ކުރިއަށް އޮތް ދުވަސްތަކުގައި ގަލްފް ސަރަހައްދުގައި ދަތުރުފަތުރު ކުރުން މަނާ އާ ސަރަހައްދުތަކެއް ކަނޑައަޅައި އިއުލާން ކުރާނެ ކަމަށް އީރާނުން ބުނެފި އެވެ.
"އިގްތިސާދީ ހަނގުރާމައެއްގެ" އިންޒާރު އެމެރިކާއަށް ދިނުމަށް ފަހު، އީރާނުން ބުނީ އެމެރިކާގެ އަސްކަރީ މަނަވަރުތަކަށް އަމާޒުކޮށް ކުރިއަރާފައިވާ މިސައިލެއް ފޮނުވާލާފައިވާ ކަމަށެވެ.
މިދިޔަ ހަ މަސްދުވަހު ކުރިއަށް ދިޔަ މި ހަނގުރާމައިގައި، ދޭތެރެ ދޭތެރެއިން ހަމަލާތައް މެދުކަނޑާލުމަށް ފަހު އަލުން ހަމަލާތައް ވަރުގަދަކުރަމުންދާކަން ފާހަގަކުރެވެ އެވެ.
އެގޮތުން، ހޮނިހިރު ދުވަހު އެމެރިކާގެ އަސްކަރިއްޔާއިން ވަނީ އިރާނުގެ ތެޔޮ އުފުލާ ތިން ޓޭންކަރަކަށް ހަމަލާދީފަ އެވެ. އޭގެ ރައްދުގައި އިރާނުން "ގާސިމް ބާސިރު" މަރުކާގެ މިސައިލެއް ފޮނުވާލާފައިވާ ކަމަށް އެ ގައުމުގެ ދައުލަތުގެ މީޑިއާއިން އާދީއްތަ ދުވަހު ވަނީ ރިޕޯޓުކޮށްފަ އެވެ.
ދުނިޔޭގެ ތެލާއި ގޭހުގެ ވިޔަފާރީގައި މުހިންމު ދައުރެއް އަދާކުރާ ސްޓްރެއިޓް އޮފް ހޯރްމޫޒް ހުޅުވާލުމަށް އެމެރިކާއިން މަސައްކަތް ކުރަމުންދިޔަ ނަމަވެސް، އިރާނުން ދަނީ އެ ސަރަހައްދުން ދަތުރުކުރާ އުޅަނދުފަހަރަށް ހުރަސްއަޅަމުންނެވެ.
މިދިޔަ ފެބްރުއަރީ މަހުގެ 28 ވަނަ ދުވަހު އެމެރިކާ އާއި އިސްރާއީލުން ދޭން ފެށި ހަމަލާތަކާއެކު ފެށުނު މި ހަނގުރާމަ ނިމުމަކަށް ގެނައުމަށް ކުރާ ޑިޕްލޮމެޓިކް މަސައްކަތްތަކުން އެދެވޭ ކުރިއެރުމެއް ލިބޭނެ ކަމުގެ އެއްވެސް ނިޝާނެއް އަދި ފެންނާކަށް ނެތެވެ.
އިރާނުން ބުނެފައިވާ ގޮތުގައި، ކުރިއަށް އޮތް ދުވަސްތަކުގައި ގަލްފް ސަރަހައްދުގައި ދަތުރުފަތުރު ކުރުން މަނާ އާ ސަރަހައްދުތަކެއް ކަނޑައަޅައި އިއުލާން ކުރާނެ އެވެ.
އަދި ސްޓްރެއިޓް އޮފް ހޯރްމޫޒްގެ ތެރެއިން ދަތުރުކުރާނެ އާ ކޮރިޑޯއެއްގެ ޗާޓުތައް ވެސް އާންމުކުރާނެ ކަމަށް އެ ގައުމުން ބުނެފައިވީ ނަމަވެސް، މިކަމުގެ ތަފްސީލުތައް ހާމަކުރާނެ ވަގުތެއް އަދި ސާފެއް ނުވެ އެވެ.
