އިނގިރޭސި އެކްޓަރު ނޮއެލް ކްލާކް، 2007 އާއި 2016 އާ ދެމެދު ފަސް އަންހެނަކަށް ޖިންސީ ގޯނާކުރި ކަމުގެ ތުހުމަތުގައި އޭނާގެ މައްޗަށް ގިނަ ދައުވާތަކެއް އުފުލައިފި އެވެ.
އުމުރުން 50 އަހަރުގެ ކްލާކްގެ މައްޗަށް އުފުލާފައިވަނީ ޖިންސީ ހަމަލާދިނުމުގެ ދެ ދައުވާއަކާއި، ނުގަބޫލުގައި ޖިންސީ މަންޒަރުތައް ބެލުމުގެ ތިން ދައުވާއެއްގެ އިތުރުން، ޖިންސީ ގުނަވަން ދެއްކުމުގެ އެއް ދައުވާ އެވެ.
މި މައްސަލައިގެ ފުރަތަމަ އަޑުއެހުމަށް އަންނަ އޮކްޓޫބަރު މަހުގެ 21 ވަނަ ދުވަހު ވެސްޓްމިންސްޓާ މެޖިސްޓްރޭޓް ކޯޓަށް ހާޒިރުވުމަށް ކްލާކަށް ވަނީ އަންގާފަ އެވެ.
މެޓްރޯޕޮލިޓަން ޕޮލިހުން ބުނި ގޮތުގައި، މި ދައުވާތައް އޭނާގެ މައްޗަށް އުފުލާފައިވަނީ 2025 ވަނަ އަހަރުގެ ސެޕްޓެމްބަރު މަހުން ފެށިގެން ކުރިއަށްގެންދިޔަ ތަހުގީގަކަށް ފަހުގަ އެވެ.
ފުލުހުން އިތުރަށް ހާމަކުރި ގޮތުގައި، މި ތަހުގީގާ ގުޅިގެން އޭރު އުމުރުން 40 ގެ އަހަރުތަކުގައި ހުރި ކްލާކް އެންމެ ފުރަތަމަ ހައްޔަރުކޮށްފައިވަނީ 2025 ސެޕްޓެމްބަރު 25 ގައެވެ.
މި މައްސަލައިގެ ތަހުގީގަށް ހޯދި ހެކިތައް ކްރައުން ޕްރޮސެކިއުޝަން ސާވިސް (ސީޕީއެސް) އަށް ހުށަހެޅުމުން، އެ އިދާރާއިން ވަނީ ކްލާކްގެ މައްޗަށް ދައުވާ ކުރުމުގެ ހުއްދަ ދީފަ އެވެ.
މި ތަހުގީގު އިސްކޮށް ހިންގަވާ ޑިޓެކްޓިވް ސުޕްރިންޓެންޑެންޓް މައިކް ކެގްނީ ވިދާޅުވީ، މި މައްސަލައިގައި ހިމެނޭ އަންހެނުންނަށް، އެކަމަށް ހާއްސަ ތަމްރީނު ލިބިފައިވާ އޮފިސަރުންގެ އެހީތެރިކަން މެދުނުކެނޑި ފޯރުކޮށްދެމުންދާ ކަމަށެވެ.
ނޮއެލް ކްލާކަކީ 2006 ވަނަ އަހަރު ނެރުނު ފިލްމު "ކިޑަލްޓްހުޑް" އާއި މަޝްހޫރު ސީރީޒް "ޑޮކްޓާ ހޫ" އިން ބޮޑު މަގުބޫލުކަމެއް ހޯދާފައިވާ އެކްޓަރެކެވެ.
