54 ވަނަ ބަޔާ ގުޅޭ
"ނައު ދެޓް ލީން އިޒް ހިއަރ.. ޕްލީޒް ޑޯންޓް ޓެލް މީ ޔޫ އަރ ހެވިންގް ސެކަންޑް ތޯޓްސް އަބައުޓް މަލް" އިވާން ހިތާހިތުން އޭނާގެ ހީވުން ކުށްހީއަކަށް ވޭތޯ ދުޢާ ކުރަމުން ބުންޏެވެ.
"ކީކޭ؟ އިވާން ކީއްވެ ތިކަހަލަ ގޮތަކަށް ވިސްނަންވީވެސް" ޝާވިން އިވާންއަށް ބަލައިލީ ނުރުހުމުގެ ނަޒަރަކުންނެވެ.
"ނޭނގެ. އަހަރެން މިރޭ ކޯލު ނިންމާފަ ވަތްއިރު ތި ދެމީހުން މާ ގާތްކޮށް ވާހަކަދައްކަން ތިބީމަ. އަނެއްކާ ގުޅީމަ އަހަރެންނަށްވެސް އަންގާނުލާ ޝޯން އެހާ އަވަހަށް ލީން ބަލާ އެގެއަށް ދިޔައީ..." އިވާން އޭނާއަށް ފާހަގަކުރެވުނު ކަންތައްތައް ކިޔައިދިނެވެ. ޝާވިންއަށް ފުން ނޭވާއަކާއެކު ދެ ފަރާތަށް ބޯ ހޫރައިލެވުނެވެ.
"ގުޅިއިރު ހީވި ލީން އެހާ ރަނގަޅު ނޫންހެން. ނަސީބަކުން އަހަރެން ހުންނަ ގެސްޓްހައުސްވެސް ހުންނަނީ ހެންވޭރުގަ. އެ ގެއަކާ މާ ދުރެއް ނުވާނެ. އަވަހަށް ދާންވެގެން އެ ގޭދޮށަށް ޓެކްސީއެއް ބުކް ކޮށްފަ އަހަރެން ހިނގާފަ އެ ދިމާލަށް ނައްޓާލީ.. ތި ދެމީހުން ވާހަކަ ނުދައްކާކަން އެނގޭތީ ސީދާ ވީގޮތެއް ނޭނގެނީސް އިވާންއަށް އަންގައިގެން ބޯ ހާސްކުރުވަން ބޭނުން ނުވީ. ދެން މިރޭ ދޯ.. އެގަޑީގަ ލީންއާ ދެއްކީ ބޮޑަށް މަލްގެ ވާހަކަ" ޝާވިން އޮޅުން ފިލުވައިދިނެވެ. "އެހެންވީމަ ކީކޭ ކިޔަން ތި އުޅެނީ؟ މަލްއާމެދު ދެވަނަ ވިސްނުމަކަށް ދާން ޖެހޭވަރު ކުއްޖެއް ދެން އަހަރެންގެ ހަޔާތަކަށް ނާންނާނެ. އެއީ ލީން ކަމުގައިވިޔަސް"
"އޯކޭ އޯކޭ މައި ބޭޑް. އެނގެޔޭ ބްރޯ މަލްއަށް ދެރަގޮތެއް ނަހަދާނެކަން. ބޯ ގޮވާފަ ހުރި ވަރުން މާ ނެގެޓިވްކޮށް ވިސްނުނީ" އިވާން މަޢާފަށް އެދުނެވެ.
"އަހަރެން ބުނީމެއްނު ލީންގެ ކަންތަކުގަ އިވާން ބޯ ގޮއްވާނެ ކަމެއް ނެތޭ. ލީން ހަމައަކަށް އެޅޭހާ އަވަހަކަށް އަހަރެން އިވާންއަށް ލީން ގޮވައިގެން އުޅެން ތަނެއް ހިފައިދީފާނަމޭ. އިވާންއަށް ވަޒީފާއެއް ހޯދައިގެން އެތަނަށް ކުލި ދެއްކޭވަރު ވަންދެން އަހަރެން އެކަން ކޮށްދޭނަން. އެނގެއެއްނު އިވާންގެ ކަމަކިއްޔާ ދޮންބެވެސް ކޮށްދޭނެކަން"
ޝާވިންގެ ހިޔާލު އިވާންއަކަށް ކަމަކު ނުދިޔަ އެވެ. ޝާވިން މިހާރުވެސް އެ ދަނީ ވާވަރަށް އޭނާއަށް އެހީތެރިވަމުންނެވެ. އެހެނަސް ޝާވިން ވަޒީފާއެއްގެ މައުޟޫއު ނެގުމުން އެދުވަހު ހިނގައިދިޔަ ކަމެއް ހަމަ ކުއްލިއަކަށް އޭނާގެ ހަނދާނުގައި ކޮށްޓައިލި އެވެ.
"އަދި ވަރަށް ފާޑެއްގެ ކަމަކާ ލައިގަނެގެނޭ މި އުޅެނީ.. މިއަދު ޝޯން އައިއިރު އަހަރެންނާ ވާހަކަދައްކަން ހުއްޓެއްނު މަންޖެއެއް؟" އިވާން ފެށީ އިޝްވާގެ ވާހަކަ އެވެ. އަކުރެއް ފިއްޔެއްވެސް ވައްޓައިލުމެއްނެތި އެދެމެދުގައި ދެކެވުނު ހުރިހާ ވާހަކައެއް ޝާވިންއަށް ކިޔައި ދިނެވެ.
"އެހާ ރަނގަޅު ފުރުސަތެއް ލިބުނީމަ ހަމަ ދޫކޮށްލަނީތަ؟" ޝާވިންއަށް ވިސްނުނީ އެއީ އިވާންއަށް ލިބުނު ނަސީބެއްގެ ގޮތުގަ އެވެ.
"ކިހިނެއް އެނގެނީ ކާކު ކޮން ބޭނުމަކު އަހަރެންނަށް ދޭ ފުރުސަތެއް ކަމެއްވެސް މިއީ؟ އަހަރެންނަށް ވަޒީފާ އަނބުރާ ލިބުނީމަ އެމީހަކު އަހަރެންގާތު ކިޔާނީ ކިހާވަރެއްގެ ކޮން ކަމަކުކަން އެނގެނީ ކިހިނެއް؟ އަހަރެން ބޭނުމެއް ނޫން އުމުރުދުވަހު މީހަކަށް ދަރަނިވެރި ވެގެން އުޅޭކަށް؟" އިވާން ކޮފީ ތަށިން ކޯވަރެއް ދަމައިލަމުން ބުންޏެވެ.
"އެ ކުއްޖާގާތު އަހަންވީނު ކާކުތޯ؟" ޝާވިން ބުންޏެވެ.
"އެހިއްޔާ ވަކި ބުނާނެތަ؟ އެހެރީ ހަދާލި މޮޅު ވާހަކަ" އިވާން ޖަހައިލީ މަލާމާތުގެ ހިނިގަނޑެކެވެ.
"ދެން އިވާންއަށް ހީވަނީ ކާކުހެން؟" ޝާވިން އަހައިލި އެވެ.
"ނޭނގެ. ވެދާނެ ހަމަ ހަގީގަތުގަވެސް އެ ބުނާ ސީ. އެސް. އާރަކަށް ހޮވުނީ ކަމަށް. ނޫނިއްޔާ ވެދާނެ އަހަރެން އަލުން ގެންދަން ބޭނުންވެގެން ފުލުހުންގެ ތެރެއިން ދަންނަ މީހަކު ކުރާ ކަމަކަށް. ނަދާލްއަށް ނޫނީ މަންމައަށްވެސް ވެދާނެ. އެންމެ ބިރުގަންނަނީ އެހެންވެ. މަންމައަށް ވެދާނެތީ. ބޭނުމެއް ނޫން ފަރުހާނަށް އެއްވެސް ކަމެއްގަ ދަރައިގެން އުޅޭކަށް" އިވާންގެ ކަންބޮޑުވުން ޝާވިންއާ ހިއްސާކުރި އެވެ.
"މައިއަށް ވެދާނެތަ؟" ޝާވިން އިރުކޮޅަކު ވިސްނައިލުމަށްފަހު އެއްސެވެ.
"ޕިސް. ހިއެއް ނުވޭ.. މައިރާ ވަރަށް މަސައްކަތް ކޮށްފިއޭ އަހަރެންގެ ކަންތަކުގަ ހުރިހާ ހަގީގަތެއް ހާމަކުރަން. އެކަމަކު މިހާރު މައިރާ އެ ހުރި މަގާމުގެ ގޮތުން ހިއެއްނުވޭ އެވަރުގެ ރިސްކެއް ނަގާނެހެން. އަހަރެންގެ ވަޒީފާ އަލުން ހަމަ ޖެހިއްޖެއްޔާ ފުލުހުންނަށް މަޖުބޫރުވާނެ އަހަރެން ފްރޭމްކުރި ބަޔަކު ހޯދަން" އިވާން ބުންޏެވެ.
"އެކަމަކުވެސް އަހަރެން ނުބުނާނަން އިވާންއަށްޓަކައި މައިރާ ތި ރިސްކު ނުނަގާނެއެކޭ" ޝާވިން ޔަގީންކަމާއެކު ބުންޏެވެ.
"ނޫނޭ. މައިރާއަކަށް ނުވާނެ. މި ދުވަސްކޮޅު މިކަހަލަ ކަމަކާ އުޅޭ ވަރަށްވުރެ މައިރާ މާ ބިޒީ. ކުންފުނީގެ މައްސަލައާއި މައިޝާންގެ މައްސަލައާ.. މައިރާއަކަށް ނުވާނެ" އިވާން ހީވީ ޝާވިންއަށްވުރެ ބޮޑަށް އޭނާގެ އަމިއްލަ ނަފްސަށް އެކަން ގަބޫލުކޮށްދޭން އުޅުނު ހެނެވެ. އެކަން ފާހަގަވުމާއެކު ޝާވިން ޒާތަކަށް ހިނި އައިސްފައި އިނދެ ބޯ ޖަހައިލި އެވެ.
