ބޮޑެތި ހިފެހެއްޓުންތަކާއެކު ބެންކް އޮފް މޯލްޑިވްސްގެ ރުފިޔާ ކާޑުތައް ބޭނުންކޮށްގެން ރާއްޖެއިން ބޭރުގެ އީ-ކޮމާސް މުއާމަލާތްތައް ކުރެވޭ އަދަދު ކޮންމެ މަހަކު 16 މިލިއަން ޑޮލަރާ ހަމައަށް ލިމިޓްކޮށްފި އެވެ.
ބީއެމްއެލް އިން ހާމަކޮށްފައިވާ ގޮތުގައި މާދަމާއިން ފެށިގެން މިހާރު ކަނޑައަޅާފައިވާ 16 މިލިއަން ޑޮލަރުގެ ލިމިޓުގެ ތެރެއިން ކޮންމެ މަހަކު ކަސްޓަމަރުންގެ ބޭނުންތަކަށާއި ދެވޭ ހިދުމަތްތަކުގެ މުހިންމުކަމަށް ރިއާޔަތްކޮށް، ވަކިވަކި ދާއިރާތަކުގެ ވިޔަފާރިތަކަށް ދުވާލަކު ބޭނުންކުރެވޭނެ ވަކި ލިމިޓްތަކެއްވެސް ވަނީ ކަނޑައަޅާފަ އެވެ.
ބީއެމްއެލްއިން އީ-ކޮމާސް ލިމިޓްތައް ކަނޑައަޅާފައިވާ ގޮތް:
- އެންމެގިނައިން ވިޔަފާރިކުރާ އީ-ކޮމާސް ޕްލެޓްފޯމްތައް: މަހަކު ތިން މިލިއަން ޑޮލަރު އަދި ދުވާލަކު އެއް ލައްކަ ޑޮލަރު
- ސޯޝަލް މީޑިއާ ޕްލެޓްފޯމްތައް: މަހަކު 1.5 މިލިއަން ޑޮލަރު އަދި ދުވާލަކު 50،000 ޑޮލަރު
- ދަތުރުފަތުރާއި ހޮޓެލް ބުކިން: މަހަކު ހަ މިލިއަން ޑޮލަރު އަދި ދުވާލަކު ދެ ލައްކަ ޑޮލަރު
- ޒަރޫރީ ސަބްސްކްރިޕްޝަންތަކާއި މުހިންމު ހިދުމަތްތައް: މަހަކު ތިން މިލިއަން ޑޮލަރު އަދި ދުވާލަކު އެއް ލައްކަ ޑޮލަރު
- އެހެނިހެން ހުރިހާ ވިޔަފާރިތައް: މަހަކު 1.8 މިލިއަން ޑޮލަރު އަދި ދުވާލަކު 60،000 ޑޮލަރު
ދަތުރުފަތުރުގެ ޓިކެޓާއި ހުރުމުގެ ހަރަދުތައް ހަމަޖައްސައިދިނުމަށް ކަސްޓަމަރުން ކުރާ މުއާމަލާތްތައް އިތުރުވުމުގެ ސަބަބުން ބީއެމްއެލް އިން ވަނީ ކޮންމެ ކަސްޓަމަރަކަށް ތިން މަސް ދުވަހުގެ މުއްދަތެއްގެ ތެރޭގައި ގިނަވެގެން ތިން މުއާމަލާތް ކުރެވޭ ގޮތަށް ލިމިޓް ކަނޑައަޅާފަ އެވެ.
ކާޑުތައް ބޭނުންކޮށްގެން އެންމެ ގިނައިން ވިޔަފާރިކުރާ ބޭރުގެ 150 އީ-ކޮމާސް ޕްލެޓްފޯމްގެ ލިސްޓެއް އާންމުކުރާނެ ކަމަށާއި ލިސްޓުގައި ތައުލީމީ، ސިއްހީ، ދަތުރުފަތުރާއި ހޮޓެލް ބުކިން، އަދި އެހެނިހެން ޒަރޫރީ ހިދުމަތްތައް ނުހިމެނޭނެ ކަމަށް ބީއެމްއެލްއިން ބުންޏެވެ.
މީގެއިތުރުން ސިއްހީ އަދި ތައުލީމީ ކަންކަމާ ގުޅޭ މުއާމަލާތްތަކަށް އެއްވެސް މާޗަންޓް ލެވެލްއެއް ނުވަތަ ކެޓެގަރީ ލިމިޓެއް ކަނޑައެޅިފައި ނުވާއިރު، އެފަދަ މުއާމަލާތްތައް ހަމަޖެހިގެންދާނީ ބީއެމްއެލް އިން މަހަކަށް ކަނޑައަޅާފައިވާ 16 މިލިއަން ޑޮލަރުގެ ޖުމްލަ އަދަދުގެ ތެރެއިން ކަމަށް ބީއެމްއެލް އިން ބުންޏެވެ.
ވަކި ދާއިރާއަކަށް ނުވަތަ ވިޔަފާރިއަކަށް ކަނޑައަޅާފައިވާ ދުވަހުގެ ލިމިޓް ހަމަވެއްޖެނަމަ، ކަސްޓަމަރުންނަށް ޖެހިގެން އަންނަ ދުވަހު އަލުން މުއާމަލާތް ކުރެވިދާނެ ކަމަށާއި ނުވަތަ ޑޮލަރު ކާޑެއް އޮތްނަމަ އެ ކާޑު ބޭނުންކޮށްގެން ވިޔަފާރި ފުރިހަމަކުރެވޭނެ ކަމަށް އެ ބޭންކުން ބުންޏެވެ. އެގޮތުން ދުވާލަކު ބޭނުންކުރެވޭނެ ލިމިޓް ކޮންމެ ދުވަހަކުވެސް ހެނދުނު 7:00 ގައި ރީސެޓްވާނެ ކަމަށް ވެސް ބޭންކުން ބުންޏެވެ.
މިގޮތަށް ލިމިޓް ކަނޑައެޅުމުގެ ބޭނުމަކީ ޒަރޫރީ ނޫން ކަންކަމަށް ކުރާ ބޭރު ފައިސާގެ ހަރަދުތައް ކޮންޓްރޯލްކޮށް، ކަސްޓަމަރުންގެ ޒަރޫރީ ބޭނުންތަކަށް ބޭނުންވާ ބޭރު ފައިސާ ފޯރުކޮށް ދިނުމަށް އިސްކަން ދިނުން ކަމަށް ބީއެމްއެލްއިން ބުންޏެވެ.
ބޭންކް އޮފް މޯލްޑިވްސް (ބީއެމްއެލް) އިން ދޫކޮށްފައިވާ ރުފިޔާ ކާޑުތައް ބޭނުންކޮށްގެން ދުނިޔޭގެ އެކި ކަންކޮޅުތަކުގައިވާ 40,000 އަށްވުރެ ގިނަ އީ-ކޮމާސް ޕްލެޓްފޯމްތަކުން ކަސްޓަމަރުން މުދަލާއި ޚިދުމަތް ހޯދައެވެ. މިގޮތުން ކުރާ މުއާމަލާތްތަކުގެ އަދަދު މި އަހަރު ވަނީ ވަރަށް ބޮޑަށް އިތުރުވެފައެވެ. އެވްރެޖްކޮށް ދުވާލަކު 20,000 އަށްވުރެ ގިނަ މުއާމަލާތް މިހާރު ކުރެވެއެވެ.
