ޗައިނާއަށް ދަތުރުކުރުމާއި އެ ގައުމުން ބޭރަށް ދަތުރުކުރުމާ ގުޅޭ އާ ގަވާއިދުތަކަށް އަމަލުކުރަން ފަށައިފި އެވެ. މިއީ އެ ގައުމުގެ ރައްޔިތުންގެ މައްޗަށް ސަރުކާރުން ބާއްވާ ކޮންޓްރޯލް އިތުރަށް ވަރުގަދަކުރުމަށް އެޅި ފިޔަވަޅެއް ކަމަށް މަސްރަހު ދިރާސާކުރާ ފަރާތްތަކުން ބުނެ އެވެ.
މި އާ އުސޫލުގެ ދަށުން، ގައުމުން ބޭރުގައި އުޅުނުއިރު ޗައިނާގެ ގައުމީ ސަލާމަތަށް ނުވަތަ މަސްލަހަތަށް "ގެއްލުންދީފައިވާ" ކަމަށް ބެލެވޭ ރައްޔިތުން އެނބުރި ގައުމަށް އައުމަށްފަހު، ތިން އަހަރު ދުވަހުގެ މުއްދަތަށް ފުރައިގެން ދިއުން މަނާކުރެވިދާނެ އެވެ. މީގެ އިތުރުން، ޓެކްނޮލޮޖީ އިމްޕޯޓް އަދި އެކްސްޕޯޓް ކުރުމުގެ ގަވާއިދުތަކާ ހިލާފުވާ ފަރާތްތައް ވެސް ގައުމުން ފުރުން މަނާކުރުމުގެ ބާރު މި ގަވާއިދުން ލިބިދެ އެވެ.
ޗައިނާގެ ކަމާބެހޭ އިދާރާތަކުން ބުނާ ގޮތުގައި މި ގަވާއިދުތަކަކީ "ގައުމުގެ ސިޔާދަތާއި ސަލާމަތް ރައްކާތެރިކުރުމަށް" އެކުލަވާލާފައިވާ އުސޫލުތަކެކެވެ. އަދި މިއީ "އާންމު ރައްޔިތުންގެ" ދަތުރުފަތުރު ހަނިކުރުމަށް ކުރާ ކަމެއް ނޫން ކަމަށް ސަރުކާރުން ބުނެ އެވެ.
ނަމަވެސް، ފާޑުކިޔާ ފަރާތްތަކުން ބުނަނީ މި އާ ގަވާއިދުތަކުގެ ސަބަބުން، ގައުމުން ބޭރުގައި އުޅޭ ޗައިނާގެ ރައްޔިތުންގެ ހަރަކާތްތަކަށް ނުފޫޒު ފޯރުވުމަށް ބެއިޖިންއަށް އިތުރު ބާރުތަކެއް ލިބިގެންދާނެ ކަމަށެވެ.
އަންގާރަ ދުވަހުން ފެށިގެން އަމަލުކުރަން ފެށި ގަވާއިދުގައިވާ ގޮތުން، "ގައުމުގެ ސިނާއީ ނުވަތަ ޓެކްނޮލޮޖީގެ ސަލާމަތަށް ނުރައްކާވެދާނެ" ފަދަ ގޮތަކަށް ޓެކްނޮލޮޖީ އިމްޕޯޓް ނުވަތަ އެކްސްޕޯޓް ކުރުމުގެ އުސޫލުތަކާ ހިލާފުވާ ރައްޔިތުންނަށް ފުރައިގެން ދިއުން މަނާކުރެވިދާނެ އެވެ.
ޗައިނާގެ ބައެއް ރައްޔިތުން ބުނާ ގޮތުގައި އެއްވެސް ސާފު ސަބަބެއް ނެތި ދަތުރުފަތުރު ކުރުމުގެ ހުރަސްތަކާ ކުރިމަތިލާންޖެހޭތާ އަހަރުތަކެއް ވެއްޖެ އެވެ.
