ގައުމީ ފުޓްބޯޅަ ޓީމުގެ ކެޕްޓަން ބޭންޑް އަލުން ސަމޫހު އަލީ (ސަމުއްޓެ) އަށް ދޭން ނިންމީ އަދިވެސް ޓީމު ލީޑުކުރުމުގެ ޒިންމާގައި އޭނާ އަށް ތަފާތު ދެއްކޭނެތީ އާއި ހެދުނު ގޯހަކުން އަރައިގަންނަން އޭނާ އަށް ފުރުސަތު ހުޅުވާލުމުގެ ގޮތުން ކަމަށް ގައުމީ ފުޓްބޯޅަ ޓީމުގެ ކޯޗު އަދި އެފްއޭއެމްގެ ޓެކްނިކަލް ޑިރެކްޓަރު، ހަންގޭރީގެ އިސްތަވާން އުރްބާނީ ބުނެފި އެވެ.
ރާއްޖޭގެ ފުޓްބޯޅަ އަށް 75 އަހަރު ފުރުމުގެ މުނާސަބަތުގައި މިދިޔަ ޖޫން މަހު މާލޭގައި ބޭއްވި ޑައިމަންޑް ޖުބިލީ އިންޓަނޭޝަނަލް މުބާރާތުގައި ސަމުއްޓެ ނުކުޅެ އެެވެ. އަނިޔާގެ ސަބަބުން ޓީމުން ބާކީކުރި ކަމަށް އުރްބާނީ ވެސް ވަނީ އޭރު ބުނެފަ އެވެ.
އެކަމަކު، މި ފަހަރުގެ ފީފާ އިންޓަނޭޝަނަލް ބްރޭކުގައި ރާއްޖޭން ކުޅޭ ތިން މެޗު (ޗައިނާ، ކިރްގިސްތާން އަދި ލެބަނަން) ގެ ތައްޔާރީތަކުގެ ކުރިން ރޭ ބޭއްވި ނޫސްވެރިންގެ ބައްދަލުވުމުގައި އުރްބާނީ ވަނީ އަލުން ސަމުއްޓެ އަށް ގައުމީ ޓީމުގެ ކެޕްޓަން ބޭންޑް ހަވާލުކޮށްފަ އެވެ.
އުރްބާނީ ބުނީ، އަނިޔާ އާއި އެެހެން "ސަބަބަކާ" ހުރެ ސަމުއްޓެ އަތުން ނެގި ގައުމީ ޓީމުގެ ކެޕްޓަން ބޭންޑް އަލުން ދޭން ނިންމީ ކަމަށެވެ. ދިމާވީ ކޮން ކަމެއްތޯ އެހުމުން، އުރްބާނީ ވަނީ، ނޫސްވެރިންގެ ބައްދަލުވުމުގައި އިން އޭނާގެ އަންހެނުންނަށް އިޝާރާތްކޮށް، މިސާލެއް ޖަހައިފަ އެެވެ.
"ރަނގަޅަށް މިވީ، އަންހެނުން ވެސް އިންދައި ތި ސުވާލު އައީމަ. އަހަރެންގެ އަންހެނުންނާ ދެމެދު ހިނގާ ކަމެއް އެއީ އާއިލާ ތެރޭގައި އޮންނަ ކަމެއް. ހަމަ އެ ގޮތަށް، ސަމުއްޓެ އަކީ ގައުމީ ޓީމުގައި އަހަރެން ދެކޭ ޓީމުގެ އާއިލާ ތެރޭގެ މީހެއް. އެހެންވީމަ، އެކަން އޮންނާނީ އަހަރެމެން ތެރޭގައި،" އުރްބާނީ ބުންޏެވެ.
ކޮންމެ ވެސް ދުވަހަކުން ސަމުއްޓެ، އެ ވާހަކަ ދައްކަން ބޭނުންނަމަ އެކަން ކުރަންވީ ކަމަށާއި އެކަމަކު މި ވަގުުތު އޭނާ އެކަމަށް ބާރުނާޅާ ކަމަށް އުރްބާނީ ވަނީ ބުނެފަ އެވެ.
"މި ވަގުތު މުހިންމީ އެ ދިމާވި ކަމަކުން ކަންކަން ދަސްކޮށް ރަނގަޅުވުން. ޒުވާން ކުޅުންތެރިންނަށް މިސާލަކަށް ވުން. ފަހަރުގައި އަހަރެމެން އެ ދިމާވި ކަމެއް ހެދުނު ގޯހެއްގެ ގޮތުގައި ވެސް ނުބަލަންވީ،" އުރްބާނީ ބުންޏެވެ.
