ދުނިޔޭގެ މަގުބޫލުކަން ހޯދާފައިވާ ކޭ-ޕޮޕް ބޭންޑް، ބީޓީއެސްގެ މެންބަރު ވީ، އޭނާގެ އެއް ކަންފަތުގެ އިވުމުން މަހްރޫމްވަމުންދާތީ އެކަމަށް ފަރުވާ ހޯދަމުންދާކަން ހާމަކޮށްފި އެވެ.
އޭނާ މިކަން ހާމަކޮށްފައިވަނީ ގިނަ ބަޔަކު އިންތިޒާރު ކުރަމުންދާ އެ ބޭންޑުގެ ވޯލްޑް ޓުއާ ކުރިއަށްދާ ދަނޑިވަޅެއްގަ އެވެ.
ބުދަ ދުވަހު ކުރިއަށްގެންދިޔަ ލައިވްސްޓްރީމެއްގައި، އުމުރުން 30 އަހަރުގެ ވީ ބުނީ، އޭނާ މި މައްސަލައާ ކުރިމަތިލާތާ މިހާރު ދެ އަހަރާއި ބައި ވެފައިވާ ކަމަށެވެ. އަދި މިއީ ބޭންޑުގެ ސަޕޯޓަރުންނަށް މި ވާހަކަ އޭނާ ހިއްސާކުރި ފުރަތަމަ ފަހަރުކަން ވެސް ފާހަގަކުރި އެވެ.
އަސްލު ނަމުން ނަމަ ކިމް ތައެ-ހިއުންގް ބުނި ގޮތުގައި، އޭނާގެ ވައަތު ކަންފަތުގެ އިވުން 100 އިންސައްތައިގައި ހުރި ނަމަވެސް، ކަނާތު ކަންފަތުގެ އިވުން ހުރީ އެންމެ 30 އިންސައްތައިގަ އެވެ.
ބީޓީއެސްގެ ހަތް މެންބަރުން އަސްކަރީ ހިދުމަތް ނިންމުމަށް ފަހު އަލުން ގުޅިގެން ބާއްވާ ފުރަތަމަ ވޯލްޑް ޓުއާ މިހާރު ދަނީ ކުރިއަށެވެ.
ލައިވްސްޓްރީމްގައި ވާހަކަދައްކަމުން ވީ ބުނީ، އޭނާގެ ކަންފަތުގެ އިވުމުގެ މައްސަލަ އިތުރަށް ގޯސްވީ އަސްކަރިއްޔާގައި ހިދުމަތް ކުރި ދުވަސްވަރު ކަމަށެވެ.
ނަމަވެސް، އެއީ "ނަފްސާނީ ހިތްވަރުގެ" މައްސަލައެއް ކަމަށް ގަބޫލުކޮށް، ފުރަތަމަ އެކަމަށް މާ ބޮޑު ސަމާލުކަމެއް ނުދޭ ކަމަށް އޭނާ ބުންޏެވެ.
އޭނާ އިތުރަށް ބުނި ގޮތުގައި، މިހާރު އޭނާ ދަނީ ގަވާއިދުން ބޭސް ބޭނުންކޮށް، ހޮސްޕިޓަލަށް ދައްކައިގެން ފަރުވާ ހޯދަމުންނެވެ.
ދެކުނު ކޮރެއާގެ ގާނޫނު ބުނާ ގޮތުން، ހަށިހެޔޮ ކޮންމެ ފިރިހެނަކު ވެސް 18 މަސް ދުވަހުގެ އަސްކަރީ ހިދުމަތް ފުރިހަމަކުރަން ޖެހެ އެވެ.
މީގެ ތެރޭގައި ބީޓީއެސްގެ މެންބަރުން ވެސް ހިމެނޭއިރު، އެ މީހުން އަސްކަރިއްޔާއާ ގުޅުމަށްޓަކައި މިއުޒިކީ ކެރިއަރުން މެދުކެނޑުމެއް ނެގީ 2022 ވަނަ އަހަރު، އެ ބޭންޑުގެ މަގުބޫލުކަން އެންމެ މަތީގައި އޮތް ދުވަސްވަރު އެވެ.
ވީ އަސްކަރިއްޔާއާ ގުޅުނީ 2023 ވަނަ އަހަރު އެވެ. އަދި އޭނާ ހިދުމަތުން ވަކިވީ 2025 ވަނަ އަހަރުގެ ޖޫން މަހު އެވެ.