އާންމުވެފައިވާ މައުލޫމާތަށް ބަލާއިރު، ޗައިނާގެ ރައްޔިތުންނަށް އެމީހުންގެ މައްޗަށް ފުރުން މަނާކުރުމުގެ އަމުރެއް އޮތްތޯ އަމިއްލައަށް ޗެކް ކުރެވޭނެ ގޮތެއް މިހާރު ނެތެވެ.
ރަސްމީކޮށް ލިޔުމުން ނުވަތަ އަނގަބަހުން އަންގާފައި ނުވާނަމަ، ގިނަ މީހުންނަށް މިކަން އެނގެނީ ލިޔެކިޔުންތަކަށް އެދޭ ވަގުތު ނުވަތަ ފުރަން އެއާޕޯޓަށް ދާ ވަގުތުގަ އެވެ.
ޗައިނާގެ އެޑްމިނިސްޓްރޭޓިވް ލައިސަންސިންގް ގާނޫނުގެ ދަށުން، އިދާރާއަކުން ހުއްދައެއް ނުދޭން ނިންމައިފިނަމަ، އެކަމުގެ ސަބަބު ލިޔުމުން ބަޔާންކޮށްދޭން ޖެހެ އެވެ. ނަމަވެސް ބައެއް މީހުން ބުނީ މި ގަވާއިދަށް އަމަލުނުކުރާ ކަމަށެވެ.
އިންސާނީ ހައްގުތަކަށް މަސައްކަތްކުރާ ޖަމާއަތެއް ކަމަށްވާ 'ސޭފްގާޑް ޑިފެންޑާސް' ގެ ތަފާސްހިސާބުތަކަށް ބަލާއިރު، ފާއިތުވި އަހަރުތަކުގައި ޗައިނާ ސަރުކާރުން ރައްޔިތުން ފުރުން މަނާކުރުން ވަނީ ވަރަށް ބޮޑަށް އިތުރުކޮށްފަ އެވެ.
ޗައިނާގެ ސުޕްރީމް ކޯޓުގެ ޑޭޓާބޭސްއިން ދައްކާ ގޮތުގައި، 2016 ވަނަ އަހަރު ފުރުން މަނާކުރުމާ ގުޅޭ ގޮތުން ރެކޯޑް ކުރެވިފައިވަނީ އެންމެ 89 މައްސަލަ އެވެ. ނަމަވެސް މިދިޔަ އަހަރު ނިމުނުއިރު މި އަދަދު ވަނީ 188,760 އަށް އަރާފަ އެވެ.
ޗައިނާގެ މަދަނީ މައްސަލަތަކުގެ ތެރެއިން ގައުމުން ބޭރަށް ފުރުން މަނާކުރުމާ ގުޅޭ މައްސަލަތަކުގެ ނިސްބަތް 2019 އާއި 2025 އާ ދެމެދު ވަނީ 30 ގުނައަށް ވުރެ ބޮޑަށް އިތުރުވެފަ އެވެ.
އަންގާރަ ދުވަހުން ފެށިގެން އަމަލުކުރަން ފެށި އާ ގަވާއިދުތަކުގެ ދަށުން، "ނުރައްކާ ބޮޑު" ކަމަށް ކަނޑައަޅާފައިވާ ގައުމުތަކަށާއި ސަރަހައްދުތަކަށް ދަތުރު ނުކުރުމަށް ޗައިނާގެ ރައްޔިތުންނަށް އިރުޝާދު ދިނުން ބޯޑަރު އޮފިޝަލުންނަށް މިހާރު ވަނީ ލާޒިމްކޮށްފަ އެވެ.
އެހެންނަމަވެސް، މި އާ ގަވާއިދުތަކަށް އަމަލުކުރަން ފެށުމުގެ ކުރިންވެސް، ސިވިލް ސާވަންޓުންނާއި ދައުލަތުގެ ކުންފުނިތަކުގެ މުވައްޒަފުންގެ އިތުރުން އާންމު ރައްޔިތުންގެ ތެރެއިން ބައެއް މީހުންނަށް ވަކިވަކި ގައުމުތަކަށް ދަތުރުކުރުން އޮތީ މަނާކޮށްފަ އެވެ.
