"މައިރާ!" އިވާންގެ އަޑަށް މައިރާ ދިނީ ބީރު ކަންފަތެކެވެ. އޭނާ "އެކްސްކިއުޒް" އޭ ބުނެލައި މާޒިޔާއާއި ނުސްރާގާތުން އިޒުނަ ހޯދައިލަމުން ކުޑަކޮށް ދުވެލާފައިގޮސް އެޕަރޓްމެންޓުން ނުކުތެވެ. ލިފްޓު ތިރިއަށް މިސްރާބު ޖަހާފައި ހުރިތަން ފެނުމުން އެހާ އަވަހަށް މައިރާ ލިފްޓަށް އެރީކަން އޭނާއަށް އެނގުނެވެ. އޭނާ ކުޑަވެސް ފަސްޖެހުމެއްނެތި ސިޑިން ތިރިއަށް ދުއްވައިގަތެވެ. އެންމެ ތިރީ ފަންގިފިލާއާ ހަމައަށް އާދެވުނުއިރު މައިރާގެ ހިލަމެއްވެސް ނެތެވެ. އިވާން އަވަސް ފިޔަވަޅުތަކެއްގައި ގެއިން ނުކުމެ މަގުގެ ދެފަރާތް ބަލައިލުމާއެކު މައިރާ ގޭގެ ތިރީގައިހުރި ގަރާޖަށް ވަންނަން ދިޔަތަން ފެނުނެވެ.
މައިރާއަށް އިވާން ފެނުމުން އަވަސްވެގަތީ ގަރާޖުގެ ތެރެއަށް ދެމިގަތުމަށްފަހު ތަޅުދަނޑީގައިވި ރިމޯޓުން ގަރާޖުގެ ދޮރުފަތް ތިރިއަށް ކަހައިލުމަށެވެ. ނަމަވެސް އިވާން އެއަށްވުރެ ހުށިޔާރުވެފައި ކުޅަދާނަ އެވެ. ކުއްލި ހަރަކާތަކާއެކު ބިންމަތީގައި ބަނޑު ޖަހައިލުމަށްފަހު ލެއްޕެމުންދިޔަ ދޮރުފަތުގެ ދޭތެރެއިން ގަރާޖުގެ ތެރެއަށް ފުރޮޅިގަތެވެ. އިވާން އެފަދަ ނުރައްކާތެރި ކަމެއް ކޮށްފާނެކަމަށް ވިސްނައިވެސް ލެވިފައި ނެތުމުން މައިރާއަށް ލިބުނު ސިހުމުގައި ހަޅޭއް ލަވައިގަނެވުނެވެ. ހިތް އަވަސްވެ މޭގަނޑު ރޫރޫ އަޅައިގެންދިޔަ އެވެ. އިވާން ފަޅި ސިކުންތެއްގެ ތެރޭގައި ދެފައި މައްޗަށް ތެދުވެހުރި ނަމަވެސް މައިރާއަށް އަދިވެސް ހުރެވުނީ ދެލޯ ބޮޑުވެ ހުއްޓުން އަރައިފަ އެވެ.
"އިވާން މޮޔަވީތަ؟ މަރުވާނެ ގޮތެއް ނޭނގިގެންތަ ތި އުޅެނީ؟" މައިރާގެ ސިކުނޑި މަސައްކަތްކުރަން ފެށުމާއެކު ކުރިއަށް ފިޔަވަޅެއް އަޅައިލަމުން ފުލުފުލުގައި އިވާންގެ ކޮނޑާ ދިމާލަށް އަތުގެ ދެތިން ހަމަލާ ފޮނުވައިލި އެވެ. އޭނާގެ އަވަސްވެފައިވާ ހިތުގެ ތެޅުމަކަށް ބަދަލެއް ނާދެ އެވެ.
"މައިރާއެއްނު މޮޔަވެގެން ތި އުޅެނީ؟ ކީކޭ ހިތަށް އަރައިގެންތަ ދައްތަމެންނަށް ހުރިހާ ވާހަކައެއް ކިޔައިދިނީ" މައިރާގެ އަތުގައި ހިފަހައްޓަމުން އިވާންވެސް އަހައިލީ ހަމަ މައިރާ ސުވާލުކުރި ރާގުގަ އެވެ.
އިވާންގެ ސުވާލަށް ޖަވާބު ދިނުމުގެ ބަދަލުގައި މައިރާއަށް ދުރު ބަލައިލަމުން ފުން ނޭވާއެއް ދޫކޮށްލެވުނެވެ. މީހާ ހަމައަކަށް އެޅިލުމާއެކު އަނެއްކާވެސް އިވާންއާ ގާތަށް ފިޔަވަޅެއް އަޅައިލަމުން އަތް އުފުލައިލި އެވެ.
"އާރ ޔޫ ހަރޓް-"
"ކޮންމެހެން މައުލޫ ބަދަލުކުރަން ނޫޅޭ! މައިރާއަށް އެނގޭނެ މިއަށްވުރެ ވަރސް ކޭސް ސިނޭރިއޯތަކަށްވެސް އަހަރެން ޓްރެއިން ވެފަކަން ހުންނާނީ. އަހަރެން މި އަހަނީ މައިރާ ކީކޭ ހިތަށް އަރައިގެންހޭ ދެންމެ އެ ހުރިހާ އެއްޗެއް ކިޔައިދިނީ" އިވާން މައިރާގެ އަތުގައި ހިފަހައްޓަމުން ސުވާލު ތަކުރާރު ކޮށްލި އެވެ.
"ކިޔައިދޭން ޖެހުނީމަ" މައިރާ ޖަވާބުދިނެވެ.
"ނުޖެހޭނެ ކިޔައިދޭކަށް. މިއީ އަހަރެންގެ ދިރިއުޅުމޭ.. މައިރާއަކަށް ނުޖެހޭނެ ދައްތަ އަހަރެންނާ ދެއްކި ވާހަކައެއްގެ ތެރެއަށް ވަންނާކަށް" އިވާންއަށް ދެ ދަތްޕިލަ ޖައްސައި ބާރު ކޮށްލެވުނެވެ.
"ދެން ތި ބުނީ ކުޑާއްތަ އިވާންއަށާއި ޝޯންއަށް އެ ހުރިހާ ތުހުމަތެއް ކުރިއިރު އަހަރެން އެތާނގަ އަނގަ މަޑުންލައިގެން އިންނާށޭތަ؟ އިވާންއަށް ހީވަނީތަ ކުޑާއްތަ މިއަދު އަހަރެން އެތަނަށް ގެންދިޔައީ ރީއްޗަކަށޭ؟" މައިރާވެސް ހިތްހަމަ ނުޖެހިފައިހުރެ އިވާންގެ އަތުތެރެއިން އޭނާގެ އަތް ދަމައިގަތެވެ.
"އާން!" އިވާންއަށް ހަޅޭއް ލަވައިގަނެވުނެވެ. "ކޮންމެހެން ހަގީގަތް އޮތް ގޮތަށް ނުކިޔައިދިނަކަސް ކިޔައި ނުދިނަކަސް މައިރާއަށް ލީންއާއި ނަދާލްއޭ ކިޔައިގެން އެހެން ވާހަކައެއްވެސް ދެއްކުނީސް. ތިއީ މީހުންނަށް ދޮގު ހަދައިގެން މެނިޕިއުލޭޓް ކުރަން ނުލާހިކު މޮޅު މީހެއްނު"
އިވާންގެ ބަސްތައް އިވުމާއެކު މައިރާގެ މޫނުމަތީގައިވި ކުލަވަރު އެކީ އޮއްސިގެންދިޔަ އެވެ. ސާބިތުކަމާއި ހިތްހަމަނުޖެހުމުގެ ރޫތައް ފިލައިގޮސް މާޔޫސްކަން ފާޅުވި އެވެ. "ހައް..އައިމް ސޯ ޑަން ވިތް ދިސް" އޭނާއަށް ހިތި ގޮތަކަށް ހިނިތުންވެލަމުން ބޯ ހޫރައިލެވުނެވެ. އެ އަޑުގައިވަނީ ނާއުއްމީދެވެ. އޭނާ އިވާންއަށް ފަސްދީ ކާރުތަކާ ދިމާލަށް ހިނގައިގަތެވެ.
"ޝިޓް!" އިވާންއަށް ބުނެވުނު އެއްޗެއް ރޭކައިލެވުނީ އެ ބަސްތައް ދުލުން ބޭރުވެދިޔަ ފަހުންނެވެ. އެއީ އެ ވަގުތާއި ހާލަތަށް ބަލައި އޭނާ އެއްވެސް ގޮތަކަށް ބުނަން ބޭނުންވި އެއްޗެއް ނޫނެވެ. މިފަހަކަށް އައިސް އަބަދުމެ މައިރާ "ދެރަ ކޮށްލަން" އާދަވެފައިވާތީ އެފަދަ ހައްސާސް ވަގުތަކުވެސް އޭނާއަށް އެފަދައިން ކަން ކުރެވުނީ އެވެ.
"މައި.. މައިރާ އައި ޑިޑިންޓް މީން އިޓް ލައިކް ދެޓް" އިވާން ދުރު ފިޔަވަޅުތަކެއްގައި ގޮސް މައިރާ ހުއްޓުވި އެވެ.
"ދޫކުރޭ އިވާން! އައި ނޯ ވެރީ ވެލް ހައު ޔޫ މީން އިޓް! އެކަމަކު މިހާރު ފުދިއްޖެއޭ ބުނެވިއްޖެއެއްނު! އިވާން ތިހިރީ މިހާރު އަހަރެންނާމެދު ގޮތް ނިންމައިގެނެއްނު؟ ދެޓް އައި އޭމް އަ ލައިންގް މެނިޕިއުލޭޓިވް ބި*؟" މައިރާގެ ސުވާލަށް އިވާން ބޯ ހޫރައިލި އެވެ.
"ނޯ ދެޓްސް ރިއަލީ ނޮޓް ވަޓް އައި މެ-"
"ދެން މައްސަލައެއް ނެތޭ! އިނގިއްޖެއޭ އަހަރެން ކުރާ އެއްވެސް ކަމެއް އިވާންއަކަށް ދެން ކަމަކު ނުދާނެކަން! އަހަރެން އިވާންއަށް ރަނގަޅަށް ކަމެއް ކޮށްދޭން އުޅުނަސް... ބައެއްގެ ކުރިމަތީ އިވާން ދިފާއު ކުރަން އުޅުނަސް.. އިވާންއަކަށް ދެން ދުވަހަކުވެސް އަހަރެންނާ ދޭތެރޭ ހިތް ހެވެއް ނުކުރެވޭނެ"
އިވާންގެ އެއްވެސް ވާހަކައެއް އަޑުއަހާކަށް މައިރާ ބޭނުމެއް ނުވި އެވެ. ނުވަތަ އެ ވާހަކަތައް އަޑު އަހާނެ ފުރުސަތެއް އޭނާގެ އަމިއްލަ ނަފްސަށް ދޭން ބޭނުން ނުވަނީ އެވެ. އިވާން މަޢާފަށް އެދި ބުނާ އެންމެ ބަހަކުން އޭނާގެ ނަފްސު ބަލިކަށި ވެދާނެކަމުގެ ބިރުގަ އެވެ. އިވާންގެ ލޯތްބާމެދު އުއްމީދު އާވެދާނެކަމުގެ ބިރުގަ އެވެ. މިހާރުވެސް އޭނާ ހިފަހައްޓަމުންދިޔަ ކަރުނަތައް ހީވަނީ ދެންމެދެންމެ އޭނާ އެ ހުރި ހާލަތުގެ ނާޒުކުކަން ބޭޒާރު ކޮށްލައިފާނެ ހެންނެވެ. އެ ބޭޒާރުން އޭނާ ސަލާމަތް ކޮށްދިނީ ދަބަހުގެ ތެރެއިން ރިންގުވާން ފެށި ފޯނެވެ. މައިރާ އަވަހަށް އިވާންއާ ދުރަށް ޖެހިލަމުން ފޯނަށް ޖަވާބު ދިނެވެ.
