ބޭންކް އޮފް މޯލްޑިވްސް (ބީއެމްއެލް) ގެ ރުފިޔާ ކާޑުތަކަށް މަހެއްގެ މައްޗަށް ކަނޑައަޅާފައިވާ ލިމިޓު، އެ ބޭންކުގެ ކާޑުތައް ބޭނުންކުރާ ކަމަށް ބުނެފައިވާ ތިން ލައްކަ ކަސްޓަމަރުންގެ މެދުގައި ބަހާލުމުން ކޮންމެ ކަސްޓަމަރަކަށް 60 ޑޮލަރު ވެސް ނުޖެހޭ ކަމަށް އަދަދު ނޫހުން ހެދި ހިސާބުތަކުން ދައްކައިފި އެވެ.
ބީއެމްއެލްއިން ވަނީ އެ ބޭންކުން ދޫކޮށްފައިވާ ރުފިޔާ ކާޑުތައް ބޭނުންކޮށްގެން ރާއްޖެއިން ބޭރުގެ އީ-ކޮމާސް މުއާމަލާތްތައް ކުރެވޭ އަދަދަކީ 16 މިލިއަން ޑޮލަރު ކަމަށް ލިމިޓުކޮށްފަ އެވެ. ބޭންކުން ވަނީ ދުވާލަކަށް ހަރަދު ކުރެވޭ އެންމެ މަތީ މިންވަރެއް ކަނޑައެޅުމަށް ފަހު މި ލިމިޓު އެކި ދާއިރާތަކުގެ މެދުގައި ބަހާލާފަ އެވެ.
މި ލިމިޓުގެ ތެރެއިން އެންެ ބޮޑު އަދަދެއް ކަނޑައަޅާފައި ވަނީ ދަތުރުފަތުރާއި ހޮޓެލް ބުކިންތަކަށެވެ. ބޭންކުން ގިނަ ޑޮލަރުތަކެއް ބޭރުވާ މައިގަނޑު ސަބަބު ކަމަށް ބުނާ އީ-ކޮމާސް ޕްލެޓްފޯމްތަކުގެ ތެރެއިން އެންމެ ގިނައިން ބޭނުންކުރާ ޕްލެޓްފޯމްތަކަށް ވެސް ލިމިޓެއް އޮވެ އެވެ.
ބީއެމްއެލްއިން ކަނޑައަޅާފައިވާ ލިމިޓުތައް
- އެންމެ ގިނައިން ވިޔަފާރިކުރާ އީކޮމާސް ޕްލެޓްފޯމްތަކަށް މަހަކު ތިން މިލިއަން ޑޮލަރު (ދުވާލަކު އެއް ލައްކަ ޑޮލަރު)
- ސޯޝަލް މީޑިއާ ޕްލެޓްފޯމްތަކަށް މަހަކު ދޮޅު މިލިއަން ޑޮލަރު (ދުވާލަކު 50،000 ޑޮލަރު)
- ދަތުރުފަތުރާއި ހޮޓެލް ބުކިންތަކަށް މަހަކު ހަ މިލިއަން ޑޮލަރު (ދުވާލަކު ދެ ލައްކަ ޑޮލަރު)
- ޒަރޫރީ ސަބްސްކްރިޕްޝަންތަކާއި މުހިންމު ހިދުމަތްތަކަށް މަހަކު ތިން މިލިއަން ޑޮލަރު (ދުވާލަކު އެއް ލައްކަ ޑޮލަރު)
- އެހެނިހެން ހުރިހާ ވިޔަފާރިތަކަށް ކަނޑައަޅާފައިވަނީ މަހަކު 1.8 މިލިއަން ޑޮލަރު (ދުވާލަކު 60،000 ޑޮލަރު)
މި ލިމިޓުތަކުގައި ބޮަލަކަށް ޖެހޭ ވަރު ހިސާބުކުރަން ބޭނުންކުރީ ބީއެމްއެލްގެ "ޗެޓު ވިތު ސީއީއޯ" ގައި އެ ބޭންކުގެ ސީއީއޯ އަދި މެނޭޖިން ޑިރެކްޓަރު މުހައްމަދު ޝަރީފު ހިއްސާކުރެއްވި އަދަދުތަކެވެ. އެ ދުވަހު ޝަރީފް ވިދާޅުވީ ބޭންކުގެ 250،000 އާއި ތިން ލަައްކައާ ދެމެދުގެ އަދަދަކަށް ކޮންމެ މަހެއްގައި ރުފިޔާ ކާޑުތަކުން މުއާމަލާތް ކުރާކަމަށެވެ. އަދި، އެވަރެޖުކޮށް ކޮންމެ ކަސްޓަމަރަކަށް ޖެހެނީ 143 ޑޮލަރު ކަމަށެވެ.
މި އަދަދުގެ އެވަރެޖެއް ކޮންމެ ކަސްޓަމަރަކަށް ލިބުނީ ބޭންކުން މަހެއްގެ މައްޗަށް 39.3 މިލިއަން ޑޮލަރު ވިއްކި އިރުގަ އެވެ. މިހާރު ބޭންކުން 16 މިލިއަން ޑޮލަރު ވިއްކާއިރު، މި އަދަދު އެ ބޭންކުގެ ތިން ލައްކަ ކަސްޓަމަރުންގެ މެދުގައި ބަހާލުމުން ކަސްޓަަމަރަކަށް ހޭދަ ކުރެވޭ އެވަރެޖު އަދަދަކީ 53 ޑޮލަރެވެ.