*****************
ފަތިސް ދަންމަތި އޮއްސިއްޖެ އެވެ. ހުޅުވާލެވިފައިހުރި ބެލްކަނީގެ ދޮރުން އެޕަރޓްމެންޓްގެ ތެރެއަށް އެޅިގެންދިޔަ އިރުގެ އަލިން އެޕަރޓްމެންޓް އަލި ވެލައިފި އެވެ. ވިއްސާރަ އަލިވެ މިހާރު އިވެމުންދާ ހަމައެކަނި އަޑަކީ ގޭގޭގެ ފުރާޅާއި ބެލްކަނިތަކުގައި ހަރުލާފައިވި ފެނުން އަސްކެނިތައް ދޮށަށް ތިކި ޖަހަމުންދާ އަޑެވެ. އެހެނަސް ރެއިންސުރެ ސޯފާގައި އިން ނަދާލް އަދިވެސް އިނީ އެ އިން ގޮތަށެވެ. ވަގުތާއި މޫސުމުގެ ހިލަމެއް އޭނާއަށް ނުވާ ކަހަލަ އެވެ. ފަޑީގެ ފަހަތަށް ކަރު އެލުވާލައިގެން މޭޒުމައްޗަށް ދެފައި ދަމާލައިގެން އޮތް އިރު އޭނާ އޮތީ ދެލޯ މަރައިލައިގެނެވެ. ނިދާފައި ނޫންކަން ޔަގީންވަނީ މަދުން ނަމަވެސް ލަސްލަހުން އޭނާގެ ތެމިފައިވާ އެސްފިޔަތައް ހުޅުވާލައި ދެލޯ ހަރަކާތްކޮށްލާ ގޮތުންނެވެ.
ގަޑިއެއްހާއިރު ފަހުން އެޕަރޓްމެންޓްގެ ދޮރު ހުޅުވާލައި މައިރާ އެތެރެއަށް ވަނެވެ. ކަށިމައްޗާ ހަމައަށްހުރި މުށިކުލައިގެ ސްކާރޓުގެ ދަށަށް ޖަހާލާފައިވާ ގޮޅިޖެހި ގަމީހާއި، އެއް އަތުގައި އަޅުވާލެވިފައިވާ މުށިކުލައިގެ ދަބަހާއި ބްލޭޒަރުން އޭނާ އެ ހުރީ އޮފީހަށް ދާން ތައްޔާރުވެގެންކަން އެނގޭހާވެ އެވެ. އަނެއް އަތުން "ކަޕް ހޯލްޑަރެއް" ހިފަހައްޓާލައިގެން ހުރިއިރު އޭގައި މަތި ޖަހާލާފައިވާ ދެ ކޮފީތަށި ހުއްޓެވެ.
"ނެޑް؟ ސާބަސް! ރޭގަ ތެމިގެން އައި ގޮތަށް ޗޭންޖްވެސް ނުކުރަން ދޯ؟ ދޮރުވެސް ތަޅު ނުލާ ހުރީ. ދެން ތެދުވޭ. މި އައީ ކޮފީވެސް ހިފައިގެން. ފްރޮމް ޔޯ ފޭވަރިޓް ޕްލޭސް" މައިރާ އަތުގައިހުރި ދެ ކޮފީތަށި މޭޒުމަތީގައި ބަހައްޓައިލަމުން ނަދާލްގާތު އިށީނެވެ.
ނަދާލް އަވަސް ހަރަކާތަކާއެކު ދެ ލޮލުގެ ހިމަކޮޅުން ދެމިފައިވާ ކަރުނައިގެ ކޫރު ފޮހެލަމުން ނޭފަތް ދަމައިލި ނަމަވެސް އިތުރު ހަރަކާތެއް ކުރާކަށް ނޫޅުނެވެ. މައިރާއަށް އޭނާ ނަގައި ގޮނޑީގައި ސީދަލަށް ބައިންދަންވެސް ޖެހުނީ ގަދަކަމުންނެވެ.
"އަހަރެންދެކެ ރުޅި އައިސްފަ ދޯ؟" މައިރާގެ ސުވާލަކަށް ނަދާލް ޖަވާބެއް ނުދިނެވެ.
"އަހަރެންނަށް އެނގެޔޭ ރުޅި އައިސްފަކަން. ނެޑް؟ ވާހަކަ ދައްކަބަލަ؟" މައިރާ ތަކުރާރުކޮށް އެދުނެވެ.
"މައި ޕްލީޒް" ނަދާލް ގޮވައިލީ އޭނާއަށް އުނދަގޫކުރުން ހުއްޓާލާށޭ ބުނާ ފަދައިންނެވެ. "ތެދަށް ބުނަންޏާ އަހަރެންނަށް އެއްވެސް ވަރަކަށް ފަސޭހައެއް ނޫން މިވަގުތު މައިއާ ވާހަކަ ދައްކާކަށް. އަހަރެން ހިއެއް ނުކުރަން މައި އަހަރެންނަށް މިވަރުގެ ގެއްލުމެއް ދޭނެ ކަމަކަށް. މައިއަށް އިވާން ނުލިބުނީތީ އަހަރެންނަށް ލީން ލިބެން އޮތް ހުރިހާ ޗާންސެއް ތި ނަގާލީ.. ދިސް އިޒް ޓޫ ހާރޝް އޮފް އަ ރިވެންޖް. އީވެން ޓު ސަމްވަން ލައިކް މީ" ނަދާލްގެ އަރުތެރެ ހިކިގެންގޮސް އަޑުވަނީ ކުރަކިވެފަ އެވެ.
"ނެޑް.. އަޅެ އަހަރެން ބުނެފީމެއްނު މިއީ އަހަރެން އެއްވެސް ކަމަކާ ބަދަލުހިފަން ކުރި ކަމެއް ނޫނޭ.. މީގެ ކުރިންވެސް އަހަރުމެން ދެމީހުންގެ ދެމެދުގަ ކިހާ މައްސަލައެއް ޖެހޭ؟ އަހަރުމެން ހަމަ އަބަދުވެސް ވާހަކަ ދައްކައިގެން އެކަމެއް ހައްލު ކުރަނީއެއްނު؟ ދުވަހަކުވެސް ބަދަލެއް ނުހިފަމެއްނު؟" މައިރާ ދެރަވީ ނަދާލްގެ ވިސްނުން ހުރި ގޮތުންނެވެ.
"ދެން ކީއްވެތަ މައި؟" ނަދާލްއަށް ބަލިކަށިވެފައިވާ އަޑަކުން އަހައިލެވުނެވެ. އޭނާ ރުޅި އަންނަން ބޭނުންވި އެވެ. ހަޅޭއްލަވަން ބޭނުންވި އެވެ. އެކަމަކު އެ ހަކަތައެއް ނުލިބުނެވެ.
"ނެޑް އަދިވެސް ހަމަ ތިހެންތަ ތި އަހަނީ؟ އަޅެ ނެޑްއަށް ހަމަ އޯކޭތަ ލީންއަށް ހުރިހާ ހަގީގަތެއް ފޮރުވައިގެންހުރެ ލީންއާ ކައިވެނި ކުރަން؟" މައިރާއަށް އަހައިލެވުނެވެ.
"ކޮބާތަ އޭގަ މައްސަލައަކީ؟ ހަގީގަތް އެނގިގެން ވަކި އިވާންއަށް ވި އެއްވެސް ކަމަކީ ނުވާ ކަމަކަށް ވެއްޖެތަ؟ އިވާންގެ ދިރިއުޅުމަށް އިތުރު ކުރިއެރުމެއް އައިސްފިތަ؟ އިވާން ވަކި މައި ބަލައިގެންފިތަ؟" ނަދާލްވެސް ރައްދުގައި ސުވާލުކުރި އެވެ.
"އެޔެއް ނޫނެއްނު ޕޮއިންޓަކީ ނެޑް؟ ލީން އެހާބޮޑު އަނދިރި ކަމެއްގެ ތެރޭގަ ބަހައްޓައިގެން ލީންއާ ކައިވެނި ކުރީމަ ނެޑް އެކަމާ ގިލްޓީ ނުވާނެތަ؟ އެ ހަގީގަތް ފަޅާއަރައިގެން ލީން ދާ ދުވަހުން މާ ދެރަ ނުވާނެތަ؟" މައިރާ ބޭނުންވީ ނަދާލްއަށް ވިސްނައިދޭށެވެ.
"ގިލްޓީވިޔަސް ލޫނާ ހުންނާނީ އަހަރެންގެ ގާތުގައެއްނު؟ ލޫނާއާ ނުލައި އުޅުމަށްވުރެ އެ ގިލްޓާއެކު އުޅުންވެސް އަހަރެންނަށް ފަސޭހައޭ. މި ހުރިހާ ދުވަހުވެސް އުޅުނީނު؟ ފަހުންވެސް މައި ނުބުނަންޏަކާ ލޫނާއަށް އެކަން އެނގޭނެ އެއްވެސް ގޮތެއް ނޯންނާނެ! ހަމަ ގައިމުވެސް އިވާން ނުބުނާނެކަން އަހަރެންނަށް އެނގޭވިއްޔަ!" ނަދާލް އެއްބަހެއްނުވި އެވެ. އިސާހިތަކު އެ ދެމެދުގައި ހޫނު ޒުވާބެއް ފެށިގެން ހިނގައްޖެ އެވެ.
"ދެން ނެޑް ތި ބުނަނީ ލީންގެ ނަޒަރުގަ އިވާން މުޅި އުމުރަށްވެސް ބަހައްޓަންވީ ރޭޕިސްޓެއް ގޮތުގައޭތަ؟ ހައު އިޒް އިޓް ފެއަރ ޓު އީދަރ އޮފް ދެމް؟ ނެޑްއަށްވެސް އެނގޭނެ މިހާރު އިވާންގެ ގޮތް. އިވާން ކަހަލަ މީހަކަށް ހަމަ ހައްގު މިންވަރުތަ އަމިއްލަ ކޮއްކޮ އޭނައާމެދު އެހާ ދަށް ފެންނަވަރެއްގަ ވިސްނުމަކީ؟" މައިރާއަށް އިނދެވުނީ ނަދާލްގެ ވާހަކަ ގަބޫލު ނުކުރެވިފަ އެވެ.
