އިކޮނޮމިކް މިނިސްޓަރު މުހައްމަދު ސައީދު ނެރުއްވި ތިންވަނަ ޓިކްޓޮކް ވީޑިއޯގައިވެސް ރާއްޖޭގެ ކަޅު ބާޒާރުގައި ޑޮލަރުގެ އަގު ހިފެހެއްޓުމެއްނެތި މައްޗަށްދާ ވާހަކަ ނޫސްތަކުން ގެނެސްދޭތީ އެކަން ކުށްވެރިކުރައްވައިފި އެވެ.
ސައީދު ނެރުއްވި ޓިކްޓޮކް ވީޑިއޯގައި ވިދާޅުވީ ކަޅު ބާޒާރުގައި ޑޮލަރުގެ އަގުބޮޑުވުމަށް ހިތްވަރުދެނީ ނޫސްތަކުން ޖަހާ ހެޑްލައިންތަކުން ކަމަށާއި ވަކިން ހާއްސަކޮށް ރާއްޖޭގައި ވެރިކަން ކުރައްވާފައި ތިއްބެވި ބޭފުޅުންވެސް ރޭޓް ސެޓްކުރައްވަމުންދާ ކަމަށެވެ.
"ބްލެކް މާކެޓުގައި މިކަން ކުރަނީ ބޭންކިން ސިސްޓަމްގެ ތެރެއަށް ޑޮލަރު ނުވައްދާ ބްލެކް މާކެޓުގައި ޑޮލަރު ލިބޭ ފަރާތްތަކުން ވިއްކާތީ. އެކަމަށް ހިތްވަރު މިދެނީ މިދަންނަވާ ނޫސް ޕޭޕަރުތަކުގެ ހެޑްލައިން އާއި މިހާރު ވަކިން ހާއްސަކޮށް ރާއްޖޭގައި ވެރިކަން ކުރައްވާފައި ތިއްބެވި ބޭފުޅުން ހެނދުނު އެއް ބޭފަޅަކު، ހަވީރު އަނެއް ބޭފުޅަކު ރޭޓް މި ސެޓް ކުރައްވަނީ އެނގޭތޯ،" ސައީދު ވިދާޅުވި އެވެ.
މިދިޔަ އާދީއްތަ ދުވަހުވެސް ސައީދު ވިދާޅުވެފައިވަނީ ހެނދުނު މުޅި ގައުމު ހޭލާއިރު ދެ ނޫހެއްގެ ސުރުހީގައި ޑޮލަރުގެ ރޭޓަކީ 22ރ. އޭ ނުވަތަ 24ރ. އޭ ބުނެ ހަބަރު ފެތުރުމުން މާކެޓުން އެއަށް ރިއެކްޓްކުރާ ކަމަށެވެ.
ނަމަވެސް އެއީ ކޮން ދެ ނޫހެއްކަން ސައީދަށް ވިދާޅުވާން ކެރިވަޑައެއް ނުގެންނެވި އެވެ. އެއްވެސް ނޫހެއްގައި ޑޮލަރު 24ރ. އަށް އެރިކަމަށް ލިޔެފައެއް ނެތެވެ.
ޑޮލަރުގެ އަގު އުފުލުމާއި ނޫސްތަކުގައި ޖަހާ ސުރުހީތަކާ މާ ބޮޑު ގުޅުމެއް އޮތް ކަމަށް ގަބޫލުނުކުރެވޭ ކަމަށް އަދަދު ނޫހާއި ސަންގު ޓީވީ ގުޅިގެން ގެނެސްދިން "ޑޮލަރު ސައްލާ" ޕެނަލް ޑިސްކަޝަންގައި މާލީ އަދި އިގުތިސޯދީ ދާއިރާގެ މާހިރުންތަކެއް ބުންޏެވެ.
ހިފެހެއްޓުމެއް ނެތި އުފުލެމުންދާ ޑޮލަރުގެ އަގު ރާއްޖޭގެ ކަޅު ބާޒާރުގައި މިވަގުތު ހުރީ 22.60ރ. އަށެވެ. އެއީ މިއީ މިއަދު ހެނދުނު ހުރި އަގަށްވުރެ 15 ލާރި ބޮޑު އަދަދެކެވެ. ކަޅު ބާޒާރުގައި މިއަދު ހެނދުނު ޑޮލަރުގެ އަގު ހުރީ 22.45ރ. އަށެވެ. މީގެ ކުރިން ދުވަހަކު ވެސް ރާއްޖޭގެ ޑޮލަރުގެ އަގު މިހައި މައްޗަކަށް ނުދެ އެވެ.
ކަޅު ބާޒާރުގައި ޑޮލަރުގެ އަގު ހުއްޓުމެއްނެތި އިންތިހާއަށް ބޮޑުވަމުންދާއިރު، ޑޮލަރު ލިބުމުގައި ވެސް ދަނީ ދަތިތައް ދިމާވަމުންނެވެ.
އިގްތިސާދީ މާހިރުން ބުނާ ގޮތުގައި ޑޮލަރުގެ އަގު މިހާ ބޮޑަށް އުފުލެން ދިމާވި މައިގަނޑު ސަބަބަކީ ރާއްޖެއަށް އެތެރެކުރާ މުދަލަށް ބޭނުންވާ ޑޮލަރު ރަސްމީ ބޭންކިން ނިޒާމުގެ ތެރެއިން ލިބުން ދަތިވުމެވެ. މީގެ އިތުރުން، ބޭރުގެ ދަރަނިތައް ދެއްކުމަށްޓަކައި ދައުލަތަށް ބޮޑެތި އަދަދުތަކުން ޑޮލަރު ބޭނުންވުމަކީވެސް ކަޅު ބާޒާރުގައި ޑޮލަރަށް އޮތް ޑިމާންޑު އިންތިހާއަށް ބޮޑުވެގެން ދިޔަ ސަބަބެކެވެ.
ޑޮލަރުގެ އަގަށް އަންނަ ބަދަލުތައް އަދަދު ނޫހުގެ ޑޮލަރު ޓްރެކަރ މެދުވެރިކޮށް ވަގުތުން ބަލާލެވޭނެ އެވެ.
