މިދިޔަ މަސް ނިމުނުއިރު ބޭނުންކުރެވޭ ރިޒާވުގައި ހުރި އަދަދު، މި އަހަރުގެ އޭޕްރިލް މަހުގެ ތެރޭގައި ސުކޫކު ހަލާސްކުރަން 525 މިލިއަން ޑޮލަރު ދައްކާފައި ބާކީ ހުރި ވަރަށް ވުރެ މަދު ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އާންމުކޮށްފައިވާ ތަފާސްހިސާބުތަކުން ދައްކައިފި އެވެ.
އެމްއެމްއޭއިން މިއަދު އާންމުކުރި އެންމެ ފަހުގެ ރިޒާވު އަދަދުތަކުން ދައްކާ ގޮތުގައި މިދިޔަ މަސް ނިމުނުއިރު ޖުމްލަ ރިޒާވުގައި ހުރީ 643.8 މިލިއަން ޑޮލަރެވެ. މިއީ އޭގެ ކުރީ މަހަށް ވުރެ ފަސް މިލިއަން ޑޮލަރު އިތުރު އަދަދެކެވެ.
ޖުމްލަ ރިޒާވު އިތުރުވީ ނަމަވެސް ބޭނުންކުރެވޭ ރިޒާވު ވަނީ 221.8 މިލިއަން ޑޮލަރުން 200.6 މިލިއަން ޑޮލަރަށް ތިރިވެފަ އެވެ. މިއީ 21 މިލިއަން ޑޮލަރު ނުވަތަ ގާތްގަނޑަކަށް 10 ޕަސެންޓުގެ ދަށްވުމެކެވެ.
ޖުމްލަ ރިޒާވު އިތުރުވީއިރު، ބޭނުންކުރެވޭ ރިޒާވު ދަށްވީ، ކުރިއަށް އޮތް އަހަރު ދުވަހުގެ ތެރޭގައި ބޭރު ވާން ހުރި ފައިސާގެ އަދަދު 29.3 މިލިއަން ޑޮލަރު އިތުރުވުމުންނެވެ. މި އަދަދު ވަނީ މިދިޔަ މަސް ދުވަހުގެ ތެރޭގައި ފަސް ޕަސެންޓު އިތުރުވެފަ އެވެ.
ބޭނުންކުރެވޭ ރިޒާވު 2026
| Label | Value |
|---|---|
| ޖެނުއަރީ | 301 Million USD |
| ފެބްރުއަރީ | 337 Million USD |
| މާޗު | 409 Million USD |
| އޭޕްރިލް | 244 Million USD |
| މެއި | 260 Million USD |
| ޖޫން | 248 Million USD |
| ޖުލައި | 221 Million USD |
| އޮގަސްޓު | 200 Million USD |
މި އަހަރުގެ ރިޒާވު ހުރި ގޮތުގެ ޓްރެންޑަށް ބަލާއިރު، ސުކޫކު ދެއްކުމާ ހަމައަށް ޖުމްލަ ރިޒާވާއި ބޭނުންކުރެވޭ ރިޒާވު ރެކޯޑު އަދަދުތަކަށް އުފުލުނެވެ. ނަމަވެސް ސުކޫކު ދެއްކި ފަހުން ޖުމްލަ ރިޒާވު 600 މިލިއަން ޑޮލަރުގެ އަދަދުތަކަށް ތިރިވެފައިވާއިރު، ބޭނުންކުރެވޭ ރިޒާވު ވަނީ 200 މިލިއަން ޑޮލަރުގެ އަދަދުތަކަށް ތިރިވެފަ އެވެ.
ރިޒާވުގެ ރެކޯޑުތައް ހެދި މާޗު މަހު، ޖުމްލަ ރިޒާވުގައި 1.3 ބިލިއަން ޑޮލަރު އަދި ބޭނުންކުރެވޭ ރިޒާވުގައި 409 މިލިއަން ޑޮލަރު ހުއްޓެވެ.
ވޭތުވި ދެ ކުއާޓަރުގައި ރިޒާވު ހީނަރުވީ ނަމަވެސް، ޑޮލަރު މާރުކުރާ މިންވަރު 40 ޕަސެންޓަށް އިތުރުކޮށްފައިވާތީ، މި އަހަރުގެ ފަހު ކުއާޓަރުގައި، އެއީ އޮކްޓޫބަރުން ޑިސެމްބަރަށް ހިނގާ ކުއާޓަރުގައި، ރިޒާވު އިތުރުވާނެ ކަމަށް ބެލެވެ އެވެ.
