ބައިނަލްއަގުވާމީ އެކުވެރިކަމުގެ މެޗެއްގައި މިއަދު ރާއްޖެއާ ދެކޮޅަށް ކުޅެން ޖެހޭ މެޗު ފަސޭހަނުވާނެ ކަމަށާއި މި މެޗަކީ ޗައިނާ އަށް އުނދަގުލުގައި ކުޅެންޖެހޭ މެޗަކަށް ވުމުގެ ފުރުސަތު އޮތްއިރު، ރާއްޖެ އަށް ދޭން ޖެހޭ އިހުތިރާމް ފުރިހަމަަ އަށް އަދާކުރަން ޖެހޭ ކަމަށް ޗައިނާގެ ކޯޗު، ޝައޯ ޖިއަޔީ ބުނެފި އެވެ.
ރާއްޖެ ގަނޑިން މިއަދު ހަވީރު، 16:35 ގައި ފަށާ މެޗުގެ ކުރިން އިއްޔެ ބޭއްވި ނޫސްވެރިންގެ ބައްދަލުވުމުގައި، ޝާއޯ ހަނދާން އާ ކޮށްފައިވަނީ، މީގެ 25 އަހަރު ކުރިން ގަލޮޅު ދަނޑުގައި ކުޅުނު މެޗެއްގެ ހަނދާނެވެ. އެ ގޮތުން، ޝާއޯ ބުނީ، ގަލޮޅު ދަނޑުގައި ރާއްޖެއާ ދެކޮޅަށް ކުޅުނު މެޗުގެ ފުރަތަމަ ހާފު ނިމުނީ 0-0 އިން އެއްވަރުވެގެންނެވެ. ޗައިނާ އަށް އެ މެޗުން މޮޅެއް ހޯދުނީ، ދެ ވަނަ ހާފުގައި ޖެހި ގޯލާ އެކު، 1-0 އިންނެވެ.
"ރާއްޖެ އަކީ (ރޭންކިންއާ ހުރިހާ ކަމަކަށް ބަލާއިރު) ހީކުރާހާ ވަރުގަދަ ޓީމަކަށް ނުވެދާނެ. އެކަމަކު، ފަސޭހަކޮށްލައިގެން ކުޅެވޭނެ ފުރުސަތެއް ނެތް. އަހަރެމެން ހަމަޖެހިލައިގެން ތިބެ މި މެޗު ކުޅެން އުޅެފިއްޔާ އުނދަގޫވެދާނެ މެޗެއް މިއީ. އަހަރެމެން ވަރަށް ސީރިއަސްކޮށް ވިސްނުންތެރިކަމާ އެކު ކުޅޭ މެޗެއް މިއީ،" ޝާއޯ ބުންޏެވެ.
ރާއްޖެއާ ދެކޮޅަށް ކުޅެން އޮތް މެޗަކީ ފަހު ވަގުތު ހަމަޖެހިގެންދިޔަ މެޗެއް ކަމަށްވާތީވެ، ކުއްލިއަކަށް މި މެޗަށް ތައްޔާރުވުމުގައި ވެސް ގޮންޖެހުންތަކެއް އެބަހުރި ކަމަށް ޝާއޯ ވަނީ ބުނެފަ އެވެ.
"ހަތަރު މެޗު ކުޅެން ވިސްނާފައި އޮތްއިރު، ފުރަތަމަ މެޗު ކުޅޭ ޓީމު ބަދަލުވީ. އެހެންވީމަ ވެސް ޗެލެންޖުތަކެއް އެބަހުރި. އެކަމަކު، މިއީ ޕްރޮފެޝަނަލް ފުޓްބޯޅައިގައި ދައްކަން ޖެހޭ ވާހަކައެއް ނޫން، އަބަދުވެސް މެޗެއް ކުޅެން ލިބިގެން އެ އަށް ތައްޔާރުވާން ޖެހޭ ހާލަތުގައި ހުންނަން ޖެހޭނީ،" ޝާއޯ ބުންޏެވެ.
ޗައިނާ އިން މި މެޗުތަކަށް ތައްޔާރުވާން ޕްރެކްޓިސް ފެށީ މި މަހު 12 ވަނަ ދުވަހު އެވެ. ރާއްޖެއާ ދެކޮޅަށް ކުޅޭ މެޗުގެ ފަހުން، ޗައިނާ އިން ނިއު ޒީލެންޑާއި ފަލަސްތީނާއި ތަޖިކިސްތާނާ ދެކޮޅަށް ކުޅޭނެ އެވެ.
ރާއްޖެ އާއި ޗައިނާ އިން ވަނީ އިންޓަނޭޝަނަލް ފުޓްބޯޅައިގައި ހަ ފަހަރު ބައްދަލުކޮށްފަ އެވެ. ޗައިނާ އިން ވަނީ އެ ހުރިހާ މެޗަކުން މޮޅުވެފަ އެވެ. ރާއްޖެ އަތުން އެންމެ ފުރަތަމަ މެޗުގައި، 2001 ވަނަ އަހަރު ޗައިނާ ވަނީ 10-1 އިން މޮޅުވެފަ އެވެ. އޭގެ ފަހުން، 2001 ވަނަ އަަހަރު މާލޭގައި ޗައިނާ މޮޅުވީ 1-0 އިންނެވެ. ދެން، ޗައިނާ އިން ވަނީ 2015 ގައި ރާއްޖެ އަތުން 3-0 އަދި 2016 ވަނަ އަހަރު 4-0 ބަލިވެފަ އެވެ. އެންމެ ފަހުން، 2019 އާއި 2021 ވަނަ އަހަރު ޗައިނާ އަތުން ރާއްޖެ ބަލިވީ 5-0 އިންނެވެ.
