޓީތައް ގަނެގެން ބޭރުގެ މީހުންނަށް އެ ތަނުގައި ވަޒަންވެރިވުމުގެ ފުރުސަތު ހުޅުވިގެންދާކަން އޭނާ ފާހަގަކުރެއްވި އެވެ.
ރަސްމާލޭގެ ބިން ބޭރުގެ ބަޔަކަށް ދިނުމަކީ ރިސޯޓުތައް ތަރައްގީކުރަން ރަށްތަށް ދޫކުރުމާ އެތައް ގޮތަކުން ތަފާތުކަމެއްކަން ޒިޔާދު ފާހަގަކުރެއްވި އެވެ.
އެގޮތުން، ރާއްޖޭގައި ތަރައްގީކުރާ ރިސޯޓުތަކަށް އަންނަނީ ފަތުރުވެރިން ކަމަށާއި އެ މީހުންނަކީ ޗުއްޓީ ހޭދަކޮށްލުމަށްފަހު އެނބުރި ދާ ބައެއް ކަމަށް އޭނާ ވިދާޅުވި އެވެ. ނަމަވެސް، ރަސްމާލޭގެ ބިން ބޭރުގެ ބަޔަކަށް ދެނީ އެ ތަނުގައި އެ މީހުންނަށް ވަޒަންވެރިވެ ދިރިއުޅެވޭ ގޮތަށް ކަމަށް ޒިޔާދު ވިދާޅުވި އެވެ.
"މާދަމާ މި ތަނުގައި 500 ހެކްޓަރު، އެއީ ފުވައްމުލަކަށްވުރެ ބޮޑު ތަނެއްގެ ވާހަކަ އަޅުގަނޑުމެން މި ދައްކަނީ އިއްޒަތްތެރި ރައީސް، އެ ތަނުގައި ދިރިއުޅޭ މީހުންގެ ހައްގުގައި އެ ތަނެއްގެ ރައްޔިތުންގެ ހައްގުގައި އެ ގައުމުތަކުން އައިސް މި ތަނުގައި ބާރު ހިންގާނެ،" ޒިޔާދު ވިދާޅުވި އެވެ.
އޭގެ މިސާލެއްގެ ގޮތުގައި ޒިޔާދު ދެއްކެވީ ފަލަސްތީނުގެ ވާހަކަ އެވެ. އޭނާ ވިދާޅުވީ އެ ތަނުގައި ވަޒަންވެރިވެގެން އުޅޭ ޔަހޫދީންނަކީ ވެސް އެއް ޒަމާނެއްގައި އެ ތަނަށް ގެންގޮސް ވަޒަންވެރިވުމުގެ ފުރުސަތު ދެވުނު ބައެއް ކަމަށެވެ.