މައިރާގެ ބަސްތަކުން މިފަހަރު ނަދާލްގެ ދުލުގައި ގޮށެއް ޖެހުނެވެ. މައިރާ އެ ބުނާ ފަދައިން އައިލީން އިވާންއާމެދު އެފަދަ ގޮތަކަށް ދެކެން ދޫކޮށްލައިގެން ހުރުން ވީހީ ވަރަށްބޮޑު ބޭއިންސާފަކަށެވެ. ފާފައަކަށެވެ. ޙުދު ނަދާލްގެ ޟަމީރުވެސް އެފަދަ ކަމަކާ ދެކޮޅުހެދި އެވެ. އަނެއް ކޮޅުން މައިރާއަށް ދޭނެ ރައްދަކާމެދު ވިސްނައިވެސް ނުލެވެނީސް މޭޒުމަތީގައި އޮތް އޭނާގެ ފޯނު ރިންގުވާން ފަށައިފި އެވެ. ޑިސްޕްލޭއަށް އަރާފައިވާ އިވާންގެ ނަން ފެނުމުން އޭނާ ލަސްނުކޮށް ފޯނަށް ޖަވާބު ދިނެވެ. އަދި ހައެއްކަ ސިކުންތު ވަންދެން އިވާންދެއްކި ވާހަކައަށް "އެންމެ ރަނގަޅޭ" ބުނެލުމަށްފަހު ފޯނު ކަނޑައިލަމުން ގޮނޑިން ތެދުވި އެވެ.
"ކިހިނެއްވީ؟ ކާކު ގުޅީ؟" މައިރާ ހައިރާންވެފައި އެއްސެވެ. އޭނާ އެހާ ވަރަށް ކުރި މަސައްކަތުންވެސް ނަދާލް ދެންމެ އިންތަނުން ގުޑައި ނުލިވިއްޔާ އެވެ.
"އިވާން އެބަ އަރާ މައްޗަށް. އައިލީންގެ ބައެއް އެއްޗެހި ބަލާ. ޓަކި ޖެހީމަ ހުޅުވާލައްޗޭ" ނަދާލް އެހެން ބުނެ އެޕަރޓްމެންޓްގައި ހުރި މޮނިޓަރުން ގޭގެ މައި ދޮރޯށި ހުޅުވާލާފައިގޮސް ކޮޓަރިއަށް ވަނެވެ.
މިނެޓެއްހާއިރު ފަހުން ބެލް އަޅައިލި އަޑު އިވުނެވެ. މައިރާ އިސްތަށިގަނޑުގައި އަތްފުނާ އަޅައިލާ ރީތި ކޮށްލަމުން ދޮރު ހުޅުވައިލި އެވެ. ހަށިގަނޑުގެ ކަސްރަތީކަން ފާޅުވާވަރަށް ގަޔަށް ހިފާލާފައިވާ ގަދަ ނޫ ކުލައެއްގެ ޖާރޒީއަކާއި ކަޅު ސޯޓެއްގައިހުރި އިވާން ފެނުމާއެކު މައިރާގެ ހަތަރެސްފައި ފިނިވެލި އެވެ. ނިދިބަރުވެފައިވާ އެ ހިތްގައިމު ދެލޮލުން އޭނާއާ ހަތަރުކަޅި ހަމަކޮށްލިގޮތުން މައިރާގެ ހަށިގަނޑުގައިވި ހުރިހާ ލޯލިތައް ކޮޅަށް ޖެހިލި އެވެ.
"މިއީ އަމްމް ނަދާލް…" އިވާންއަށްވެސް ބޭއިޚްތިޔާރުގައި މައިރާގެ ބޮލުން ފެށިގެން ފަޔާ ހިސާބަށް ނަޒަރު ހިންގައިލެވުނެވެ. އެހެން ކޮންމެ ދުވަހެކޭ އެއްފަދައިން މިއަދުވެސް މައިރާ އޮފީހަށް ދާން ތައްޔާރުވެލައިގެން ހުރިގޮތް އޭނާއަށް ނުހަނު ކަމުގޮސްފި އެވެ. ކޮނޑުގައި އޮތް ބޫޓު ދަބަސް އެޕަރޓްމެންޓްގެ ބޭރުގައި ބަހައްޓައިލުމަށްފަހު އޭނާ އެޕަރޓްމެންޓްގެ ދޮރުން އެތެރެއަށް ވަނެވެ. އެއާއެކު ހިނދުކޮޅަކަށް ނަމަވެސް މައިރާއާ ދެމެދު އޮތް ޖާގަ ހަނިވެގެން ދިޔުމާއެކު ބޮޑު ނޭވާއެއް އެތެރެއަށް ދަމައިލެވުނީ މައިރާ ޖަހާފައިވާ ޝަނެލް ސެންޓުގެ މީރުވަސް ސިކުނޑީގައި ހަރުލައްވައިލަމުންނެވެ.
"ނެޑް އެ ވަނީ ކޮޓަރިއަށް. އެއްޗެހި ހަމަކޮށްލަންހެން ހީވަނީ. އިވާން އިށީނދެލަންވީނު؟ ކޮފީ؟" މައިރާ ދެއަތް ދެއަތާ މޮޑެމުންގޮސް މޭޒުމަތިން ނެގި ކޮފީތަށި އިވާންއަށް ދިއްކޮށްލި އެވެ.
އިވާން ކޮފީތަށީގައި ހިފަމުން އެޕާރޓްމެންޓްގެ ކަނުން ކަނަށް ނަޒަރު ހިންގައިލި އެވެ. އޭނާއަށް މީގެ ކުރިންވެސް އެ ގޭގެ ދެ އެޕަރޓްމެންޓަކަށް ދެވިފައި ވެއެވެ. މައިރާމެން އުޅޭ އެޕަރޓްމެންޓާއި މަލަކްމެން އުޅޭ އެޕަރޓްމެންޓަށެވެ. އެ ދެ އެޕަރޓްމެންޓަށްވުރެ މި އެޕަރޓްމެންޓްގެ ޖާގަ ކުޑަވެފައި "މިނިމަލިސްޓް" ގޮތެއް ހުރި ކަމުގައިވިޔަސް މިތަން މާ ބޮޑަށްވެސް ހިތްގައިމެވެ. ތަނުގައިވާ ކުލަތަކާއި ބޭނުންކޮށްފައިވާ ފަރުނީޗަރުތަކުގެ އިތުރުން ބޮކިތަކުންވެސް ހާމަވަނީ ނަދާލްގެ ފާޑުވެރިކަމެވެ. ތަނަވަސްކަމަށް ލޯބިކުރާ މިންވަރެވެ. ހިތާހިތުން ނަދާލްގެ ހޮވުންތަކަށް ތައުރީފު ކުރަމުން އޭނާ ނުކުމެލީ ބެލްކަންޏަށެވެ. އެތަނުގައި މަޑުކޮށްލިތާ މާ އިރެއް ނުވަނީސް ނަދާލް ކޮޓަރިން ނުކުތް އަޑު އިވުމުން އެދިމާލަށް ހިނގައިގަތެވެ. އޭރު ނަދާލް ލަސް ހިނގުމެއްގައި އައިސް އަތުގައިހުރި ފޮށި ސޯފާ މަތީގައި ބަހައްޓައިލަނީ އެވެ.
އިވާން އެ ފޮށީގައިހުރި އެއްޗެއްސަށް ނަޒަރު ހިންގައިލި އެވެ. ހުދާއި ކަޅުގެ ސެފޯރާ ކޮތަޅެއްގެ ތެރޭގައި ހުރީ އައިލީންގެ މޭކަޕް ސާމާނާއި ރީތިވާ އެއްޗެއްސެވެ. ދެން ކެންވަހެއްގައި ކުރަހާފައިވާ ރީތި ކުރެހުމަކާއި ފޯނުގެ ޗާރޖަރާއި ވާހަކަ ފޮތް ތަކެކެވެ. އޭނާ ބަލަން ހުއްޓައި ނަދާލް ކޮފީ މޭޒު މަތީގައި އޮތް ދެ ވާހަކަފޮތްވެސް ނަގައި އެ ފޮށްޓަށްލި އެވެ.
ޒިބު އަޅުވައިލުމުގެ ކުރިން ނަދާލް އިރުކޮޅަކު އެ ފޮށްޓަށް ބަލަހައްޓައިގެން އިނީ އޭގައިވާ އައިލީންގެ ހަނދާންތަކަށް އަލްވަދާއު ކިޔަން ބޭނުން ނުވެފައި ކަހަލަ އެވެ. އެންމެފަހުން އޭނާ އެ ފޮށި ލައްޕައި ޒިބު އަޅުވައިލީ އޭގަށް ފަހުން ލީ ދެ ފޮތުގެ ތެރެއިން އެއް ފޮތް ނަގައިފަ އެވެ. އައިލީންގެ ހުރިހާ ހަނދާނެއް ދޫކޮށްލަން އޭނާގެ ހިތް އެއްބަސްނުވީ އެވެ. އިވާން އެކަމާމެދު އެއްޗެކޭ ނުބުނެ ނަދާލް ދިއްކޮށްލި ފޮށީގައި ހިފައި ބިންމަތީގައި ބަހައްޓައިލި އެވެ.
"އަހަރެންވެސް އެބައޮތް ލީން ދިން އެއްޗެއް ހަވާލުކުރަން ޖެހިފަ" އިވާން އޭނާ ލައިގެންހުރި ސޯޓުގެ ޖީބަށް އަތް ކޮށްޕައިލަމުން ނެގީ ނަދާލް އައިލީންގެ އަތުގައި އަޅުވައިދިން އަނގޮޓި އެވެ. ނަދާލް އެ އަނގޮޓީގައި ހިފަން ދެކޮޅު ހަދަމުން ދުރަށް ހިނގައިގަތް މަންޒަރު ފެނި އޭނާގެ ހިތުގައި ނަދާލްއާމެދު ހަމްދަރުދީ އުފެދުނެވެ. ދައްކަން އައި ވާހަކަވެސް ފަސްކޮށްލުމަށްފަހު މައިރާގެ އަތަށް އެ އަނގޮޓި ދީފައި ނުކުތެވެ.
މައިރާ ލަސްހިނގުމެއްގައިގޮސް ފަސް އެނބުރިގެން ހުރި ނަދާލްގެ ކޮނޑުގައި އަތް ޖަހައިލި އެވެ. ނަދާލްގެ ފަރާތުން ހަރަކާތެއް ނުފެނުމުން އޭނާ އިވާން ދިން އަނގޮޓި ނަދާލްގެ އަތު ތެރެއަށް ލައިދިނެވެ. އޭރުވެސް ނަދާލްގެ އަތުގައި މަޑު ތުރުތުރެއް ހަރުލާފައި ހުރިކަން މައިރާއަށް ފާހަގަވި އެވެ. އޭނާ އަވަސްއަވަހަށް އެޕަރޓްމެންޓުން ނުކުތީ ނަދާލްއަށް ދޭނެ ހިތްވަރުގެ ބަހެއް ދުލާ ހިސާބަށް ނައުމުންނެވެ. އެހެންނޫނަސް އޭނާ ބުނާ އެއްޗަކުން ނަދާލް އިތުރަށް ދެރަވެ ރުޅި އައުން ނޫންކަމެއް ނުވާނޭކަން އޭނާއަށް އެނގެ އެވެ.