"ހަލޯ؟ ޔެސް.. ޔެސް ހަނދާން އެބަހުއްޓޭ ޓެން-އޮ-ކްލޮކް މީޓިންގް. ނޫނޭ ލަސްކުރާނެ ކަމެއް ނެތް މި ދަނީ މިހާރު" މައިރާ އެ ކޯލު ކުރުކޮށްލި އެވެ. "އިވާން ދެން އަހަރެންނާ ދިމާލަށް ކިޔާނެ އިތުރު އެއްޗެއް ނެތިއްޔާ ދަނީ.."
މައިރާ އިވާންގެ ޖަވާބަކަށް މަޑުކުރުމެއްނެތި އެތަނުގައި އޮތް ކާރަށް އަރައި އިސްޓާޓުކޮށްލި އެވެ. އެހެނަސް ހަމަހިލާ އެ ކާރު އޮތް ތަނުން ގުޑައި ނުލި އެވެ. ކުރިއަކަށް ނުވަތަ ފަހަތަކަށްވެސް ދުވާކަށް ނޫޅުނެވެ. ނުވިތާކަށް އިރުކޮޅަކުން އިންޖީނުވެސް ނިވިއްޖެ އެވެ. ދެތިން ފަހަރުގެ މަސައްކަތުންވެސް ނުކުތީ އެއް ނަތީޖާ އެކެވެ.
"އާހް!" މައިރާ ދެއަތުގެ އިނގިލިތައް ހުޅުވައިލަމުން ކާރުގެ މުއްގަނޑުގައި ބާރަށް ޖެއްސެވެ. ހިތުގައިވި ހުރިހާ އުދާހެއް އެ މުއްގަނޑަށް ބޭރުކޮށްލި ފަދައިންނެވެ. އިތުރަށް ވަގުތު ބޭކާރު ކުރެވެން ނެތުމާއެކު އޭނާ ދަބަސް ހިފައިގެން ކާރުން ނުކުތެވެ. އެ ގަރާޖުގައި ދެން އޮތް ހަމައެކަނި ކާރަކީ ނަދާލްގެ ކާރު ކަމަށްވާތީ އޭނާ އޭގެ ތަޅުދަނޑި ހޯދަން ނަދާލްއަށް ގުޅަންފެށި އެވެ.
"ސްޓާރޓް ނުވީތަ؟" މައިރާ ސިއްސައިގެން ދިޔައީ ކުއްލިއަކަށް މާ ގާތުން އިވާންގެ އަޑު އިވުމުންނެވެ.
"ސްޓާރޓްވޭ.. އެކަމަކު ނުއެއް ދުއްވުނު" މައިރާ އިވާންއަށް ރައްދު ދިނުމަށްފަހު ކާރަށް ބަލައިލި އެވެ.
"ޗެކް ކޮށްލަންތަ؟" އިވާން ހުށަހެޅި އެވެ.
މައިރާ އެންމެ ރަނގަޅޭ ބުނާ ފަދައިން ބޯ ޖަހައިލުމަށްފަހު އިވާންއަށް ތަޅުދަނޑި ދިނެވެ. އިވާން ތަޅުދަނޑި ހިފައިގެންގޮސް ކާރުގެ އިންޖީނު ބަލަން ފެށުމުން މައިރާ ކާރުގެ ފަހަތުގައި ލެގިލަމުން ކޮނޑު އެލުވައިލި އެވެ. އޭނާގެ މޫނުމަތިން ފެންނަމުންދިޔައީ ބޮޑު ހިތާމައެއް ތަހައްމަލު ކުރަމުންދާކަމުގެ އަސަރުތަކެވެ. ހެނދުނު ހިނގައިދިޔަ ކަންތަކުގެ ހިޔާލާއި އިވާން އޭނާއާ ދިމާލަށް ބުނި ބަސްތައް އޭނާގެ ހިތާއި ސިކުނޑި ކަމުންދިޔަ އެވެ.
ކާރުގެ ބޮނެޓް ލައްޕައިލުމަށްފަހު ދެއަތް ދެއަތާ ފުހެލަމުން އެދިމާލަށް އައި އިވާންއަށް މައިރާގެ އެ މަޑުމޮޅިކަން ފެނި ހިތުގައި ހަމްދަރުދީ އުފެދުނެވެ. އޭނާގެ ހިތް އެދެމުންދިޔައީ އެ އަތުގެ ތެރެއަށް މައިރާ ގެނެސް ދުނިޔޭގެ ކޮންމެ ހިތާމައަކުން މިންޖު ކޮށްދިނުމަށެވެ. އެހެނަސް އޭނާ މިފަހަރުވެސް އަމަލުކުރީ ހިތާ ދެކޮޅަށެވެ.
"އެހެމް" އިވާން ކަރުކެހިލުމާއެކު މައިރާގެ އެލުވާލެވިފައިވާ ދެކޮނޑު ސީދާކޮށްލަމުން އަވަސް އަވަހަށް އެސްފިޔަ ޖަހާލައި މޫނުމަތީގެ އަސަރުތައް ފިލުވައިލިތަން އިވާން ދުށްޓެވެ. "ފިލްޓަރ ބްލޮކްވެފަ އިނީ.." އޭނާ ކަންބޮޑުވެފައިހުރެ މައިރާގެ މޫނަށް ރަނގަޅަށް ބަލައިލި އެވެ. "އިފް ޔޫ ވޯންޓް އައި ކޭން-"
"އިޓްސް އޯކޭ..ދެން ފަހުން ތިކަމާ އުޅެވޭނީ.. ޓެކްސީއެއްގަ ދާނީ މިއަދު" އިވާންގެ ވާހަކަ ހުއްޓުވައިލަމުން މައިރާ ބުންޏެވެ. އިވާން އެންމެ ރަނގަޅޭ ބުނާ ފަދައިން ކާރުގެ ތަޅުދަނޑި މައިރާއާ ހަވާލުކޮށްލި އެވެ.
ދެމީހުންނަށް ގަރާޖުން ނުކުމެވުނުއިރު މައިރާ ދިޔައީ ހުއްޓުމެއްނެތި ޓެކްސީއެއް ހޯދަން މަސައްކަތް ކުރަމުންނެވެ. އޭރު މަގުގެ އަނެއް ފަރާތުގައިހުރި ސައިކަލު މަތީގައި ޝާވިން އިށީނދެލައިގެން އިނެވެ. އިވާން އަތުގެ އިޝާރާތުން ޝާވިންގާތު މަޑުކޮށްލުމަށް ބުނެފައި ޓެކްސީ އަންނަންދެން މައިރާގާތު މަޑުކޮށްލި އެވެ. އެދެމެދުގައި ވާހަކައެއް ނުދެކެވުނެއްކަމަކު މައިރާ ހިނދުކޮޅަކަށްވެސް އެކަނި ދޫކޮށްލަން އޭނާ ބޭނުން ނުވީ އެވެ.
"ނިންމާލީތަ؟" ދެތިން މިނެޓު ފަހުން އެތަނަށް ހުއްޓައިލި ޓެކްސީއަށް އަރައިގެން މައިރާގެ މަންޒިލަށް މިސްރާބު ޖެހުމުން އިވާން އައިސް ޝާވިންގާތު ހުއްޓިލި އެވެ.
"ބްރޯއާ އެއްކޮށް ކަހަލަ ގޮތަކަށް މަވެސް ފައިބައިފީމޭ.. ގުޅަންދެން މި އިންނަނީ.. މައި ރަނގަޅުތަ؟" ޝާވިން ޓެކްސީ ދިޔަ ދިމާލަށް ބޮލުން އިޝާރާތް ކޮށްލި އެވެ.
"ޕިސް.. ރަނގަޅެއް ނޫން ކަންނޭނގެ. ވަރަށް ކަޑަ އެއްޗެކޭ ބުނެވިއްޖެ. ވީގޮތަކީ.." އިވާން އެދެމެދުގައި ދެކެވުނު ވާހަކަ ޝާވިންއަށް ހުލާސާ ކޮށްދިނެވެ.
"ހެޔޮނުވާނެ! ޕިސްޕިސް. ކީކޭ ދެން ބުނާނީ؟ ތިހިރީ މިހާރު އޭނަ ދެރަކުރަން އެއްޗެހި ބުނަން އާދަވެފަ. އަހަރެން ކޮންމެހެން މައިގެ ސައިޑު ނަގަނީކީ ނޫން މިކަންތަކުގަ އެކަމަކު އެއްޗެހި ބުނަންވެސް ވަގުތެއް އޮންނަންވާނެ ދޯ؟ މަށަށްވެސް ފެނުނު މައި ދެންމެ ދައްތަމެން ކުރިމަތީ ކަޑަވެފަ ހުރިވަރު. ނުވިތާކަށް ނުސްރާއްތަ އޭނަ ގައިގަ ޖަހަންވެސް ޖެހިވިއްޔަ" ޝާވިންއަށް ބޯ ހޫރައިލެވުނެވެ.
"ދެން އަހަރެންވެސް ގަސްތަކު ނޫނޭ" އިވާންއަށް އިސްތަށިގަނޑުގައި އަތްފުނާ އަޅައިލެވުނެވެ.
"ހޫން ދެން ކީއް ކުރާނީ؟ ވީކަމެއް ވީނު. ހިނގާ ކޮފީއަކަށް އަރާލަން. ނަމެއްގަ އައިސް ކެއުމަކާވެސް ނުވެވިއެއްނު މި ދިޔައީ" ޝާވިން ސައިކަލު ނެރެ އިސްޓާޓުކޮށްލި އެވެ.
މާލޭގެ ހުޅަނގު ފަރާތުގައި ހުންނަ ފުޑްކޯޓު ކައިރިއަށް ޝާވިންގެ ސައިކަލު މަޑުކޮށްލުމާއެކު އިވާން ޕާކިން ޒޯނުގެ ބޭރުގައި މަޑުކޮށްލި އެވެ. ފޫހިވެފައިހުރެ ޖީބުން ފޯނު ނަގައި ހުޅުވައިލިތަނާހެން ކޮންމެވެސް މީހަކު އޭނާގެ ކޮނޑުގައި ކޮށްޓައިލި އެވެ. ފަސްއެނބުރި ބަލައިލިއިރު ފުޅާ ހިނިތުންވުމެއްގައިހުރީ މީގެ ކުރިންވެސް އޭނާއާ ދެފަހަރަކު ބައްދަލުވެފައިވާ މޫނެކެވެ.
"އަނެއްކާ؟ އަޅެ އަހަރެންނަށް ފާރަ ލަނީތަ؟" އިވާން ފޯނު އަލުން ޖީބަށް ލަމުން ފަރުވާކުޑަ ރާގެއްގައި އަހައިލި އެވެ.
"އަހަހަ ނޫނޭ. މިއީ ހަޒްބަންޑާ އެއްކޮށް މިތަނުން ސައިބޮއެ ނިންމާލާފަ. އޭނަ ސައިކަލު ނަގައިގެން އަންނަންދެން މަޑުކޮށްލީ" އިޝްވާ ބުންޏެވެ. އިވާން އެހެންހެއްޔޭ ބުނެ ބޯ ޖަހައިލަމުން ޝާވިން ފެނޭތޯ ހޯދައިލި އެވެ.
"އެކަމަކު ދިމާވީމަ އަދިވެސް އަހާލަން ބޭނުން... ހަމަ ހިޔާލު ބަދަލެއް ނުވޭތަ؟" އިޝްވާ އަހަން ނާހަން ހުރެފައި އަހައިލި އެވެ.
"ހިޔާލު ބަދަލުވިނަމަ އެންމެ ފުރަތަމަވެސް އެނގޭނީ ތިކޮޅަކަށްނު؟" އިވާން ރައްދު ދިނެވެ.
