ރާއްޖޭގެ ފުޓްބޯޅަ ދެހާހުގެ ކުރީކޮޅުގައި އޮތް ލެވަލަށް ދިއުމަށްޓަކައި ވަގުތުނަގާނެ ކަމަށާއި މި ވަގުތު ޓީމުގައި ހުރި މައްސަލަތަކުގެ އެންމެ ބޮޑު ސަބަަބަކީ މިދިޔަ އަހަރުތަކުގައި ގައުމީ ޓީމުގައި ދިމާވެފައި ހުރި ކަންތައްތައް ކަމަށް ގައުމީ ޓީމުގެ ކޯޗު، ހަންގޭރީގެ އިސްތަވާން އުރްބާނީ ބުނެފި އެވެ.
އެފްއޭއެމްގެ ޓެކްނިކަލް ޑިރެކްޓަރުކަން ވެސް ކުރަމުން އަންނަ އުރްބާނީ މިހެން ބުނެފައިވަނީ، ބައިނަލްއަގުވާމީ އެކުވެރިކަމުގެ މެޗެއްގައި ރޭ ޗައިނާ އަތުން 3-0 އިން ބަލިވި މެޗަށް ފަހު އޮތް ނޫސްވެރިންގެ ބައްދަލުވުމުގަ އެވެ.
ތިން ވަނަ ފަހަރަށް ރާއްޖޭގެ ކޯޗުކަމާ ހަވާލުވި، އުރްބާނީގެ ކޯޗުކަމުގައި ރާއްޖޭން މިހާތަނަށް ކުޅުނު ފަސް މެޗުގެ ތެރެއިން މޮޅުވީ އެންމެ މެޗަކުންނެވެ. އެއީ، މި އަަހަރުގެ މާޗް މަހު އޭޝިއަން ކަޕް ކޮލިފައިންގައި ޓިމޯ ލެސްޓޭ އަތުން 2-1 އިންނެވެ. އޭގެ ފަހުން، ޑައިމަންޑް ޖުބިލީ އިންޓަނޭޝަނަލް މުބާރާތުގައި، އަފްގާނިސްތާން އަތުން 1-0 އިން ބަލިވިއިރު، ޕާކިސްތާން އަތްދަށުވީ 3-0 އިންނެވެ. އަދި، ބަންގްލަދޭޝްގެ 23 އަހަރުން ދަށުގެ ޓީމާ ވަނީ 1-1 އިން އެއްވަރުވެފަ އެވެ. ޗައިނާއާ އެކު ރޭ ކުޅުނު މެޗަކީ އުރްބާނީގެ ކޯޗުކަމުގަައި ރާއްޖޭން ބޭރުގައި މި ފަހަރު ކުޅުނު ފުރަތަމަ މެޗެވެ.
ދެ ވަނަ ހާފުގެ ލަނޑުތަކާ އެކު ޗައިނާ އިން ރާއްޖެ އަތުން މޮޅުވެއްޖެ
ޗައިނާއާ ދެކޮޅަށް ކުޅުނު އެކުވެރިކަމުގެ މެޗުން ރާއްޖެ ބަލިވީ ދެވަނަ ހާފުގައި ޗައިނާ އިން ޖެހި ލަނޑުތަކުން. ރާއްޖޭގެ ޓީމުން އާ ކުޅުންތެރިންތަކަކަށް ފުރުސަތު ދިން މި މެޗުގެ ފުރަތަމަ ހާފުގައި ރާއްޖޭގެ ޑިފެންޑަރުންނާއި ކީޕަރު ވަނީ ޗައިނާގެ ހަމަލާތައް ހުށިޔާރުކަމާއެކު ދިފާއުކޮށްފައި. އެކަމަކު، ދެ ވަނަ ހާފުގެ 23 މިނިޓް ތެރޭ ޗައިނާ އިން ތިން ގޯލު ޖެހި.