މައިރާ ގޭގެ މައި ދޮރާށިން ނުކުތްއިރު އިވާން އެ މަގުގެ ކަންމައްޗެއްގައި މަޑުކޮށްލައިގެން ހުއްޓެވެ. އެކަމަށް ސަމާލުކަން ނުދީ ވޭތޯ ބަލަމުން އޭނާ ގަރާޖާ ދިމާލަށް ހިނގައިގަތެވެ. ގަރާޖުން ކާރު ނެރެގެން ނުކުތްއިރުވެސް އިވާން ހުރީ ހަމަ އެ ހުރިތަނުގައި މަޑުކޮށްލައިގެނެވެ. ފޯނަށް ބަލަހައްޓައިގެން ހުރިގޮތުން ކާރެއް ހޯދަން މަސައްކަތް ކުރަނީކަން ޔަގީން ކުރެވުނެވެ. ހިނގައިދިޔަ ހުރިހާ ކަމަކަށްފަހު އިވާން އެ އުޅެނީ ނުނިދައިކަން އޭނާއަށް ޔަގީންވެ އެވެ. އެ ވަރުބަލިކަންމަތީ ކާރެއް ލިބެންދެން ހުންނަން ޖެހޭނީ ކިހާއިރަކު ކަމެއްވެސް ނޭނގެ އެވެ.
މައިރާގެ ހިތަކަށް ކެތެއް ނުވި އެވެ. ގޮތް ދޫކުރުމަށްފަހު އިވާންގެ ގާތަށް ކާރު މަޑުކޮށްލަމުން ކާރުގެ ބިއްލޫރިގަނޑު ތިރިކޮށްލި އެވެ. "މި މަގަކަށް ފަސޭހައިން ކާރެއް ނުލިބޭނެ. ކޮންތާކަށް ދަނީ؟" އޭނާ އަހައިލި އެވެ.
"ހުޅުމާލެއަށް" އިވާންގެ ޖަވާބު ކުރެވެ.
"އަހަރެންވެސް އޮފީހަށް މި ދަނީ. ގެންގޮސް ދެވިދާނެ" މައިރާ ބުންޏެވެ.
އިވާން ނުހަނު ފަސޭހައިން މައިރާގެ ހުށަހެޅުން ގަބޫލުކޮށް ކާރަށް އެރިގޮތުން މައިރާ ހައިރާންވެސްވި އެވެ. ނޫންނަމަ އެވަރުގެ ކުޑަ ކަމެއްގައިވެސް އިވާން އޭނާއާ ޖަދަލު ކުރާނެ އެވެ. އޭނާ އިވާން ކިޔައިދިން ގޮތަށް ކާރުގެ ޖީ.ޕީ.އެސްގައި ދާންވީ ތަން ފާހަގަ ކޮށްލި އެވެ.
"ނިންމާފަ އިތުރު ތާކަށް ގެންގޮސްދޭން ޖެހޭތަ؟ ކުޅެން ދާން ރެޑީ ވެގެން ހުރީމަ.." މައިރާ ކާރު ދުއްވައިލަމުން އަހައިލި އެވެ.
"ނޫނޭ… ޝޯން އަންނާނެ ބަލާ.." އިވާން އާދައިގެ ގޮތަކަށް ބުނެލި އެވެ.
"މިއަދު ހަމަ ދާންތަ؟ ވަރަށް ނިދިބަރުވެފަ ހުރިހެން ހީވަނީ. ރޭގަ ނުނިދަން ދޯ؟" މައިރާގެ އަޑުގައިވި ކަންބޮޑުވުން ސިއްރެއްނުވެ އެވެ.
"ފަތިސް ނަމާދު ކޮށްގެން އިރުކޮޅަކަށް ޖައްސާލިން. ދެން ކުޑަކޮށް ދުވެލީމަ ނިދި ފިލައިފާނެ. އަވި ނިވާލާފަ އޮތް ދުވަހެއްވީމަ ނުގޮސް ދޫކޮށްލާނީ ކިހިނެއް؟ އެހެންނޫނަސް ޝޯންވެސް އައިސް އުޅޭ އިރަކު ދެވޭނީ.." އިވާން މިއަދު މައިރާގެ ކޮންމެ ސުވާލަކަށް ޖަވާބުދެމުން ދިޔައީ އެހެންޏާ ނުދޭހާ ރީތިކޮށެވެ. ފަހަރެއްގައި އިއްޔެ މައިރާ ދެއްކި ވާހަކަތަކުން އޭނާއަށް އަސަރެއް ކުރީ ކަމުގައި ވެދާނެ އެވެ.
"އައިމް ގްލޭޑް" މައިރާ ހިނިތުންވެލި އެވެ. އެއާއެކު އިވާންގެ މޫނުމަތީގައި ސުވާލުމާކު ޖެހިގެން ދިޔަތަންފެނި މައިރާ އަނެއްކާވެސް ވާހަކަދެއްކި އެވެ.
"އައި މީން… އަހަރެންނަށް އެނގޭ އިވާން ވަރަށް ކުރާ ހިތުން ކުރާ ކަމެއްކަން ތިއީ.. ރަށުގަ އުޅުނު އިރުވެސް އަހަރެންނަށް އަބަދުވެސް އިވާން އެންމެ އުފާވެފަ ހުންނަތަން ފެންނަނީ ފުޓްސަލް ކުޅެންދާ ދުވަސް ދުވަހު. ސޯ އައިމް ގްލޭޑް ޔޫ އަރ ފައިނަލީ ސީކިންގް ހެޕިނެސް އަގައިން" މައިރާ ހިނިތުންވެލި އެވެ.
"ހެހެ. އޭރު އެ ފެނުނު އުފާވެރިކަން ފުޓްސަލްއާ ތި ގުޅުވީ ކިހިނެއްހޭ؟ ފަހަރެއްގާ އަހަރެން އުފާވާނެ އެހެން ސަބަބެއް އޭރު އޮތީ ވެދާނެއެއްނު؟" އިވާން ހިތި ހިނިތުންވުމަކާއެކު ބުންޏެވެ.
"ތިބުނީ؟" މައިރާގެ ބުމަ ގޮށްޖެހުނެވެ.
"އައިމް އާސްކިންގް ޔޫ... އިޒް ދެޓް ރިއަލީ ދަ ހެޕިއެސްޓް ޔޫ ހޭވް ސީން މީ؟" އިވާންގެ ސުވާލު ނަގައިގަނެވުމާއެކު މައިރާއަށް މަޑުމަޑުން ބޯ ހަރަކާތްކޮށްލައި އިވާންއާ ހަތަރުކަޅި ހަމަކޮށްލި އެވެ. އެހެނަސް އެ ދެލޮލުން ފެނުނު އަސަރާއެކު ދެވަނަ ސިކުންތުގައި އަވަސްއަވަހަށް މަގަށް ސަމާލުކަން ދިނެވެ.
އާނއެކެވެ. އިވާން އެއަށްވުރެން މާ އުފާވެރިކޮށް ފެނުނު ކިތަންމެ ހިނދުކޮޅެއް އޭނާގެ ހަނދާނުގައި އެބަ ހުއްޓެވެ. އިވާން އޭނާއަށް ލޯބި ހުށަހެޅި ރޭ އެ ހުށަހެޅުން އޭނާ ގަބޫލުކުރުމުން އިވާންގެ މޫނުމަތިން ފެނުނު އުފާވެރިކަމެވެ. ދެމީހުން އެކުގައި އެންމެ ފުރަތަމަ އަދި ފަހު ފަހަރަށް ތުނޑިއަށްގޮސް އިރުއޮއްސޭ މަންޒަރު ބަލާލި ދުވަހު އެ މޫނުމަތިން ފެނުނު އުފާވެރިކަމެވެ. އިވާންގެ އަތުތެރޭގައި އޭނާ ބައިންދާލައިގެން އިނދެ ބެލްކަނީގައި ވާހަކަދެއްކި ކޮންމެ ރެއަކު އެ މޫނުމަތިން ފެނުނު އުފާވެރިކަމެވެ. އެ އުފާވެރިކަން އިވާންގެ މޫނުމަތިން ދެކިލަން އޭނާ އަދިވެސް ބޭނުމެވެ. އެއީ ދެން އޭނާއަށް ފެންނާނޭ މަންޒަރެއް ނޫންކަން އެނގޭ ހާލުގައިވެސްމެ އެވެ. ކޮންމެވެސް ދުވަހަކުން އިވާންގެ ހިތް އަނެއްކާވެސް ލޯތްބަށް ހުޅުވާލައިފިނަމަ އެ ހިތާ ހަމައަށް ވާސިލްވެވޭ އެހެން ކުއްޖަކަށް އެ ހިނިތުންވުން ފެނިދާނެއެވެ. ހަމަ ގައިމުވެސް އެ ނަސީބެއް ދެން އޭނާއަކަށް ނުލިބޭނެ އެވެ.
"ލީން ކިހިނެއް؟" މާ ބޮޑަށް ޖަޒުބާތީ ވެވިދާނެހެން ހީވުމުން މައިރާ ވާހަކައިގެ މައުޟޫއު ބަދަލުކޮށްލި އެވެ.
"ލީންވެސް ވަކި ރަނގަޅެއް ނޫން. ރޭގަވެސް ވަރަށް ދެރަވެފަ ހުރީ" އިވާން ޖަވާބު ދިނެވެ.
"ކީއް ކުރާނީ؟ އަހަރެންވެސް ވަރަށް ބޭނުން ލީން ނެޑްއަށް މަޢާފުކުރަން" މައިރާ ބުންޏެވެ. އޭރު އެމީހުންނަށް ވަނީ ބްރިޖް ހުރަސްކޮށް ހުޅުމާލޭގެ މަލަމަތި ފެންނަ ހިސާބަށް އާދެވިފަ އެވެ.