"އަހަރެންނަކަށް ހިއެއް ނުވޭ އިވާން ތި ގޮތް ނިންމަނީ އެންމެ ރަނގަޅަށް ހެނެއް. އިވާންގެ މަގާމުގަ އެހެން މީހަކު ހުރިނަމަ މިކަހަލަ ފުރުސަތަކަށްޓަކައި ޝުކުރުވެރި ވާނެ. އިވާންއަކަށްވެސް އަދި ލަހެއް ނުވޭ.. ފުރުސަތުގެ ބޭނުން ރަނގަޅަށް ހިފާ" އިޝްވާ ނަސޭހަތްތެރިވި އެވެ.
"އަހަރެންވެސް ޝުކުރުވެރިވަމޭ މި ފުރުސަތަށް. އެކަމަކު ޝުކުރުވެރިވެވޭ ކޮންމެ ފުރުސަތަކީ އަދި ބޭނުން ހިފޭނެ ފުރުސަތެއް ނޫން" އިވާން ބުންޏެވެ. އެވަގުތުވީ އިޝްވާގެ ފިރިމީހާވެސް ސައިކަލުގައި އައިސް އެތަނަށް ހުއްޓިލި ވަގުތަށެވެ.
"މާނު ދިސް އިޒް އިވާން މައި ކްލަޔަންޓް. އިވާން.. ދިސް އިޒް މައި ހަޒްބަންޑް" އިޝްވާ ސައިކަލަށް އަރަމުން އެދެމީހުން ތައާރަފު ކޮށްދިނެވެ.
"ގުޑް ޓު ސީ ޔޫ.. ދާންވީތަ؟" އެމީހާ އިވާންއަށް ބޯ ޖަހައިލުމަށްފަހު ސައިކަލުގެ ލޯގަނޑުން އިޝްވާއަށް ބަލާލައި ހިނިތުންވެލި އެވެ.
"ޔެސް. ދަމާ ދޯ؟ އިވާން.. މިއީ އަހަރެން އިވާންއާ މި ވާހަކަ ދައްކާނެ ފަހު ފަހަރު. އަދިވެސް ރަނގަޅަށް ވިސްނާލާ.. ހިޔާލު ބަދަލުވިއްޔާ ޔޫ ނޯ ހައު ޓު ރީޗް މީ"
ސައިކަލު ދުއްވާލުމުގެ ކުރިން އިޝްވާ ބުނެލި ބަސްތައް އިވާންގެ ކަންފަތް ދޮށުގައި ތަކުރާރުވަމުންދިޔަ އެވެ. ޝާވިން އައިސް އެތަނަށް ހުއްޓުނުކަންވެސް ރޭކައިލީ އޭނާއަށް ގޮވައިލުމުންނެވެ. އެއާއެކު އިޝްވާގެ ނަސޭހަތް ސިކުނޑިން ނެރެލަން އުޅޭ މީހަކު ފަދައިން ބޯ ހޫރައިލުމަށްފަހު ޝާވިންއާއެކު ހިނގައިގަތެވެ.
ދެމީހުން ބުފޭއިން ކާން އަޅައިގެން އައިސް އިށީނދެލި ވަގުތު ޝާވިންގެ ފޯނަށް ފުލުފުލުގައި މެސެޖުތައް އަންނަން ފެށި އެވެ. "މަލް ހޭލައިގެން އެ މެސެޖު ކުރަނީ. މިއަދު އެގެއަށް ދިޔައިންތޯ އެހީ" އޭނާ ފޯނު ބަލައިލި އެވެ.
"އެނގިގެން ކަމަށް ވާނީ އެ އެހީ. ބުނޭ ސައިބޯން ދިޔައީމޭ. ދޮގު ހެދުމުގެ ބޭނުމެއް ނެތެއްނު؟" އިވާން ބުންޏެވެ.
"މަލް އަހަރުމެން ދެއްކީ ކޮން ވާހަކައެއްތޯ އެހިޔަސް ހަމަ ދޮގަކާނުލާ ކިޔައިދޭންވީތަ؟" ޝާވިންގެ ސުވާލާއެކު އިވާންގެ ހަރަކާތްތައް މަޑުޖެހިލި އެވެ.
"ޝޯން.. އަހަރެންނަކަށް ނުފެނޭ މަލްއަށް މިއިން އެއްވެސް ކަމެއް އަންގާކަށް" އިވާން ކުޑަކޮށް ވިސްނާލާފައި ބުންޏެވެ.
"އަހަރެންވެސް ބުނާކަށް ނޫނޭ. އިވާންއަށް އެނގެއެއްނު ކިހާ މަސައްކަތަކުންކަން މަލް އެވަރަށްވެސް ހަމައަކަށް އެޅުވުނީ.. އައި ކާންޓް ލޫޒް ހަރ ޓު ދެޓް ޑާރކްނެސް އަގައިން.. މިހާރުވެސް އެހެން އުޅެފަ ދޭތެރެއަކުން ބޭސް ނުކައި ފަރުވާ ކުޑަކޮށްލީމަ އަހަރެން ޕެނިކްވާވަރު އެނގޭނީ އަހަރެންނަށް ދޯ؟ އެކަމަކު މިހާރު އެގޭ މީހުންނަށްވެސް އެ އެނގުނީ.. މަލްގެ ކަންފަތާ ހަމައަށް ހަބަރު ފޯރާކަށް ދުވަހެއް ނުނަގާނެ" ޝާވިންގެ އަޑުގައިވަނީ ކަންބޮޑުވުމެވެ.
"އަހަރެން މިއަދު ގުޅާނަން ދައްތައަށް. މަސައްކަތް ކުރާނީ މަލްއަށް މިކަން ނާންގަން ކޮންވިންސް ކުރެވޭތޯ. ދައްތަވެސް ވިސްނާނެއެއްނު މަލްއަށް. އެހެންނޫނަސް..." އިވާންގެ ވާހަކަ މެދުކަނޑައިލުމާއެކު ޝާވިން "ކިހިނެއްވީ" ހޭ އަހައިލާ ފަދައަކުން ބުމަ އަރުވައިލި އެވެ.
"މައި.. މައިރާގެ ލައިފްގަ އެންމެ މުހިއްމު އެކަކު މަލްއަކީ.. އެނގެއެއްނު އޭނަގެ ދޮންބެވެސް މިހާރު ނެތްކަން.. އަނެއްކާ ނަދާލްވެސް.. މިކަންތަކުގެ އެ ދެ މީހުންގެ ގުޅުމަށް ބުރޫއަރައިފިނަމަ މައި ވަރަށް އެކަނިވާނެ" އިވާންއަށް ބުނެވުނެވެ. ޝާވިންވެސް އެކަމާ އެއްބަސްވެ ބޯޖަހައިލި އެވެ.
"މާދަމާ ފުރުމުގެ ކުރިން އަސްލު މަލްގެ މަންމައާއި ބައްޕައާ ވާހަކަ ދައްކާލަން ހިތު އަޅައިގެން ހުރީ.. މިއަދު މިހެންވީމަ ހިއެއް ނުވޭ ދެން ޓައިމިންގް ރަނގަޅުހެނެއް. އޭ! އަނެއްކާ މަލްގެ މަންމަ މަޖަލަކަށް ދޯ އޭރު މަލްއާ ދުރުވާށޭ އެ ބުނީ. މަގޭ މޭގަނޑު ކިރިޔާ ހުވާ އަތަށް ނައީ" ޝާވިން ޔަގީންކުރި އެވެ.
"އަހަހަ. ހަމަޖައްސާލަބަ. އެއީ އެގަޑީގަ އަހަރުމެން ތަޅުވަންވެގެން ބުނި އެއްޗަކަށް ވާނީ. އެކަމަކު އަދި ތިވާހަކަ ފަސްކޮށްލަން އަހަރެންނަށްވެސް ފެންނަނީ. މިހާރު ދެން ނުބުންޏަކަސް މައިޓުއަށްވެސް އެބަ އެނގެއެއްނު. އަހަރެންނަށް ހީވަނީ ދައްތަ ތި ގުޅުމާ ގަބޫލުހެން" އިވާން ބުންޏެވެ. "އެންޑް އައިމް ސޮރީ.. އަހަރެންނާހެދި މިކަހަލަ ކަންތައްގަނޑެއްގެ ތެރެއަށް ޝޯން ވަންނަން ޖެހުނީމަ" އޭނާ މަޢާފަށް އެދުނެވެ.
"ދައްކާ ވާހަކަ. މިއީ ކަމެއް ނޫނެއްނު؟ އެކަމަކު ބުނަން.. ދެން އެކަހަލަ އިންޓެންސް ސިޗުއޭޝަނަކަށް އަހަރެން ވައްޓާލިއްޔާ މައިއަށްވުރެ ކުރިން އަހަރެން އިވާން ބާނާލާނަން އެނގޭ" ޝާވިން ހިނިގަނޑެއް ޖަހައިލަމުން ކާން ފެށްޓެވެ.
*******************
މީޓިންގް ނިންމައިލުމަށްފަހު ކެބިނަށް އައިސް ވަނުމާއެކު މައިރާއަށް ފާރުގައިހުރި ގަޑިއަށް ބަލައިވުނީ ވަކި ކަމަކަށް އިންތިޒާރު ކުރަމުންދާ މީހަކު ފަދައިންނެވެ. ލެޕްޓޮޕު ހުޅުވައިލިއިރު އައިސްފައިހުރި އީމެއިލްތަކަށްވެސް އޭނާ ބަލައިލީ އެ ހުޅުވުމާމެދު ދެ ހިޔާލެއްގައި ހުރެގެނެވެ. މިއަދު މިއީ އޭނާ ކުންފުނީގައި ހޭދަކުރާނޭ ފަހު ދުވަސްކަން މާޒިޔާ އެ ވަނީ ނުހަނު ސާފުކޮށް ބުނެދީފަ އެވެ. ވީއިރު ދެން އެދުވަހު އިތުރު މަސައްކަތެއް ކުރުމުގެ ބޭނުމެއް އޭނާއަކަށް ނުފެނުނެވެ. އެ ހަކަތައެއްވެސް އޭނާގެ ގަޔަކު ނެތެވެ. މީޓިންގްގެ ސަބަބުން ހިނދުކޮޅަކަށް ހެނދުނު ހިނގައިދިޔަ ކަންތައްތަކުގެ ހިޔާލު ސިކުނޑިން އެއްފަރާތް ކޮށްލެވުނު ނަމަވެސް މިހާރު އެ ހިޔާލުތައް އަނެއްކާވެސް އޭނާއަށް އުނދަގޫކުރަން ފަށައިފި އެވެ. ހަގީގަތް ހާމަވުމުން އޭނާގެ ބައްޕަ އޭނާއާމެދު ދެކޭނީ ކިހިނެއްބާ އެވެ؟ މަލަކް އޭނާއާމެދު ދެކޭނީ ކިހިނެއްބާ އެވެ؟ މަލަކްއަށް އޭނާގެ ސަބަބުތައް ވިސްނޭނެބާ އެވެ؟ ނުވަތަ އިވާންއެކޭ އެއްގޮތަށް މަލަކްވެސް އޭނާއަށް ގެއްލޭނީ ހެއްޔެވެ؟
ކުއްލިއަކަށް ކެބިންގެ ދޮރު ހުޅުވުނެވެ. މައިރާއަށް ސިހިފައި ލެޕްޓޮޕުން އަތް ދޫކޮށްލެވުނީ އެއީ މާޖިދު ނުވަތަ މުރުޝިދު ކަމުގައި ނިންމަމުންނެވެ. އެމީހުންގެ ކަންފަތްތަކާ ހަމައަށް އެ ހަބަރު ފޯރައި، އޭނާއާ ބައްދަލުކުރަން އައީ ކަމުގައި ނިންމަމުންނެވެ. ނަމަވެސް އިސްއުފުލައިލިއިރު ދޮރުމަތީގައިހުރީ ޒާރާ އެވެ.
"މައި؟ ބިޒީތަ؟ ޑެސްޓިނޭޝަން މެގެޒިންއަކުން ގުޅި ދާލު އައުޓްލެޓް ޝެފްގެ އިންޓަރވިއުއެއް ނަގަން. އެ ކޮލަމްގެ ވިއުއަރޝިޕްވެސް ފުދޭވަރަކަށް ރަނގަޅު. އައި ކޭން އީމެއިލް ޔޫ ދަ ނަންބަރޒް. ހަމައެކަނި މައިގެ އެޕްރޫވަލް ބޭނުންވަނީ" ޒާރާ ވާހަކަދެއްކި އެވެ.