ޗައިނާގެ ސިނާ ނިއުސް އިން ރިޕޯޓްކޮށްފައިވާ ގޮތުގައި، މެޗަށް ފަހު އޮތް ނޫސްވެރިންގެ ބައްދަލުވުމުގައި އުރްބާނީ ވަނީ ރާއްޖޭގެ ފުޓްބޯޅަ ދެހާހުގެ ކުރީކޮޅުގައި އޮތް ލެވަލަށް ދާން މަަސައްކަތް ކުރާ ކަމަށް ބުނެފަ އެެވެ. އެހެން ނަމަވެސް މިދިޔަ އަހަރުތަކުގައި ރާއްޖޭގެ ގައުމީ ޓީމަށް ދިމާވި ކަންކަމަަށް ބަލާއިރު، ދާން ޖެހޭ ހިސާބަށް ޓީމު ދިއުމުގައި ބޮޑު ފަރަގެއް އޮތް ކަމަށް އުރްބާނީ ވަނީ ބުނެފަ އެވެ.
"ޗައިނާ އާއި ރާއްޖެ މި އޮތީ ތަފާތު ދެ ލެވަލެއްގައި. ޗައިނާ އޮތީ އޭޝިއާގެ އެންމެ ރަނގަޅު ފަންތީގައި ފުޓްބޯޅައިގެ ލެވަލުން ބަލާނަމަ. ރާއްޖޭން ވެސް މި މެޗުގައި ޒުވާން ކުޅުންތެރިންތަކެއް ބޭނުންކުރަން ބޭނުންކުރިން. 19 އަހަރުގެ ކުޅުންތެރިންތަކަކަށް ފުރުސަތު ލިބިއްޖެ. މެޗުން ފެނުނު މައިގަނޑު ތަފާތަކީ ދެ ގައުމުގެ ފުޓްބޯޅައިގައި މި ވަގުތު އިންޓެންސިޓީ އާއި މެޗު ކުޅުމުގެ ގާބިލުކަމުގެ ތަފާތު،" އުރްބާނީ ބުންޏެވެ.
"އަަހަރެމެންގެ ކުޅުންތެރިން ރަނގަޅުކުރަން އޮތް އެންމެ ބޮޑު ފުރުސަތަކީ ވަރުގަދަ މެޗުތަކެއް ކުޅުން. އެެހެންވީމަ، (ޗައިނާ މެޗު) މިއީ ވެސް ރަނގަޅު ފިޔަވަޅެއް ކަންކަން ދަސްކުރުމަށްޓަކައި،" އުރްބާނީ ބުންޏެވެ.
ރާއްޖޭގެ ފުޓްބޯޅައިގައި ގައުމީ ޓީމަށް މެޗެއް ނުކުޅެ މި ފަހުން އެންމެ ބޮޑު ބްރޭކެއް އައީ، 2023 ވަނަ އަހަރުގެ އޮކްޓޫބަރު މަހު، ވޯލްޑް ކަޕް ކޮލިފައިން ޕްރިލިމިނަރީ ބުރުގައި ބަންގްލަދޭޝާ ކުުޅުމަށް ފަހު އެވެ. އެ މެޗު ކުޅުމަށް ފަހު، ރާއްޖޭން ދެން މެޗެއް ކުޅުނީ، އެއް އަހަރު ފަހުން، 2024 ވަނަ އަހަރުގެ ނޮވެމްބަރު މަހު ބަންގްލަދޭޝާ ދެކޮޅަށް އެކުވެރިކަމުގެ މެޗުތަކެކެވެ.
އެ އެއް އަހަރުގެ މެދުކެނޑުމަށް ފަހު، ބަންގްލަދޭޝްއާ އެކު ކުޅުނު ދެ މެޗު ހިމެނޭހެން، ރާއްޖޭން ޖުމްލަ އެކު، މިހާތަނަށް ކުޅުނު 16 މެޗުގެ ތެރެއިން މޮޅުވީ ތިން މެޗުންނެވެ. އެއީ، އަލީ ސުޒޭންގެ ކޯޗުކަމުގައި ބަންގްލަދޭޝްގައި 1-0 އިންނާއި މުހައްމަދު ޝިޔާޒް (މޯހަން)ސައުތު އޭޝިއަން ސުޕަ ކަޕްގެ ފުރަތަމަ ލެގުގައި ސްރީ ލަންކާ އަތުން 3-0 އިން އަދި އުރްބާނީގެ ކޯޗުކަމުގައި ޓިމޯ ލެސްޓޭ އަތުން 2-1 އިންނެވެ.
