ދިވެހިރާއްޖޭގެ ދަށު ސާނަވީ އިމްތިހާނުތަކުގައި 49 ޕަސެންޓު ކުދިން ބިޒްނެސް ސްޓްރީމް ކިޔަވާތީ ފަންނީ ތަޖުރިބާކާރު، ޑރ. ހަސަން ހަމީދު ކަންބޮޑުވުން ފާޅުކުރައްވައިފި އެވެ.
ކްރިޓިކަލް ތިންކިންގެ ރޮނގުން ޕީއެޗްޑީ ހާސިލްކުރައްވާފައިވާ ހަސަން ހަމީދު އެކްސްގައި ކުރެއްވި ޕޯސްޓެއްގައި ވިދާޅުވީ ރާއްޖެ ފަދަ ގައުމެއްގައި ދަށު ސާނަވީ އިމްތިހާނުތަކުގައި ބިޒްނެސް ސްޓްރީމް ކިޔަވާ ކުދިންގެ އަދަދު 20 ޕަސެންޓަށް ވުރެ އިތުރުވުމަކީ ހާސްވާން ޖެހޭ ކަމެއް ކަމަށެވެ.
"ރާއްޖެ ފަދަ ގައުމެއްގައި 20 ޕަސެންޓަށް ވުރެ ބިޒްނެސް ސްޓްރީމް ކިޔަވާ ދަރިވަރުން ގިނަވުމަކީ ހާސްވާންޖެހޭ ކަމެކެވެ. އިނގިރޭސިވިލާތާއި ސިންގަޕޫރުގައި ވެސް މި ނިސްބަތް ފަސްބައިކުޅަ އެއްބަޔަށްވުރެ މަދެވެ،" ހަސަން ހަމީދު ލިޔުއްވާފައިވެ އެވެ.
އެ ޕޯސްޓާއެކު ހަސަން ހަމީދު ވަނީ ދަށު ސާނަވީ އިމްތިހާނުތަކުގައި އެކި ސްޓްރީމްތައް ކިޔަވާ ދަރިވަރުންގެ ނިސްބަތް ހޯދުމަށް އެދި، މައުލޫމާތު ހޯދައި ލިބިގަތުމުގެ ހައްގުގެ ދަށުން އޭނާ ހޯދަން އެދުނު މައުލޫމާތުގެ ޖަވާބު ހިއްސާ ކުރައްވައިފަ އެވެ.
އެ މައުލޫމާތުން އެނގޭ ގޮތުގައި، މިދިޔަ އަހަރުގެ މެއި، ޖޫން އިމްތިހާނުގައި ބައިވެރިވި ކުދީންގެ ތެރެއިން ސައިންސް ސްޓްރީމް އިހުތިޔާރުކޮށްފައިވަނީ 50 ޕަސެންޓު ދަރިވަރުންނެވެ. އާޓްސް ސްޓްރީމް އިހުތިޔާރުކޮށްފައި ވަނީ އެންމެ ޕަސެންޓެއްގެ ކުދިންނެވެ.
އެ މައުލޫމާތުން އެނގޭ ގޮތުގައި، ބިޒްނެސް ސްޓްރީމް ކިޔަވާ ދަރިވަރުންގެ ތެރޭގައި ވެސް، ވިޔަފާރީގެ ހުނަރުތަކާއި ހިސާބުތައް ބަލަހައްޓާނެ ގޮތް ކިޔަވައިދޭ ބިޒްނެސް ސްޓަޑީސް އާޢި އެކައުންޓިން ކިޔަވާ ކުދިންގެ އަދަދު، އިގުތިސާދީ ސިޔާސަތުތައް ކަނޑައެޅުމަށް ބޭނުންވާ އިލްމު ކިޔަވައިދޭ އިކޮނިމިކްސް މާއްދާ ކިޔަވާ ކުދިންގެ އަދަދަށް ވުރެ ގިނަ އެވެ.
ރާއްޖެ ފަދަ ކުޑަ ގައުމެއްގައި ބިޒްނެސް ސްޓްރީމް ކިޔަވާ ދަރިވަރުންގެ އަދަދު އިންތިހާއަށް އިތުރުވުމުގެ ކަންބޮޑުވުން ހަސަން ހަމީދު ފާހަގަކުރައްވާފައިވާއިރު، ރާއްޖޭގައި މިހާރު ވެސް އިންޖިނިއަރިން އާއި ސިއްހީ އަދި، ތައުލީމީ ދާއިރާ ފަދަ ދާއިރާތަކުން ދިވެހީންނަށްވުރެ ބޮޑަށް ބަރޯސާ ވަނީ ބިދޭސީންނަށެވެ.
އޭގެ އިތުރުން، ރާއްޖޭގެ އިގުތިސާދަށް އެންމެ ގިނަ ފައިސާ ވައްދައިދޭ، ފަތުރުވެރިކަމާއި މަސްވެރިކަމުގައި ވެސް މަސައްކަތްކުރާ ދިވެހީންގެ އަދަދު ވަނީ ވަރަށް ބޮޑަށް އިތުރުވެފަ އެވެ.
ނަތީޖާއެއްގެ ގޮތުން، ބިޒްނެސް އަދި، އެކައުންޓިން ދާއިރާއިން މަތީ ތައުލީމު ހާސިލުކޮށްފައިވާ އެތައް ޒުވާނުންނެއް އާދައިގެ އެޑްމިން ވަޒީފާތައް އަދާކުރަން މިހާރު ވެސް ދަނީ މަޖުބޫރުވަމުންނެވެ.
