އިސްތަންބޫލް، ތުރުކީ (ސެޕްޓެމްބަރު 26) - ޔުއެފާ ނޭޝަންސް ލީގުގައި ރޭ ތުރުކީ އަތުން 1-0 އިން ފްރާންސް މޮޅުވިއިރު، އެ ޓީމުގެ ލަނޑު ޖަހަން އުޅުމުގެ ތެރޭގައި، ކީލިއަން އެމްބާޕޭގެ ކަކުލަށް އަނިޔާވެއްޖެ އެވެ.
މިއީ، ފްރާންސްގެ ކޯޗުކަމާ ދާދި ފަހުން ހަވާލުވި އެ ޓީމުގެ ލެޖެންޑަރީ ތަރި ޒިނެދިން ޒިދާންގެ ކޯޗުކަމުގައި އެ ޓީމުން ކުޅުނު ފުރަތަމަ މެޗެވެ.
ރޭގެ މެޗުގައި ތުރުކީ ކޮޅަށް ފްރާންސް އިން ޖެހި ހަމައެކަނި ލަނޑު، އެމްބާޕޭ ވަނީ 54 ވަނަ މިނިޓްގައި ކާމިޔާބުކޮށްފަ އެވެ. އެކަމަކު، މައިކަލް އޮލީސޭ ތަނަވަސްކޮށްދިން ފުރުސަތެއްގައި އެމްބާޕޭ، މި ގޯލު ޖެހި ވަގުތު ކަކުލަށް އަނިޔާވެ، އޭގެ ފަސް މިނިޓް ފަހުން ޖެހުނީ ބަދަލުކުރާށެވެ.
މެޗަށް ފަހު އޮތް ނޫސްވެރިންގެ ބައްދަލުވުމުގައި، ޒިދާން ބުނީ، މި ފަހަރުގެ އިންޓަނޭޝަނަލް ބްރޭކުގައި ބާކީ އޮތް ތިން މެޗުގައި އެމްބާޕޭ އަށް ނުކުޅެވޭނެ ކަމަށެވެ.
"އަހަރެމެން އެއްވެސް ރިސްކެއް ނުނަގާނަން ކުޅުންތެރިންގެ މި ކަހަލަ ކަންކަމުގައެއް. އޭނަގެ ކަކޫ ކައިރިން ހުރީ ދުޅަވެފައި. އެހެންވީމަ، މިއީ، އެހާ ކުޑަ އިންޖަރީއެއްގެ ގޮތުގައި ދެކިގެން މަޑުކުރަން ނެތިން. ރެއާލްގެ މެޑިކަލް ޓީމަށް ވެސް މި ކަން އަންގައިފިން،" ރެއާލްގެ ކުރީގެ ކޯޗު ޒިދާން ބުންޏެވެ.
ތުރުކީން ރޭގެ މެޗު ނިންމާލީ އެއް ކުޅުންތެރިއަކު މަދުކޮށެވެ. އެއީ، މެޗުގެ 87 ވަނަ މިނިޓްގައި ތުރުކީގެ ގޯލްކީޕަރު، އުގުރްކާން ޗަކީރު އަށް ރަތް ކާޑެއް ދެއްކުމުންނެވެ. ޗަކީރު އަށް ސީދާ ރަތެއް ދެއްކީ އޭރިއާބޭރުން ބޯޅައިގައި އަތްލުމުންނެވެ.
ޑިޑިއޭ ޑެޝޯމްޕްސް މި ފަހަރުގެ ވޯލްޑް ކަޕަށް ފަހު، ފްރާންސް އިން ވަކިވުމުން ދެން އެ ޓީމާ ހަވާލުވި ޒިދާން ބުނީ، ވީހާވެސް ގިނަ ކުޅުންތެރިންނަށް މި އިންޓަނޭޝަނަލް ބްރޭކުގައި މި އޮތް ހަތަރު މެޗުގައި ފުރުސަތު ދިނުމަކީ މުހިންމު އަމާޒެއް ކަމަށެވެ.
ނޭޝަންސް ލީގުގެ މި ގްރޫޕްގައި ރޭ ކުޅުނު އަނެއް މެޗުން މާކް ވެން ބޮމެލްގެ ކޯޗުކަމުގައި ފުރަތަމަ މެޗު ކުޅުނު ބެލްޖިއަމުން ވަނީ 2-0 އިން ރޮބާޓޯ މަންޗިނީ އެނބުރި އައިސް ހަވާލުވި އިޓަލީ ބަލިކޮށްފަ އެވެ. ބެލްޖިއަމް އަށް މި މެޗުގައި ލަނޑުތައް ޖަހައިދިނީ، މި ފަހަރު ޕީއެސްޖީއާ ކުޅުނު މިކާ ގޮޑްޓްސްގެ އިތުރުުން، ގައުމީ ޓީމުގައި މި ފަހުން ރަނގަޅު ކުޅުމެއް ދައްކަމުން އަންނަ ޑޯޑީ ލުކެބާކިއޯ އެވެ.
