އިންޑިއާގެ ބޮޑުވަޒީރު ނަރެންދުރަ މޯދީ އާއި ރަޝިޔާގެ ރައީސް ވްލަޑިމިއާ ޕުޓިން، ދެ ގައުމުގެ ދެމެދުގައި އޮތް ޒަމާންވީ ގުޅުން އިތުރަށް ބަދަހިކުރުމަށް ހުކުރު ދުވަހު އެއްބަސްވެވަޑައިގެންފި އެވެ.
މި ބައްދަލުވުމުގައި ވާހަކަދައްކަވަމުން ޕުޓިން ވިދާޅުވީ، ހުޅަނގުގެ ގައުމުތަކުން ކަނޑައަޅާފައިވާ ގަވާއިދުތަކުން އެއްކިބާވެފައިވާ، ދުނިޔޭގެ އިގްތިސާދީ ކުރިއެރުމަށް މަގުފަހިކޮށްދޭ އާ އޮނިގަނޑެއް ބްރިކްސް އިއްތިހާދުން ބިނާކުރަންޖެހޭ ކަމަށެވެ.
ބްރިކްސް ސަމިޓް ފެށުމުގެ ކުރިން އިންޑިއާގެ ވެރިރަށް ނިއުދިއްލީގައި މޯދީ އާއި ޕުޓިން މަޝްވަރާތައް ބާއްވާފައިވާއިރު، މި ސަމިޓުގައި ޗައިނާގެ ރައީސް ޝީ ޖިންޕިން އާއި އީރާނުގެ ރައީސް މަސްއޫދު ޕެޒެޝްކިއަންގެ އިތުރުން އެހެން ގައުމުތަކުގެ އިސްވެރިން ވެސް ބައިވެރިވެވަޑައިގަތުމަށް ވަނީ ހަމަޖެހިފަ އެވެ.
ޔޫކްރެއިން އަދި އީރާނުގެ ހަނގުރާމަތަކާ ގުޅިގެން މުދާ އުފުލުމަށާއި ވިޔަފާރިއަށް ބޮޑެތި ހުރަސްތަކެއް ކުރިމަތިވެފައިވާ މި ދަނޑިވަޅުގައި، އިންޑިއާއިން ދަނީ އެމެރިކާ، ގަލްފުގެ އަރަބި ގައުމުތައް، ރަޝިޔާ، އީރާން އަދި އިސްރާއީލާއެކު އޮންނަ ގުޅުންތައް ހަމަހަމަކަމާއެކު ދެމެހެއްޓުމަށް ޑިޕްލޮމެޓިކް ގޮތުން ގިނަ މަސައްކަތްތަކެއް ކުރަމުންނެވެ.
ބްރިކްސްގެ މެންބަރު ގައުމުތަކުގެ މެދުގައި، ހާއްސަކޮށް އީރާނާއި ޔުނައިޓެޑް އަރަބް އެމިރޭޓްސް (ޔޫއޭއީ) އިދިކޮޅު ފަރާތްތަކުގެ ގޮތުގައި ތިބި ގަލްފުގެ ހަމަނުޖެހުންތަކާ މެދު ހިޔާލުތަފާތުވުންތައް ހުރި ނަމަވެސް، ބައިނަލްއަގުވާމީ ގަވާއިދުތަކާއި މުއައްސަސާތަކަށް ނުފޫޒު ފޯރުވައި، އެ އިއްތިހާދުގެ ދައުރު ފުޅާކުރުމަށް ބްރިކްސްއިން ދަނީ މަސައްކަތް ކުރަމުންނެވެ.
ޕުޓިންގެ ހާއްސަ މަންދޫބު ކިރިލް ޑިމިޓްރިއޭވް ރޮއިޓާސްއަށް މައުލޫމާތު ދެއްވަމުން ވިދާޅުވީ، ބްރިކްސް މިހާރު ބަދަލުވަމުންދަނީ ހަމައެކަނި ޖިއޯޕޮލިޓިކަލް ގްރޫޕެއްގެ ގޮތުގައި އޮތުމުގެ ބަދަލުގައި، ވިޔަފާރިތަކާއި ޓެކްނޮލޮޖީ ކުންފުނިތަކާއި އިންވެސްޓަރުންގެ މެދުގައި އެއްބާރުލުން އިތުރުކުރުމަށާއި، ފައިސާ ދެއްކުމުގެ ނިޒާމުތަކާއި އުމްރާނީ ވަސީލަތްތައް ތަރައްގީކުރުމަށް އިސްކަންދޭ އަމަލީ އިގްތިސާދީ ބައިވެރިވުމަކަށް ކަމަށެވެ.