"އަހަރެންނަށް ތި ކަމަކާ އެއްބަހެއް ނުވެވޭނެ. އަހަރެންނަށް ކޮންމެ ގޮތެއް ހެދިޔަސް ނަދާލް އެ ކަންތައްގަނޑުގެ ތެރެއަށް ލީން ވެއްދުން އަހަރެންނަކަށް ގަބޫލެއް ނުކުރެވޭ. މިއަދު ނަދާލްއާ އެކަމުގަ ދެބަސްވާން ހިތުލައިގެން ދިޔައީވެސް އެކަމަކު އޭނަ ހުރިގޮތް ފެނިފަ އެއްޗެކޭ ނުބުނީ" އިވާންގެ އަޑަށް ހަމަ ކުއްލިއަކަށް ހިތްހަމަނުޖެހުމުގެ އަސަރު ވެރިވެއްޖެ އެވެ. "އަހަރެންނަށް ލީން ކިޔާދިން ނަދާލްއާ ފުރަތަމަ ދިމާވި ގޮތް"
"އޯހް ޔޫ މީން؟ ނޯ ނޯ.." މައިރާއަށް އިވާން އެ ދައްކަނީ ކޮން ވާހަކައެއްކަން ނަގައިގަނެވި ކުށްހީ ފިލުވައި ދިނުމަށް އަވަސްވެގަތެވެ. "އިވާންއަށް އަދި ތި ހީވަނީ ގޯސްކޮށް. ނެޑް އެއްވެސް އިރަކު ޕްލޭނެއް ނުކުރޭ ލީން މި ކަންތައްގަނޑުގެ ތެރެއަށް ވައްދާކަށް. އެ ދެމީހުން ރިސޯޓުން ދިމާވުމަކީ ހަމަ އިއްތިފާގެއް. އޭރުވެސް ނެޑް އަހަރެންގާތު ކީ ކޮންމެވެސް ލޫނާއެއްގެ ވާހަކަ. އަހަރެން ފުރަތަމަ ހީކުރީވެސް އެއީ ބޭރު ކުއްޖެއްކަމަށް. ނެޑްއަށް އެއީ އިވާންއާ ގުޅުންހުރި މީހެއްކަން އެނގުނީ އެ ބާބެކިއުގެ ތެރެއިން. އަދި އަހަރެންނަށް ނެޑްގެ ލޫނާއަކީ ލީންކަން އެނގުނީ ދޮންބެއާ ޖެހުނު މައްސަލަގަނޑުގެވެސް ފަހުން. ޝީ ވޯޒް ނެވަރ އަ ޕާރޓް އޮފް އަވަރ ޕްލޭން އިވާން. ހަމަ ހުވާ މި ކު-"
"އެކަމަކު ނަދާލް އޭރުވެސް އުޅުނީ ޒެފަންގެ ކޮއްކޮއާ އެންގޭޖް ވެގެންނު؟ އެކަން އަމިއްލައަށް އެނގިހުރެ އޭނަ ހަމަ ރީއްޗަށްވެސް ލީންގެ ދިރިއުޅުމާ ކުޅެލީއެއްނު؟" އިވާންއަށް މައިރާގެ ވާހަކަ ކަމަކު ނުދިޔަ އެވެ.
"ތިކަން އޮތީ ތިހެން. އެކަމަކު އަހަރެންނަށް އެނގޭ މިންވަރަކަށް ބުނެދީފާނަން. ނެޑް އެއްވެސް އިރަކު އިޒޫދެކެ ލޯތްބެއް ނުވޭ.. އެމީހުންގެ އެންގޭޖްމެންޓަކީ ބިޒްނަސް ޑީލެއް. ނެޑްއަކަށް ނުކެރޭނެ ކާފަ ބުނާ ކަމެއްގަ ދުވަހަކުވެސް ނޫނެކޭ ބުނާކަށް. އަސްލު އެނގޭތަ؟ ކާފައާއި ބޮޑުބެ އިޓަލީއަށް ދިޔަ ދަތުރެއްގަ އެޑޮޕްޓްކޮށްގެން ގެނައި ކުއްޖެއް ނެޑް އަކީ.. ޔެސް.. ހީ އިޒް އެކްޗުއަލީ އެޑޮޕްޓެޑް. އޭރު ނެޑް އިންނާނީވެސް ވަރަށް ނެގި މަޑުވެފަ. އެއްވެސް މީހަކާ ވާހަކައެއް ނުދައްކާނެ. ދައްކަންވެސް ނޭނގެނީ. ނެޑްއަށް އޭރު އެނގޭ ހަމައެކަނި ބަހަކީ އިޓަލީބަސް. އިންގްލިޝްވެސް ނޭނގެންޏާ އަހަރުމެންނަކަށްވެސް ވާހަކައެއް ނުދެއްކޭނެތާ؟ ކާފަ ޓިއުޓަރއެއް ގެނެސްގެން އިންގްލިޝް އެންޑް ދިވެހި ދަސްކޮށްދޭން ފެށި ފަހުން ކިރިޔާވެސް މީހަކަށް ނެޑްއާ ވާހަކަ ދެއްކެން ފެށީ. ދެން އެހެންވެ އަހަރެންނާއި ޒެފްގެ ގްރޭޑަކަށްވެސް ނޫން ނެޑް ވައްދަން ޖެހުނީ.. ކުރިން ނުކިޔަވާ ހުރީމަ ވަކި ވަރަކަށް ގޭގަ ހޯމް ސްކޫލް ކޮށްފަވެސް ދަށް ގްރޭޑަކަށް ވައްދަން ޖެހުނީ. އެކަމާހުރެ ސްކޫލްގަ އިންނާނީ އަދި ވަކިން މަޑުން. އެހިސާބުން އިޒޫއާ ދިމާވީ" މައިރާ ކިޔައިދިނެވެ. "އިޒޫ އޭރުއްސުރެން ނެޑް ދޫކޮށް ނުލާ. ޝީ ވޯޒް ހިޒް ކްލާސް މޭޓް، ހިޒް ބެސްޓް ފްރެންޑް.. އެވްރީތިންގް. ވަކި ހިސާބަކުން ނެޑް އެއް ގްރޭޑް ސްކިޕް ކޮށްފަ އަހަރުމެންގެ ގްރޭޑަށް ބަދަލުވީމަވެސް އިޒޫ ވަރަށް ޝަކުވާ ކުރި. ނެޑް ވޯޒް އެވްރީތިންގް ޓު ހަރ އެހެންވެ އިޒޫގެ ފެމިލީއިން އެ އެންގޭޖްމެންޓް ޕްރޮޕޯޒް ކުރީ. ބަޓް ޓު ނެޑް ޝީ ވޯޒް އޯލްވޭޒް އަ ފްރެންޑް"
"ކޮންމެ ހާލަތެއްގަ ވެވުނު އެންގޭޖްމެންޓަކަސް ނަދާލް ޖެހޭނެ އިޒޫއަށް އެ އިޚްތިރާމް ދޭން. މުއްސަނދިންނަށް ހީވަނީ ދޯ ލޯތްބާއި، އެކުވެރިކަމާއި، ކައިވެންޏަކީ ކުޅޭ ކުޅިވަރެކޭ؟" އިވާންގެ ފަހު ސުވާލާއެކު މައިރާ ހިމޭންވި އެވެ. އެއީ ކޮންމެހެން ނަދާލްއަށް އެކަނި ރައްދުކުރި ބަހެއް ނޫން ކަމާއި، އޭނާއަށްވެސް ޖަހައިލި ބަހެއްކަން މައިރާ ދެނެގަތެވެ. ހަމަ އެހެންމެ އިވާން ރުޅި އައިސްފައިހުރި މިންވަރުވެސް އޭނާއަށް އަންދާޒާ ކޮށްލެވުނެވެ. ބުމަ ގޮށްޖަހާލައިގެން އިންއިރު އިވާންގެ ކަތުރު ކަށިގަނޑު ހީވަނީ ބާރުކޮށްލެވިފައި ހުރިވަރުން ދެންމެ ދެންމެ ނައްޓައިގެން ހިނގައިދާނޭ ހެނެވެ. އައިލީންއަކީ އިވާންގެ ރަތް ރޮނގުކަން އޭނާއަށް ވަރަށް ރަނގަޅަށް އެނގެ އެވެ. ވުމާއެކު އޭނާ އިތުރަށް ބުނާ އެންމެ ބަހަކުންވެސް އެ ރުޅިގަނޑު ކެކިދާނޭކަމުގެ ބިރުގައި މައިރާއަށް އިނދެވުނީ ހަށިފުރާ ނޭވާއެއްވެސް ލާން ނުކެރިފަ އެވެ. ކިރިޔާވެސް ހަމަޖެހިލެވުނީ އެވަގުތު އިވާންގެ ފޯނަށް އައި އައުޒަމްގެ ކޯލަށް އިވާންގެ ފުރިހަމަ ސަމާލުކަން ހުސްވުމުންނެވެ.
"އަހަރެން އޭނަގާތު ބުނެފަ އޮންނާނީ އެކަމާ ވާކަށް ބޭނުމެއް ނޫނޭ. ބުނޭ އަހަރެން ނޫޅެއޭ އަހަރެން ހޯދަން ނާންނާށޭ. އޯކޭ.. އޯކޭ މަޑުކުރޭ އަހަރެން ގުޅާނަން" އައިސްފައިހުރި ރުޅީގައި އިވާން އައުޒަމްއާވެސް ވާހަކަދެއްކީ ނުހަނު ހަރުކަށި ކޮށެވެ. އަދި ވޮލެޓުން ނެގި ކާޑުގައި އޮތް ނަންބަރު ފޯނުގައި ޖަހަންފެށި އެވެ.
"ހުރިހާ ކަމެއް ރަނގަޅުތަ؟ މީހަކު އުނދަގޫ ކުރަނީތަ؟" މައިރާ އަހަން ނާހަން އިނދެފައި އަހައިލި އެވެ.
"ވަޓް ނޯ ނޯ.. ޝީޒް އަ ލޯޔަރ" ނަންބަރަށް ސަމާލުކަން ދެވިފައިވި ވަރުން އިވާންއަށް ބުނެވުނީ މާބޮޑު ވިސްނުމަކާނުލަ އެވެ. ބުނެވުނީ ކީކޭކަންވެސް ރޭކައިލީ މައިރާގެ ޖަވާބު އައި ގޮތުންނެވެ.