މި ފަހަރުގެ އިންޓަނޭޝަނަލް ބްރޭކުގައި ކުރު މުއްދަތެއްގެ ތެރޭގައި ޗައިނާ މެޗު ހަމަޖެހިގެން ދިޔަ ކަމުގައި ވިޔަސް، މި މެޗު ކުޅެން ނިންމުމަކީ "ގޯސްކޮށް ކުރެވުނު ކަަމެއް ނޫން" ކަމަށް އުރްބާނީ ވަނީ ބުނެފަ އެވެ.
ރޭގެ މެޗުގައި ޗައިނާ އަށް އެންމެ ބޮޑު އެޑްވާންޓޭޖަކީ، ގާތްގަނޑަކަށް ތިން ހަފްތާ ކުރިން، މި މަހުގެ 12 ވަނަ ދުވަހު ތައްޔާރީތައް ފަށައި، ފިޒިކަލީ ޓީމު މާ ރަނގަޅަށް މި މެޗަށް ތައްޔާރުވެފައި ހުުރުން ކަމަށް އުރްބާނީ ވަނީ ބުނެފަ އެވެ. އަދި، މުހިންމު މަގާމުތަކުގައި ޗައިނާގެ ފަރަގަކީ އިސްކޮޅާއި ބަރުދަން ރަނގަޅު ކުޅުންތެރިން ތިބުން ކަމަށް ވެސް އުރްވާނީ ވަނީ ފާހަގަކުރި އެވެ.
ޗައިނާއާ ދެކޮޅަށް ރާއްޖެ އަށް ރޭގެ މެޗުގައި ޝޮޓެއް ވެސް ފޮނުވާލެވިފައިނުވެ އެވެ. ޗައިނާ އިން ދެ ވަނަ ހާފުގައި ޖެހި ގޯލުތަކުން ރޭގެ މެޗުން މޮޅުވިިއިރު، އުރްބާނީ ބުނީ ފުރަތަމަ ހާފުގައި ރާއްޖޭން ފެނިގެންދިޔައީ އޮގަނައިޒް ކުޅުމެއް ދެއްކިތަން ކަމަށެވެ.
"މެޗުން ދަސްވި އެއް ކަމަކީ، ބޯޅަ ނެތިސް ވެސް މެޗުގެ ކޮންޓްރޯލެއް ދެމެހެއްޓުން، އެއީ ރަނގަޅު ސްޓްރަކްޗާގައި ދެމިތިބެގެން، އެކަމަކު، ގަބޫލުކުރަން ޖެހޭ ޗައިނާގެ އިންޓެންސިޓީއާ ލެވަލާ އެއްވަރަށް އަހަރެމެންނަށް އެއް ހަަމައެއްގައި މި ވަގުތު ވާދަނުކުރެވޭނެ" އުރްބާނީ ބުންޏެވެ.
މުހިންމު ގިނަ ކުޅުންތެރިންްތަކެއް ނުލައި މި މެޗު ކުޅެން ޖެހުމުން، ޓީމު ނެގުމުގައި ގޮންޖެހުންތަކެއް ދިމާވި ކަމަށް ވެސް އުރްބާނީ ވަނީ ބުނެފަ އެވެ.
މި ފަހަރުގެ އިންޓަނޭޝަނަލް ބްރޭކުގަައި ރާއްޖޭން ދެން ކުޅޭ މެޗުތައް އޮތި ކިރްގިސްތާންގެ ބިޝްކެކްގަ އެވެ. އެ ގޮތުން، މި މަހު 28 ވަަނަ ދުވަހު ކިރްގިސްތާނާ ކުޅުމަށް ފަހު، ތިން ދުވަސް ފަހުން، ލެބަނަންއާ އެވެ. ޗައިނާ އިން މި ބްރޭކުގައި ދެން ކުޅޭނީ، ނިއު ޒީލެންޑާއި ފަލަސްތީނާއި ތަޖިކިސްތާނާ އެވެ.
