ދުބާއީން ފުރައިގެން އިޒްރޭލުގެ ތެލް އަވީވަށް ދަތުރުކުރި ފްލައިޓެއްގެ ކޯ-ޕައިލެޓް، އެ ބޯޓުގެ ކެޕްޓަނަށް ވަޅިން ހަމަލާދީ ޒަޚަމްކޮށްލުމަށް ފަހު ބޯޓު ވައްޓާލަން މަސައްކަތް ކޮށްފި ކަމަށް އިޒްރޭލުގެ އޮފިޝަލުން ބުދަ ދުވަހު ހާމަކޮށްފި އެވެ.
މި ހާދިސާ ހިނގި ވަގުތު ބޯޓުގެ ފަސިންޖަރުން ނުކުމެ ކޯ-ޕައިލެޓް ކޮންޓްރޯލް ކުރިއިރު، ބޯޓުގައި ތިބި އެހެން ޕައިލެޓުން ވަނީ ބޯޓު ސައުދީ އަރަބިއްޔާއަށް ރައްކާތެރިކަމާއެކު ޖައްސާފަ އެވެ.
މިއީ ސަލާމަތީ ގޮތުން ހިނގި ވަރަށް ނުރައްކާތެރި ހާދިސާއެއްގެ ގޮތުގައި ސިފަކުރައްވަމުން، އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ބުނީ ޔުނައިޓެޑް އަރަބް އެމިރޭޓްސް އިން އިޒްރޭލަށް ދަތުރުކުރި ފްލައިދުބާއީގެ އެފް.ޒެޑް 1073 ފްލައިޓުގެ ކޯ-ޕައިލެޓާ ސައުދީގެ ކަމާބެހޭ ފަރާތްތަކުން ސުވާލުކުރާނެ ކަމަށެވެ. މި ބޯޓުގައި އިޒްރޭލުގެ 170 އަށްވުރެ ގިނަ ރައްޔިތުން ތިއްބެވެ.
ފްލައިދުބާއީ އެއާލައިނުން ނެރުނު ބަޔާނެއްގައި ބުނެފައިވަނީ މި ހާދިސާ ހިނގަން މެދުވެރިވި އަސްލު ސަބަބު އަދި ދެނެގަނެވިފައި ނުވާ ކަމަށާއި، އެހެންކަމުން މިކަމާ ގުޅޭގޮތުން ދުރާލާ ގޮތް ނިންމުމާ މެދު އިންޒާރު ދޭ ކަމަށެވެ. ދެ ޕައިލެޓުންގެ މެދުގައި ހިނގި ހަމަނުޖެހުމުގެ އަސްލު ސަބަބެއް އަދި ސާފެއް ނުވެ އެވެ.
އިޒްރޭލުގެ އޮފިޝަލަކު މައުލޫމާތު ދިން ގޮތުގައި އެ ބޯޓުގެ ކޯ-ޕައިލެޓަކީ އޮމާންގެ ރައްޔިތެކެވެ. ބޯޓު ސައުދީއަށް ޖެއްސުމާއެކު އޭނާ ހައްޔަރުކޮށްފައިވާ ކަމަށް ނަތަންޔާހޫ ބުންޏެވެ. އިޒްރޭލުގެ ޓްރާންސްޕޯޓް މިނިސްޓްރީން ބުނީ މި ހާދިސާ ތަހުގީގު ކުރުމަށް އެ ގައުމުގެ ދިފާއީ އިދާރާތަކާ ގުޅިގެން މަސައްކަތް ކުރަމުންދާ ކަމަށެވެ.
ނަތަންޔާހޫގެ އޮފީހުން އާންމުކުރި ވީޑިއޯ ބަޔާނެއްގައި އޭނާ ބުނީ ހުރިހާ ފަސިންޖަރުންގެ ހާލުވެސް ރަނގަޅު ކަމަށާއި އެންމެންވެސް ތިބީ ރައްކާތެރިކަމާއެކު ކަމަށެވެ. މީގެ އިތުރުން، އިޒްރޭލަށް ދަތުރުކުރާ އެ ގައުމުގެ އެއާލައިންތަކާއި ބޭރުގެ އެއާލައިންތަކުގެ ސަލާމަތީ ކަންކަން އިތުރަށް ވަރުގަދަ ކުރުމަށްވެސް ބޮޑުވަޒީރު ވަނީ އަންގާފަ އެވެ.
ސައުދީ އަރަބިއްޔާގައި އަށް ގަޑިއިރު މަޑުކުރުމަށްފަހު، ފަސިންޖަރުން އިޒްރޭލަށް ދަތުރުކުރީ ފްލައިދުބާއީން ފޮނުވި އެހެން ބޯޓެއްގަ އެވެ.
ބޯޓުގެ ފަސިންޖަރަކާ ހަވާލާދީ ނަތަންޔާހޫ ބުނީ، ބޯޓު ކުއްލިއަކަށް ކޮންޓްރޯލުން ނެއްޓި ތިރިއަށް މިސްރާބު ޖެހުމާއެކު، ފަސިންޖަރުންނާއި ކްރޫ މެންބަރަކު ބޯޓުގެ ކޮކްޕިޓްގެ ދޮރު ވައްޓާލާފައި އެތެރެއަށް ވަން ކަމަށެވެ. އެމީހުން އެތެރެއަށް ވަންއިރު، ކޯ-ޕައިލެޓް ދިޔައީ ބޯޓުގެ ސިސްޓަމްތަކަށް ގެއްލުންދީ ބޯޓު ވައްޓާލަން މަސައްކަތް ކުރަމުން ކަމަށް އޭނާ ބުންޏެވެ.
ބޯޓު ދަތުރުކުރާ މަގު ބަލާ "ފްލައިޓްރޭޑާ24" ވެބްސައިޓުން ދައްކާ ގޮތުގައި، ބުދަ ދުވަހުގެ ހެނދުނު ބޯޓުން ފުރަތަމަ އިމަޖެންސީ ސިގްނަލް ފޮނުވުމުގެ ކުރިން، 30 ސިކުންތަށް ވުރެ ކުރު ވަގުތުކޮޅެއްގެ ތެރޭގައި ބޯޓު ވަނީ ކުއްލިއަކަށް 14،000 ފޫޓަށް ވުރެ ބޮޑަށް ތިރިވެފަ އެވެ.
