އަންނަ އޮކްޓޫބަރު މަހު އަމަލުކުރަން ފަށާ އެއްގަމު ދަތުރުފަތުރުގެ އާ ގާނޫނުގެ ދަށުން 20 އަހަރުވެފައިވާ އެއްވެސް އުޅަނދެއް ނައްތާލާނީ ސަރުކާރުން ބަދަލުދީފައި ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ސައީދު ވިދާޅުވީ އުމުރު ހަމަވާ ވެހިކަލްތަކުގެ ރަޖިސްޓްރީ ބާތިލް ކުރާނީ ތާޑް ޕާޓީއަކުން އެސެސްކޮށްފައި ކަމަށެވެ.
"ވެހިކަލެއް މުސްކުޅި ކުރަންޖެހޭ ހާލަތެއް އައިސްގެން މިސާލަކަށް ހައްލުކުރަން ޖެހުނަސް، އެ ވެހިކަލްއެއްގެ އޭރުގެ އަގެއް ކޮންމެވެސް ތާޑް ޕާޓީއަކުން އެސެސްކޮށްފައި ނޫން ގޮތަކަށް އަދި އެއަށް ބަދަލެއް ދީފައި ނޫން ގޮތަކަށް އެކަން ނުވެސް ކުރާނެ، އޭނާއަށް ވެހިކަލްއެއް ލިބޭނެ ގޮތް ހަދައިދީފައި ނޫނީ،" ސައީދު ވިދާޅުވި އެވެ.
އޭނާ ވިދާޅުވީ އެކަމާ ބެހޭ ގޮތުން، ހަދަންޖެހޭ ގަވާއިދުތައް ހަދާނީ ވެސް ފުޅާ ދާއިރާއެއްގައި މަޝްވަރާ ކުރުމަށްފަހު ކަމަށެވެ.
މިއަދުގެ ނޫސްވެރިންގެ ބައްދަލުވުމުގައި ވާހަކަދައްކަވަމުން ސައީދު ވިދާޅުވީ ވެހިކަލްތަކުގެ އުމުރު ކަނޑައެޅުމަކީ މާލޭގެ ޓްރެފިކް މައްސަލައަށް ހައްލު ހޯދުމަށް ކުރާ މަސައްކަތުގެ ވަރަށް ކުޑަ ކަމެއް ކަމަށެވެ. ނަމަވެސް، އެކަން ކުރާނީ އެއްވެސް ރައްޔިތަކަށް އޭގެ ތަކުލީފު އުފުލަންނުޖެހޭ ގޮތަށް ކަމަށް ސައީދު ވިދާޅުވި އެވެ.
އޭގެ އިތުރުން، މިއަދުގެ ނޫސްވެރިންގެ ބައްދަލުވުމުގައި ވާހަކަދައްކަވަމުން ސައީދު ވިދާޅުވީ އަލަށް ފާސްކުރި އެއްގަމު ދަތުރުފަތުރާ ބެހޭ ގާނޫނުގެ އެންމެ ބޮޑު ބޭނުމަކީ މަގުތައް ބޭނުންކުރާ ވަކިވަކި އާންމު ފަރުދުންގެ ރައްކާތެރިކަން ކަށަވަރު ކުރުން ކަމަށެވެ.
އަންނަ އޮކްޓޫބަރު 1، ގައި އަމަލުކުރަން ފަށާ އެ ގާނޫނުގެ 23 ވަނަ މާއްދާގައި ބަޔާންކޮށްފައި ވަނީ، އިސްތިސްނާ ކުރެވޭ ހާއްސަ ގިންތީގެ އުޅަނދުތައް ފިޔަވައި އެހެން އެއްވެސް އެއްގަމު އުޅަނދެއް ބޭނުންކުރެވޭނީ އެ އުޅަނދެއް އުފެއްދި ތާރީހުން ފެށިގެން 20 އަހަރު ދުވަހުގެ މުއްދަތަށް ކަމަށެވެ. މި މުއްދަތު ހަމަވުމުން އެ އުޅަނދުތަކުގެ ވެރިފަރާތަށް ނޯޓިސް ދިނުމަށް ފަހު، އުޅަނދުގެ ރަޖިސްޓްރީ ބާތިލުކުރެވޭނެ އެވެ.
އެ މައްދާގައި އިސްތިސްނާއެއްގެ ގޮތުގައި ހިމަނާފައި ވަނީ އެ ގާނޫނަށް އަމަލުކުރަން ފަށާއިރު ރެޖިސްޓްރީކޮށްފައިވާ އުޅަނދުތަކުގެ ތެރެއިން 18 އަހަރާއި 20 އަހަރާ ދެމެދުގެ އުޅަނދުތަކަށެވެ. އެ ގާނޫނުގެ 23 ވަނަ މާއްދާގެ ބ. ގައި ބަޔާންކޮށްފައި ވަނީ އެ އުޅަނދުތަކުގެ ރެޖިސްޓްރީ ބާތިލުކުރެވޭނީ ގާނޫނަށް އަމަލުކުރަން ފަށާ ތާރީހުން ފެށިގެން ތިން އަހަރުދުވަސް ހަމަވާ ތާރީހުގައި ކަމަށެވެ.