"ޒާރާ. ބޮޑުބެގާތު އަހާލާފަ އަހަރެން އެއްޗެކޭ ބުނެލާނަން އިނގޭ" މައިރާ ގަދަކަމުން ހިނިތުންވެލި އެވެ.
"މައި. މިއީ ހަމައެކަނި ފޯރމަލިޓީއެއްނު؟" ޒާރާ އަހައިލީ އެކަހަލަ ނިންމުންތަކަކީ އާންމުކޮށް "މިޑްލް މެނޭޖްމެންޓް" ގައި މަޝްވަރާ ކުރެވިގެން ހަމައެކަނި ރުހުން ހޯދައިލުމަށް ވެރިންނާ ހަމައަށް އަންނަ ނިންމުންތަކަށް ވާތީ އެވެ.
"ހަމައެކަނި ފޯރމަލިޓީއަކަށް ކުރާ ކަމެއްވިޔަސް އަހަރެން ބޭނުމެއް ނޫނޭ މިއަދު އެއްވެސް އެއްޗެއްގަ ސޮއި ކުރާކަށް. ކޭން ޔޫ ސްޓޮޕް ބޮދަރިންގް މީ؟" މައިރާއަށް ބުނެވުނީ އޭނާ އެހެންޏާ މުވައްޒަފުންނާ ވާހަކަ ދައްކާވަރަށްވުރެ ރުންކުރު ކޮށެވެ. ޒާރާވެސް އެކަމާ ހައިރާންވެ ޖެހިލުންވެފައިހުރެ ދޮރު ލައްޕައިލި އެވެ.
މައިރާއަށް ކުރެވުނު ކަންތައް ރޭކައިލި ފަދައިން ގޮނޑިން ތެދުވެ ދުވެލާފައިގޮސް ދޮރު ހުޅުވައިލި އެވެ. އަދި ކެބިންގެ ދޮރާ ހައެއްކަ ފޫޓު ދުރަށް ދެވިފައިހުރި ޒާރާއަށް ގޮވައިލި އެވެ.
"ޒާރާ ވެއިޓް. ސޮރީ ފޯރ ލޭޝިންގް އައުޓް ލައިކް ދެޓް. ޒާ އެއްވެސް ކަމެއް ގޯސްކޮށް ކުރީކީ ނޫން މިއަދު މިއީ ހަމަ އަހަރެންނަށް ވަރަށް ގޯސްކޮށް އިރުއެރި ދުވަހެއް. ތީތި ބޮޑުބެއަށް ކޮޕީކޮށްފަ އަހަރެންނަށް މެއިލް ކޮށްލެވިދާނެތަ؟ ވަގުތެއް ހޯދާލާނަން ތި ކަމަށް" މައިރާ މަޢާފަށް އެދުނެވެ.
ޒާރާ އެންމެ ރަނގަޅޭބުނެ މައިރާއަށް ހިނިތުންވެލުމާއެކު މައިރާ ކެބިނަށްވަދެ ދޮރު ލައްޕައިލި އެވެ. މޭޒުދޮށުގައި އިށީނދެލުމަށްފަހު އަސަރެއް ނެތް ބެލުމަކުން ލެޕްޓޮޕަށް ބަލަން އިނދެފައި ހުޅުވައިލީ ހުސްކޮށް އޮތް ވޯޑް ޑޮކިއުމެންޓެކެވެ. އޭގައި އޭނާގެ ވަޒީފާއިން ވަކިވުމުގެ ސިޓީ ލިޔެލުމަށްފަހު ދެން އެ މަގާމަށް އަންނާނެ މީހަކަށް ފަސޭހަ ކޮށްދިނުމަށްޓަކައި އޭނާ ފަށާފައިވާ މަސައްކަތްތައް ހުލާސާ ކުރަންފެށި އެވެ. އެއާއެކު އަނެއްކާވެސް ކެބިންގެ ދޮރުގައި ޓަކި ޖަހާލައިފި އެވެ. މިފަހަރުވެސް މައިރާ ދިޔައީ ސިއްސައިގެނެވެ. ކުރިންވެސް ހީކުރެވުނު ސަބަބުތަކާހުރެ އެވެ. ނަމަވެސް މިފަހަރުވެސް ދޮރުމަތީގައި ހުރީ ޒާރާ އެވެ. ކުރީ ފަހަރު ހިފަހައްޓާލައިގެންހުރި ފައިލްގެ ބަދަލުގައި މިފަހަރު ޒާރާގެ އަތުގައިހުރީ މަތި ޖަހާފައިވާ ކޮފީ ތަށްޓެކެވެ.
"އައި އާސްކްޑް ޑެނިއެލް ފޯރ ޔުއަރ ޔޫޝުއަލް" ޒާރާ އެ ތަށި މޭޒުމަތީގައި ބަހައްޓާލާފައި ނުކުތެވެ. އޭގެ ވަހުން އެކަނިވެސް މައިރާގެ ތުންފަތަށް ހިނިތުންވުމެއް ގެނުވި އެވެ. އެއަށްވުރެވެސް ބޮޑަށް އުފާވީ ޒާރާއަށް އަމިއްލައަށް ފެނިގެން އޭނާއަށް އެވަރު ކަމެއް ކޮށްދޭން ހިޔާލުކުރީތީ އެވެ. އަދި ހަފްތާއަކު އެތައް ސަތޭކާ ކަސްޓަމަރުންނަކަށް ހިދުމަތްދޭ ބާރުބޮޑު ރެސްޓޯރަންޓެއްގައި މަސައްކަތްކުރި ނަމަވެސް ޑެނިއަލް އޭނާގެ އޯޑަރު ހަނދާން ހުރީތީ އެވެ. މައިރާއަށް އިހުސާސްވީ އެ މުވައްޒަފުން އޭނާދެކެވާ ލޯތްބެވެ. އޭނާ އެ މުވައްޒަފުންނާ ދޭތެރޭ ބަހައްޓާ ގާތްކަން އެ މުވައްޒަފުން ބަލައިގަންނަ ކަމެވެ.
****************
ހުޅުމާލޭގެ ހަލަބޮލި މަގެއްގެ އެއްފަރާތުގައި ސައިކަލު ބަހައްޓާލައިގެން އިން ނަދާލް އަތުކުރީގައި އޮތް ގަޑިއަށް ބަލައިލި އެވެ. އެއަށްފަހު އިސް އުފުލައިލަމުން އޭނާ އަނެއްކާވެސް ބަލައިލީ މަގާ މާ ދުރުނޫން ހިސާބެއްގައި ހުންނަ ކްލިނިކަށެވެ. އެތަނަކީ ކޮންމެ ހަފްތާއެއްގެ ބުރާސްފަތި ދުވަހު އައިލީން އަންނަން ހަމަޖެހިފައިވާ ތެރަޕީ ކްލިނިކެވެ.
އައިލީން އާންމުކޮށް އެތަނަށް އަންނަ ގަޑި ފަހަނައަޅައި ދިޔުމުން އައިލީން ފެނިލާތޯ ކުރެވެމުންދިޔަ އުއްމީދު ފަނޑުވި ނަމަވެސް ނަދާލް ހިތްވަރު އެލުވައިލާކަށް ނޫޅުނެވެ. މެންދުރުގެ ހޫނުގަދަ ވަގުތުކަމުން އޭނާ ލައިގެންހުރި ގަމީސް ދަލުން ފޯވެގެން ގޮސް ގައިގައި ތަތްލަމުން ދިޔައިރުވެސް އޭނާގެ އަޒުމަކަށް ބަދަލެއް ނާދެ އެވެ. އެ އިންތިޒާރުގެ ނިމުން ވަރަށްވެސް ފޮންޏެވެ. ކްލިނިކްގެ ދޮރުމައްޗަށް މަޑުކޮށްލި އޮފްކަންގަދަ ކަޅުކުލައިގެ ޕްރައިވެޓް ކާރަކުން އައިލީން ފޭބި އެވެ. ނަސީބު ކަންދިމާކުރިގޮތުން އައިލީން ފޭބީވެސް މަގައިވީ ފަޅިއަށް ކަމުން ނަދާލްއަށް ނުހަނު ސާފުކޮށް އައިލީން ފެންނަވަރު ވިއެވެ. މަޑު ނޫކުލައިގެ އަތްދިގު ސްވެޓަރަކާއި ހުދު ޖީންސެއްގައިހުރިއިރު އެ ބުޅި އިސްތަށިގަނޑުވަނީ ހުޅިއެއްގައި ހައްޔަރު ކޮށްލައިފަ އެވެ. އެ މޫނުމަތި މިލާފައިވި ނަމަވެސް އެތަނުން އައިލީން ފެނުމުން ނަދާލްގެ ހިތަށް ފިނިކަމެއް އިހުސާސް ކުރެވުނެވެ. އޭނާއާ ވަކިވި ކަމުގައިވިޔަސް އައިލީންގެ ނަފްސާމެދު ފަރުވާކުޑަ ނުކުރާކަން އެނގުމުން ހިތަށް ބަޔާންކުރަން ދަތި ހަމަޖެހުމެއް ލިބުނެވެ. އޭނާ ސައިކަލު ދުއްވައިލީ ކާރުގެ އަނެއް ފަރާތުން ފޭބި އަންހެނަކާއެކު އައިލީންގޮސް އެ ކްލިނިކަށް ވަދެ ގެއްލުމުންނެވެ.
**************
"ދޮންބެދައްތާ؟ އެކަނިތަ؟ ކޮބާ ޒީންތަ މިރޭ؟" ތަބަކެއްގައި އަތުރާފައިހުރި ކޮފީ ޖޯޑުތަކެއް ހިފައިގެން އައިސް ޓެރަހުގައިހުރި ހަޓަށް ވަތް ނުސްރާ ފެނި މާޒިޔާ ސުވާލުކުރި އެވެ.
"އަންނަ ގޮތަކަށް ނޫން ހުރީ. އެނގެއެއްނު؟ މައިޝާން ބަންދުކުރި ފަހުން ކުރިއަށްވުރެވެސް އަހަރުމެންނާ ދުރުންނެއްނު އުޅެނީ. މަލް ކޮބާތަ މިރޭ؟ ނާދޭތަ ކުޑާއްތައާއެކު؟" މޭޒުމަތީގައި ތަބައް ބަހައްޓައިލަމުން ނުސްރާ ގޮނޑީގައި ހަމަޖެހިލި އެވެ.
"ނޫނޭ.. ގަބޫލުކުރަން ބޭނުން ނުވިޔަސް މިހާރު އެހެރީ އަހަރެން ފުލުން އުޅޭވަރަށްވުރެ ބޮޑުވެފަ" މާޒިޔާ ހިނިތުންވެލި އެވެ.
"ތިބުނީ؟" ނުސްރާ އަހައިލި އެވެ.
"މިރޭ ހިނގައްޖެ ބޭރަށް" މާޒިޔާ ބުންޏެވެ.
"ބޭރަށޭ؟ މަލްކޮ؟" ނުސްރާ ހައިރާންވި އެވެ.
"ހްމްމް. ހަވީއްރުއްސުރެން ހަމަ އެކަނިހުރެ ވާހަކަދައްކަނީ. އެންމެފަހުން އަހަރެން އެކަމާ ކަންބޮޑުވެގެން އޭނަ ގެނެސް ވާހަކަދައްކާލީމަ ބުނެފި މިރޭ ބޭރަށް ދިޔަސް އެންމެ ރަނގަޅުހޯ މައިއާ އެއްކޮށް. ނޫނެކޭ ބުނާނީ ކިހިނެއް؟ އަހަރެން ހުރީ ވަރަށް ބިރުން. އެނގޭ އެ އާޝިޔާގެ ކުއްޖާ މާދަމާ ފުރާތީ އޭނައާއެކު ދާންވެގެންކަން. އެކަމަކު ދެން އަޅާނުލީ… މާބޮޑަށް ހިފަހައްޓައިގެން އުޅުނީމަ ކުރިންވެސް ވީގޮތް އެނގެއެއްނު ދޮންބެދައްތާ؟ އަހަރެންގެ ހިތެއް ނުބުނޭ ޝާވިން މަލްއަށް ދެރަގޮތެއް ހަދާނެއެކޭ" މާޒިޔާ ކޮފީ ތަށިން ރަހަ ބަލައިލި އެވެ.
