ރިއޯ ޑި ޖަނެއިރޯ، ބްރެޒިލް (ސެޕްޓެމްބަރު 24) - އާބާދީގެ ގޮތުން ބިލިއަނަކަށް ވުރެން ގިނަ މީހުން ދިރިއުޅުނު ކަމުގައި ވިޔަސް ފީފާ ވޯލްޑް ރޭންކިންގައި އިންޑިއާ އަކީ ދަށް ގައުމެއްގެ ގޮތުގައި އޮންނަ މައިގަނޑު އެއް ސަބަބަކީ އިންޑިއާ އަކީ ފުޓްބޯޅައިގެ ގައުމެއް ކަމަށް ނުވާތީ ކަމަށް ބްރެޒިލްގެ ކޯޗު، ކާލޯ އަންޗެލޮޓީ ބުނެފި އެވެ.
ފަސް ފަހަރު ދުނިޔޭގެ ޗެމްޕިއަންކަން ހޯދާފައިވާ ބްރެޒިލުން އަންނަ މަހުގެ ތިން ވަނަ ދުވަހު، ކަލްކަތާގެ 85،000 މީހުން ވަދެވޭ ސޯލްޓް ލޭކް ސްޓޭޑިއަމްގައި އިންޑިއާއާ ދެކޮޅަށް މެޗެއް ކުޅޭނެ އެވެ. އެ މެޗަށް ދަނޑު ފުރޭނެ ކަމަށް ބެލެވޭއިރު، އެ މެޗުގެ ކުރިން އަންޗެލޮޓީއާ ވަނީ އިންޑިއާއާ ބެހޭގޮތުން ގިނަ ސުވާލުތަކެއް ކުރިމަތިކޮށްފަ އެވެ.
ބްރެޒިލުން ދުނިޔޭގެ ރޭންކިންގެ ފަސް ވަނައިގައި އޮތްއިރު، އިންޑިއާ އޮތީ 138 ވަނައިގަ އެވެ. އާބާދީގައި 1.4 ބިލިއަން މީހުން ތިބި އިންޑިއާގެ ފުޓްބޯޅައިގައި ކުރިއަށް ނުދެވި އޮތް ސަބަބާ ބެހޭގޮތުން އަންޗެލޮޓީ ވަނީ އޭނާ ދެކޭ ގޮތް ހިއްސާކޮށްފަ އެވެ.
ޔޫރަޕްގެ ނަން މަޝްހޫރު ގިނަ ކްލަބްތަކަށް ކޯޗުކޮށްދީފައިވާ އަންޗެލޮޓީ ބުނީ، އިންޑިއާގެ ރޭންކިން އިން ލިބެނީ ހައިރާންކަމެއް ކަމަށެވެ.
"އަހަންނަށް ފެންނަ ފެނުމުގައި އިންޑިއާގެ ފުޓްބޯޅައިގެ މައްސަލަ ގުޅިފައި އޮތީ ސަގާފަތާ. އިންޑިއާގައި ސީދާ ފުޓްބޯޅައާ ގުޅޭ ސަގާފަތެއް ނެތް. އެކަމަކު، އެ މީހުން ވަރަށް މޮޅު އެހެން ކުޅިވަރުތަކެއް އެބަހުރި. ހަގީގަތުގައި އިންޑިއާ އިން ރަނގަޅަށް މަސައްކަތް ކުރަންވީ ފުޓްބޯޅައިގެ އާ ޖީލުތަކެއް ބިނާކުރަން،" ޓައިމްސް އޮފް އިންޑިއާ އަށް، އަންޗެލޮޓީ ބުންޏެވެ.
ފުޓްބޯޅައިގައި ކުރިއަރާފައިވާ ގައުމުތަކުގައި، ކަންކަން ކޮށްފައިވަނީ އެ ގައުމުގެ ސަގާފަތުގެ ތެރެއިން ފުޓްބޯޅަ އަށް ދޭ އަހައްމިއްޔަތުކަން އިތުރުކޮށް، ރަނގަޅު ޕްލޭންތަކާ އެކު މަސައްކަތްކޮށްގެން ކަމަށް އަންޗެލޮޓީ ވަނީ ފާހަގަކޮށްފަ އެވެ.
"ތަފާތު ގައުމުތަކާ އެކު އަހަރެމެން (ބްރެޒިލުން) މެޗުތައް މި ކުޅެނީ ވެސް އެކި ކަހަލަ ގައުމުތަކުގެ ސަގާފަތް ދަސްކުރަން. އިންޑިއާ ވަރަށް ޝައުގުވެރިވާނެ އެ ވިސްނުމުގައި. ތެދެއް، ހަގީގަތަކީ ދުނިޔޭގެ ފެންވަރުގެ ފުޓްބޯޅައިގެ ވަރުގަދަ ގައުމުތަކާ ކުޅެން އިންޑިއާގެ ތަޖުރިބާ އެންމެ ރަނގަޅުނުވާނެ. އެކަމަކު، އަހަރެމެންނަށް އިންޑިއާ ފަދަ ގައުމެއް ދަސްކުރަން މިއީ ފުރުސަތެއް،" އަންޗެލޮޓީ ބުންޏެވެ.
އިންޑިއާގެ ފުޓްބޯޅައާ ބެހޭގޮތުން، އަންޗެލޮޓީ ދެއްކި ވާހަކަތަކާ މެދު، އިންޑިއާގެ ކޯޗު، ހާލިދު ޖާމިލް ދެކޭގޮތެއް ހިއްސާކުރަން ނޫސްވެރިން ވަނީ ސުވާލުކޮށްފަ އެވެ.
"އަހަންނެއް ނުވިސްނަން (އަންޗެލޮޓީގެ ވާހަކަތަކަށް). ކޮންމެ މީހަކަށް ވެސް އަމިއްލަ ވިސްނުމުގައި ހިޔާލު ފާޅުކުރުމުގެ އިހުތިޔާރު އޮންނާނެ،" ޖާމިލް ބުންޏެވެ.
"އަހަރެންގެ ޓާގެޓް ވަރަށް ފަސޭހަ. ވަރަށް ރަނގަޅަށް ޓީމު ތައްޔާރުކޮށް، އިންޑިއާ ޓީމު ކުރިއަށްގެންދަން. މި މެޗުތަކުން އަހަރެމެން އޮތް ހިސާބެއް ފެންނާނެ. ކުރަންވީ ކަންކަން ވެސް ރަނގަޅަށް ސާފުވާނެ،"
އިންޑިއާ އިން މި ފަހަރުގެ ފީފާ ބްރޭކުގެ ތެރޭގައި، ފުރަތަމަ މެޗުގައި އަންނަ ހުކުރު ދުވަހު ބެންގަލޫރުގައި ކުޅޭނީ ޕެނަމާއާ އެވެ. އެ އަށް ފަހު، ކަލްކަތާގައި އަންނަ މަހު ތިން ވަނަ ދުވަހު ބްރެޒިލާ ކުޅުމަށް ފަހު ތިން ދުވަސް ފަހުން އުރުގުއޭއާ ވާދަކުރާނެ އެެވެ.
