ބައެއް ރަށްރަށަށް ކަރަންޓާއި ފެނުމުގެ ހިދުމަތް ދޭން ސަރުކާރުން އުފައްދާފައިވާ ފެނަކަ ކޯޕަރޭޝަން އުވާލައި އެ ކުންފުނި ސްޓެލްކޯއާ އެއްކޮށްލައި، ގާ އަޅާ ކުންފުނި އުވާލައި އެމްޓީސީސީއާ އެއްކޮށްލަން ސަރުކާރުން ނިންމައިފި އެވެ.
އެކަން މިއަދު އިއުލާން ކުރައްވާފައި ވަނީ މިހާރު ކުރިއަށްދާ ނޫސްވެރިންގެ ބައްދަލުވުމެއްގައި ރައީސް މުހައްމަދު މުއިއްޒު އެވެ.
"[މީގެ ފަހުން] މުޅި ރާއްޖޭގައި ހިދުމަތް ދޭނީ ސްޓެލްކޯއިން މި މަސައްކަތް، މި ޕްރޮސެސް ނިމުނީމަ. އެހެންވީމާ ފެނަކައިން ކުރަމުންދާ ހުރިހާ މަސައްކަތެއް، ފެނަކައިގެ މުޅި މަސައްކަތް އެއްކޮށް ސްޓެލްކޯއަށް ބަދަލުކޮށް، ފެނަކަ އެއްކޮށް އުވާލެވިގެންދާނެ،" ރައީސް ވިދާޅުވި އެވެ.
"ހަމައެއާއެކީގައި އާރްޑީސީ އުވާލައި އެމްޓީސީސީއާ އެއްކޮށްލުމުގެ މަސައްކަތް ވެސް ކުރުމަށް މި ވަނީ ނިންމައިފަ."
އެ ބައްދަލުވުމުގައި ރައީސް ވިދާޅުވީ އެ ބަދަލުތަކަށްފަހު އެމްޓީސީސީ އާއި ސްޓެލްކޯގެ ހިންގުން ހަރުދަނާވެ، ހަރަދު ވެސް ކުޑަވާނެ ކަމަށް މުއިއްޒު ވިދާޅުވި އެވެ.
"ފެނަކަ ސްޓެލްކޯއާ އެއްވެގެން ގޮސް ނިމިގެންދާއިރު އަދި އާރްޑީސީ އެމްޓީސީސީއާ މާޖްވެގެންދާއިރުގައި، ކުންފުނީގެ އެފިޝިއެންސީ އެޗީވް ކުރުމުގެ މަސައްކަތުގެ ތެރެއިން އަދި މުވައްޒަފުން ވެސް މަދުވެގެންދާނެ. އެހެންވީމާ އެފިޝިއެންޓް، މުވައްޒަފުން މަދު ހަރުދަނާ ނިޒާމެއްގެ ތެރެއިން ސަރުކާރު ކުންފުނިތައް ހިނގަމުންދާނީ،" މުއިއްޒު ވިދާޅުވި އެވެ.
އޭގެ އިތުރުން، އެގްރޯނެޓް ކުންފުނި މިފްކޯގެ ސަބްސިޑިއަރީ ކުންފުންޏަކަށް ބަދަލު ކުރަން ވެސް ސަރުކާރުން ނިންމާފައިވާ ކަމަށް މުއިއްޒު ވިދާޅުވި އެވެ. އެ ދެ ކުންފުނި ގުޅިގެން ކުރެވިދާނެ ބައިވަރު ކަންކަން އެބަހުރި ކަމަށް ވެސް މުއިއްޒު ވިދާޅުވި އެވެ.