ނޫސްވެރިންގެ ބައްދަލުވުމުގައި ދެން ބައިވެރިވި، ގައުމީ ޓީމުގެ ޑިފެންޑަރު، ހަސަން އީނާޒަށް އިޝާރާތްކޮށް، އުރްބާނީ ބުނެފައިވަނީ، ސަމުއްޓެ ނެތުމުން، އެ މަގާމަށް އައީ ޑައިމަންޑް ޖުބިލީ މުބާރާތުގައި އީނާޒް ކަމަށެވެ. ބޭނުންވަނީ، އަބަދުވެސް ރަނގަޅު ކުޅުންތެރިންނަށް އެކިއެކި ސަބަބުތަކާ އެކުގައި ނަމަވެސް ގައުމީ ޓީމުގައި ފެންވަރު ސާބިތުކޮށްދޭން ފުރުސަތު ލިބުމަށް ކަމަށް އުރްބާނީ ވަނީ ބުނެފަ އެވެ.
އެންމެ ފަހުން، 2023 ވަނަ އަހަރު އިންޑިއާގެ ބެންގަލޫރުގައި އޮތް ސާފް ޗެމްޕިއަންޝިޕްގެ ކުރިން ގައުމީ ޓީމުގެ ކެޕްޓަންކަމާ ހަވާލުވި ސަމުއްޓެ ބުނީ، ޑައިމަންޑް ޖުބިލީ މުބާރާތުގައި ޓީމުގައި ނުހިމެނުނު ކަމުގައި ވިޔަސް ކުޅުންތެރިންނާ ވާހަކަ ދައްކައި ޓީމުގެ ކަންކަން ބަލަމުންދިޔަ ކަމަށެވެ.
"ޕްލޭޔަރުންނާ ކޮމިއުނިކޭޓް ކުރަމުން ދިޔައީ، ކޯޗާ ވެސް ވާހަަކަ ދައްކަން. އެންމެންނާ ބަރާބަރަށް ވާހަކަ ދައްކަން، މިހާރު ވެސް ކުރިއެކޭ އެއްގޮތަށް ހަމަ ޕްލޭޔަރުން ވެސް އެކަތި ގަނޑެއް ގޮތަށް މަސައްކަތް ކުރަނީ،" ސަމުއްޓެ ބުންޏެވެ.
ޗައިނާ އާއި ކިރްގިސްތާން އަދި ލެބަަަނަންއާ ދެކޮޅަށް ރާއްޖޭގެ ގައުމީ ފުޓްބޯޅަ ޓީމުން ކުޅޭ ތިން މެޗަށް ނެގި ސްކޮޑުގެ ފަރިތަކުރުންތައް ރޭ ގަލޮޅު ދަނޑުގައި ވަނީ ފަށައިފަ އެވެ. ކުރިއަށް އޮތް ފީފާ ބްރޭކުގައި ރާއްޖޭން ކުޅޭ މެޗުތަކަށް މިއަދު ފުރާނެ އެވެ. އެހެންކަމުން، ރާއްޖޭގައި ގައުމީ ޓީމުން ރާއްޖޭގައި ޕްރެކްޓިސް ކުރީ ރޭ އެކަންޏެވެ. މި މަހުގެ 24 ވަނަ ދުވަހު، ގައުމީ ޓީމުން ޗައިނާގެ ޗޮންގްޖިންގައި ކުޅޭނީ ޗައިނާ ގައުމީ ޓީމާ އެވެ. އެ މެޗަށް ފަހު، ގައުމީ ޓީމުން ދެން ދަތުރުކުރާނީ ކިރްގިސްތާންގެ ވެރި ރަށް ބިޝްކެކް އަށެވެ. އަދި، ބިޝްކެކްގައި މި މަހު 28 ވަނަ ދުވަހު ކިރްގިސްތާނާ މެޗެއް ކުުޅުމަށް ފަހު، އަންނަ މަހުގެ އެއް ވަނަ ދުވަހު ލެބަނަންއާ ދެކޮޅަށް ކުޅޭނެ އެވެ.
މިއީ، އިންޓަނޭޝަނަލް ބްރޭކެއްގައި، ގަައުމީ ޓީމުން ތަފާތު ދެ ގައުމަކަށް ދަތުރުކޮށް، ތިން މެޗެއް ކުޅޭނެ ފުރަތަމަ ފަހަރެވެ. ސަމުއްޓެ ބުނީ، މިއީ ރާއްޖޭގެ ކުޅުންތެރިންނަށް ވެސް ތަފާތު ތަޖުރިބާ އަކަށްވާނެ ކަމަށާއި މި ގޮތަށް މަސައްކަތްކޮށްގެން ވެސް ޓީމުގެ ކަންކަން ކުރިއަށް އޮތްތަނުގައި ރަނގަޅު ކުރެވޭނެ ކަމަށެވެ.