"ޝީ؟ ސޯ އިޓްސް އަ ގަރލް" މައިރާ މަގުން ނަޒަރު ވަކިކޮށްލުމަކާ ނުލައި ބުމަ އަރުވައިލި އެވެ. “ގުޑް ފޯރ ޔޫ.. ރީތި ކުއްޖެއްތަ؟” އޭނާ އެ އިން ގޮތަށް އިނދެ ތުންފިއްތައިލި އެވެ. ބޭއިހްތިޔާރުގައި ކާރުގެ ހުންގާނުގައި އަޅުވާލެވިފައިވާ އަތަށްވެސް ބާރެއް ލެވުނެވެ. އޭރު އިވާން އިނީ މައިރާއަށް ވަމުންދިޔަ ހުރިހާ ގޮތެއް ނުހަނު ފަރުވާތެރިކަމާއެކު ބަލާށެވެ.
"ޔާ.. ޔާ އެކްޗުއަލީ.. ވެރީ ޕްރިޓީ" އިވާންއަށް އެއް މިޔަކަނިން ހީނލެވުނެވެ. އޭނާ ބޭނުންވީ މައިރާ އިތުރަށް ތަޅުވައިލާށެވެ.
މައިރާ ގަދަކަމުން ހިނިތުންވެލަމުން ކޮލުގައި ދަތް އަޅައިލީ އެ މައުޟޫއަށް އިވާންއާ ވާހަކަ ނުދައްކަން އަމިއްލަ ނަފްސަށް މަޖުބޫރު ކުރަމުންނެވެ. އިވާންގާތު އޭނާއާ ދުރުން އުޅެން އެދުނީ ޙުދު އޭނާ ވިއްޔާ އެވެ. ވީއިރު އޭނާއަކަށް ދެން އިވާން ކުރާ ކަމަކާ ނުބެހެވޭނެ ނޫން ހެއްޔެވެ؟ ނަމަވެސް އެ ވިސްނުމުގައި އޭނާއަށް އިނދެވުނީ އެންމެ މިނެޓެއް ހާއިރެވެ.
"ކިހާއިރަކުތަ ކުޅެން ދަނީ؟" މައިރާ އަހައިލި އެވެ.
"އޯކޭއޭ ބުނެފީމެއްނު.. އަހަރެން ޝޯންއަށް ގުޅައިގެން-"
"އެނީ ކިއުޓް ގައިޒް ގޮނަ ބީ ދެއަރ؟" އިވާންގެ ޖުމްލަ މެދުކަނޑައިލަމުން މައިރާ ކުރި ސުވާލާއެކު އިވާންއަށް ސިހިފައި ފޯނުން އިސް އުފުލައިލެވުނެވެ. އެއީ ދުވަހަކުވެސް މައިރާ އޭނާއާ ކޮށްފާނެ ކަމަށް ވިސްނާލެވިފައި ނުވާ ސުވާލަކަށް ވާތީ އެ ސުވާލު އިވުނީ ރަނގަޅަށް ކަމާމެދު ޝައްކު ކުރެވުނެވެ.
"ކިހިނެއްވީ؟ އިވާން ދެން އަހަރެންނަށް ޗާންސެއް ނުދޭނެކަން ޔަގީންވަންޏާ އަހަރެންވެސް އެހެން އޮޕްޝަންސް ހޯދަންވާނެ ދޯ؟ އިވާންއަށް އެކަންޏެއް ނޫނެއްނު އެ ފުރުސަތު އޮންނާނީ؟" އިވާން ރައްދެއް ނުދީ އިންނަން ފެށުމުން ދެންވެސް ވާހަކަދެއްކީ މައިރާ އެވެ.
"ތި ބުނަނީ އަހަރެން މައިރާ ގޮވައިގެންގޮސް އެތަނުން މީހަކަށް އިންޓްރޮޑިއުސް ކޮށްދޭށޭތަ؟ އަހަރެން ގޮސް މައިރާ ދައްކާފަ އަހަންވީތަ މިއީ އަހަރެންގެ އެކްސްއޭ މީނައާ ޑޭޓްކުރާނެ މީހަކު އެބަ ހުރިހޭ؟" އިވާން މަލާމާތް އެކުލެވިފައިވާ ރާގެއްގައި އެއްސެވެ.
"އަހަހަ. އިވާން އެއްޗެކޭ ކިޔަން ޖެހޭތަ؟ އިވާންއަށް އެނގެއެއްނު އަހަރެންގެ ޓައިޕް؟ މީހެއް ހުރިތޯ ބަލާލާފަ ބުނީމަ އަހަރެން ބާކީބައި ކުރިއަށް ގެންދާނަމޭ. އައި ތިންކް އައި ކުޑް ކެޗް އެން އައި. ޑޯންޓް ޔޫ؟" މައިރާއަށް އޭނާގެ ނަފްސާމެދު ޔަގީންކަން އޮތް ފަދައިން ދެކޮނޑު އަރުވައިލި އެވެ.
އިވާން ދަތްކުނޑި ވިކައިލަމުން މޫނު އަނބުރައިލީ މައިރާއާ ދުރަށެވެ. މައިރާ އެ ބުނީ ތެދެއްކަން ހުދު އޭނާއަށްވެސް އެނގެ އެވެ. ދުނިޔޭގެ މަޝްހޫރު އެތުލީޓުންގެ ލޯބިވެރިންނާ ގާތްކުރާވަރުގެ ރީތިކަމެއް މައިރާއަށް ލިބިފައިވާއިރު، މާ ބޮޑު މަސައްކަތަކާ ނުލައިވެސް މީހުންގެ ލޮލުގައި މައިރާ އަޅައިގަންނާނޭ ކަމަށް އޭނާއަށް އެއްބަސްވެވެ އެވެ.
ގިނައިރެއްނުވެ ހުޅުމާލޭގެ އުތުރު ފަރާތުގައި ހުންނަ ލަގްޜަރީ އިމާރާތެއްގެ ކުރިމައްޗަށް މައިރާ ކާރު މަޑުކޮށްލި އެވެ. އެއީ މުޅި އެ ސަރަހައްދުގައި ހުރި ހުރިހާ ލަގްޜަރީ އިމާރާތެއްގެ ތެރެއިންވެސް އެންމެ ރަނގަޅު ފެންވަރުގައި ހަދާފައި ހުންނަ ތަން ކަމުން އޭނާ ދެވަނަ ފަހަރަށް ޖީ. ޕީ. އެސްއަށް ބަލައިލީ މިއީ ހަމަ ހަގީގަތުގައިވެސް އިވާންގެ މަންޒިލްތޯ ޔަގީން ކުރުމަށެވެ.
"ލީން ހުންނަނީ މިތާނގަތަ؟" މައިރާ އަހައިލި އެވެ.
"ހްމްމް. އަހަރެންގެ މަންމަގާތު" އިވާން ފަރުވާކުޑަ ރާގެއްގައި ބުންޏެވެ.
"ވާއު.. އާރ ޔޫ ސީކްރެޓްލީ ރިޗް އޯރ ސަމްތިންގް؟" މައިރާ ޝައުގުވެރިކަމާއެކު އަހައިލި އެވެ.
"މަންމައާ ދިމާވިއެއްނު. މަންމަ ކައިވެނި ކޮށްގެން އުޅެނީ ފަރުހާން ފައުޒީއާ" އިވާން ކާރުން ނުކުންނަމުން ބުނެލި ޖުމްލައާއެކު މައިރާ ހަމަ ރަނގަޅަށްވެސް ސިހުނެވެ. އެހެނަސް ފަހަތު ސީޓުގައި އޮތް ފޮށި ނެގުމަށްޓަކައި އިވާން ދޮރު ހުޅުވައިލުމާއެކު އެ ސިހުމުން އަރައިގަންނަމުން އޭނާ ކުޑަކޮށް ފަހަތަށް އެނބުރިލި އެވެ.
"ޔޫ މީން؟ ދި ފަރުހާން ފައުޒީ؟ އެއީ އިވާން މަންމަގެ ފިރިމީހާ؟ ފަރުހާން ފައުޒީއަކީ އިވާންގެ ދޮންބައްޕަ؟" މައިރާ އެއް ސުވާލެއް އެކި ގޮތްގޮތަށް ކުރަން ފެށީ އިވާން އޭނާއާ އެ ކުރަނީ ސަމާސާއެކޭ ހީވުމުންނެވެ. ވާނީވެސް އެހެންތާ އެވެ. ފަރުހާން ފައުޒީއަކީ މާލެއާއި މާލެ ކައިރި ރަށްތަކުގެ ލޯކަލް ފަތުރުވެރިކަމާއި މޫދު ކުޅިވަރުގައި ނަންހިނގާ ވިޔަފާރިވެރި އެކެވެ. އެހެނަސް އެ ވިޔަފާރިތަކަކީ އޭނާ ކަޅުފައިސާ ދޮވުމުގެ ބޭނުމަށް ހިންގަމުންދާ ވިޔަފާރިތަކެއް ކަމާއި، އޭނާގެ ހަގީގީ ތަނަވަސްކަމުގެ ފަހަތުގައި ވަނީ ކޮން ކަންތައްތަކެއްކަން ވިޔަފާރި ދުނިޔެއާއި ސިޔާސީ މައިދާނުގެ އެކަކަށްވެސް އޮޅިފައެއް ނޯންނާނެ އެވެ. އެހެންކަމުން އިވާންފަދަ ލަފާދާރު އުސޫލުތަކެއް ގެންގުޅޭ މީހަކާ އެފަދަ މީހެއްގެ އާއިލީ ގުޅުމެއް އޮތީތީވެސް މައިރާ ހައިރާންވި އެވެ.
"މަންމަގެ ފިރިމީހާއަކަސް އޭނައަކީ އަހަރެންނާ އެއްވެސް ގުޅުމެއް ހުރި މީހެއް ނޫން" އިވާން ކާރުގެ ފަހަތު ދޮރުފަތް ލައްޕައިލީ ފުދޭވަރަކަށް ބާރަށެވެ. އޭނާގެ އަމަލުތަކުން ފެންނަމުންދިޔަ ހިތްހަމަނުޖެހުމުގެ ފަހަތުގައިވަނީ ފަރުހާންއާ ގުޅިގެން މައިރާކުރި ސުވާލުތަކަށްވުރެ ބޮޑަށް އޭގެ ކުރިން ދެއްކި ވާހަކަތަކެވެ.
