ސައި ނުވަތަ ކޮފީ ފަދަ ބުއިންތައް ވަރަށް ހޫނުކޮށް ހުއްޓާ އާދަވެގެން ބުއިމަކީ ކާތަކެތި ދަތުރުކުރާ ހޮޅި ހަލާކުވެ ކެންސަރު ޖެހުމުގެ ފުރުސަތު އިތުރުވާ ކަމެއް ކަމަށް އިނގިރޭސިވިލާތުގެ ދިރާސާއަކުން ދައްކައިފި އެވެ.
ގާތްގަނޑަކަށް އެއް މިލިއަން މީހުން ބައިވެރިކޮށްގެން ކުރިއަށްގެންދިޔަ މި ދިރާސާއާ ބެހޭގޮތުން ދިރާސާވެރިން ބުނަނީ، މިއީ ހޫނު ބުއިންތަކާއި ކެންސަރާ ހުރި ގުޅުން ދެނެގަތުމަށް މިހާތަނަށް ކުރި އެންމެ ބޮޑު ދިރާސާ ކަމަށެވެ.
މި ދިރާސާއިން ދައްކާގޮތުގައި، ބުއިންތައް "ވަރަށް ހޫނުކޮށް" ބޯ މީހުންނަށް، ކުޑަކޮށް ހިހޫކޮށްގެން ބޯ މީހުންނާ އަޅާބަލާއިރު މި ބާވަތުގެ ކެންސަރު ޖެހުމުގެ ފުރުސަތު ތިން ގުނަ އިތުރެވެ. ނަމަވެސް، އާންމު ގޮތެއްގައި މި ކެންސަރު ޖެހުމުގެ ފުރުސަތު ކުޑަކަން މާހިރުން ފާހަގަކުރެ އެވެ.
ދުން އަރާހާ ހޫނުކޮށް ހުންނަ ދިޔާ ތަކެތި ބުއިމުގެ ސަބަބުން، ކަރުން ފެށިގެން ބަނޑާ ހަމައަށް ކާތަކެތި ދަތުރުކުރާ ހޮޅީގެ އެތެރޭގެ ސެލްތަކަށް ގެއްލުން ލިބެ އެވެ.
އޮކްސްފޯޑް ޔުނިވާސިޓީން ކުރިއަށްގެންގޮސް "އިންޓަނޭޝަނަލް ޖާނަލް އޮފް ކެންސަރު" ގައި ޝާއިއުކޮށްފައިވާ މި ދިރާސާގައި ބުނާގޮތުން، 65 ޑިގްރީ ސެލްސިއަސް ނުވަތަ އެއަށްވުރެ މަތީ ހޫނުމިނެއްގައި ހުންނަ ކޮންމެ ބުއިމަކީ "ވަރަށް ހޫނު" ބުއިމެއްގެ ގޮތުގައި ބެލެވޭނެ އެވެ. އަދި މިއީ ސިއްހީ ނުރައްކަލެއް އޮތް ކަމެކެވެ.
މެދު އުމުރުގެ 977,282 ފިރިހެނުންނާއި އަންހެނުންގެ މައުލޫމާތަށް ބިނާކޮށް ހެދި މި ދިރާސާއިން އެނގޭ ގޮތުގައި، ދުވާލަކު ހަ ތަށި ނުވަތަ އެއަށްވުރެ ގިނައިން ހޫނު ބުއިންތައް ބޯނަމަ ކެންސަރުގެ ނުރައްކާ އިތުރަށް ބޮޑުވެ އެވެ.
ބުއިންތަކަށް ކިރު އެޅުމުން ހޫނުމިން ކުޑަކޮށް ދަށްވި ނަމަވެސް، ކިރު އެޅި ސައި ނުވަތަ ކޮފީއަކީ ވެސް ސިއްހަތަށް ނުރައްކާވާ މިންވަރަށް ހޫނު އެއްޗަކަށް ވެދާނެ ކަމަށް ދިރާސާވެރިން ބުނެ އެވެ.
ފެން ކައްކާ ނިމޭއިރު ހުންނަނީ ފެން ކެކޭ ހޫނުމިން ކަމަށްވާ 100 ޑިގްރީ ސެލްސިއަސްގަ އެވެ. އެ ފެން ތަށްޓަކަށް އެޅުމުން ހޫނުމިން 90 ނުވަތަ 95 ޑިގްރީ ސެލްސިއަސްއަށް ތިރިވެ އެވެ.
އެހެންކަމުން، ރައްކާތެރި ހޫނުމިނަކަށް ބުއިން ތިރިވަންދެން، ބުއިމުގެ ކުރިން މިނެޓްކޮޅަކަށް މަޑުކޮށްލުމަށް ލަފާދެ އެވެ.
ކެންސަރ ރިސާޗް ޔޫކޭއިން ބުނާ ގޮތުގައި، ހޫނު ބުއިމެއް ހިހޫވަންދެން ބަހައްޓަންވީ ސީދާ ކިހާ ވަގުތެއްކަން ބުނަން ދަތިވެ އެވެ.
ކަރުގެ ކެންސަރުގެ ބާވަތެއް ކަމަށްވާ "ސްކޭމަސް ސެލް އޮއިސޯފޭޖިއަލް ކެންސަރު" އަކީ ވަރަށް މަދުން ނޫނީ ނުޖެހޭ ބައްޔެކެވެ. އެހެންކަމުން، ދިލަ ހޫނު ބުއިންތަކުގެ ސަބަބުން ނުރައްކާ އިތުރުވި ނަމަވެސް، އާންމުކޮށް މި ބަލި ޖެހުމުގެ ފުރުސަތު އަދިވެސް އޮތީ ވަރަށް ކުޑަ މިންވަރެއްގަ އެވެ.
މައުލޫމާތު: ބީބީސީ