"އެކަމަކުވެސް އެހާ ފަސޭހައިން އިތުބާރު ކުރާކަށް ނުވާނެ. މާ ލަސްވަންޏާ ހަނދާންކޮށް ގުޅާލައްޗޭ. މަލަކްގާތު މިހާރު އެވާހަކަ ދައްކައިފިންތަ؟" ނުސްރާ އަހައިލި އެވެ.
"ނޫން. އަހަރެންނަކަށް ނުކެރޭނެ. މިއަދު އިވާންވެސް އަހަރެންގާތު ގުޅާފަ ބުނެފި އެކަންތައް މަލްއަށް ސިއްރު ކޮށްދޭށޭ. އޭނަވެސް ބޭނުމެއް ނުވޭ އެކުދިންގެ ގުޅުން ކަނޑާލާކަށް" މާޒިޔާ ބުންޏެވެ.
"މާޝާﷲ އެއީ ހާދަ ރަނގަޅު ކުއްޖެކޭ. ވަރަށް ރަނގަޅަށް ބަޔަކު ތަރުބިއްޔަތު ކޮށްފަހުރި ކުއްޖަކަށް ވާނީ. ހިތަށް މި އަރަނީ އަހަރުމެންގެ ތަރުބިއްޔަތުގަ އުނިވީ ކޮން ކަމެއްބާއޭ. ނަދާލްއަށް ލީންދެކެ ލޯބި ނުވެވުނުނަމަ.. އަދި ލީން އޭނަ ދޫކޮށްލާފަ ނުދިޔަނަމަ އޭނަ އަދިވެސް މިއިން ކަމަކާ ހިތާމައެއް ނުކުރާނެ" ނުސްރާގެ މޫނުމަތިން އިންތިހާ ދަރަޖައިގެ ކަންބޮޑުވުން ފެންނަމުންދިޔަ އެވެ. "ދެން ހުރީ މައިރާ. މައިރާއަށް އެ ހެދުނީ ވަރަށް ބޮޑު ގޯހެއް. ދުވަހަކުވެސް ހިއެއް ނުކުރަން މައިރާ އެވަރުގެ ކަމެއް ކޮށްފާނެ ކަމަކަށް. ކުޑާއްތަ ތި ވިސްނަނީ ހަމަ ހަގީގަތިގަވެސް މައިރާ ކުންފުނިން ދުރުކުރަންތަ؟"
ނުސްރާ ސުވާލު ކުރީ މާޒިޔާއާ ނަމަވެސް ނުސްރާ ދިން ދައުވަތާމެދު ހިޔާލު ބަދަލުވެގެން އެވަގުތު ޓެރަހަށް އެރި ޒީނިޔާގެ ކަންފަތާ ހަމައަށްވެސް އެ ސުވާލު ފޯރައިފި އެވެ. އޭނާއަށް ބުމަ ގޮށްޖަހައިލަމުން ހުރި ފިޔަވަޅު މައްޗަށް ގަނޑުވެވުނެވެ. ނަމަވެސް ދެވަނަ ސިކުންތުގައި ހަޓާ ދިމާލަށް ސިއްރު ފިޔަވަޅުތަކެއް އަޅަން ފެށި އެވެ.
"ނޫނޭ. އެގަޑީގަ ރުޅި އާދެވިފަ ހުރިވަރުން އަހަރެންނަށްވެސް އެހެން ބުނެވުނީ. އެކަމަކު ބޭބެމެންގާތު މި ވާހަކަ ނުދައްކައެއް ނުހުރެވޭނެއެއްނު؟ ނަދާލް އެ ކުރި ކަންތައް ދޮންބެއަށް އެނގެންވާނެ. އަދި މައިރާ އެ ކުރި ކަންތައް ތިއްތިބެއަށް. ކުށެއް ނެތް މީހެއްގެ މުސްތަގްބަލޭ އެ ހަލާކު ކޮށްލީ. އެހާ ފަސޭހައިން މިކަން ދޫކޮށްލާނީ ކިހިނެއް؟" މާޒިޔާގެ އަޑުގައިވަނީ ނުރުހުމާއި ހިތާމަ މަސްހުނިވެފައިވާ އަސަރެކެވެ.
"ކޮން ކަމެއް؟" އެ ވާހަކަތައް އަޑު އަހަންހުރި ޒީނިޔާ ކެތްކޮށްލީ އެހިސާބަށެވެ. އޭނާ ހަމަ ކުއްލިއަކަށް ހަޓް ތެރެއަށް ވަދެގަތެވެ.
"ޒީންތަ-" "ޒީނިޔާ-" ލިބުނު ސިހުމާއެކު މާޒިޔާއާއި ނުސްރާއަށް އެއްފަހަރާ ގޮވައިލެވުނެވެ.
"ކޮން ކަމެއްހޭ! މައިރާ ކީއްކުރީ؟" ޒީނިޔާގެ އަޑު އިހުނަށްވުރެ ބާރުވެލި އެވެ. މާޒިޔާއާއި ނުސްރާ ހަދާނެ ގޮތް ނޭނގިފައި ތިބެ އެކަކު އަނެކަކަށް ބަދަލުކޮށްލި ނަޒަރުފެނި އޭނާގެ ގާތަށް އައީ އަމަށަކު ރުޅިއެއް ނޫނެވެ.
"ބަލަ މުރުޝިދުގެ އެކަނި ދަރިއެއް ނޫނޭ އެއީ! މައިރާގެ ކަމަކިއްޔާ އަހަރެންނަށްވެސް އެނގެން ޖެހޭނެއޭ! ކަލޭމެން އަހަރެންނާ ދޭތެރޭ އާއިލާގެ ގޮތުގަ ނުދެކުނަސް މަގޭ ބަނޑުގައޭ އޭނަ ނުވަމަސް ވަންދެން އޭނަ ގެންގުޅުނީ" އޭނާ އެދެމީހުންނާ ގާތަށް ފިޔަވަޅެއް އަޅައިލަމުން އަޑަށް ހަރުކަށިކަން ވެރިކޮށްލި އެވެ.
"ޒީންތާ އެހެނެއް ނުބުނަމެއް-"
"ދެން ކީއްވެތަ މައިރާ ކުރިކަމެއް އަހަރެންގާތު ނުބުނެވިގެން ތި އުޅެނީ؟" މާޒިޔާގެ ޖުމްލަ މެދުކަނޑައިލަމުން ޒީނިޔާ އަނެއްކާވެސް ހަޅޭއްލަވައިގަތެވެ.
"އެހެނެއް ނޫނެއްނު ޒީނިޔާ! ނުބުނާކަށް ނޫނޭ! އާދެބަލަ! އައިސް މިތާ އިށީނދެބަލަ. ރުޅި އައިސްފަހުރެ ދެއްކޭ ކަހަލަ ވާހަކައެއް ނޫނޭ މި ހުންނަނީ" ނުސްރާއަށް ޒީނިޔާގެ ރުޅި ހުރި ހިސާބު އަންދާޒާ ކޮށްލެވުމާއެކު ޒީނިޔާގެ އަތުގައި ހިފައިގެން ގެނެސް އެދެމީހުންގެ މެދުގައި ބައިންދައިލި އެވެ.
"ތި ބުނާހެން މައިރާގެ ކަމެއްވީމަ އަހަރެން ބޭނުމެއް ނޫން ޒީނިޔާއަށް މިކަން ސިއްރު ކުރާކަށް. ނަދާލް މިވަރު ކަމެއް ކުރިއިރު މިއަދާ ހަމައަށް އަހަރެންނަށް މިކަން ނޭނގި އޮތީމަ މިވާ އުނދަގޫ އެނގޭނީ އަހަރެންނަށް ދޯ؟ އެކަމަކު ޒީނިޔާ ވައުދުވޭ މި ކަންތަކުގެ ރުޅި އިސްކޮށްގެން އެއްވެސް ކަމެއް ނުކުރާނަން ކަމަށް" ނުސްރާ ދިއްކޮށްލި އަތްމަތީގައި ޒީނިޔާގެ އަތް ބާއްވައިލީ އިތުރު ގޮތެއް ނެތުމުންނެވެ. އެއާއެކު ނުސްރާގެ އިޝާރާތަށް މާޒިޔާ އެ ހުރިހާ ވާހަކައެއް ޒީނިޔާއަށް ކިޔައިދޭން ފަށައިފި އެވެ.
"ޒީންތަ؟ އެއްޗެކޭ ނުބުނާނަންތަ؟" ހުރިހާ ހަގީގަތެއް ހާމަވެ ދިޔުމަށްފަހުގައިވެސް ޒީނިޔާގެ ފުށުން ފެންނަމުންދިޔަ ހިމޭންކަން މާޒިޔާއާއި ނުސްރާގެ ހިތުގައި ބިރުވެރިކަން އުފެއްދި އެވެ. ޒީނިޔާއެކޭ ދެންމެދެންމެ ގޮވައިފާނޭ ބޮމެކޭ ތަފާތެއް ނެތްކަން އެދެމީހުންނަށްވެސް އެނގެ އެވެ. ކަންވީވެސް ހަމަ އެހެންނެވެ. ކުއްލިއަކަށް ޒީނިޔާ ނުސްރާގެ އަތުން ދޫކޮށްލުމަށްފަހު އަވަސް ފިޔަވަޅުތަކެއްގައި ޓެރަހުން ނުކުތުމަށް ހިނގައިގަތެވެ.
"ޒީންތާ!" މާޒިޔާއަށް ގޮވައިލެވުނެވެ. ނުސްރާއާ ދެމީހުން އެކުއެކީގައި އޭނާގެ ފަހަތުން ދިޔަނަމަވެސް އޭރު ޒީނިޔާ ލިފްޓަށް އަރައިގެން ހިނގައްޖެ އެވެ. މާޒިޔާ ކަންބޮޑުވެފައިހުރެ ނުސްރާއަށް ބަލައިލަމުން ލިފްޓަށް ފިތައިލި އެވެ.
ޒީނިޔާގެ އަތުގަ ހުރި ބާރެއްލާފައި އެޕަރޓްމެންޓްގެ ދޮރު ހުޅުވައިލި އެވެ. ވައިސޫރިއެއްގެ ބާރުމިނުގައިގޮސް އޭނާ މަޑުކޮށްލީ މައިރާ އުޅޭ ކޮޓަރީގެ ދޮރުމަތީގަ އެވެ.
"މައިރާ!" ޒީނިޔާގެ ބާރު އަޑަށް މައިރާގެ ކޮޓަރީގެ ހަތަރު ފާރުވެސް ގުޑައިގަތް ކަހަލަ އެވެ. ފާހަނައިގައިހުރި މައިރާ އަވަސް އަވަހަށް ފެން މާގަނޑު ބަންދުކޮށްލުމަށްފަހު ތުވާލިން ގައި ހިއްކަމުން ފާހަނައިން ނުކުތެވެ.
"މައިރާ ދޮރު ހުޅުވާށޭ! މައިރާ!" ޒީނިޔާގެ އަޑު ހިނދެއް ހިނދަކަށް ބާރުވަމުންދިޔައިރު ދޮރުފަތުގެ ތަޅުގައި ހިފައި ތަޅުވަމުންދިޔަގޮތުން ހީވަނީ ތަޅުވެސް ފުނޑުފުނޑު ކޮށްލައިފާނޭ ހެނެވެ. މައިރާ އަތުގައި އޮތް ތުވާލި އެޅުވުމަށްފަހު ހަރުގައި އޮތް ބާތްރޯބު ގަޔަށް މަހައިލައި ގޮށެއް ޖަހައިލަމުން ދޮރު ހުޅުވައިލި އެވެ.
