ގެއްލިގެން ހޯދަމުންދިޔަ ހަތަރު މީހެއްގެ ހަށިގަނޑު ދެކުނު ކޮރެއާގެ ޗުއްޓީ ހޭދަކުރާ މަޝްހޫރު ރަށް ކަމަށްވާ ޖެޖޫ އިން ފެނިއްޖެ އެވެ.
މި ހާދިސާއާ ގުޅިގެން، ގެއްލޭ މީހުން ހޯދުމުގެ މައްސަލަތައް ބެލުމުގައި ފުލުހުން އިހުމާލުވެފައިވާ ކަމަށް ބުނެ އާންމުންގެ ބޮޑެތި ފާޑުކިޔުންތަކެއް ވަނީ އަމާޒުވެފަ އެވެ.
މީގެ މަސްތަކެއް ކުރިން ގެއްލިގެން ރިޕޯޓްކޮށްފައިވާ އަންހެނަކު ހޯދުމުގެ މަސައްކަތް ކަމާބެހޭ އިދާރާތަކުން މާ ލަސްވި ފަހުން ފެށިކަމުގެ ހަބަރުތައް މިދިޔަ ހަފުތާގައި ވަނީ ފެންމަތިވެފަ އެވެ.
މި މައްސަލަ އިތުރަށް ގޯސްވެފައިވަނީ، ގެއްލޭ މީހުންގެ އާއިލާތަކަށް ދޮގު މައުލޫމާތު ދީ، އެ މީހުން ހޯދުމުގެ މައްސަލަތައް މާ އަވަހަށް ނިންމާލި ކަމުގެ ތުހުމަތުގައި ފުލުހުންގެ ސާޖަންޓެއް ކަމަށްވާ ބޫ ހައްޔަރުކުރުމާ ގުޅިގެންނެވެ.
މި މައްސަލައާ ގުޅިގެން އިސް ހަތަރު އޮފިސަރަކު ވަޒީފާއިން އެކަހެރިކޮށްފައިވާއިރު، އަންގާރަ ދުވަހު ރައީސް ލީ ޖޭ މިޔުންގް ވަނީ ފުލުހުންގެ މުއައްސަސާގެ އުސޫލުތަކަށް ބޮޑެތި އިސްލާހީ ބަދަލުތަކެއް ގެނައުމަށް އަމުރުކުރައްވާފަ އެވެ.
މިދިޔަ ހޮނިހިރު ދުވަހުން ފެށިގެން ފުލުހުން ވަނީ ޖެޖޫ އައިލެންޑުން ހަތަރު މީހެއްގެ ހަށިގަނޑު ހޯދާފަ އެވެ. އޭގެ ތެރޭގައި މިދިޔަ މޭ މަހު ގެއްލުނު އުމުރުން 37 އަހަރުގެ ޖަންގް މީ-ރާންގެ ހަށިގަނޑު ވެސް ހިމެނެ އެވެ.
ހޯމަ ދުވަހު ޖަންގްގެ ހަށިގަނޑު ފެނިފައިވަނީ އޭނާ ހުރި ތަނާ ގާތްގަނޑަކަށް 500 މީޓަރު ދުރުގައި ހުރި ދަނޑަކުންނެވެ. ބެލެވޭ ގޮތުގައި އޭނާ މަރުވީ އަމިއްލައަށެވެ.
ތުހުމަތު ކުރެވޭ ގޮތުގައި ސާޖަންޓް ބޫ ވަނީ ޖަންގް ހުރި ތަނެއް ކަށަވަރު ނުކޮށް، އޭނާ ހޯދުމުގެ މައްސަލަ މާ އަވަހަށް ނިންމާލާފަ އެވެ.
މީޑިއާ ރިޕޯޓްތައް ބުނާ ގޮތުގައި، ބޫ ވަނީ ޖަންގްގެ ލޯބިވެރިޔާ ގާތު ޖަންގްއާ ފޯނުން ވާހަކަދެއްކި ކަމަށާއި، ލޯބިވެރިޔާއާ ވާހަކަދައްކަން ބޭނުންނުވާ ކަމަށް ޖަންގް ބުނި ކަމަށް ބުނެ ދޮގު ހަދާފަ އެވެ.
މީގެ އިތުރުން، ޖެޖޫ ސިޓީއަށް ނިސްބަތްވާ އުމުރުން 60 އަހަރުގެ ފިރިހެނެއްގެ ހަށިގަނޑު ވެސް ހޮނިހިރު ދުވަހު ފުލުހުން ވަނީ ހޯދާފަ އެވެ.
މިދިޔަ ޖޫން މަހުގެ 28 ވަނަ ދުވަހު ގެއްލުނު މި މީހާގެ މައްސަލަ ވެސް ބޫ ވަނީ ނިންމާލާފަ އެވެ. އަދި އެ މީހާ ފެނިފައިވާ ކަމަށާއި، އޭނާ ހުރީ "ސަލާމަތުން" ނަމަވެސް "އާއިލާއަށް އޭނާ ހުރި ތަން އަންގަން ބޭނުންނުވާ" ކަމަށް ބޫ ބުނެފައިވާ ކަމަށް ރިޕޯޓްތައް ބުނެ އެވެ.
ފެނުނު އަނެއް ދެ މީހުންގެ މަރުގެ މައްސަލާގައި ބޫގެ ބައިވެރިވުމެއް އޮތްތޯ އަދި ސާފެއް ނުވެ އެވެ.
ފުލުހުން މިހާރު ދަނީ ބޫ ބަލާފައިވާ ހުރިހާ މައްސަލަތަކެއް އަލުން ތަހުގީގު ކުރަމުންނެވެ. މީގެ ތެރޭގައި ގާތްގަނޑަކަށް 300 އެއްހާ މައްސަލަ ހިމެނެ އެވެ.
ޖެޖޫ އަކީ ދެކުނު ކޮރެއާގެ އެންމެ މަގުބޫލު ފަތުރުވެރި މަންޒިލްތަކުގެ ތެރެއިން އެއް ތަނެވެ.
ދެކުނު ކޮރެއާގައި ނުރައްކާތެރި ކުށްތައް ހިނގާ މިންވަރު މަދު ނަމަވެސް، އަމިއްލައަށް މަރުވާ މީހުންގެ ނިސްބަތް ވަރަށް ގިނަ އެވެ.
ބައެއް މާހިރުން ވިދާޅުވާ ގޮތުގައި، ކުށްކުރުން މަދުވުމަކީ ގެއްލޭ މީހުންގެ މައްސަލަތައް ސީރިއަސްކޮށް ނުބެލުމަށް މެދުވެރިވާ އެއް ސަބަބެވެ.
ދެކުނު ކޮރެއާގައި ކޮންމެ އަހަރަކު 70،000 އަށްވުރެ ގިނަ ބޮޑެތި މީހުން ގެއްލިގެން ރިޕޯޓްކުރާއިރު، އޭގެ ތެރެއިން 99 އިންސައްތަ މައްސަލަ އެއް މަސްދުވަސް ތެރޭގައި ހައްލުވާ ކަމަށް ރެކޯޑްތަކުން ދައްކަ އެވެ.
