ރައީސް މުހައްމަދު މުއިއްޒުގެ އާއިލީ މީހެއް ކަމުގައިވާ އަދި މި ސަރުކާރުގެ ސިޔާސީ މަގާމެއްގައި ހުރި ހައްސާން ވަހީދުގެ ރިސޯޓަކީ "އަޅުގަނޑު ބެހޭ ކަމެއް ނޫން" ކަމަށް ވިދާޅުވެ، އެ މުއާމަލާތާ ގުޅުމެއް ނެތް ކަމަށް އެމަނިކުފާނު މިއަދު ވިދާޅުވެއްޖެ އެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި މި މުއާމަލާތާ ގުޅުވާ ނޫސްވެރިޔަކު ކުރި ސުވާލަކަށް ޖަވާބު ދެއްވަމުން މުއިއްޒު ވިދާޅުވީ، އެމަނިކުފާނަށް ވެސް އެ ހަބަރު ނޫހުން ފެނުނު ކަމަށެވެ. މުއިއްޒު ވިދާޅުވި ގޮތުން ނަމަ އޭގެ ކުރިން އެ މުއާމަލާތާ ގުޅޭ އެއްވެސް ކަމެެއް އެމަނިކުފާނަށް އެނގިވަޑައިނުގަންނަވަ އެވެ.
މި ކަންކަން އެނގުނު ހިސާބުން، މުއިއްޒު ވިދާޅުވީ، ހައްސާނަށް ގުޅާފައި ކަންކަން ސާފުކުރި ކަމަށެވެ. ހައްސާނާ ސުވާލުކުރުމުން ރިސޯޓުގެ ހިއްސާ އޮންނަކަން އޭނާ ކަށަވަރުކޮށްދެއްވި ކަމަށް އެމަނިކުފާނު ވިދާޅުވެފަ އެވެ.
އަދަދު ނޫހުން މި މުއާމަލާާތުގެ ވާހަކަ ރިޕޯޓުކުރިއިރު، ރިސޯޓުގެ ހިއްސާ ހޯދަން އޭނާއާ މުއިއްޒާ އޮންނަ އާއިލީ ގުޅުމާއި ޔޫއޭއީއަށް ކަނޑައަޅާފައި ހުންނަ ޑެޕިއުޓީ އެމްބެސެޑަރުގެ މަގާމުގެ ބޭނުންކުރިކަމަށް ރިޕޯޓުކޮށްފަ އެވެ. މިއަދު މުއިއްޒު ދެއްކި ވާހަކައިން މީގެ ގިނަ ކަންކަން މި ގޮތަށް ހިނގާފައިވާކަން ވަނީ ކަށަވަރުވެފަ އެވެ.
މުއިއްޒުގެ އާއިލީ މީހަކު ކުއްލިއަކަށް ބޮޑު ރިސޯޓެއްގެ ހިއްސާދާރަކަށް
ޔޫއޭއީގެ ޑެޕިއުޓީ އެމްބެސެޑަރު ހައްސާން ވަހީދު، ކުއްލި ގޮތަކަށް ބޮޑު ރިސޯޓެއްގެ ހިއްސާދާރަކަށް ވެފައިވަނީ އާއިލީ ގުޅުމާއި މަގާމުގެ ނުފޫޒު ބޭނުންކޮށްގެން ކަމަށް ތުހުމަތުކުރެވޭ. ވިޔަފާރީގެ އެއްވެސް ތަޖުރިބާއެއް ނެތް ހައްސާނަށް މިފަދަ ބޮޑު މަންފާއެއް ލިބުމަކީ ނުހައްގު މުއްސަނދިކަން ހޯދުމަށް ހިންގާފައިވާ ބޮޑު ހިޔާނާތެއް.
އެ ގޮތުން މުއިއްޒު ވިދާޅުވީ، ސަރުކާރުގެ މަގާމެއްގައި ހުރެފައި މި ގޮތަށް ކަންކަން ކުރުމަކީ އެމަނިކުފާނު ގަބޫލުކުރާ ހަމައަކަށް ނުވާތީ ހައްސާން ވަޒީފާއިން ވަކިކޮށްފައިވާ ކަމަށެވެ.
"ދެން އެކަން އެނގުނު ހިސާބުން، އަޅުގަނޑު ގަބޫލު ކުރާ ހަމައެއް ނޫން އެއީ އެނގޭތޯ، ސަރުކާރުގެ މަގާމެއްގައި، އަޅުގަނޑު ދީފައި ހުރި، އަޅުގަނޑު އެޕޮއިންޓްކޮށްފައި ހުރި މަގާމެއްގައި ހުރި ބޭފުޅަކު އެކަހަލަ ކަމެއް ކުރުމަކީ އަޅުގަނޑު ގަބޫލު ކުރާ ހަމައެއް ނޫން. އެހެންވީމާ ވަޒީފާއިން ވަކިކޮށްފައި ވާނީ އަޅުގަނޑަށް އެނގުނު ހިސާބުން،" އެމަނިކުފާނު ވިދާޅުވި އެވެ.
ހައްސާން ހިއްސާވާ ކުންފުންޏަކީ، އިންޑިއާގެ އާޔަތާނާ ހޮސްޕިޓާލިޓީސްއާ އެކީ އޭނާ ހިއްސާވާ ކުންފުންޏެކެވެ. މި ކުންފުނިން ވަނީ ތ. ފުއްޓާއި ވަންބަންޖާއި ކަނި ރިސޯޓު ތަރައްގީކުރަން ނަގާފަ އެވެ. މި ކުންފުނީގެ އިންޑިއާގެ ހިއްސާދާރަކީ ރިއަލް އެސްޓޭޓު ވިޔަފާރިކުރާ އަރަޓު ޑިވެލޮޕާސް އެވެ.
މި މައްސަލަ އަދަދު ނޫހުން ތިލަކުރީ، އިންޑިއާގެ މާލީ ގޮތުންނާއި ފަންނީ ގޮތުން ގާބިލު ކުންފުންޏަކުން ވިޔަފާރިއެއް ނުކުރާ ހައްސާންއާ ގުޅިގެން ރިސޯޓެއް ތަރައްގީކުރަން އުޅޭތީ އެވެ.
