ޅ. ނައިފަރުން އުމުރުން ސަތާރަ އަހަރުގެ ފިރިހެން ކުއްޖަކު ވީނުވީއެއް ނޭނގި ގެއްލިގެން، އެ ކުއްޖާ ހޯދުމުގެ މަސައްކަތް ފަށައިފި އެވެ.
ފުލުހުން ހާމަކޮށްފައިވާ ގޮތުގައި ހޯދަމުންދަނީ އެ ރަށު، ނޫކަނޑު، މުހައްމަދު އަހުޔާން ހުސައިން އެވެ. އޭނާ ގެއްލިގެން ރިޕޯޓުކުރީ އިއްޔެ ހަވީރު އެވެ.
އަހުޔާން ގެއްލިގެން އާއިލާގެ ފަރާތުން ފުލުހުންނަށް ރިޕޯޓުކުރީ އޭނާގެ އެއްވެސް ހަބަރެއް ނުވެގެން ހޯދުމަށް ކުރި މަސައްކަތް ކާމިޔާބު ނުވުމާ ގުޅިގެންނެވެ. އޭނާ އެންމެ ފަހުން ފެނިފައިވަނީ އާދީއްތަ ދުވަހު އެވެ.
އޭގެ ފަހުން އޭނާގެ އެއްވެސް ހަބަރެއް ވެފައި ނުވާތީ އާއިލާއިން އޭނާގެ ފޯނަށް ގުޅުމަށް ކުރި މަސައްކަތް ވެސް ވަނީ ނާކާމިޔާބުވެފަ އެވެ.
"އެއްވެސް މައުލޫމާތެއް ލިބިފައިވާ ފަރާތެއް ވާނަމަ ޅ. ނައިފަރު ޕޮލިސްގެ ނަންބަރު 9792187 އަށް ނުވަތަ ފުލުހުންގެ ހޮޓްލައިން ނަންބަރު 3322111 އަށް ގުޅުއްވައި އެ މައުލޫމާތެއް ހިއްސާކުރެއްވުން އެދެން،" ފުލުހުން ބުނެފައިވެ އެވެ.
މި މައްސަލަ ފުލުހުންނަށް ހުށަހެޅުމާއެކު، ފުލުހުން ވަނީ އަޙްޔާން ހޯދުމަށްޓަކައި ހާއްސަ މަސައްކަތްތަކެއް ފަށާފަ އެވެ.