"މަންމާ ކިހިނެތްވި- އާހް އައްދޯތް!" މައިރާގެ ސުވާލު ފުރިހަމަ ނުކުރެވެނީސް ޒީނިޔާ ކުއްލިއެއް ޖަހައި މައިރާގެ ތެތް އިސްތަށިގަނޑުގައި ހިފައިގަތެވެ. އަދި ސިޓިންގްރޫމުގެ ތަޅުންގަނޑާ ދިމާލަށް މައިރާ ހޫރައިލި އެވެ. މައިރާއަށް ހީވީ އޭނާގެ ބޮލުގެ އިސްތަށިތައް ލުހިގެން އައި ހެނެވެ. ހިސާބަކަށް ބުރާންތި އަރާފައި އިނދެ ލައިގެންހުރި ބާތްރޯބްގެ ފަސްބައި ރީތި ކޮށްލަމުން ޒީނިޔާއާ ކުރިމަތިލި އެވެ.
"މަށަށް އެކަނިވިއްޔާ މި ތިބީ ދަރިން ލިބިފަ! ތާކު ނުބައި ކަމެއް އޮތިއްޔާ އެތަނަކަށް ފާވާން އެބަ އެނގޭ ދޯ ކަލޭމެންނަށް!" ޒީނިޔާގެ ހައްދެއް ނެތް ރުޅިވެރިކަމުގެ ބަސްތައް މައިރާއާ އަމާޒުވަމުންދިޔަ އެވެ.
"މަންމާ.. މަންމާ ޕްލީޒް އަޑު މަޑުކޮށްބަލަ" މައިރާއަށް ބުނެވުނެވެ. އޭނާ ކަންބޮޑުވީ މިވަގުތު މާޒިޔާއަށް އެތަނަށް އާދެވިދާނެތީ އެވެ. މަލަކް ބޭރަށް ދިޔައީ އޭނާއާ އެކުގައޭ މާޒިޔާގާތު ބުނެވިފައި ވާތީ އެވެ.
"ޒީނިޔާ! ކިހިނެއްތަ ވެގެން ތި އުޅެނީ؟" ނިދާފައި އޮތް މުރުޝިދުވެސް ޒީނިޔާގެ އަޑަށް ހޭލައިގެން ކޮޓަރިން ނުކުތެވެ. އޭނާއަށް މައިރާ ފެނުމާއެކު ދެލޯ ބޮޑުކޮށްލަމުން މައިރާއަށް ބިންމަތިން ތެދުވުމުގައި އެހީވެދިނެވެ.
"ޒީނިޔާ މޮޔަވީތަ؟ މިއޮއްފަދަ ގަޑީގަ އޭނައަށް ކޮން ވަރެއްތަ ތި ބާލަނީ؟" މުރުޝިދު ގާތަށްވެސް މިފަހަރު އައީ ރުޅިއެކެވެ.
"ވަރެއް ވާ ނުބާލަމެއްނު! މުރުޝިދު އަހާބަލަ އޭނަގާތު ކީއްތޯ ކޮށްގެން އެ އުޅެނީ! މަލަކްއަށް ބަޔަކު ކޮންމެ ގޮތެއް ހެދިޔަސް ކަލޭ ޖެހޭތަ ދުނިޔެމަތިން ކުރާނެ ކަންކަން ނެތިގެން ބަދަލު ހިފާށޭ ކިޔާފަ އިންސާފޭ ކިޔާފަގޮސް ބޮޑެތި ކުށްކުށަށް އަރައިގަންނަން! ކަލެއަށް ކަމެއްވީމަ މަލަކްތަ ބަދަލުގަ ގޮސް ޖަލުގަ އޮންނާނީ؟" ޒީނިޔާ މުރުޝިދާ ދައްކަންފެށި ވާހަކަ މައިރާއަށް އަނބުރައިލަމުން ދުރު ފިޔަވަޅު ތަކެއްގައި އައިސް މައިރާގެ އަތުގައި ހިފައިގަތެވެ. އޭރު ނުސްރާއާއި މާޒިޔާއަށްވެސް އެތަނަށް އާދެވިއްޖެ އެވެ. އަދި އެ ފަންގިފިލާގެ ތިރިއަށް ހުންނަ ފަންގިފިލާގައި ތިބި ނަދާލްއާއި މާޖިދުވެސް އަޑުފަށްގަނޑު ގަދަވެގެން އެތަނަށް އަތުވެއްޖެ އެވެ.
"މުރުޝިދު! ކިހިނެއް ވެގެންތަ ތި އުޅެނީ؟ ކޮންމެ ދެދުވަހުން އެއްދުވަހު މިތާ ހައިޖާނުގަނޑެއް ހިންގައި ހަޅޭއްފަޅޭއް ޖަހާއިރަކު ނޭނގޭތަ މިގޭގަ ކުއްޔަށް އުޅޭ މީހުންނަށްވެސް އުނދަގޫވާނެ ކަމެއް؟" މާޖިދުގެ ހިތްހަމަނުޖެހުން އަމާޒުވީ މުރުޝިދަށެވެ. އެހެނަސް މުރުޝިދަށް ރައްދުގައި އެއްޗެކޭ ނުބުނެވެނީސް އިވުނު ޒީނިޔާގެ އަޑަށް އެންމެންގެ ސަމާލުކަން ހުއްޓިއްޖެ އެވެ.
"އެ އިވާންގެ އިހުސާންތެރިކަމުން ނޫންނަމަ ކަލޭވެސް ކަލޭގެ އެހެރަ ދޮންބެއަކާއެކުގޮސް މިއަދު އޮންނާނީ ޖަލުގައޭ!" ޒީނިޔާ މިފަހަރު ބުނެލި ޖުމްލައާއެކު އެތަނުގައިހުރި ނަދާލްގެ މޫނުމަތިން ސުވާލުގެ ރޫތައް ފިލައިދިޔަ އެވެ. އޭނާ އެއް އަތް މޫނުގައި ހިންގައިލަމުން ހަށިފުރާ ނޭވާއެއް ދޫކޮށްލީ އެކަންތަކާ ކުރިމަތިލާން ތައްޔާރުވާ މީހަކު ފަދައިންނެވެ.
"މިރޭވެސް މިދެމީހުން ކަލޭ ކުންފުނިން ވަކި ކުރަން ވާހަކަ ދައްކަނިކޮށޭ މަށަށް ދެވުނީ! މީނައަށްވެސް ލިބޭ ފުރަތަމަ ފުރުސަތުގަ ކަލޭ ގަންބާލާނެ. ބަލަ އޭނައަކީ މި އާއިލާއަށް ދުރުން އައިސްހުރި މީހެކޭ. ކަލޭ އެންމެނަށް މާ ހެޔޮއެދިގެން އެވަރެއް ނެތިގެން އުޅުނަސް އޭނަގެ ނުހުންނާނެއޭ އެ ކުލުނެއް!" ޒީނިޔާ އެއްފަހަރު މާޒިޔާއާއި ނުސްރާއަށް އަނެއްފަހަރު ނަދާލްއަށް އިޝާރާތް ކުރަމުން މައިރާއާ ދިމާލަށް ހަޅޭއްލެވި އެވެ.
"ޒީނިޔާ ތި ބޭކާރު ވާހަކަދެއްކުން ހުއްޓާލަބަލަ! މައިރާ އަހަރެންނަށް ކިޔާދީބަލަ މި ވެގެންއުޅޭ ގޮތެއް" މުރުޝިދު ހަރުކަށިކަމާއެކު އަމުރުކުރި އެވެ.
"ބައްޕާ އަޅުގަނޑު.. އަޅުގަނޑަށް މަޢާ-"
"ތިއްތިބޭ" މައިރާގެ ވާހަކަ މެދުކަނޑައިލަމުން ނަދާލް ކުރިއަށް ފިޔަވަޅެއް އަޅައިލި އެވެ. "އަޅުގަނޑު.. އަޅުގަނޑު ކިޔައިދީފާނަން ވެގެން އުޅޭގޮތް.. މައިއަކަށް ފަސޭހައެއް ނުވާނެ މިވާހަކަ ދައްކާކަށް. އެހެންނޫނަސް.. ހުރިހާ ކަމެއް ކުރީ އަޅުގަނޑު.. މައި.. މައި ކުރިކަމެއް ކުރީ އަޅުގަނޑު ބުނި ގޮތަކަށް” ނަދާލް ލަސް ފިޔަވަޅުތަކެއްގައި ގޮސް އެތަނުގައިހުރި ސޯފާގައި އިށީނދެލި އެވެ. މައިރާ އަވަހަށްގޮސް ކޮޓަރިއަށް ވަނީ އެއްޗެހި ބަދަލު ކޮށްލާށެވެ.
"ދެން ކޮންމެވެސް މީހަކު ކިޔައިދޭން ވެއްޖެއެއްނު މި ވެގެން އުޅޭ ގޮތެއް!" މާޖިދަކަށްވެސް ހިމޭނަކުން ނުހުރެވުނެވެ.
ނަދާލް އިސް އުފުލައިލިއިރު އެންމެންގެ މޫނުތައްވަނީ އޭނާއާ ދިމާލަށް އެނބުރިފަ އެވެ. ނުސްރާގެ މޫނު ފިޔަވަ އެވެ. އޭނާއާ ދިމާލަށް ބަލައިވެސް ނުލާން ހުވާ ކޮށްގެންހުރި މީހަކު ފަދައިން ނުސްރާގެ މޫނު ދުރަށް އަނބުރާލައިގެން ހުރިގޮތުން އެކަނިވެސް ނަދާލްއަށް ނުސްރާ އޭނާދެކެ ހިތްހަމަ ނުޖެހިފައިހުރި މިންވަރު އަންދާޒާ ކޮށްލެވުނެވެ. އެހެނަސް އޭނާ މިފަހަރު ފަސްޖެހޭކަށް ބޭނުމެއްނުވި އެވެ.
"މިފަހުން ހިނގައިގެން އުޅޭ ކަމެއް ނޫން މިއީ.. މީގެ އަހަރެއްހާ ދުވަސް ކުރިން.. ކާފަ ނިޔާވުމަށްފަހު.. ބައްޕައަށްވެސް އެނގިލައްވާ ނޫންތޯ އަޅުގަނޑު މައި ގޮވައިގެން ދަތުރަކު ދިޔަކަން… އަޅުގަނޑުމެން އެ ދަތުރަށް ފުރީ ވަރަށް ބޮޑު ރޭވުމަކާއެކު.. އެ ދަތުރުގެ ވަކި ހިސާބަކުން މައިއާ އަޅުގަނޑާ ވަކިވީ.. އަޅުގަނޑު މަހަލްދީބްގަ މަޑުކުރިއިރު.. މައި ދިޔައީ އިވާންމެންގެ ރަށަށް..."
ނަދާލް ކިޔައިދެމުންދިޔަ ވާހަކަތަކުން ހައިރާންކަމެއް ލިބުނީ މާޖިދާއި މުރުޝިދަށް އެކަނި ކަމުގައިވިޔަސް ދެން އެތަނުގައިތިބި މީހުންވެސް ކަނުލައި އެވާހަކަތައް އަޑު އަހަމުންދިޔަ އެވެ.