ބީއެމްއެލްގެ ޑޮލަރު ލިމިޓް ރީސެޓްވާ ގަޑީގައި ވެސް ކާޑުން ނުކެނޑޭ ކަމުގެ ޝަކުވާ
ބީއެމްއެލްގެ ރުފިޔާ ކާޑުތަކުން ކުރާ ބޭރުގެ މުއާމަލާތްތަކުގެ ލިމިޓް ކޮންމެ ދުވަހަކު ހެނދުނު 7:00 ގައި ރީސެޓްވާނެ ކަމަށް ބޭންކުން ބުނި ނަމަވެސް، އެ ވަގުތުވެސް މުއާމަލާތް ނުކުރެވޭތީ އާންމުންގެ ބޮޑެތި ޝަކުވާތަކާއި ފާޑުކިޔުންތައް ބޭންކަށް ވަނީ އަމާޒުވެފައި. ގިނަ ކަސްޓަމަރުން ތުހުމަތުކުރާ ގޮތުގައި ބޭންކުން ދޭ މައުލޫމާތު ސައްހައެއް ނޫން.
މި ވަރުގެ ކުޑަ އަދަދެއް ހޭދަ ކުރެވޭ ގޮތަށް އޮތް ނަމަވެސް، ބީއެމްއެލްގެ ރުފިޔާ ކާޑުތަކަށް ކަނޑައަޅާފައިވާ މަހަކު 500 ޑޮލަރުގެ އެލަވަންސަށް އެއްވެސް ބަދަލެއް ނުގެނެ އެވެ. އެކަމަކު މިހާރު ޑޮލަރު ފޯރުކޮށްދޭ މިންވަރު ވަރަށް ބޮޑަށް މަދުކޮށްފައިވާތީ މި ވަރަށް ހަރަދު ކުރެވުމަކީ ނާދިރު ކަމެކެވެ.
ސަބަބަކީ ބީއެމްއެލްގައި ތިބި ހުރިހާ ކަސްޓަމަރުންނަށް މިހާ މަދު އަދަދެއްގެ ޑޮލަރު ބޭނުންކޮށްގެން ގިނަ ޓްރާންސެކްޝަންތައް ނުހެދޭނެތީ އެވެ. މި ލިމިޓުގައި 500 ޑޮލަރުގެ އެލަވަންސެއް ބޭނުންކުރެވޭނީ އެއް މުއާމަލާތަކުން ކުރާ ނަމަ ނޫނީ ބޭންކުގެ ޑެއިލީ ލިމިޓު ހަމަ ނުވަނީސް ނަސީބު އަތުގައި ހިފައިފި ނަމަ އެވެ.
ބީއެމްއެލްއިން ވަނީ މި ޑެއިލީ ލިމިޓުތައް ރީސެޓުވާ ގަޑިއަކީ ހެނދުނު 7:00 ކަމަށް ކަނޑައަޅާފަ އެވެ. އަދި، ވަކި ދާއިރާއަކަށް ނުވަތަ ވިޔަފާރިއަކަށް ކަނޑައަޅާފައިވާ ދުވަހުގެ ލިމިޓް ހަމަވެއްޖެ ނަމަ، ކަސްޓަމަރުންނަށް ޖެހިގެން އަންނަ ދުވަހު އަލުން މުއާމަލާތް ކުރެވޭނެ ކަމަށް އެ ބޭންކުން ބުނެފައިވެ އެވެ.
މިހެން ނަމަވެސް، މި ގަޑީގައި ކާޑުތަކުން ކަނޑަން މަސައްކަތްކޮށްގެން ވެސް ނުކެނޑޭ ކަމަށް ބުނެ މިއަދު ގިނަ ބަޔަކު ޝަކުވާކުރި އެވެ.
ބީއެމްއެލްއިން މި ހިފެހެއްޓުންތައް ގެނައީ، މި އަހަރުގެ ފެބްރުއަރީ މަހުގެ ފަހުކޮޅު ފެށި އިރާނު ހަނގުރާމައާއެކީ، ޓޫރިޒަމަށް ލޮޅުން އައިސް، އިގުތިސޯދު ހީނަރުވުމުންނެވެ. މިއާއެކީގައި ބީއެމްއެލްގެ އާމްދަނީއަށް އަސަރުކޮށް، އެ ބޭންކަށް ލިބޭ ޑޮލަރުގެ އަދަދު ވަރަށް ބޮޑަށް މަދުވެފައިވަ ކަމަށް އޭރުން ފެށިގެން އައީ ބުނަމުންނެވެ.
މިހެން ނަމަވެސް މި މައްސަލަ ރަނގަޅަށް މެނޭޖުނުކުރެވުމާ ގުޅިގެން، ޑޮލަރު ހުރެގެން ހަދާ ޓީޓީތައް ލަސްވާ މައްސަލައާ ވަނީ ކުރިމަތިލާން ޖެހިފަ އެވެ. މި ގޮތަށް ޓީޓީ ނުހެދޭ ކަމަށް ދުވަސްތަކެއް ވަންދެން އިންކާރުކުރުމަށް ފަހު، ބީއެމްއެލްއިން އިއްޔެ ވަނީ ޑޮލަރު ތާށިކަމުގެ ސަބަބުން ޓީޓީ ނުހެދޭ ކަމަށް ފުރަތަމަ ފަހަރަށް އެއްބަސްވެފަ އެވެ.
