ދިވެހިރާއްޖޭގެ މާކެޓަށް ޔުނިފޯމް އުފެއްދުމުގެ މުޅިން އާ މިންގަނޑެއް ތައާރަފުކޮށް، ދަ ޓެއިލާޝޮޕް މޯލްޑިވްސްއިން ރާއްޖޭގެ ގިނަ ކުންފުނިތަކެއްގެ އިތުބާރެއް ހޯދައިފި އެވެ. ކޯޕަރޭޓު ދާއިރާއަށް ބޭނުންވާ ފެންވަރު ރަނގަޅު ޔުނިފޯމު ފޯރުކޮށްދިނުމުގައި އެ ކުންފުނިން އަންނަނީ އިންގިލާބީ ބަދަލުތަކެއް ގެންނަމުންނެވެ.
ދަ ޓެއިލާޝޮޕް މޯލްޑިވްސްގެ މެނޭޖިން ޑިރެކްޓަރު އައިޝަތު ޝަދާ ވިދާޅުވި ގޮތުގައި، އެ ކުންފުންޏަށް ތިން އަހަރު ފުރެންދާއިރު، މި ދާއިރާގައި ދިމާވެފައިވާ ތަފާތު ގޮންޖެހުންތަކަށް ހައްލު ހޯދުމަށް ގިނަ މަސައްކަތްތަކެއް ވަނީ ކުރެވިފަ އެވެ. އޭގެ ނަތީޖާއެއްގެ ގޮތުން ގިނަ ވިޔަފާރިތަކެއްގެ އިތުބާރު ލިބެމުންދާކަން އޭނާ ވިދާޅުވި އެވެ.
ހާއްސަކޮށް ފަތުރުވެރިކަމުގެ ދާއިރާއަށް އަމާޒުކޮށްގެން ދެމުންދާ ހިދުމަތްތައް ފުޅާކުރުމަކީ އެ ކުންފުނީގެ ބޮޑު އަމާޒެކެވެ. ފަތުރުވެރިކަމުގެ ދާއިރާގެ ތަފާތު ޔުނިފޯމްތައް އުފެއްދުމުގެ ފުރުސަތު ލިބުމަކީ ކުންފުނިން ވަރަށް ބޮޑަށް އެދޭ ކަމެއް ކަމަށްވެސް ޝަދާ ވިދާޅުވިއެވެ.
މި ކުންފުނިން ފޯރުކޮށްދޭ ހިދުމަތްތަކަކީ ކަސްޓަމަރުންނަށް ވަރަށް ފަސޭހަ އަދި ފުރިހަމަ ނިޒާމެއްގެ ދަށުން ކުރިއަށްދާ މަސައްކަތްތަކެކެވެ. އޭގެ ތެރޭގައި ޔުނިފޯމަށް ބޭނުންވާ މިންގަނޑުތަކާއި ބޭނުންތައް ދެނެގަނެ އިރުޝާދު ދިނުމުގެ ކޮންސަލްޓޭޝަން ހިދުމަތާއި، ޔުނިފޯމުގެ ޑިޒައިންތައް ޓެކްނިކަލްކޮށް ކުރެހުމުގެ މަސައްކަތް ހިމެނެއެވެ. މީގެ އިތުރުން، ފެންވަރު ރަނގަޅު ފޮތި ހޯދުމާއި، ބޮޑު އޯޑަރަކަށް ދިއުމުގެ ކުރިން ސާމްޕަލް ތައްޔާރުކޮށް ކަސްޓަމަރުންގެ އެޕްރޫވަލް ހޯދުމަކީ އެ ކުންފުނިން ވަރަށް ބޮޑު އިސްކަމެއްދޭ ކަމެކެވެ.
ޒަމާނީ ވަސީލަތްތަކާއެކު ގާއިމުކޮށްފައިވާ މެނުފެކްޗަރިން ޑިޕާޓްމަންޓުން ޔުނިފޯމް ފެހުމުގެ މަރުހަލާ ކުރިއަށްގެންދާއިރު، ކޮންމެ އުފެއްދުމެއްގެ ފެންވަރު ވަކިވަކިން ކަށަވަރުކުރެ އެވެ. އަދި އުފެއްދުންތައް ރައްކާތެރިކަމާއެކު ޕެކްކޮށް ކަސްޓަމަރުންނާ ހަމައަށް ފޯރުކޮށްދިނުމުގެ ހިދުމަތް ވެސް ދެއެވެ. މީގެ އިތުރުން ޓީޝާޓް ޕްރިންޓްކުރުމާއި، ޑީޓީއެފް ޕްރިންޓިން އަދި އެމްބްރޮއިޑަރީ ފަދަ އިތުރު ހިދުމަތްތައްވެސް ދެއެވެ.
މެންހެޓަން ހޮޓެލްގައި ބޭއްވި ހޮޓެލް އޭޝިއާ އެގްޒިބިޝަންގައި ވެސް ދަ ޓެއިލާޝޮޕުން ބައިވެރިވި އެވެ. މި އެގްޒިބިޝަންގައި، އިޓަލީގެ މަޝްހޫރު ފެބްރިކް ބްރޭންޑެއް ކަމަށްވާ ކްލޮޕްމަން އިންޓަނޭޝަނަލްގެ ފޮތި ވަނީ ދައްކާލާފަ އެވެ. މިއީ ހާއްސަކޮށް ކަލިނަރީ ދާއިރާގެ ޔުނިފޯމުތަކަށް ބޭނުންވާ އަރާމުކަމާއި، ގިނަ ދުވަހު ހިފަހައްޓާނެ ފެންވަރު ރަނގަޅު ފޮއްޗެކެވެ. މި ފޮއްޗަކީ ދަ ޓެއިލާޝޮޕުން ކަސްޓަމަރުންނަށް ލިބެން ހުންނާނެ އުފެއްދުމެކެވެ.
ދަ ޓެއިލާޝޮޕްގެ އަމާޒަކީ ކަލިނަރީ ދާއިރާ ހިމެނޭހެން ހުރިހާ ދާއިރާއެއްގެ ބޭފުޅުންނަށް ބޭނުންވާ ޔުނިފޯމުގެ ފުރިހަމަ، އެންޑް-ޓު-އެންޑް ހައްލުތައް ފޯރުކޮށްދީ، ރާއްޖޭގެ ޔުނިފޯމް އުފެއްދުމުގެ ސިނާއަތް އާ އުސްމިންތަކަކަށް ގެންގޮސްދިނުމެވެ.