"އޭރު ހީކުރެވުނީ އިވާންއާމެދުވެސް އެ ކަންތައް ކުރެވުނީ ހަމަ އެންމެ ރަނގަޅަށޭ. އައިލީންއަށްވެސް އެވަރުގެ ބޮޑު އޮޅުވާލުމެއް އޮޅުވާލާފައި އައިއިރު ހިއެއް ނުކުރަން ދެވަނަ ފަހަރަށް އައިލީންއާ ބައްދަލުވެދާނެ ކަމަކަށް. އައިލީން މައިޝާންއާ ކައިވެނިކުރަން ނިންމި ހިސާބުން އެކަމަކު އަޅުގަނޑަށް އިހުސާސްވީ އޮޅުވާލެވުނީ ހަމައެކަނި އައިލީންއަށް ނޫންކަން.. އަޅުގަނޑުގެ އަމިއްލަ ނަފްސަށްވެސް.. އަމިއްލަ ހިތަށްވެސް އޮޅުވާލެވިއްޖެކަން.. އޭރު ދެން ކުރެވޭނެ އިތުރު ކަމެއް ނެތް. އެހެންވެ އެ ކައިވެންޏަށް ތިންމަސް ވިއިރުވެސް އުޅުނީ އައިލީންއާ ދުރުން.. ވާހަކައެއްވެސް ނުދައްކަން. އެކަމަކު ކަންތައްތައް ގޯސްވި ހިސާބުން އިތުރަށް ބޭނުންނުވީ އައިލީން އެ ކައިވެނީގަ ބަހައްޓަން. އޭރުވެސް މައިޝާން ހުރީ އައިލީން ވަރި ކުރާގޮތަކަށް ނޫން. އެކަންތަކުގަ މައިޝާންއަށް އައިލީން ވަރިކުރަން ޝަރުތުކޮށްފަ އަޅުގަނޑު ކުންފުންޏާ ދުރަށް ޖެހުނީ" ނަދާލް އިސްޖަހައިގެން އިނދެ ހުރިހާ ހަގީގަތެއް ހާމަކޮށްދިނެވެ. މައިރާ ކިޔައިދިން ވަރަށްވުރެވެސް ތަފުސީލުކޮށެވެ. މިހާރު އެތަނުގައި ތިބި އެންމެނަށްވެސް ބޮޑު މަންޒަރު ފެންނަން ފަށައިފި އެވެ.
"މިހާރު ނަދާލް ތި ހުރިހާ ވާހަކައެއް ދައްކަނީ އަހަރުމެންގެ ހަމްދަރުދީ ލިބޭނެ ކަމަށްތަ؟" ހިމޭންކަމުގެ ތެރެއިން އެންމެ ފުރަތަމަ އިވުނީ ނުސްރާގެ އަޑެވެ. އޭނާގެ ދެލޮލުން ހޯސްލާފައި ކަރުނަތައް ފައިބަމުން ދިޔައިރު ނަދާލްގެ އަމަލުތަކުން އޭނާ ނުހަނު ހިތުގައި ޖެހިއްޖެކަން ޔަގީންވެ އެވެ.
"މަންމާ.." ނަދާލްއަށް އިށީނދެ އިން ގޮނޑިން ތެދުވެވުނެވެ.
"ނޫން.. އަހަރެންނާ ދިމާލަށް ތިހެން ކިޔުމުގެ ހައްގު ނަދާލްއަށް ގެއްލިއްޖެ. ހަމަ ގައިމުވެސް.. ހަމަ ގައިމުވެސް އަހަރެންނަކީ އިންސާނުންގެ މައްޗަށް ތިހާ ރަހުމުކުޑަ މީހެއް.. ނޫން.. އަހަރެންނަކީ މީހުންނަށް ތިހާ.. ގޯސް މީހެކޭ މިތާހުރި އެކަކުވެސް.. ނުބުނާނެ.." ގިސްލެވޭވަރުން ނުސްރާއަށް ވާހަކަވެސް ދެއްކެނީ ކިރިޔާ އެވެ. "ނަދާލް… ނަދާލް ތި ސާބިތު ކޮށްދިނީ.. ނަދާލްއަކީ ހަމަ ހަގީގަތުގަވެސް އަހަރެންގެ ދަރިއެއް ނޫންކަން ނޫންކަން!"
ނުސްރާގެ ފަހު ޖުމްލައާއެކު ނަދާލްއަށް އުނދަގޫ ގޮތަކަށް ހިންދިރުވައިލަމުން ދެލޯ މަރައިލެވުނެވެ. އޭނާއަށް މަޢާފަށް އެދުމުގެ ފުރުސަތެއްވެސް ނުދީ ނުސްރާ އެ އެޕަރޓްމެންޓުން ނުކުމެގެން ހިނގައްޖެ އެވެ. އެއާއެކު އޭނާގެ ކުރިމަތީގައި އައިސް ހުއްޓިލީ މާޖިދެވެ. މާޖިދު އަލިފާން އަރަމުންދިޔަ ދެލޮލުން ނަދާލްއަށް ބަލައިލަމުން އަތުގެ ހޫނު ހަމަލާއެއް ނަދާލްގެ ކަންފަތް މައްޗަށް ވީއްލައިލި އެވެ.
"ނަދާލްއަށް އެނގޭތަ ތި ކުޅެލެވުނީ ބައެއްގެ ދިރިއުޅުމާކަން؟ ދެން އަހަރުމެން އެމީހުންގެ ކުރިމަތީގަ އިސް އުފުލައިލާނީ ކިހިނެއް! މިއަދުވެސް އިވާންގެ ހިޔާލު ބަދަލުވެއްޖެނަމަ.." މާޖިދުގެ ވާހަކަ އެހިސާބުން މެދުކަނޑައިލި އެވެ.
"އަޅާނުލާ! ދެން އެވާހަކަ ދައްކަނީ ކީއްކުރަން.. ނަދާލްއަކީ މި ހުރިހާ އެއްޗެއް ނޭނގޭވަރުގެ މޮޔައެއް ނޫނެއްނު! ދޭ! އަހަރެންގެ އަތުން ފައިން ގޯހެއް ނެހެދެނީސް ނަދާލް ހަމަ މިހާރު އަހަރެންގެ ކުރިމަތިން ދުރަށް ދޭ!" މާޒިދު ނަދާލްއަށް ފުރަގަސްދިނެވެ.
"އެއީ ނިމުނީތަ؟ އަހަރެން މި އަހަނީ އެއީ ނިމުނީހޭ؟" ނަދާލް ލަސްލަހުން އެ އެޕަރޓްމެންޓްގެ ދޮރާ ދިމާލަށް ނަގަމުންދިޔަ ފިޔަވަޅުތައް ހުއްޓުނީ ޒީނިޔާގެ އަޑަށެވެ. ޒީނިޔާގޮސް ހުއްޓިލީ މާޖިދުގެ ކައިރިއަށެވެ. އޭރު މައިރާވެސް ތައްޔާރުވެލައިގެން ކޮޓަރިން ނުކުމެއްޖެ އެވެ.
"ޒީނިޔާ!" މުރުޝިދު ރުޅިއައިސްފައި ގޮވައިލި އެވެ. ޒީނިޔާ އެހާ އިހްތިރާމް ކުޑަކޮށް މާޖިދާ ވާހަކަދެއްކުން އޭނާއަކަށް ބަލައެއް ނުގަނެވެ އެވެ.
"ކިހިނެއްވީ؟ ބަލަ މައިޝާން އެކަން ކޮށްގެން އަހަރެންގެ ކުރިމައްޗަށް ގެނައިނަމަ އަހަރެންވެސް އެގޮތަށް އަދަބު ދިނީމުހޭ! ކަންކަށިމަތީގަ ޖަހާފަ ގޭގަ ބަންދު ކުރީމުހޭ! އެކަމަކު އެ ފުރުސަތު ދިނިންތަ؟ އޭނައަށް ވަކީލަކު ހަމަޖައްސައި ނުދިންތާނގަ ވިޔަފާރިން ދުރަށް ޖައްސާ.. ބޯޑުން ވަކިކޮށް.. އާއިލާއިން ވަކިކޮށް.. ނުވިތާކަށް އެތަނުން ނުނިކުމެވޭވަރު ކުރަންވެގެން އެކި މައްސަލަ މި މައްސަލައިގެ ތެރެއަށް ވައްދާ؟ ނަހަދަންތަ އެހެން؟ މައިރާ އޭން؟ ޖަވާބު ދީބަލަ! ކަލޭމެންގެ އަމިއްލަ ލެއާ ދޭތެރޭ ހިތުގަ ހަމަ އެއްވެސް ރަހުމެއް ނެތީތަ؟" ޒީނިޔާ އަނެއްކާވެސް ގޮސް މައިރާއާއި މުރުޝިދުގެ ކުރިމައްޗަށް ހުއްޓުނެވެ.
"މައިޝާން އެކަނިތަ ޑްރަގް ގެންގުޅުނު ކަމަށްވަނީ؟ ނަދާލް ޑްރަގް ހިފައިގެން ކަނޑު ހުރަސްކޮށްފަގޮސް އޮޅުވާލައިގެން މީހަކަށް އެ ދިނީމަ ޑްރަގް ގެންގުޅޭ ކަމަށް ނުވޭތަ؟ މައިޝާން އެކަނިތަ މީހަކަށް އަނިޔާ ދިނީ؟ ނަދާލް އިވާންއަށް އެ ދިން އަނިޔާއަކީ އަނިޔާއަކަށް ނުވޭތަ؟ މައިޝާން އެކަނިތަ ކުންފުނިން ވައްކަން ކުރީ؟ ނަދާލް ކުންފުނީގެ ތެރެއަށް ނަމެއްގަ މުވައްޒަފަކު ވައްދައި، ވަކިކޮށް، ހޮސްޕިޓަލުން ފޭކު ރިޕޯޓުތައް ހަދައި، ސަރުކާރުގެ އިދާރާތަކަށް ކުންފުނީގެ ނަމުގަ ދޮގު މައުލޫމާތު ދިނީމަ މަކަރަކަށް ނުވޭތަ؟ އެވަރުންވެސް އަހަހަ. ހަހަ. ހަހަ" ޒީނިޔާ މޮޔައަކު ފަދައިން ހެމުންހެމުން ސޯފާގައި އިށީނެވެ. "އެވަރުންވެސް މަގޭ ދަރި ޖަލު ގޮޅީގަ؟ މިއީތަ އިންސާފަކީ؟ އަހަރެން ހީކުރީ ބައްޕަ ނިޔާވީމަ މި ތަފާތު ކުރުންތަކެއް ނޯންނާނެ ކަމަށް.. މުރުޝިދު ކިހިނެއް ވެފައިތަ ތި ހުންނަނީ؟ އޭނަ ފުލުހުންނާވެސް ހަވާލު ނުކުރާނީތަ؟"
"ދޮންބޭ..ޒީންތަ ބުންޏަސް މިފަހަރު އެއީ ރަނގަޅު ވާހަކައެއް.. ނަދާލް.. ނަދާލްއާ ދޭތެރޭ ގޮތެއް ނިންމާ" ފެންކަޅިވެފައި ހުރި މާޒިޔާ އެންމެފަހުން ވާހަކަދެއްކި އެވެ.
"ދޮންބެ ގޮތެއް ނިންމާށޭ؟ ދޮންބެއެއް ނޫން. އެންމެންވެސް. ކަލޭމެން އެންމެންވެގެން މައިޝާން ދުރަށް ޖެއްސިގޮތަށް ކަލޭމެން އެންމެންވެގެން ނަދާލްވެސް ޖެހޭނީ ދުރަށް ޖައްސަން" ޒީނިޔާ ބުންޏެވެ.
