ބެންގަލޫރު (ސެޕްޓެމްބަރު 26) - ބައިނަލްއަގުވާމީ އެކުވެރިކަމުގެ މެޗެއްގައި ރޭ ޕެނަމާއާ 1-1 އިން އެއްވަރުވި މެޗުގައި އިންޑިއާ އިން ދެއްކި ކުޅުމަށް އެ ޓީމުގެ ކޯޗު، ހާލިދު ޖާމިލް ތައުރީފުކޮށްފި އެވެ.
މި ފަހަރު، އެމެރިކާ، މެކްސިކޯ އަދި ކެނަޑާގައި ބޭއްވި ފީފާ ވޯލްޑް ކަޕްގައި ކުޅުނު ޕެނަމާ ކައިރީގައި ރޭ އިންޑިއާ އިން ވަނީ ބެންގަލޫރުގެ ސްރީ ކަންޓީރްވާ ސްޓޭޑިއަމްގައި ފުރަތަމަ ހާފުގައި ލީޑުކޮށްފަ އެވެ. ފީފާ ރޭންކިންގެ 44 ވަނައިގައި އޮތް ޕެނަމާ ކޮޅަށް 138 ވަނައިގައި އޮތް އިންޑިއާ އަށް ރޭގެ މެޗުގައި ފުރަތަމަ ހާފުގައި ލަނޑު ޖަހައިދިނީ އޮސްޓްރޭލިއާ ދަރިކޮޅަށް ނިސްބަތްވާ ފޯވާޑް، ރަޔާން ވިލިއަމްސް އެވެ. މެޗުގެ 68 ވަނަ މިނިޓްގައި ޕެނަމާ އަށް އެއްވަރުކޮށްދިނީ ވެލެންސިއާ އެވެ.
ފަހު ވަގުތާ ހަމައަށް ދެ ޓީމުން ވެސް ލިބޭ ފުރުސަތުތަކުގައި ގޯލެއް ޖަހައި މެޗުން މޮޅުވެވޭތޯ ބެލި ނަމަވެސް ނިމުނީ އެއްވަރުވެގެންނެވެ. މިއީ، އިންޑިއާ އިން ނެރުނު ތާރީހީ ނަތީޖާ އެކެވެ. މެޗަށް ފަހު، އިންޑިއާގެ ކޯޗު ހާލިދު ޖާމިލް ވަނީ ޓީމުގެ ކުޅުންތެރިންނާއި ކޯޗިން ސްޓާފުން މި ކަމުގައި ކުރި މަސައްކަތް ފާހަގަކޮށްފަ އެވެ.
"މިއީ، އެންމެން ގުޅިގެން ޓީމެއްގެ ގޮތުގައި ކުރި މަސައްކަތުގެ ނަތީޖާ. ޕެނަމާ ކަހަލަ ގައުމެއް ކައިރީގައި އަހަރެމެން ވަރަށް ކެރިގެން ޓީމެއްގެ ގޮތުގަައި ކުޅެފި. ހަގީގަތުގައި މިއީ އިންޑިއާ ކުރިއަށްދާން ޖެހޭ ގޮތަކީ، ވަރުގަދަ ޓީމުތަކާ ދެކޮޅަށް ވެސް ކެރިގެން ކުރިއަށް ޖެހިގެން ކުޅެންވީ،" މިދިޔަ އަހަރު އިންޑިއާ ކޯޗުކަމާ ހަވާލުވި ހާލިދު ޖާމިލް ބުންޏެވެ.
އިންޑިއާ އިން މި ފަހަރުގެ އިންޓަނޭޝަނަލް ބްރޭކުގައި ދެން ކުޅޭ ދެ މެޗު އޮތީ ކަލްކަތާގެ ސޯލްޓް ލޭކް ސްޓޭޑިއަމްގަ އެވެ. އަންނަ މަހުގެ ތިން ވަނަ ދުވަހު، އިންޑިއާ އިން ކުޅޭނީ ބްރެޒިލާ އެވެ. އޭގެ ތިން ދުވަސް ފަހުން، އިންޑިއާ އިން އުރުގުއޭއާ ދެކޮޅަށް ކުޅޭނެ އެވެ.
އަންނަ ނޮވެމްބަރު މަހުގެ ފީފާ ބްރޭކުގެ ތެރޭގައި އިންޑިއާ އިން ނިއު ޒީލެންޑާ ދެކޮޅަށް ކުޅޭ ދެ މެޗު އޮތީ އެ ގައުމުގަ އެވެ.