"އިވާން!" އިވާން އެ އިމާރާތާ ދިމާލަށް ހިނގައިގަތް ވަގުތު މައިރާ ކާރުން ފޭބުމަށްފަހު އިވާންއަށް ގޮވައިލި އެވެ. އިވާންއަށް އެ އަޑު އިވުމުން މައިރާއާ ގާތަށް ޖެހިލިނަމަވެސް އޭނާ ދެންވެސް ހަތަރުކަޅި ހަމަކުރާކަށް ނޫޅުނެވެ. އަތުގައިހުރި އައިލީންގެ ފޮށި އެ ދެމެދަށް ހުރަސްކޮށްލަމުން ދުރު ބަލައިލި އެވެ.
"އެ ވާހަކަ ދެއްކީމަ ރުޅި އައީތަ؟" މައިރާ އަހައިލި އެވެ
"ޕްފްފްޓް. އަހަރެން ކޮންކަމަކާ ރުޅި އަންނަންވީ؟ މައިރާ ބޭނުން މީހަކާ ބޭނުން ވާހަކައެއް ދައްކައިގެން ބޭނުން މީހަކާ ރައްޓެހިވާންވީނު" އިވާން ޖަވާބު ދިނެވެ.
"އޯހް އަމްމް. އަހަރެން އަސްލު ބުނީ ފަރުހާންގެ ވާހަކަ" މައިރާގެ ތުންފަތަށް ވެރިވި ހިނިތުންވުން ވަނީ އިވާންއަށް ފޮރުވިފަ އެވެ. "ބަޓް ދެޓް މޭކްސް މީ ވޮންޑަރ ނައު.. އިވާން... ޑިޑް ޔޫ ގެޓް ޖެލަސް؟" މައިރާ ކުރިއަށް ފިޔަވަޅެއް އަޅައިލަމުން އިވާންގެ މޫނުގައި ހިފައި އޭނާއާ ދިމާލަށް އަނބުރައިލި އެވެ.
"ވަޓް؟ ހެހެ.. އަހަރެން؟ ލައިކް އައި ސެޑް.. މައިރާ ބޭނުން މީހަކާ ރައްޓެހިވާންވީނު. ވަޓްސް އިޓް ޓު މީ؟" އިވާންގެ އަޑަށް ސާބިތުކަން ވެރިކޮށްލި ނަމަވެސް އޭނާހެ ބަނޑުގައި ކޮކާލުގެ ލަޝްކަރެއް އުދުހެމުންދިޔަ ކަހަލަ އެވެ. އެހާ ދުވަހަށްފަހު މައިރާގެ އަތުގެ ބީހުން އެ މޫނަށް އިހުސާސްވުމުން އެ އަތުގައި ބޮސްދޭން އޭނާގެ ހިތް އެދެމުންދިޔަ އެވެ.
"ބަޓް އައި ތިންކް.. ޔޫ އަރ އަ ލިޓްލް ބިޓް ޖެލަސް" މައިރާ ކުޑަކޮށް ކޮރައިލަމުން އިވާންގެ މޫނާ މޫނު ގާތްކޮށްލި އެވެ.
އިވާންއަށް ހީވީ އޭނާގެ ބަނޑުގައި ކޮކާތައް ހިތާ ހަމައަށް ފޯރައި މުޅި ހަށިގަނޑަށް ފެތުރިގަތް ހެނެވެ. ބިރެއް ފެނުނު ފަދައިން ފަހަތައް ދެތިން ފިޔަވަޅު އަޅައިލަމުން ކަރުކެހިލި އެވެ. "ބޭނުން ގޮތަކަށް ގަބޫލު ކުރޭ.. އައި ޑޯންޓް ކެއަރ" މައިރާއާ ދުރަށް ހިނގައިގަންނަމުން އޭނާ އަވަސްއަވަހަށް ބުންޏެވެ.
މައިރާ ލުއި ހުނުމަކާއެކު ބޯ ހޫރައިލި އެވެ. އިވާން ގޮސް އެ އިމާރާތަށް ވަތްތަން ބަލަން ހުރުމަށްފަހު ކާރަށް އަރައި ލަސް ދުވެއްޔެއްގައި ކާރު ދުއްވައިލި އެވެ. ތަންކޮޅަކަށް ދެވުނު ތަނާހެން އެ މަގުގައިހުރި ބަސްހުއްޓިއަށް މަޑުކޮށްލައިގެން އޮތް ބަހުގެ ފަހަތުގައި ކާރު މަޑުކޮށްލަން ޖެހުނެވެ. ކެތްތެރިކަމާއެކު ބަހަށް މީހުން އަރަމުންދިޔަ މަންޒަރަށް ގެއްލިފައި އިންދައި އޭނާގެ ބޮލުގައި ގޯސް ގޮތަކަށް ރިއްސައިލި އެވެ. ބޭއިޙްތިޔާރުގައި މަގުގެ އެއްފަޅީގައިހުރި ފިތުރޯނު ގަސްތަކަށް ބަލައިލެވުމާއެކު ހަނދާނުގައި ކޮށްޓައިލީ ދެތިން އަހަރު ކުރިން މަލަކް އޭނާގާތު ދައްކާފައިވާ ވާހަކަ ތަކެކެވެ. ދުވެފައި އައިސް މަލަކް އިން ބަހަށް އެރި ޒުވާނާގެ ވާހަކަ އެވެ. އެ ޒުވާނާގެ ފައިން ލޭ ކޮށި، ނިތުން ދާތިކި ހިލިފައިވި ގޮތުން އެއީ ބަޔަކަށް ފިލަންވެގެން ދުވި މީހެއްކަން މަލަކް ޔަގީންކަމާއެކު ބުނި ކަމެވެ. އެ ޒުވާނާއަކީ އިދާންކަމާއި، އިދާން އެރޭ ފިލަން ދުވި ސަބަބު އިވާން އޭނާއަށް ވަނީ ކިޔައިދީފަ އެވެ. ވީއިރު އިދާން އޭރު ފަރުހާންމެންގެ ގޭގައި ދިރިއުޅެމުން ދިޔުމާއި، އެ ގެ ހުންނަ މަގުން އެފަދަ ގޮތަކަށް ފިލަން ދުވުމަކީ ހަމައެކަނި އިއްތިފާގަކަށް ނުވާނެ އެވެ. މައިރާ ހާސްވެފައި އިނދެ އިސްތަށިގަނޑުގެ ތެރެއަށް އެއް އަތް މަހައިލަމުން ފޯނު ނަގައި ނަންބަރަކަށް މެސެޖެއް ކޮށްލި އެވެ.
****************
ހަވީރުގެ ސައި ގަޑިއަށް ގަނެގެން އައި ހެދިކާ ކޮތަޅު ހުޅުވައިލަމުން ނުސްރާ އޭގައިހުރި ހެދިކާތައް ތަށްޓަކަށް އޮއްސައިލި އެވެ. އެއަށްފަހު އެ ތަށި ގެންގޮސް ބަހައްޓައިލީ ސޯފާ ތަކުގެ މެދުގައި ބަހައްޓާފައިހުރި ކޮފީ މޭޒު މަތީގަ އެވެ. އެތަނުގައިހުރި ބިއްލޫރި ކުރައަކުން ދެ ޖޯޑަށް ސައި އަޅާލާފައި އޭނާ ސޯފާގައި އިށީނެވެ. ނެޓްފްލިކްސްއިން ދައްކަމުންދާ މުއްސަނދިންގެ އަނބިންނާ ގުޅޭ ރިއަލިޓީ ޝޯއެއް އަޅުވައިލުމަށްފަހި އައިލީން އަންނާނެ އިރެއްގެ އިންތިޒާރުގައި މަޑުކޮށްލި އެވެ. ހަވީރުގެ އެ ވަގުތަކީ މިފަހަކަށް އައިސް އޭނާ އައިލީންއާއެކު ހޭދަކުރާ ވަގުތެކެވެ. މުއްސަނދިންގެ އަނބިންގެ ދިރިއުޅުމާ ގުޅޭ ރިއަލިޓީ ޝޯތަކާއި ކުރީގެ ކްލާސިކް ފިލްމްތައް ބެލުމަކީ އައިލީންއެކޭ އެއްފަދައިން ނުސްރާވެސް ނުހަނު ގަޔާވާ ކަމަކަށް ވާތީ އެ ދެމީހުންގެ ގުޅުން ވަނީ މިފަހަކަށް އައިސް ނުހަނު ބަދަހިވެފަ އެވެ.
އަޅާފައިހުރި ސައިތަށިތައް ހިހޫ ވެއްޖެ އެވެ. އައިލީން އާންމުކޮށް އަންނަ ވަގުތުގެ ފަހަށް ފަނަރަ މިނަޓު ފާއިތުވެގެން ދިޔައިރުވެސް ލޮލަށް ދައްކައިނުލި އެވެ. ނުސްރާ އައިލީންއަށް ފޯނުކުރަން ގަސްތުކުރީ އެހިސާބުންނެވެ. އައިލީންގެ ފޯނު ނިވިފައި އޮތްކަމަށް އެންގުމުން އޭނާ އާދައިގެ މަތިންގޮސް އައިލީންއާއި ނަދާލް އުޅޭ އެޕަރޓްމެންޓްގެ ބެލް އަޅައިލި އެވެ. ދޮރު ނުހުޅުވުމުން އައިލީންއަށް ގޮވައި ޓަކި ޖަހަން ފެށި އެވެ.
"ލީން.. ލީން އެބަ އުޅެންތަ؟.. ނަދާލް…" ނުސްރާ ފަހަރަކު މީހަކަށް ގޮވަމުންދިޔަ އެވެ. ޖަވާބެއް ނުލިބުމުން އޭނާ ނިންމީ އައިލީންއާއި ނަދާލް އެކުގައި ބޭރަށް ގޮސްލީ ކަމަށެވެ. އެހެނަސް ހަވީރުގެ ވަގުތު އެކަހަލަ ކަމެއް އޮތަސް އައިލީންއަކީ މީގެ ކުރިން އޭނާއަށް އަންގައިލާ ކުއްޖެކެވެ. ސުވާލުތައް ހިތުގައި ރައްކާ ކޮށްލަމުން ނުސްރާގޮސް އޭނާ ދިރިއުޅޭ އެޕަރޓްމެންޓަށް ވަނެވެ.
