އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އާދީއްތަ ދުވަހު އަބޫދާބީއަށް ވަޑައިގެން، ޔުނައިޓެޑް އެރަބް އެމިރޭޓްސް (ޔޫއޭއީ) ގެ ރައީސް ޝެއިޚް މުހައްމަދު ބިން ޒައިދު އަލް ނަހްޔާނާ ބައްދަލުކުރައްވާފައިވާ ކަމަށް އިސްރާއީލުގެ އިސް އޮފިޝަލަކު ރޮއިޓާސް ނިއުސް އެޖެންސީއަށް މައުލޫމާތު ދީފި އެވެ.
މި ދަތުރާ ގުޅޭގޮތުން ނަތަންޔާހޫގެ އޮފީހުންނާއި ޔޫއޭއީގެ ފޮރިން މިނިސްޓްރީން މިހާތަނަށް އެއްވެސް އެއްޗެއް ބުނެފައެއް ނުވެ އެވެ.
ނަތަންޔާހޫ ޔޫއޭއީއަށް މި ކުރި ދަތުރަކީ، 2023 އޮކްޓޯބަރު 7 ގައި ހަމާސްއިން އިސްރާއީލަށް ދިން ހަމަލާގެ ހަފުތާއެއްހާ ދުވަސް ކުރިން، ހަމާސްއިން ބޮޑު އޮޕަރޭޝަނެއް ރާވަމުންދާ ކަމުގެ އިންޒާރު ޝެއިޚް މުހައްމަދު ނަތަންޔާހޫއަށް ދެއްވި ކަމަށް އިސްރާއީލުގެ ހާރެޓްޒް ނޫހުން މި މަހު ރިޕޯޓުކޮށްފައި ވަނިކޮށް ކުރެއްވި ދަތުރެކެވެ. ހާރެޓްޒްއިން ރިޕޯޓުކޮށްފައިވާ ގޮތުގައި، ޔޫއޭއީގެ ރައީސް ދެއްވި އެ އިންޒާރު އިސްރާއީލުގެ އިންޓެލިޖެންސް އިދާރާތަކަށާއި އަސްކަރިއްޔާއާ ހަމައަށް ބޮޑުވަޒީރު ފޯރުކޮށްދެއްވާފައެއް ނުވެ އެވެ.
ހާރެޓްޒް ނޫހުގެ ރިޕޯޓު ދޮގުކުރައްވައި، އެ ނޫހާ ދެކޮޅަށް ގާނޫނީ ފިޔަވަޅު އަޅާނެ ކަމުގެ އިންޒާރު ދެއްވާފައިވާ ނަތަންޔާހޫ މިހާރު ކުރިމަތިލައްވަމުން ގެންދަވަނީ އިންތިޚާބުގެ އުނދަގޫ ކެމްޕޭނަކާ އެވެ. އިދިކޮޅު ލީޑަރުން ގެންދަވަނީ އޮކްޓޯބަރު 7 ގެ ހަމަލާގެ ކުރިން ސަލާމަތީ ކަންކަމުގައި ފެއިލްވި ފެއިލްވުމުގެ ޒިންމާ ނަތަންޔާހޫ އުފުލަން ޖެހޭނެ ކަމަށް ބުނެ ތުހުމަތު ކުރަމުންނެވެ.
ހާރެޓްޒްގެ ރިޕޯޓާ ގުޅޭގޮތުން ޔޫއޭއީން ވަކި އެއްޗެއް ބުނަން އިންކާރު ކުރި ނަމަވެސް، 2020 ވަނަ އަހަރު ދެ ގައުމުގެ ދެމެދުގައި ސިޔާސީ ގުޅުން ގާއިމުކުރި ފަހުން، ޔޫއޭއީއާއި އިސްރާއީލާ ދެމެދު "ސީދާ އަދި ހުޅުވާލެވިފައިވާ މުއާމަލާތުގެ މަގުތަކެއް" އޮންނަ ކަމަށް އެ ގައުމުން ވަނީ ބުނެފަ އެވެ. ޔޫއޭއީގެ މަސްދަރަކުން މީގެ ކުރިން ރޮއިޓާސްއަށް ބުނެފައިވާ ގޮތުގައި، އެ ގައުމުން ސަލާމަތީ ކަންކަމާ ގުޅޭގޮތުން އެހެން ގައުމުތަކާ މަޝްވަރާ ކުރަނީ "ކަމާގުޅޭ އިދާރާތަކުގެ" މެދުގަ އެވެ. ނަމަވެސް އެފަދަ މަޝްވަރާތައް "ގައުމުތަކުގެ ވެރިންގެ ފެންވަރުގައި" ކުރިއަށް ނުގެންދާ ކަމަށް އެ މަސްދަރުން ބުނެފައިވެ އެވެ.
މިއަހަރުގެ މެއި މަހުގެ ތެރޭގައި، ނަތަންޔާހޫ ސިއްރު ދަތުރެއްގައި ޔޫއޭއީއަށް ވަޑައިގެން ރައީސް ޝެއިޚް މުހައްމަދާ ބައްދަލުކުރެއްވި ކަމަށް ބޮޑުވަޒީރުގެ އޮފީހުން ބުނި ނަމަވެސް، ޔޫއޭއީން ވަނީ އެކަން ދޮގުކޮށްފަ އެވެ.
އެ ބައްދަލުވުމުގެ މައުލޫމާތު އެނގޭ މަސްދަރަކުން އޭރު ބުނެފައިވާ ގޮތުގައި، ނަތަންޔާހޫ އާއި ޝެއިޚް މުހައްމަދު ބައްދަލުކުރެއްވީ މާޗް 26 ވަނަ ދުވަހު، އޮމާންގެ ބޯޑަރު ކައިރީގައި އޮންނަ އަބޫދާބީގެ އަލް-އައިން ސިޓީގަ އެވެ.
އީރާން ހަނގުރާމައިގެ ތެރޭގައި ހަމަލާތަކެއް އަމާޒުވި ފަހުން، ޔޫއޭއީން ވަނީ އެމެރިކާ އާއި އިސްރާއީލާއެކު އޮންނަ ގުޅުން ވަރުގަދަކޮށްފަ އެވެ. އިސްރާއީލާއެކު ޔޫއޭއީން ގުޅުން ގާއިމުކުރީ 2020 ވަނަ އަހަރުގެ "އަބްރަހަމް އެކޯޑްސް" އެއްބަސްވުމުގެ ދަށުންނެވެ. އިސްރާއީލާއެކު އޮންނަ މި ގުޅުމުގެ ސަބަބުން ސަރަހައްދީ ނުފޫޒު ފޯރުވުމުގެ ބާރު ޔޫއޭއީއަށް ލިބިގެންދާއިރު، މިއީ ވޮޝިންޓަނާ މުއާމަލާތް ކުރުމަށް އެ ގައުމަށް ލިބިފައިވާ ހާއްސަ މަގަކަށް ވެސް ވަނީ ވެފަ އެވެ.
