ގަވާއިދާ ހިލާފަށް ވިޔަފާރިއަކަށް ހަތަރު ބިން ދިން މައްސަލަައިގައި ގދ. ތިނަދޫ ސިޓީގެ މިހާރުގެ މޭޔަރު ސައުދު އަލީ އާއި އެ ނިންމުމަށް ރުހުން ދިން ތިން ކައުންސިލަރުންގެ މައްޗަށް ކޮރަޕްޝަންގެ ދައުވާކޮށްދޭން ޕްރޮސެކިއުޓާ ޖެނެރަލް (ޕީޖީ) އޮފީހަށް ފޮނުވައިފި އެވެ.
މި މައްސަލައިގައި އެންޓި ކޮރަޕްޝަން ކޮމިޝަން (އޭސީސީން) ދިން މައުލޫމާތުގައި ބުނީ މި ބިމަކީ ބީލަމަކަށް ނުލައި ކައްކާ ގޭހުގެ ވިޔަފާރި ކުރަން އަމިއްލަ ކުންފުންޏަކަށް ދިން ބިމެއް ކަމަށެވެ.
މިއީ، ދިރިއުޅުން ނޫން ބޭނުންތަކަށް ބިން ދޫކުރުމުގެ ގަވާއިދާ ހިލާފަށް ކުރި ކަމެކެވެ. އެ ގަވާއިދުގައި އޮންނަނީ ބީލަމަށް ނުލައި ވިޔަފާރި ނޫނީ ސިނާއީ ބޭނުމަށް ބިން ދިނުމަކީ މަނާ ކަމެކެވެ.
އޭސީސީން ބުނި ގޮތުގައި، ތިނަދޫ ކައުންސިލްގެ ހަތަރު ވަނަ ދައުރުގެ 111 ވަނަ ރަސްމީ ބައްދަލުވުމުގައި އެ ކުންފުންޏަށް ބިމެއް ދޫކުރަން، އޭރު ކައުންސިލަރުންގެ ގޮތުގައި ތިބި އާމިނަތު ނަސީމާ އާއި، އަހުމީމާ އަހުމަދު އަދި އާއިޝަތު ލިއުޝާ ޒުބައިރު ތާއީދުކޮށް ނިންމާފައި ވަނީ އެ ކުންފުންޏަށް ނާޖާއިޒު ފައިދާ ހޯދައި ދިނުމަށެވެ.
މި މައްސަލައިގައި މިހާރުގެ މޭޔަރު، އޭރު ކައުންސިލުގެ ރައީސް ސައުދުގެ މައްޗަށް ދައުވާ ކުރަނީ، ނޮވެންބަރު 1، 2023 ގައި އެ ކުންފުންޏަށް ބިން ދޫކުރުން ސޮއިކުރިއިރު، ކުރިން ދޭން ނިންމި ބިމުގެ އިތުރުން 2000 އަކަފޫޓުގެ ތިން ބިން އެ ކުންފުންޏަށް ގަވައިދާ ހިލާފަށް ދޫކުރުމުންނެވެ.
މި މައްސަލައިގައި އޭސީސީން ވަނީ މި ހަތަރު މީހުންގެ މައްޗަށް ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ދައުވާކުރަން، މި މަހުގެ 10، ގައި ފޮނުވާފަ އެވެ.
ތިނަދޫ ސިޓީގެ ބިމާ ގުޅޭ މައްސަލައެއްގައި ސައުދަށް ދައުވާ ކުރަން އުޅޭ އިރު، އެ ރަށަށް ސިޓީއެއްގެ ލަގަބު ހޯދަން އާބާދީ އޮޅުވާލި ކަމަށް ތުހުމަތުކޮށް، ރަސްމީ އިދާރާއަކަށް ދޮގު މައުލޫމާތު ދިނުމުގެ ދައުވާ ވެސް އޭނާއަށް ވަނީ ކޮށްފަ އެވެ.