ނަދާލް ކެތްތެރިކަމާއެކު ދޮރުމަތީގައި މަޑުކޮށްލައިގެން ހުރީ އެމީހުން އޭނާއާ ދޭތެރޭ އަމަލުކުރާނޭ ގޮތެއް ނިންމަންދެނެވެ. އެއީ ކޮންމެ ގޮތެއް ކަމުގައިވިޔަސް ހަގީގަތުގައި އޭނާގެ ފަރުވާލެއް ނެތެވެ. މިއަދު އޭނާގެ ހަށީގައި ފުރާނަ ހިނގިއެއްކަމަކު ދިރިއުޅުމުގެ މަގްސަދުވަނީ ގެއްލިފަ އެވެ. ދެން އިތުރަށް ގެއްލެން އޮތީ ކޯއްޗެއް ހެއްޔެވެ؟
"ތިކަމެއް އަހަރުމެންނަކަށް ނުކުރެވޭނެ!" އިރުކޮޅެއްގެ ހިމޭންކަމަކަށްފަހު މުރުޝިދު މަޑުމަޑުން ބުނެލި އެވެ. "އަހަރުމެންނަށް ނަދާލް ފުލުހަށް ރިޕޯޓު ކުރެވިދާނެ. އެކަމަކު އޭރުން ވަކި މައިރާ ރިޕޯޓު ނުކުރުމުން އެ ޖެހުނީ ކޮންތާކު"
"ތިއްތިބޭ. މައި މިކަމުގެ ތެރެއަށް ނުވައްދާ. އަޅުގަނޑު ހުރިހާ ޒިންމާއެއް-"
"ދަންޏާ ދާނީ ދެމީހުން އެއްކޮށް" މުރުޝިދަށް ރައްދު ދިނުމަށްޓަކައި ނަދާލް ބުނި ޖުމްލަ މެދުކަނޑައިލަމުން އޭނާ ބުންޏެވެ. "އެހެންވީމަ މިކަމުގަ ޒީނިޔާ ގޮތެއް ނިންމާ.. ދެން ހުރި ދަރިފުޅުވެސް ގެއްލެންތަ ބޭނުމީ؟
ޒީނިޔާގެ ފަރާތުން ޖަވާބެއް ނުލިބުނެވެ. އެތަނުގައި ތިބި އެންމެނެކޭ އެއްފަދައިން އޭނާވެސް ބަލައިލީ މުރުޝިދުގާތު ހުއްޓިލައިގެންހުރި މައިރާއަށެވެ. ބައެއް ފަހަރު އޭނާއަށް މައިރާއާ ދޭތެރޭ އިހުމާލުވެވި އަނިޔާވެރި ވެވުނަސް އެއީ އޭނާގެވެސް ހުރި ހަމައެކަނި އަންހެން ދަރި އެވެ. ހަގީގަތަކީ އެ ދަރިފުޅަށް ދެރަގޮތެއްވާން އޭނާވެސް ނޭދޭ ކަމެވެ. މިރޭވެސް އޭނާއަށް އެހާ ބޮޑަށް ރުޅި އާދެވުނީ މައިރާ އެއްވެސް ވަރަކަށް އަމިއްލަ މީހާއާ ދޭތެރޭ ވިސްނައިނުލާ ނަދާލްގެ ބަހަށް ހެއްލިގެން އެހާ ގެއްލުންދެނިވި ކަމެއް ކުރީތީ އެވެ.
"ދެން އޮތީ ކުންފުނީގެ ކަންތައް. ކުންފުނީގެ ކަންކަމުގަ އަހަރެމެން އެންމެނަށްވުރެ ބޮޑު ހައްގެއް އޮތީ ނަދާލްއަށް" ޒީނިޔާގެ ޖަވާބެއް ނުލިބުމުން އަނެއްކާވެސް ވާހަކަދެއްކީ މުރުޝިދެވެ. މުރުޝިދު މިފަހަރު ބުނި ޖުމްލައާއެކު އެތަނުގައި ތިބި އެންމެންގެ މޫނުމަތީގައިވެސް ސުވާލުމާކު ޖެހިގެންދިޔަ އެވެ.
"ކީކޭ؟ ތިއްތިބެ ކީކޭ ތި ކިޔަނީ؟" އެ އެންމެންގެ ހިތުގައި އުފެދުނު ސުވާލު ކޮށްލީ މާޒިޔާ އެވެ.
"ދޮންބޭ.." މުރުޝިދު މާޖިދަށް ބަލައިލީ ކަމަކަށް އިޒުނަ ހޯދާ ފަދައިންނެވެ. އިތުރަށް ދެން އެއްވެސް ކަމެއް ފޮރުވަން ވެއްޖެނަމަ ކަންތައްތައް ދާނީ ގޯހުން ގޯހަށްކަން މާޖިދަށް ބުނެދިން ކަހަލަ އެވެ.
މާޖިދު ފުން ނޭވާއެއް ދޫކޮށްލުމަށްފަހު ބޯ ޖަހައިލުމާއެކު މުރުޝިދު ހަރު ފިޔަވަޅުތަކެއްގައި ގޮސް ކޮޓަރިއަށް ވަނެވެ. އޭރު އެތަނުގައި ތިބި އެންމެން ސުވާލުގެ ނަޒަރުތަކުން އެކަކު އަނެނަކާ ވާހަކަދައްކަމުން ދިޔަ އެވެ. މާޖިދު ފިޔަވަ އެވެ. އެކެއްގެ ޖާގައިގެ ސޯފާގައި އޭނާ އިށީނދެލައިގެން އިނީ ބޮޑު ފިކުރެއްގެ ތެރޭގަ އެވެ. އެހެން އިންދައި މުރުޝިދު ކޮޓަރިން ނެރެގެން ގެނައި މުށިކުލައިގެ ބްރީފްކޭހެއް ގެނެސް މާޖިދުގެ ކުރިމަތީގައި ބަހައްޓައިލި އެވެ. އެއާއެކު މާޖިދު ކުރިއަށް ޖެހިލައި ދެތިން ފަހަރެއްގެ މަސައްކަތުން އޭގައިވި ލޮކް ކޯޑު ޖަހައިލަމުން އެ ބްރީފް ކޭސް ހުޅުވައިލި އެވެ. އޭގައިހުރި ބާވެފައިވާ ސިޓީ އުރަތަކުގެ ތެރޭގައި އޮތް ހުދު ކުލައިގެ އައު ސިޓީ އުރައެއް ހޯދައިލުމަށްފަހު އޭނާ އެ ދިއްކޮށްލީ ދޮރުމަތީގައި ހުރި ނަދާލްއަށެވެ.
ނަދާލް ބުމަ ގޮށްޖަހައިލަމުން އެ ސިޓީއުރަ ކަނޑައިލައި އޭގައި ހީރަސް ޖަހާފައިވާ ދެތިންގަނޑު މަތިމަތިން ކިޔައިލި އެވެ. އެއާއެކު އޭނާގެ ނިތްކުރި މައްޗަށް އަނެއްކާވެސް ރޫތަކެއް އިތުރުވެލި އެވެ. ގަބޫލު ނުކުރެވިފައިހުރެ އެއްފަހަރު މާޖިދަށް އަނެއްފަހަރު މުރުޝިދަށް ބަލައިލެވުނެވެ.
"ކިހިނެއްތަ ވީ؟" ނަދާލްގެ މޫނަށް އެރި ކުލަވަރު ފެނި މައިރާ ދުރު ފިޔަވަޅުތަކެއްގައި ގޮސް އެ ގަނޑުތައް އަތުލި އެވެ.
"މި.. މި ކޯއްޗެއް؟" ނަދާލް ހައިރާންވެހުރެ މާޖިދުއާ ސުވާލު ކުރި އެވެ.
"ޝެއަރ ޓްރާންސްފަރ އެގްރީމެންޓް" ޖަވާބުދިނީ ކައިރީގައިހުރި މައިރާ އެވެ. މައިރާގެ ދެލޯ އެ ލިޔުންތަކުގައި ތަތްކޮށްލެވިފައި ވާއިރު އެ މޫނުމަތީގައިވެސްވީ ހައިރާން ކަމެވެ.
"މައި.." ނަދާލްއަށް މަޑުމަޑުން ގޮވައިލެވުނެވެ.
"ނެޑް.. ކާފަ ދޫކޮށްފަދިޔަ ފަންސަވީސް ޕަސަންޓް ހިއްސާ.. އިޓްސް.. އިޓްސް ފުލީ ޔުއަރޒް" މައިރާ އެ ލިޔުންތަކުގައިވާ މައުލޫމާތު ޔަގީން ކޮށްދިނެވެ.
ނަދާލްއަށް ވަގުތުން ހާސްވެފައިހުރެ ބަލައިލެވުނީ ދުރުގައިހުރި ޒީނިޔާ އަށެވެ. އެ މައުލޫމާތު “ހަޖަމު ކުރަން” އެންމް އުނދަގޫވާނީ ޒީނިޔާއަށްކަން އޭނާއަށް އެނގެ އެވެ.
"ދައްތާ.. ދައްތާ ގަބޫލު ކުރޭ. މިއީ.. މިއީ އެއްވެސް ވަރަކަށް އަހަރެންނަށް އެނގިގެންވި ކަމެއް ނޫން" ނަދާލް ޒީނިޔާގާތު ބުންޏެވެ. އެއަށްފަހު އޭނާ ކުރިމަތިލީ މާޖިދުމެންނާ އެވެ. "ޑޭޑް.. އަންކަލް.. މި ކޮން ކަމެއް؟ އަޅުގަނޑަކަށް މިވަރުގެ އަންފެއަރ ނިންމުމެއް ގަބޫލެއް ނުކުރެވޭނެ. މައިއާއި މަލް އަދި ދޮންތަވެސް ތިއްބާ އަޅުގަނޑަށް އެކަނި. ނޫން.. އަޅުގަނޑު ހީކުރީ ކާފަގެ ކޮންމެ ހިއްސާއެއް ބަހާނީ އެންމެނަށް ހަމަހަމައަށް ކަމަށް" ނަދާލް ބޯ ހޫރައިލި އެވެ.
"ނަދާލް.. ތިއީ އަހަރުމެންގެ ބައްޕަގެ ނިންމުން. ރަސްމީ ހައިސިއްޔަތަކުން ބަލާނަމަ ބައްޕައަކީ ކުންފުނީގެ ފައުންޑަރ. އެހެންވީމަ ތި ނިންމުމުގެ އިންސާފާމެދު އެއްޗެކޭ ބުނުމުގެ ހައްގެއް އަހަރުމެންނަކަށް ނެތް. ތިއީ ނަދާލް.. ނަދާލްއާމެދު.. އަދި ނަދާލްގެ މަންމައާމެދު އަހަރުމެންގެ ބައްޕައަށް ކަންތައް ކުރެވުނު ގޮތުން ބައްޕަ ނަދާލްއަށް ދެއްވި އެއްޗެއް ކަމަށް ބެލެވެނީ" މާޖިދު ބުންޏެވެ.
"ނޫން. ކާފަ އެއްވެސް އިރަކު އަޅުގަނޑު ނުވަތަ މަންމައާ ދޭތެރޭ ބޭއިންސާފަކުން ކަމެއް ނުކުރައްވާ. ބައްޕައަށް އެކަން އެނގިލައްވާ ނޫންތޯ؟ އަޅުގަނޑަށްވުރެ ބޮޑަށް މައިޝާންއަށްވެސް، މައިއަށްވެސް އަދި މަލްއަށްވެސް ތިހެން ބުނުމުގެ ހައްގު އޮންނާނެ. އަޅުގަނޑާ އެމީހުންނާ މިކަމުގަ އެއްވެސް ތަފާތެއް ނޯންނާނެ" ނަދާލްއަކަށް އެ ނިންމުން ގަބޫލު ކުރާކަށް ފަސޭހައެއް ނުވި އެވެ. ވަކިން ހާއްސަކޮށް މައިރާވެސް އެތަނުގައި ހުއްޓައި އޭނާއަށް އެކަން ގަބޫލު ކުރެވޭނީ ކިހިނެއް ހެއްޔެވެ؟
"ނޫނޭ ނަދާލް.. ތަފާތު.. ވަރަށް ތަފާތު.. ނަދާލް.. ނަދާލްއަކީ އަހަރުމެންގެ ބައްޕަގެ ކާފަ ދަރިއެއް ނޫން. އަދި އަހަރެންގެ ދަރިއެއްވެސް ނޫން. ނަދާލްއަކީ.. ނަދާލްއަކީ.." މާޖިދު ވާހަކައިގެ މެދުތެރެއިން އެތަނުގައިހުރި މާޒިޔާއަށް ބަލައިލި އެވެ. "މާޒި.. ނަދާލްއަކީ އަހަރުމެން އެންމެންގެ ކޮއްކޮ. އަހަރުމެންގެ ބައްޕަ މުޖްތަބާގެ އެންމެ ހަގު ދަރި"
- ނުނިމޭ -