ބެލްކަނީގައި ގޮނޑިއެއް ބަހައްޓާލައިގެން އިން ނަދާލް ހަމަޖެހުމުގެ ނޭވާއެއް ދޫކޮށްލީ ނުސްރާގެ އަޑު ކެނޑުނުތާ އިރުކޮޅެއް ފަހުންނެވެ. އެ އަޑު އޭނާގެ ކަންފަތަށް ނީވުނީކީ ނޫނެވެ. ނުސްރާ އޭނާއާ ކޮށްފާނެ އެއްވެސް ސުވާލަކަށް ޖަވާބުދޭން ނޭނގޭނެތީ ދޮރު ހުޅުވަން ދާން ބޭނުން ނުވީ އެވެ. ރެއިލިންގްގެ މައްޗަށް ފައި އަރުވައިލަމުން އޭނާ އަތުގައި އޮތް ވާހަކަ ފޮތް ހުޅުވައިލި އެވެ. އެއީ ހިތުގައިވާ އިހުސާސްތަކާއި ސިކުނޑީގައިވާ ހަނދާންތައް ފިޔަވައި އޭނާގެ އަތުގައި މިހާރު އޮތް އައިލީންގެ ހަމައެކަނި ނިޝާނެވެ. އައިލީން އެންމެ ގިނައިން ކިޔައި އުޅުނު، އައިލީންއަށް އެންމެ ކަމުދާ ވާހަކަ ފޮތެވެ. އެ ފޮތުގެ ކޮންމެ ޖުމްލައެއް ކިޔަމުން ދިޔައިރު އޭނާގެ ހިޔާލުގައި ރަސްކަން ކުރަމުންދިޔައީ އައިލީން އެވެ. ވާހަކައިގެ މައި އަންހެން ޝަހްސިއްޔަތު އެލިޒަބެތްގެ މިޒާޖުގައިވާ ސަކަކަމާއި، ވިސްނުމުގެ ތޫނުކަމާއި، ހިތުގެ ސާފުކަންވެސް އޭނާއަށް ހަނދާން ކޮށްދެމުން ދިޔައީ އައިލީން އެވެ. ބިރަކާނުލައި ތެދު ބުނަން ކެރޭ ގޮތާއި، ދިމާވާ ގޮންޖެހުންތަކާ ހިތްވަރާއެކު ކުރިމަތިލާ ގޮތެވެ. ހަމަ އެހެންމެ އެ ވާހަކައިގައި އުޅޭ ފިރިހެން ޝަހްސިއްޔަތު ޑާރސީ އޭނާއަށް ފެންނަމުން ދިޔައީ މޫނުބަލާ ލޯގަނޑެއް ފަދައިންނެވެ. ބޭރުފުށުން ފެންނަ ހިތްމޮޅުކަމުގެ ސަބަބުން މިޒާޖާމެދު ކުށްހީ ކުރެވޭކަހަލަ ގޮތެއް ހުރެފައި، ވިސްނުމާއި ހިޔާލުގައި އެއްބަސްވެވޭ ގިނަ ކަންތައްތަކެއް ހުއްޓެވެ.
ނަދާލްގެ ތުންފަތް އެނގުމަކާނުލައި އެއް މިޔަކަނުން ދެމިލި އެވެ. އެއީ އެހެން ޒަމާނަކަށް ފެތޭގޮތަށް ލިޔެފައިވާ އޭނާއާއި އައިލީންގެ ލޯބީގެ ފަސާނާއެއް ފަދައެވެ. ވުމާއެކު އައިލީންއެކޭ އެއްފަދައިން އޭނާއަށްވެސް އެ ފޮތް ނުހަނު ކަމުގޮސްފި އެވެ. ފޮތުގެ ތެރެއަށް ވަދެވިފައި އިންވަރުން ގަސް މުށިތައް ބަހައްޓާފައިހުރި ހަރުން ރިންގުވަމުންދިޔަ ފޯނު ނަގަންވެސް އޭނާއަށް އިނީ ބޮޑު ކަމަކަށްވެފަ އެވެ. އަންނަނީ ޒެފަންގެ ކޯލެއް ކަމުން އިތުރަށް އެކަމާ ފަރުވާކުޑަ ކޮށްލެވުނެވެ. ނަމަވެސް ކޯލުތައް މެދުކެނޑުމަށްފަހު އައި މެސެޖު ފެނި އޭނާ ފޫހިކަމާއެކު ޗޮކެއް ކަނޑައިލަމުން އިންތަނުން ތެދުވި އެވެ. ކަންނެތްކަމާއެކު ފައި ދަމަމުންގޮސް ބޭރުގައިހުރި ޒެފަންއަށް ދޮރު ހުޅުވާލައި ދިނެވެ. އޭނާ ފެނުމާއެކު ޒެފަންގެ މޫނުމައްޗަށް ޖައްސައިލި މަލާމާތުގެ ވައްތަރު ނުފެންނަ ކަމަށް ހެދެމުން އަނެއްކާވެސް ބެލްކަންޏަށް ނުކުތެވެ.
"ސަކް އިޓް އަޕް ބާ*ޓާޑް" ނަދާލްގެ ފަހަތުން ބެލްކަންޏަށް ނުކުތް ޒެފަން ރެއިލިންގަށް ލެގިލި އެވެ.
"ޝަޓް އަޕް! ހަވާލުކުރި އެންމެ ކަމެއް ރަނގަޅަށް ނުކުރެވުނީމަ މަށަށް ޖެހޭހާ ތުރާލޭ މިއީ. އޯލް ޔޫ ފަ*** ހެޑް ޓު ޑޫ ވޯޒް ޖަސްޓް ސެންޑް ދަ ކަރެކްޓް ފައިލް" ނަދާލް ގޮނޑީގައި އިށީންނަމުން ދަތްކުނޑި ވިކައިލި އެވެ.
"އަހަހަހަހަ ހަހަ. އެންމެފަހުން އަހަރެންގެ ބޮލަށް ދޯ ތި ކަންތައް ތި ޖެހީ.. އަހަރެންގާތު މައިރާ ބުނީ މަލަކްގެ ބިޓުގެ ފައިލް ފޮނުވަދޭށޭ. އޭނަގެ ޓްވިންއާ ދެމީހުންގެ ފައިލް ފޮނުވަދޭން ބުނި ނަމަތާ. އެހެންނޫނަސް ތިކަމެއް ކުރަން ދިޔައިރު ކުރަނީ ކީއްކަންވެސް އަހަރެންނަށް އަންގާލީކީ ނޫން. އެކަމަކުވެސް ވަރިހަމައޭ. އަހަރެންގެ މައްސަލައެއްނު؟ އަހަރެންނެއްނު ނަދާލްގާތު ބުނީވެސް އަހަރެންގެ ކޮއްކޮއާ އެންގޭޖް ވެގެންހުރެގޮސް އެހެން އަންހެނެއްގެ ގަޔަށް އަރާށޭ. ޔޫ ނޯ ވަޓް؟ ކަރްމާ އިޒް އަ ބި*. އެ އަންހެންކުއްޖާއަކީ އިވާންގެ ކޮއްކޮއަށްވުމަކީވެސް ތަގުދީރު ނަދާލްއާ ކުރި ސަމާސާއެއް. މިހާރު ނަދާލްއަށް ތި ލިބެނީ އިޒޫއަށާއި ލީންއަށް ދިން ހުރިހާ ހިތާމައެއްގެ ބަދަލު"
ޒެފަން ހިތްހަމަ ނުޖެހިގެން އެހާ އެއްޗެހި ކީއިރުވެސް ނަދާލް ރައްދު ބަހެއް ބުނެ ނުލަ އެވެ. އެހިސާބުން ނަދާލްއަށް ކޮށްފައިވާ އަސަރުގެ ފުންމިން ޒެފަންއަށްވެސް ނަގައިގަނެވުނެވެ. އެ މޫނުމަތިން މާޔޫސްކަން ފެނި ވާހަކައިގެ ރާގު ބަދަލުކޮށްލި އެވެ. "ދެން ގުޅޭތޯ ބަލައިފިންތަ؟"
"ރޭގަ ވަރަށް މަސައްކަތް ކުރިން.. ވާހަކައެއް ނުދެއްކި. ބޭކާރު ކަމަކަށް ވާނީ" ޒެފަންގެ ސުވާލަށް ބޯ ހޫރައިލަމުން ނަދާލް ބުންޏެވެ.
"ދެން ކީއްކުރާނީ؟ ލީންއަކީ އިވާންގެ ކޮއްކޮއެއްކަން އެނގުނު ހިސާބުންވެސް ދުރުވިނަމަ ތިވަރެއް ނުވީސް" ޒެފަން ތުނބުގައި ޖަހައިލި ސިނގިރޭޓު ރޯކޮށްލަމުން ވާހަކަދެއްކި އެވެ.
"ޒެފް.. އަހަރެން ހިތަށް އަރާ ހަމަ އެންމެ ފުރުސަތެއް ލިބޭނަމައޭ..” ނަދާލް އަތުގެ އިނގިލިތައް ބޮލުގެ ފުށްކިބައާ ހިސާބުން ގުޅުވައިލަމުން ގޮނޑީގެ ފަހަތައް ލެގިލި އެވެ. އަދި އުޑުގައިވާ ބަނަ ވިލާތަކަށް ބަލަން އޮވެ އުނދަގުލާއެކު ހިންދިރުވައިލި އެވެ. "އެނގޭ އަހަރެންނަށް ކުރެވުނީ މަޢާފު ހައްގުވާ ވަރުގެ ކަމެއް ނޫންކަންވެސް އެކަމަކު… އެ މަޢާފު ހޯދަން އަހަރެން ކޮންމެ ކަމެއްވެސް ކުރާނަން. އައި ޖަސްޓް ވޯންޓް ވަން މޯރ ޗާންސް"
"ޓެލް މީ އަބައުޓް އިޓް" ޒެފަންގެ އަނގައިން ސިނގިރޭޓުގެ ދުންތައް ބޭރުކޮށްލި އެވެ. ރެއިލިންގައި އަޅުވާލައިގެންހުރި ދެ އުޅަނބޮށީގެ މައްޗަށް ހަށިގަނޑުގެ ވަރު ދޫކޮށްލައިގެން ހުރިއިރު އެ މޫނުމަތީގައިވި ފިކުރުތައް އެހެން ދުވަހެއްގައިނަމަ ނަދާލްއަށް ފާހަގަވީހެވެ. އެހެނަސް މިއަދު އޭނާ އެ ދަނީ އެހެން މީހެއްގެ ފިކުރުތަކުން އަރައިގަތުމަށް އެހީގެ އަތެއް ދިއްކޮށްލެވޭ ވަރަށްވުރެ ބޮޑަށް އަމިއްލަ ފިކުރުތަކުގެ ކަނޑެއްގައި ގެނބެމުންނެވެ.
- ނުނިމޭ -
